Amusyome Leza Kutegwa Mukkomane Mucikwati

Jehovaa Leza ngowakatalisya cikwati. Bbaibbele litwaambila kuti Leza wakalenga mukaintu wakusaanguna ‘akumuleta kumuntu’ naa kumwaalumi. Adamu wakakkomana kapati cakuti wakaamba kuti: “Ncobeni oyu ulijisi zifuwa mbubonya mbuli zifuwa zyangu anyama mbubonya mbuli nyama yangu.” (Matalikilo 2:22, 23) Asunu Jehova uciyanda kuti banabukwetene kabakkomana.

Ciindi nomwakwatana, inga mwayeeya kuti zintu zyoonse zinooli buyo kabotu. Pele masimpe ngakuti nokuba kuti mwaalumi amukaintu balayandana, balakonzya kuba amapenzi. (1 Bakolinto 7:28) Mubroshuwa eeyi, mulajana njiisyo zyamu Bbaibbele zikonzya kumupa kukkomana mucikwati alimwi amumukwasyi, ikuti naa mwazitobela.—Intembauzyo 19:8-11.

1 AMUUZUMINE MUKULI NGWAAKAMUPA JEHOVA

NCOLYAAMBA BBAIBBELE: Mwaalumi ngomutwe wamukwasyi.—Baefeso 5:23.

Ikuti kamuli mulumi, Jehova uyanda kuti kamumulanganya mukaintu wanu amoyo mutete. (1 Petulo 3:7) Wakamulenga mukaintu kuba sikumugwasya uumweelede alimwi uyanda kuti kamumulemeka alimwi akumuyanda. (Matalikilo 2:18) Mweelede kumuyanda kapati mukaintu wanu kamulibambilide kubikka zintu nzyayandika mubusena butaanzi kwiinda zyanu.—Baefeso 5:25-29.

Ikuti kamuli mukaintu uukwetwe, Jehova uyanda kuti kamumulemeka kapati mulumi wanu alimwi akumugwasyilizya kuzuzikizya mukuli wakwe. (1 Bakolinto 11:3; Baefeso 5:33) Amukukkomanine kusala nkwacita alimwi akubelekela antoomwe camoyo woonse. (Bakolose 3:18) Ikuti mwacita oobo, mulumi wanu alimwi a Jehova bayoobotelwa.—1 Petulo 3:1-6.

NCOMUKONZYA KUCITA:

• Amumubuzye ngomukwetene limwi ncomukonzya kucita kutegwa mube mulumi naa mukaintu uuli kabotu. Amumuswiililisye alimwi amucite nzyomukonzya kutegwa kamucita kabotu zintu

• Amukkazike moyo. Ciyootola ciindi kutegwa nyoonse nyobilo muzyibe mbomukonzya kukkomanisyanya

2 AMUBIKKILE MAANO MBWALIMVWA NGOMUKWETENE LIMWI

NCOLYAAMBA BBAIBBELE: Mweelede kubikkila maano kuzintu nzyayandika ngomukwetene limwi. (Bafilipi 2:3, 4) Kamumubona kuba muntu uuyandika kapati kumwi kamuyeeyede kuti Jehova uyanda kuti babelesi bakwe kabali “amoyo mutete kubantu boonse.” (2 Timoteyo 2:24) “Majwi aabantu bamwi alayasa mbuli ipanga, pele lulimi lwabasongo lulaponya.” Aboobo kamusala kabotu majwi ngomubelesya. (Tusimpi 12:18) Muuya wa Jehova uuyoomugwasya kwaambaula calubomba alimwi acaluyando.—Bagalatiya 5:22, 23; Bakolose 4:6.

NCOMUKONZYA KUCITA:

• Amupaile ikulomba lugwasyo kutegwa mucikonzye kubatama alimwi akutuba kumoyo kamutanabandika makani mapati angomukwetene limwi

• Amuyeeyesye kujatikizya makani ngomuyakwaamba alimwi ambomuyakwaamba

3 AMUBE AMUZEEZO OMWE

NCOLYAAMBA BBAIBBELE: Ciindi nomwakwatana, muba “nyama yomwe” angomukwetene limwi. (Matayo 19:5) Nokuba boobo, mucili bantu bobilo alimwi mulakonzya kuyeeya munzila ziindene-indene. Aboobo muyandika kwiiya mbomukonzya kukamantana mumizeezo alimwi ambomulimvwa. (Bafilipi 2:2) Lukamantano lulayandika kapati ciindi nomusala zyakucita. Bbaibbele lyaamba kuti: ‘Lulayo lulayandika kutegwa makanze azuzikizigwe.’ (Tusimpi 20:18) Amulekele Bbaibbele kuti limusololele ciindi nomusala zyakucita zipati-pati antoomwe.—Tusimpi 8:32, 33.

NCOMUKONZYA KUCITA:

• Amumwaambile mbomulimvwa ngomukwetene limwi ikutali buyo makani naa nzyomuyeeya

• Amumubuzye ngomukwetene limwi kamutanacita zintu zimwi