Amusyomeke Kuli Umwi Amweenzinyina

Jehova uyanda kuti ‘katuyanda luzyalo’ naa kusyomeka. (Mika 6:8) Eeci cilayandika kapati mucikwati canu, nkaambo kuti kamutasyomeki nkokuti taakwe kusyomana. Kusyomeka kulayandika kutegwa luyando lukomene.

Mazuba aano, mucikwati kuli penzi lyakutasyomeka. Kutegwa mukwabilile cikwati canu, mweelede kucita zintu eezyi zyobilo.

1 AMUBIKKE CIKWATI CANU MUBUSENA BWAKUSAANGUNA

NCOLYAAMBA BBAIBBELE: “Musinizye zyintu ziyandika kapati.” (Bafilipi 1:10) Cikwati canu cili akati kazintu ziyandika kapati mubuumi bwanu. Ciyandika kubikkwa mubusena bwakusaanguna.

Jehova uyanda kuti kamumubikkila maano ngomukwetene limwi alimwi ‘akubotelwa . . . mubuumi’ antoomwe. (Mukambausi 9:9) Ulacisalazya kuti tamweelede kumusulaika ngomukwetene limwi, pele mweelede kuzyiba mbomukonzya kukkomanisyanya. (1 Bakolinto 10:24) Ngomukwetene limwi weelede kulimvwa kuti mulamuyanda alimwi mulamulumba.

NCOMUKONZYA KUCITA:

• Amusinizye kuti lyoonse mulajana ciindi cakuba antoomwe, kumubikkila maano kapati ngomukwetene limwi

• Kamubelesya majwi aakuti “swebo” ikutali “mebo”

2 AMUBAMBE MOYO WANU

NCOLYAAMBA BBAIBBELE: “Kufwumbwa muntu uulangisisya mukaintu cakuti wamunyomenena, wacita kale bumambe anguwe mumoyo wakwe.” (Matayo 5:28) Ikuti muntu wazumanana kuyeeya zintu zijatikizya kutalilemeka, munzila imwi citondezya kutasyomeka kuli ngobakwetene limwi.

Jehova waamba kuti mweelede ‘kubamba moyo wanu.’ (Tusimpi 4:23; Jeremiya 17:9) Kutegwa mucite oobo, mweelede kubamba meso aanu. (Matayo 5:29, 30) Amutobele cikozyanyo casikale Jobu iwakapanga cizuminano ameso aakwe cakutalangisisya mukaintu uumbi cakumunyomenena. (Jobu 31:1) Tamweelede kweebelela zintu ziletela muzeezo wakoonana. Alimwi amweelebe kuyandana amuntu ngomutakwetene limwi.

NCOMUKONZYA KUCITA:

• Amumuyande ngomukwetene limwi cakumaninina alimwi bantu beelede kuti kabacibona eeci

• Amuyeeye kujatikizya mbwalimvwa ngomukwetene limwi, mpoonya cakufwambaana amucileke cilongwe cili coonse cikonzya kupa ngomukwetene limwi kutalimvwa kabotu