CIBEELA 5
Mbomukonzya Kukkala Muluumuno Abasazinyoko
“Amulisamike . . . luzyalo, kulicesya, kubomba moyo alimwi akukkazyika moyo.”—Bakolose 3:12
Bantu nobakwatana batalisya mukwasyi mupya. Nokuba kuti lyoonse munoobayanda alimwi akubalemeka bazyali banu, pele lino muntu uuyandika kapati anyika ngooyo ngomukwetene limwi. Eeci cilakonzya kubakatazya kucitambula basazinyoko bamwi. Pele njiisyo zyamu Bbaibbele inga zyamugwasya kulanga zintu munzila yeelede kutegwa mukkale muluumuno abasazinyoko nomubeleka canguzu kuyaka mukwasyi wanu mupya.
1 AMUBALANGE MUNZILA YEELEDE BASAZINYOKO
NCOLYAAMBA BBAIBBELE: “Lemeka bauso abanyoko.” (Baefeso 6:2) Tacikwe makani naa muli bapati buti, lyoonse mweelede kubalemeka bazyali banu. Amuyeeye kuti ngomukwetene limwi awalo uyandika kuti kababikkila maano bazyali bakwe. “Luyando talukwe bbivwe,” aboobo tamweelede kulibilika kujatikizya cilongwe ncajisi abazyali bakwe ngomukwetene limwi.—1 Bakolinto 13:4; Bagalatiya 5:26.
NCOMUKONZYA KUCITA:
Mutani kwaambi majwi mbuli aakuti “Lyoonse mukwasyi wako ulandityompya” naa aakuti “Banyoko kunyina nobabotelwa azintu nzyondicita”
Amusole kulanga zintu mbuli mbwazilanga ngomukwetene limwi
2 AMUYUME KUTI KWAYANDIKA
NCOLYAAMBA BBAIBBELE: “Mwaalumi uleelede kusia wisi abanyina akukakatila kumwanakazi wakwe, babe nyama yomwe buyo.” (Matalikilo 2:24) Ciindi nomwakwatana, bazyali banu inga balimvwa kuti bacili amukuli wakumweendelezya alimwi inga bayanda kuti kabanjilila kapati mumakani aajatikizya cikwati canu kwiinda mbobeelede.
Cili kulindinywe angomukwetene limwi kuzumizyanya mpobeelede kugolela caboola kumakani aajatikizya cikwati canu mpoonya akubaambila caluyando. Mulakonzya kubaambila cakusalazya alimwi cacigaminina kakuyina kubanyemena pe. (Tusimpi 15:1) Kulicesya, kubomba moyo alimwi akukkazika moyo ziyoomugwasya kuba acilongwe cibotu abasazinyoko alimwi akuzumanana “kweengelelana caluyando.”—Baefeso 4:2.
NCOMUKONZYA KUCITA:
Kuti kamulibilika kujatikizya basazinyoko mbobajatikizyidwe kapati mumakani aajatikizya cikwati canu, amubandike mbomulimvwa angomukwetene limwi ciindi zintu nozili kabotu
Amubandike akuzumizyanya mbomukonzya kwaalanganya makani aaya