“Kamubayeeya Aabo Basololela Akati Kanu”

MAJWI aaya aamwaapostolo Paulo, aalembedwe kulugwalo lwa Bahebrayo 13:7 alakonzya alimwi kusandululwa kuti: “Kamubayeeya aabo bamweendelezya.” Kuzwa mu Pentekoste 33 C.E. kuya kumbele, baapostolo ba Mwami Jesu Kristo ibasyomeka bakacita mulimo ooyu kabali kabunga keendelezya ikakali kusololela ikupa malailile kumbungano ya Banakristo iyakazwide aakutalisyigwa. (Mil. 6:2-4) Mpoonya kulangilwa kuti kuzyikusika mumwaka wa 49 C.E., aaka kabunga keendelezya kakalikomezyedwe akubikkilizya abambi kunze lyabaapostolo ba Jesu. Makani aakupalulwa naakakosolwa, aaka kabunga keendelezya kakali kubikkilizya ‘baapostolo abaalu ku Jerusalemu.’ (Mil. 15:1, 2) Wakali mukuli wabo ikulanga-langa twaambo tujatikizya Banakristo kumasena oonse nkobakabede. Bakatuma magwalo amalailile, aayo aakayumya mbungano akugwasya basikwiiya kuzumanana kukamantana mukuyeeya alimwi amumilimo. Mbungano zyakalibombya alimwi akwaatobela malailile aakapegwa akabunga keendelezya, aboobo zyakalongezyegwa a Jehova alimwi zyakayaambele.—Mil. 8:1, 14, 15; 15:22-31; 16:4, 5; Heb. 13:17.

² Baapostolo nobakafwa, kwakatalika luleyo lutaambiki. (2Tes. 2:3-12) Mbubonya Jesu mbwaakasinsima mucikozyanyo cawiiti ansaku, akati kawiiti (Banakristo bananike) kwakasyangwa nsaku (Banakristo bakubeja). Mumyaanda yamyaka iyakatobela, nkamu zyoonse zyobilo zyakalekwa kuti zikomenene antoomwe kusikila kuciindi cakutebula, nkokuti “mamanino aabweende bwazintu.” (Mt. 13:24-30, 36-43) Munakristo umwi aumwi kumugama wakazumanana kukkomaninwa a Jesu mumyaka eeyi yoonse yakatobela, pele kwakanyina kabunga keendelezya, naa nzila iigaminide anyika njaakali kubelesya Jesu kupa basikumutobela malailile. (Mt. 28:20) Nokuba boobo, wakasinsima kuti kwakali kuyooba kucinca kuciindi cakutebula.

³ “Ino mubwini, nguni muzike uusyomeka alimwi uucenjede?” Kwiinda mukubuzya mubuzyo ooyu, Jesu Kristo wakaamba caano naa cikozyanyo icakali cibeela ‘cacitondezyo’ ncaakapa kujatikizya “mamanino aabweende bwazintu.” (Mt. 24:3, 42-47) Jesu wakatondezya kuti ooyu muzike uusyomeka wakali kunoojisi bubi kusanina bantu ba Leza cakulya cakumuuya “aciindi ceelede.” Mbubonya Jesu mbwaakabelesya kakamu kabaalumi—ikutali muntu omwe buyo—kusololela mumwaanda wamyaka wakusaanguna, muzike uusyomeka ooyo ngwabelesya Jesu ciindi cino cakumamanino aabweende bwazintu tali muntu omwe buyo pe.

IKUZYIBA “MUZIKE UUSYOMEKA ALIMWI UUCENJEDE”

⁴ Ino nguni ooyo Jesu ngwaakabikka kuti kasanina basikumutobela? Cakutadooneka cileelela kuti inga wabelesya buyo Banakristo bananike anyika. Bbaibbele libaamba kuti “ibapaizi bami” ibakapegwa mulimo ‘wakwaambilizya koonse-koonse bulemu bwayooyo wakabaita kuzwa mumudima akubanjizya mumumuni wakwe uutaliboteli.’ (1Pet. 2:9; Malk. 2:7; Ciy. 12:17) Sena bananike boonse ibali anyika ngomuzike uusyomeka? Peepe. Ciindi Jesu munzila yamaleele naakaisanina cakulya cakumubili nkamu yabantu iyakajisi baalumi basika ku 5,000 kutabalilizya bamakaintu alimwi abana basyoonto, wakapa basikwiiya bakwe cakulya eeco, kumane balo mbabakaabanya makamu aabantu. (Mt. 14:19) Wakasanina bantu banji kwiinda mukubelesya bantu basyoonto. Mazuba aano, upa bantu cakulya cakumuuya munzila njimunya eeyo.

⁵ Aboobo, “mubanzi uusyomeka, uucenjede,” nkakamu kasyoonto kabakwesu bananike aabo ibabeleka cacigaminina mukubamba alimwi akwaabila cakulya cakumuuya kuciindi cakubako kwa Kristo. (Lk. 12:42) Mumazuba oonse aamamanino, bakwesu bananike aabo ibaitwa kuti “muzike uusyomeka alimwi uucenjede” bali kubeleka antoomwe kumaofesi mapati. Mazuba aano, bakwesu aaba bananike mbambabo Kabunga Keendelezya ka Bakamboni ba Jehova.

⁶ Kristo ubelesya kabunga aaka kumwaya makani aajatikizya kuzuzikizyigwa kwabusinsimi bwamu Bbaibbele alimwi akupa malailile aaciindi ceelede aajatikizya mbozibelesyegwa njiisyo zyamu Bbaibbele mubuumi bwabuzuba abuzuba. Cakulya cakumuuya eeci cilapegwa kwiinda mumbungano zya Bakamboni ba Jehova. (Is. 43:10; Gal. 6:16) Ciindi nolyakali kulembwa Bbaibbele, muzike uusyomwa, naa mubanzi, ngowakali kulanganya zintu zyaaŋanda. Mbubonya buyo, muzike uusyomeka alimwi uucenjede wapegwa mukuli wakulanganya bamukwasyi wa Leza ibasyoma. Aboobo, muzike uusyomeka alimwi ulanganya lubono lwambunga, mulimo wakukambauka, miswaangano yabbazu alimwi ayacooko, kubikkwa kwabalangizi kuti babeleke milimo yiindene-indene mumbunga, kumwaigwa kwamabbuku aamba zyamu Bbaibbele, zyoonse izigwasya “babelesi bamuŋanda.”—Mt. 24:45.

⁷ Aboobo, ino “babelesi bamuŋanda” mbaani? Mubufwaafwi, aaba mbaabo basaninwa. Kumatalikilo, babelesi bamuŋanda boonse bakali bananike. Kumbele, babelesi bamuŋanda bakazyi kubikkilizya abankamu mpati iba “mbelele zimbi.” (Joh. 10:16) Bankamu eezyi zyoonse zyobilo balya cakulya cakumuuya icibambwa amuzike uusyomeka.

⁸ Ciindi camapenzi mapati, Jesu aakuboola kuzyikubeteka akunyonyoona bweende bwazintu oobu bubyaabi, uyoobikka muzike uusyomeka “kulanganya lubono lwakwe loonse.” (Mt. 24:46, 47) Aabo ibali mukakamu kamuzike uusyomeka bayoopegwa bulumbu bwabo bwakujulu. Antoomwe abambi boonse iba 144,000, bayootola lubazu mubweendelezi bwa Kristo bwakujulu. Nokuba kuti takucinooli muzike uusyomeka alimwi uucenjede anyika, Jehova alimwi a Jesu bayoozumanana kupa malailile kubalelwa ba Bwami bwa Mesiya kwiinda muli baabo ibayoobikkwa kuba “basilutwe.”—Int. 45:16.

NKAAMBO NZI NCOTWEELEDE ‘KUBAYEEYA AABO BASOLOLELA’?

⁹ Kuli twaambo tunji ncotweelede ‘kubayeeya aabo basololela’ alimwi akutondezya kuti tulabasyoma. Nkaambo nzi kucita boobo ncokutugwasya? Mwaapostolo Paulo wakaamba kuti: “Nkaambo balanganya ndinywe kabali baabo ibayoobuzyigwa makani, ikutegwa kabacita oobu cakukondwa ikutali cakuusa pe, nkaambo eeci inga camuletela mapenzi.” (Heb. 13:17) Cilayandika kapati kuti katubamvwida aabo ibatusololela alimwi akulibombya kulimbabo ciindi nobatupa malailile nkaambo balatulanganya kutegwa tukwabililwe kumuuya akupona kabotu.

¹⁰ Kweelana ambokulembedwe ku 1 Bakorinto 16:14, Paulo wakaamba kuti: “Amucite zintu zyoonse caluyando.” Makani aajatikizya bantu ba Leza alakosolwa kweelana abube oobu bubotu kapati bwaluyando lwini-lwini. Kujatikizya luyando, lugwalo lwa 1 Bakorinto 13:4-8 lwaamba kuti: “Luyando lulakkazika moyo alimwi lulaaluzyalo. Luyando talukwe munyono, talulidundi, talulisumpuli, talukwe cisapi, talubikkili buyo maano kuzintu nzyoluyanda, talunyemi-nyemi, talubikkilili. Talukkomanini kutalulama, pele lukkomanina kasimpe. Lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse. Luyando talumani.” Akaambo kakuti luyando mpaayeeme zintu zyoonse zisalwa kucitwa izibambilidwe kugwasya babelesi ba Jehova, swebo tweelede kuliiba akulimvwa kukwabililwa ciindi notusololelwa abusolozi buli boobu. Alimwi buya, eeci ncitondezyo caluyando lwa Jehova kubantu bakwe boonse.

¹¹ Mbubonya mbocakabede mumwaanda wamyaka wakusaanguna, aabo Jehova mbabelesya kweendelezya bantu bakwe mbantu batalondokede. Nokuba boobo, kuzwa kaindi Jehova wali kubelesya bantu batalondokede kucita kuyanda kwakwe. Nowa wakayaka bwato alimwi akukambauka kujatikizya lunyonyooko ilwakali kulangilwa kuciindi cakwe. (Matl. 6:13, 14, 22; 2Pet. 2:5) Musa wakasalwa kuti asololele bantu ba Jehova kuzwa mucisi ca Egepita. (Kul. 3:10) Baalumi batalondokede bakasololelwa a Leza kulemba Bbaibbele. (2Tim. 3:16; 2Pet. 1:21) Aboobo, mazuba aano ciindi Jehova nabelesya baalumi batalondokede kweendelezya mulimo wakukambauka akuyiisya bantu kuba basikwiiya, tatuleki kwiisyoma mbunga yakwe pe. Muciindi caboobo, tulayumizyigwa nkaambo tulizyi kuti ikuti noyatali kugwasyigwa a Jehova, mbunga yakwe kunyina noyali kukonzya kucita zintu zyoonse nzyoicita lino. Kwiinda mukuliyumya mumapenzi manji alimwi akubona zintu zinji, muzike uusyomeka watondezya kuti muuya wa Leza nguweendelezya zintu. Cibeela cambunga ya Jehova icilibonya calongezyegwa kapati mazuba aano. Aboobo, camoyo woonse tubelekela antoomwe anjiyo alimwi tulaalusyomo luyumu mulinjiyo.

MBOTUTONDEZYA KUTI TULAISYOMA

¹² Aabo ibapedwe mikuli mumbungano balatondezya mbobaisyoma mbunga kwiinda mukwiitambula camaanza obilo milimo njobapegwa alimwi akwiibeleka cakusyomeka. (Mil. 20:28) Mbotuli basikwaambilizya Bwami, tulatola lubazu cabusungu mumulimo wakuŋanda aŋanda, munyendo zyakupilukila alimwi akweendelezya ziiyo zya Bbaibbele zyaaŋanda. (Mt. 24:14; 28:19, 20) Ikutegwa tugwasyigwe ncobeni acakulya cakumuuya citaliboteli icipegwa amuzike uusyomeka, tulalibambila kabotu alimwi akujanika kumiswaangano yesu ya Bunakristo, kubikkilizya amiswaangano yabbazu alimwi ayacooko. Tulagwasyigwa kapati akukulwaizyanya notuyanzana abakwesu kumiswaangano eeyi ya Bunakristo.—Heb. 10:24, 25.

¹³ Alimwi tulatondezya kuti tulaisyoma mbunga ciindi notugwasyilizya kwiinda mukusanga lubono ndotujisi. (Tus. 3:9, 10) Eelyo notubona kuti bakwesu balibulide kumubili, tulabagwasya cakufwambaana. (Gal. 6:10; 1Tim. 6:18) Tulacita oobu amuuya mubotu waluyando lwabunyina, lyoonse inga tulipakamene kubona mbotukonzya kutondezya kuti tulamulumba Jehova ambunga yakwe akaambo kazintu zibotu nzyotupegwa.—Joh. 13:35.

¹⁴ Nzila imbi mbotutondezya kuti tulaisyoma mbunga nkwiinda mukuzuminizya akutobela mbwaakosolwa makani. Eeci cibikkilizya kwaatobela cakulicesya malailile aapegwa abaabo babikkidwe kuti kabatulanganya, mbuli balangizi babbazu alimwi abaalu bambungano. Bakwesu aaba balibikkilizyidwe akati kabaabo “basololela,” aabo mbotweelede kumvwida alimwi akulibombya kulimbabo. (Heb. 13:7, 17) Nokuba kuti tiitwatumvwisya twaambo toonse tujatikizyidwe mumakani ngobasala, tulizyi kuti cigwasya ndiswe lyoonse notutobela ncobasala. Aboobo, Jehova ulatulongezya akaambo kakuti tumvwida Jwi lyakwe alimwi ambunga yakwe. Munzila eeyi tutondezya kuti tulalibombya kuli Simaleleesu, Jesu Kristo.

¹⁵ Masimpe, tulijsi twaambo tulimvwisya ncotweelede kumusyoma muzike uusyomeka alimwi uucenjede. Saatani, walo uuli ngoleza wabweende bwazintu oobu, uluujisi kusola kuleta masampu kuzina lya Jehova alimwi akumbunga yakwe. (2Kor. 4:4) Mutacengwi pe anzila zibi zyabucenjezu nzyabelesya Saatani! (2Kor. 2:11) Ulizyi kuti “ujisi buyo kaindi kaniini” kuti awaalwe mumulindi uutagoli, aboobo ukanzide kuzandula bantu ba Jehova banji kapati kuzwa kuli Leza. (Ciy. 12:12) Nokuba boobo, Saatani mbwayaabwiindila kusola kucita boobo, atuyumye cilongwe cesu a Jehova kwiinda lyoonse. Atumusyome Jehova alimwi anzila eeyo njabelesya kusololela bantu bakwe mazuba aano. Ikuti naa twacita boobo, tunooli babunyina bakamantene.