Kutolaambele Mulimo wa Bwami Nkomukkala Alimwi Amunyika Yoonse

IKUZUZIKIZYA businsimi mbwaakaamba Jesu kujatikizya mazuba aamamanino, Bakamboni ba Jehova baubeleka mulimo wakukambauka makani mabotu “mane kusikila kumasena aakulamfwu kapati aanyika.” (Mil. 1:8; Mt. 24:14) Kutegwa bacite boobo, balisungula kubelesya ciindi cabo alimwi anguzu kuti baabile bamwi zintu zyakumuuya. Akaambo kakusyoma kuti Jehova ulabalanganya basimilimonyina, balazumanana kubikka Bwami bwa Leza mubusena bwakusaanguna mubuumi bwabo. (Mt. 6:25-34; 1Kor. 3:5-9) Izicitika akaambo kakucita boobo zipa bumboni busalede bwakuti Jehova ulabakkomanina alimwi akubaleleka.

KULANGANYA MILIMO YA BWAMI NYIKA YOONSE MBOIZULWA

² Ciindi bantu bamwi nobabona nzila nzyotubelesya mukukambauka alimwi akuti tumwaya ma Bbaibbele alimwi amabbuku aamba zyamu Bbaibbele kubuleya kakunyina kubbadelesya, balabuzya kuti: “Ino mucikonzya buti kucita boobu?” Ncobeni, kuyandika mali kutegwa kusimbwe akupangwa ma Bbaibbele alimwi amabbuku aamba zyamu Bbaibbele. Alimwi kuyandika mali kutegwa kuyakwe alimwi akubambulula maanda aa Bbeteli imukkala babelesi ibajatauka mincini yakusimbya, ibalanganya mulimo wakukambauka alimwi abaabo ibabeleka munzila azimbi zyakutolaambele makani mabotu. Kuyungizya waawo, balangizi bamabbazu, bamisyinali bamumuunda, bapainiya baalubazu alimwi abamwi buyo ibali mumulimo waciindi coonse waalubazu balagwasyigwa kumubili kutegwa bacikonzye kuzumanana mumulimo wabo. Cilisalede kuti kuyandika mali manji kapati kutegwa mulimo wakukambauka makani mabotu mazuba aano ucitwe, kufwumbwa naa muubusena motukkala naa muunyika yoonse mboizulwa. Ino mali oonse aaya azwa kuli?

³ Bantu banji ibalumba akaambo kamulimo wakuyiisya Bbaibbele ngobacita Bakamboni ba Jehova, balakkomana kusanga kutegwa bagwasyilizye mulimo wanyika yoonse. Nokuba boobo, mulimo wesu ugwasyilizyigwa kapati a Bakamboni lwabo beni, aabo ibatuma zyakusanga zyakuliyandila kuofesi yamutabi ya Bakamboni ba Jehova yamucisi cabo. Batondezya muuya wakulisungula mbubonya mbuli babelesi ba Leza bakaindi ibakagwasyilizya mukuyaka busena bwakukombela Jehova kwiinda mubwaabi bwabo. (Kul. 35:20-29; 1Mak. 29:9) Zipego zimwi izipegwa inga ndubono ndwasanga muntu katanafwa, pele zyakusanga zimbi zilapegwa abantu, mbungano, alimwi amabbazu; nokuba boobo, bunji bwaziindi eezyi inga taali mali manji kapati. Pele zipego eezyi zyoonse zyabikkwa antoomwe zipa kuti kube mali aali mbwaabede aapa kuti mulimo uzumanane.

⁴ Bakamboni ba Jehova bacibona kuti ncoolwe cipati ikubelesya mali aabo alimwi alubono lumbi ikutolaambele mulimo wakukambauka. Jesu abasikwiiya bakwe bakajisi ciyobwedo camali oomo mobakali kugusya mali aakubelesya kuula izyakali kuyandika. (Joh. 13:29) Bbaibbele litwaambila zyabamakaintu bamwi ibakali kukutaukila Jesu abasikwiiya bakwe. (Mk. 15:40, 41; Lk. 8:3) Mwaapostolo Paulo wakali kulutambula camaanza obilo lugwasyo lwakumubili ndobakali kumupa caluyando aabo ibakali kuyanda kutolaambele makani mabotu alimwi ibakali kuyanda kutola lubazu mumulimo wakwe. (Flp. 4:14-16; 1Tes. 2:9) Bakamboni ba Jehova bazumanana kuzitobela zikozyanyo eezyi zyakaindi zyabaabo ibakali kucita mulimo cabusungu alimwi akupa camoyo woonse. Aboobo babombe myoyo balakonzya kupegwa “maanzi aabuumi kakunyina kubbadela” kufwumbwa nkobabede.—Ciy. 22:17.

KULANGANYA ZIYANDIKA MUMBUNGANO YANU

⁵ Mali aabelesyegwa ambungano yanu aalo alajanwa kwiinda mukusanga kwakuliyandila. Kunyina mbale yamulumbo yiinzyigwa; simbungano umwi aumwi tabikkilwi mweelwe wamali ngayelede kupa alimwi taaku mali aalombelelwa pe. Tubbokesi twakusangila tulabikkwa kumasena aakuswaanganina kutegwa muntu umwi aumwi atole lubazu mukupa “mbuli mbwaasala mumoyo wakwe.”—2Kor. 9:7.

⁶ Mali aasangwa asaanguna kubelesyegwa kubbadalila zintu zyoonse iziyandika mukubelesya alimwi akubamba Ŋanda ya Bwami. Kabunga kabaalu kalakonzya kusala kuti mali amwi atumwe kuofesi yamutabi ya Bakamboni ba Jehova yamucisi cabo kuti akabelesyegwe kutolaambele mulimo wanyika yoonse. Kusala ooku kweelede kusaanguna kutolwa kumbungano kutegwa izuminizye. Munzila eeyi, mbungano zinji zilasanga ciindi aciindi kumulimo wanyika yoonse. Ciindi boonse nobabikkila maano kubona zintu iziyandika mumbungano ciindi aciindi, takukayandiki kwaambilizya lyoonse kujatikizya makani aakusanga.

KULANGANYA ZYAKUSANGA

⁷ Wamana muswaangano umwi aumwi, bakwesu bobilo balagusya mali aabikkwa mutubbokesi twakusangila akwaalemba. (2Bam. 12:9, 10; 2Kor. 8:20) Kabunga kabaalu kayakujana nzila yakwaayobola mali aaya kusikila ciindi naayootumwa kuofesi yamutabi naa naayoobelesyegwa kujana ziyandika mumbungano. Mukwesu uulanganya nkomwe yamali yambungano ulalemba sitetimenti mwezi amwezi yakuzyibya mbungano, mpoonya kwainda myezi yotatwe sicuuno wakabunga kabaalu ulabikka bubambe bwakulingula nkomwe yamali.

MALI AABELESYEGWA MUBBAZU

⁸ Mali aabelesyegwa mukucita miswaangano yabbazu alimwi aziyandika zimwi zyabbazu azwa kuzyakusanga nzyobapa Bakamboni bamubbazu eelyo. Tubbokesi twakusangila tulabikkwa kumasena aakuswaanganina ikutegwa aabo bajanika bakonzye kupa zyakusanga zyakuliyandila kubbazu. Kuyungizya waawo, kutegwa kulanganizyigwe ziyandika zimwi, mbungano zilakonzya kusanga aziindi zimbi.

⁹ Kanji-kanji, mali aabelesyegwa mumabazu asangwa ambungano zyamumabazu aayo, eelyo mali aasyaala alasangwa kumulimo wanyika yoonse. Ikuti naa kuli mali masyoonto munkomwe yamali yabbazu aakubelesya kubbadalila ziyandika aamuswaangano ooyu naa aakuyoobelesya mukutalisya muswaangano uutobela mbuli kujatila busena bwakuswaanganina, mulangizi wabbazu ulakonzya kulailila kuti mbungano zizyibisyigwe kujatikizya coolwe cakusanga ncozijisi. Kabunga kabaalu kamwi akamwi kayakwaabandika makani aaya akubona mali ngoikonzya kusanga mbungano kubbazu. Mpoonya bayakuzyibya mbungano mweelwe wamali aayo aayandika kusanga kutegwa izuminizye.

¹⁰ Ikuti naa kwabuka makani amwi aajatikizya mali aayandika kulanganizyigwa abaalu bamubbazu, nkokuti muswaangano wabaalu bamubbazu eelyo uyoocitwa mubuzuba bwamuswaangano wabbazu. Kusala koonse ikucitwa kunze lyakooko ikujatikizya mali aayandika kubbadelela zintu zimwi zyamubbazu kweelede kuzuminizyigwa abaalu. Ciindi coonse kusala ooko kweelede kulembwa mumyeelwe iigaminide akutolwa kubaalu kuti bazuminizye kaatanabelesyegwa mali aabbazu.

¹¹ Kulabikkwa bubambe bwakuti nkomwe yamali yabbazu kailingulwa ciindi aciindi.

KULANGANYA BACETE

¹² Mulimo umwi wamali aakali muciyobwedo camali ncaakajisi Jesu abasikwiiya bakwe wakali wakugwasya bacete. (Mk. 14:3-5; Joh. 13:29) Mukuli ooyu wa Bunakristo uciliko asunu, nkaambo Jesu wakaamba kuti: “Bacete munooli limwi lyoonse.” (Mk. 14:7) Ino mbuti Bakamboni ba Jehova mbobaulanganya mukuli ooyu sunu?

¹³ Zimwi ziindi, bakwesu abacizyi ibasyomeka mumbungano inga kabayandika kupegwa lugwasyo lwakumubili akaambo kakucembaala, kuciswa naa akaambo kamapenzi amwi buyo. Banamukwasyi, babbululu alimwi abamwi ibabuzyi bukkale oobo balakonzya kubweza ntaamu yakubagwasya. Eeci cileendelana amajwi aamwaapostolo Johane aakuti: “Ikuti ooyo uujisi lubono lwamunyika eeyi wabona munyina uupengede nokuba boobo tayandi kumufwida luzyalo, ino luyando lwa Leza inga lwazumanana buti mulinguwe? Nobana bangu bayandwa, luyando lwesu lutabi lwamajwi buyo naa lwaamulomo pe, pele alube lwamumilimo amukasimpe.” (1Joh. 3:17, 18; 2Tes. 3:6-12) Bukombi bwakasimpe bubikkilizya kulanganya bakwesu abacizyi basyomeka ibayandika lugwasyo lwakumubili.—Jak. 1:27; 2:14-17.

¹⁴ Mulugwalo lwakwe lwakusaanguna ndwaakalembela Timoteyo, mwaapostolo Paulo wakapandulula lugwasyo lwakumubili mbolukonzya kupegwa kuli baabo ibeelela. Mulakonzya kwaabala malailile ngaakapa kulugwalo lwa 1 Timoteyo 5:3-21. Munakristo umwi aumwi nguujisi mukuli wakulanganya nzibayandika bamukwasyi wakwe mwini. Bakwesu abacizyi bacembeede naa ibaciswa beelede kugwasyigwa abana babo, bazyukulu naa bacibbululu bambi. Zimwi ziindi, lugwasyo lwakumubili lulajanwa kumfwulumende naa kumbunga zigwasya bapengede, aboobo babbululu naa bambi buyo balakonzya kubagwasya ibapengede kujana lugwasyo oolu. Kulakonzya kuba bukkale eelyo nokunga kwayandika kuti mbungano yoonse ibagwasyilizye munzila imwi bakwesu abacizyi bamwi bapengede ibali kubelekela Leza cakusyomeka kwaciindi cilamfwu. Ikuti kakunyina bamukwasyi naa babbululu bambi ibakonzya kubagwasya alimwi kakunyina lugwasyo lukkwene kuzwa kumfwulumende, kabunga kabaalu kalakonzya kubikka bubambe bwakubagwasya. Banakristo bacibona kuti ncoolwe cipati kubaabila zintu zyakumubili nzyobayandika aabo bapengede.

¹⁵ Bakwesu abacizyi banji balakonzya kubula zintu ziyandika akaambo kakupenzyegwa, nkondo, muzuzumo wanyika, cilobe naa kupaya kwameenda, nzala, naa mapenzi aambi buyo aavwula kucitika kumazuba aano aakatazya. (Mt. 24:7-9) Mbungano zyakubusena ooko inga kazitajisi aakujata cakunga tazikonzyi kugwasyanya; aboobo mubukkale oobu, Kabunga Keendelezya kalabikka bubambe bwakuti bakwesu mumasena aambi bagwasye kwiinda mukupa ziyandika. Eeci cilikozyenye ambobakacita Banakristo ku Asia Minor nobakapa bakwesu baku Judaya zyakulya ciindi canzala. (1Kor. 16:1-4; 2Kor. 9:1-5) Kwiinda mukutobela cikozyanyo cabo, tutondezya kuti tulabayanda ncobeni bakwesu alimwi akuti tuli basikwiiya ba Jesu Kristo bakasimpe.—Joh. 13:35.

KWAABILA MABBUKU

¹⁶ Ma Bbaibbele alimwi amabbuku aamba zyamu Bbaibbele alayandika kapati mukumwaya mulumbe wa Bwami. Bunji bwaziindi mukutausi ulabikkwa akabunga kabaalu kuti kalanganya mabbuku ngoitambula mbungano. Bakwesu ibabikkwa kulanganya zintu eezyi balaibikkila maano kapati mikuli yabo. Balaabamba kabotu malekkoodi akubona masimpe kuti kuli mabbuku amamagazini aayandika kubelesyegwa ambungano.

¹⁷ Mbotuli Banakristo balyaabide, tulizyi kuti ciindi cesu, maano, nguzu, zipego naa matalenta alimwi alubono lwesu, kubikkilizya abuumi bwesu bwini nzipego kuzwa kuli Leza nzyotweelede kubelesya mumulimo wakwe. (Lk. 17:10; 1Kor. 4:7) Kwiinda mukuzibelesya kabotu zintu zyoonse nzyotujisi, tutondezya kuti tulamuyanda kapati Jehova. Makanze eesu ngakulemeka Jehova azintu zyesu ziyandisi, mbwaanga tulizyi kuti ulacikkomanina cipego cili coonse ncotumupa ikutondezya kuti tulilyaabide camoyo woonse kulinguwe. (Tus. 3:9; Mk. 14:3-9; Lk. 21:1-4; Kol. 3:23, 24) Jesu wakaamba kuti: “Mwakapegwa kakunyina kubbadelesyegwa, amupe kakunyina kubbadelesya.” (Mt. 10:8) Notulyaaba swebo tobeni alimwi anotubelesya lubono lwesu mumulimo wa Jehova, citupa kukkomana kapati.—Mil. 20:35.