Ikuzumanana Kuba Aluumuno Alimwi Abusalali Mumbungano

MWAKA amwaka bantu banji kapati balaboola kuŋanda ya Jehova yabukombi busalala, ikuzuzikizya businsimi bwamu Bbaibbele. (Mik. 4:1, 2) Eelo kaka tulikkomene kapati kubatambula ‘mumbungano ya Leza’! (Mil. 20:28) Balacikkomanina coolwe cakubelekela Jehova antoomwe andiswe alimwi akuba muparadaiso yesu yakumuuya imuli busalali alimwi aluumuno. Muuya uusalala wa Leza alimwi alulayo lugwasya iluli mu Jwi lyakwe zilatugwasya kuzumanana kuba aluumuno alimwi akubona kuti mbungano yesu ilasalala.—Int. 119:105; Zek. 4:6.

² Kwiinda mukutobela njiisyo zyamu Bbaibbele, tulisamika “buntu bupya.” (Kol. 3:10) Tatulekeli twaambo tutayi koomoonga alimwi akwiimpana mumizeezo kutupa kuzwangana. Akaambo kakuti zintu tuzibona mbubonya mbwazibona Jehova, tulauzunda muuya wanyika uupa kwaandaana alimwi tulabeleka calukamantano abakwesu nyika yoonse mboizulwa.—Mil. 10:34, 35.

³ Nokuba boobo, ciindi aciindi kulabuka mapenzi aanyonganya luumuno alimwi alukamantano lwambungano. Ino ncinzi cipa boobo? Bunji bwaziindi, inga nkutatobela lulayo lwamu Bbaibbele. Tuciyandika kulwana tumpenda ntotujisi akaambo kakutalondoka. Kunyina muntu naba omwe akati kesu uutakwe cibi. (1Joh. 1:10) Umwi ulakonzya kuleya munzila akuyunga bamwi mumbungano kuti basofwaale mumakani aakulilemeka naa kumuuya. Tulakonzya kutyompya bamwi akaambo kakwaamba majwi cakutayeeya naa akaambo kamicito yesu, naa inga twatyompwa akaambo kacintu ncaamba naa ncaacita umwi. (Rom. 3:23) Muziindi eezyi, ino ncinzi ncotukonzya kucita kutegwa tululamike zintu?

⁴ Caluyando Jehova ubikkide nzila yakulanganya zintu eezyi zyoonse. Ijwi lyakwe lilapa lulayo kujatikizya mbotunga twacita ikuti naa kwabuka mapenzi. Beembezi bakumuuya basiluyando, nkokuti baalu, balakonzya kutugwasya. Kwiinda mukutobela lulayo ndobatupa lwamu Magwalo, tulakonzya kubukulusya cilongwe cibotu abamwi alimwi akuzumanana kuba azina libotu a Jehova. Ikuti twalaigwa naa kusinswa akaambo kakuti twalubizya, tweelede kuzyiba kuti ikululamikwa ooko ncitondezyo cakuti Taateesu wakujulu ulatuyanda.—Tus. 3:11, 12; Heb. 12:6.

KUMANA MAZWANGA MANIINI

⁵ Kuli ziindi nokubuka mazwanga naa mapenzi maniini akati kabakwesu abacizyi mumbungano. Aaya ayelede kumanizyigwa cakufwambaana kwiinda mukutobela muuya waluyando lwabunyina. (Ef. 4:26; Flp. 2:2-4; Kol. 3:12-14) Cakutadooneka, nywebo lwanu muyoobona kuti mapenzi aakonzya kubuka akati kanu a Munakristonyoko alakonzya kumanizyigwa kwiinda mukutobela lulayo ndwaakapa mwaapostolo Petro lwakuti “amuyandane kapati, nkaambo luyando lulavwumba zibi zinji kapati.” (1Pet. 4:8) Bbaibbele lyaamba kuti: “Toonse tulalubizya ziindi zinji.” (Jak. 3:2) Kwiinda mukutobela Mulawo Wabukkale Bubotu, wakucitila bamwi zintu zyoonse nzyotuyanda kuti abalo batucitile, kanji-kanji tulakonzya kubalekelela alimwi akuluba zintu ziniini nzyobatulubizyila.—Mt. 6:14, 15; 7:12.

⁶ Ikuti mwabona kuti umwi wakatyompwa akaambo kacintu cimwi ncomwakaamba naa ncomwakacita, mweelede kubweza ntaamu yakubamba luumuno cakufwambaana. Mutalubi kuti cilongwe canu a Jehova acalo cilijatikizyidwe. Jesu wakalailila basikwiiya bakwe kuti: “Lino ikuti uleta cipego cako kucipaililo kumane noli kooko wayeeya kuti munyoko ulaakaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.” (Mt 5:23, 24) Masimpe, ambweni mwakaimpana mizeezo. Ikuti kacili boobo, amubandisyanye. Kubandisyanya akati kabakwesu abacizyi boonse mumbungano kulagwasya kapati mukulesya mazwanga alimwi akumanizya mapenzi aabuka akaambo kakutalondoka kwesu.

KUPA LULAYO LWAMU MAGWALO ILUYANDIKA

⁷ Zimwi ziindi, balangizi balakonzya kubona kuti cilayandika kupa lulayo kutegwa balulamike mizeezo yamuntu umwi. Talili lyoonse nocili cuuba-uba kucita boobo. Ku Banakristo baku Galatiya, mwaapostolo Paulo wakalemba kuti: “Bakwesu, nokuba kuti muntu umwi waleya katazyi walo, nywebo nomujisi zyeelelo zyakumuuya amusoleke kumululamika muntu ooyo amyoyo iibombede.”—Gal. 6:1.

⁸ Kwiinda mukweembela butanga, balangizi balakonzya kukwabilila mbungano kuzintu zinji izikonzya kwiinyonganya kumuuya alimwi akupa kuti kutabuki mapenzi mapati. Baalu balasoleka kubelekela mbungano mbubonya mbwaakasyomezya Jehova kwiinda muli Isaya kuti: “Umwi aumwi uyooba mbuli busena bwakutijila muwo, busena bwakuyusila mvwula mpati yamuwo, uyooba mbuli tulonga twamaanzi mucisi cinyina maanzi, mbuli cimvwule camwala mupati kapati munyika yacimpayuma.”—Is. 32:2.

KUBABIKKA CAANDO AABO BEENDA CAKUPILINGANA

⁹ Mwaapostolo Paulo wakacenjezya kujatikizya bamwi ibakali kukonzya kuleta muuya mubi mumbungano. Paulo wakaamba kuti: “Tumupa malailile . . . kuti mumutantamuke mukwesu uuli woonse weenda cakupilingana ikutali kweelana azilengwa nzyomwakatambula kulindiswe.” Wakakasalazya kaambo nkaakali kwaamba kwiinda mukulemba kuti: “Ikuti naa umwi kataaswiilili majwi eesu aali mulugwalo oolu, amumucenjelele kapati ooyo alimwi amuleke kuyanzana anguwe, kutegwa afwe nsoni. Nokuba boobo, mutamuboni mbuli kuti ngusinkondonyoko, pele amuzumanane kumulaya mbuli munyoko.”—2Tes. 3:6, 14, 15.

¹⁰ Zimwi ziindi, kulakonzya kujanika kuti muntu umwi watakacita cibi cipati ncakonzya kugusyilwa mumbungano utondezya muuya mubi wakutalemeka zyeelelo zya Leza nzyobeelede kutobela Banakristo. Eeci cilakonzya kubikkilizya zintu mbuli butolo bwiindilide, kutongooka, naa buyamba. Ulakonzya kali muntu ‘uulinjizya mumakani aatamujatikizyi.’ (2Tes. 3:11) Naa ulakonzya kali muntu uubelesya bumpelenge kutegwa alide bamwi masuku atalaamutwe naa uuyandisya zyakulikondelezya izizyibidwe kuti tazili kabotu. Bukkale bwakwe bwakweenda cakupilingana mbubi cakuti bulakonzya kubisya zina lyambungano, alimwi bulalangilwa kubatambukila Banakristo bambi.

¹¹ Baalu bayakusaanguna kumugwasya muntu ooyo iweenda cakupilingana kwiinda mukumupa lulayo lwamu Bbaibbele. Pele ikuti muntu ooyo wazumanana kucita zintu iziteendelani anjiisyo zyamu Bbaibbele nokuba kuti walaigwa cakwiinduluka-induluka, baalu balakonzya kusala kuti kupegwe makani aakucenjezya mbungano. Baalu bayakubelesya bupampu kubona naa bukkale bumwi mbubi kapati akuti bunyonganya bamwi cakunga inga kwayandika kupegwa makani aakucenjezya. Mwaambi uyakupa lulayo ilweelede kujatikizya bukkale oobo butali kabotu, pele takaambi zina lyamuntu ooyo weenda cakupilingana. Aboobo, aabo ibabuzyi bukkale bwaambwa mumakani bayakuleka kumvwana amuntu ooyo, nokuba kuti bayakuzumanana kuyanzana anguwe mumakani aakumuuya, ‘ikumulaya mbuli mukwesu.’

¹² Ambweni ntaamu njobabweza cakutazungaana Banakristo basyomeka iyakumugwasya ooyo iweenda cakupilingana kuti alisende akucinca nzila zyakwe. Eelyo nocalibonya antangalala kuti ooyo muntu waleka kweenda cakupilingana, takuciyandiki kumubona mbuli muntu uubikkidwe caando.

KUMANIZYA MILANDU IMWI

¹³ Kulisungula kujatila bamwi alimwi akubalekelela nobatulubizyila tacaambi kuti tatukwe makani anzyobatulubizyila naa kuti tulazizuminizya. Takuli kulubizya koonse ikukonzya kwaambwa kuti kulacitwa akaambo kakutalondoka nkotwakakona; alimwi tacili kabotu ikwiile kwiilanga buyo milandu mipati. (Lev. 19:17; Int. 141:5) Mucizuminano ca Mulawo, zibi zimwi zyakali kwaambwa kuti nzipati kwiinda zimbi, alimwi oobo mbocibede amububambe bwa Bunakristo.—1Joh. 5:16, 17.

¹⁴ Jesu wakabikka nzila iigaminide yakumanizya mapenzi mapati aakonzya kubuka akati ka Banakristo. Amubone ntaamu nzyaakaamba: “Ikuti munyoko wakubisizya, [1] koya ukamwaambile ncaalubizya kamuli nyobilo. Ikuti wakuswiilila, nkokuti wamupilusya munyoko. Pele kuti takuswiilili, [2] utolelezye muntu omwe naa bobilo, kutegwa kubumboni bwabakamboni bobilo naa botatwe makani oonse akasinizyigwe. Ikuti naa tabaswiilili, [3] ambila mbungano. Ikuti naa taiswiilili noiba mbungano, aabe kulinduwe mbubonya mbuli muntu wamasi alimwi ambuli simutelo.”—Mt. 18:15-17.

¹⁵ Kweelana acikozyanyo ncaakapa Jesu naakamana kupa malailile aaya, icilembedwe kuli Matayo 18:23-35, kulibonya kuti cibi cimwi caambwa kuli Matayo 18:15-17 cijatikizya makani aamali naa lubono, mbuli kukaka kujola cikwelete naa kuunina bamwi. Ambweni kulubizya ooko kulakonzya kujatikizya kubejekezya bamwi, kwalo ikukonzya kubisya zina lyamuntu umbi.

¹⁶ Ikuti kamujisi bumboni bwakuti umwi mumbungano wamucitila cibi cili boobo, mutafwambaani kuunka kubaalu kuyoobaambila kuti bamubambile twaambo. Mbubonya Jesu mbwaakalailila, amusaangune kwaambaula amuntu ooyo ngomulaakaambo anguwe. Amusole kubamba kaambo aako akati kanu nyobilo buyo kakunyina kubikkilizya muntu umbi. Kamuyeeyede kuti Jesu tanaakaamba kuti ‘uunke ciindi comwe buyo akumwaambila ncaalubizya.’ Aboobo, ikuti naa muntu ooyo wakaka kuuzumina mulandu alimwi tanaalomba kulekelelwa, inga cabota kusola kumusikila alimwi aciindi cimbi. Ikuti naa kaambo kabambwa munzila eeyi, ooyo iwakamulubizyila uyoolumba kuti tiimwakaambila bambi kujatikizya kulubizya kwakwe naa kumujaila zina mumbungano. Mwacita boobo, nkokuti ‘mwamupilusya munyoko.’

¹⁷ Ikuti naa ooyo iwakalubizya wauzumina mulandu wakwe, walomba kulekelelwa, alimwi wabweza ntaamu kutegwa alulamike ncaakalubizya, takuyandiki kwaatola kumbele makani aayo. Nokuba kuti ncaakalubizya cakali cipati, kaambo kamusyobo ooyu kalakonzya kumanizyigwa akati kabantu bobilo bajatikizyidwe.

¹⁸ Ikuti tiimwakonzya kumujola munyoko kwiinda mukumwaambila ncaalubizya “kamuli nyobilo,” mulakonzya kucita mbuli mbwaakaamba Jesu kuti, “utolelezye muntu omwe naa bobilo,” akwaambaula amunyoko ooyo alimwi. Aabo mbomutolelezya abalo beelede kuti kabajisi makanze aakupilusya munyoko. Inga cainda kubota ikuti kabali bakamboni baceeco ncomwaamba kuti ncaakamulubizyila, pele ikuti kakutakwe bakamboni ibakalibonena ameso, mulakonzya kulomba omwe naa bobilo kuti babe bakamboni nomubandika. Aabo balakonzya kuba baabo ibajisi luzyibo mukubamba makani aali boobo alimwi ibakonzya kuzyiba naa eeco cakacitika cililubide ncobeni. Baalu ibasalwa kuti babe bakamboni tabaiminini mbungano pe, mbwaanga kabunga kabaalu takali nkako cacigaminina ikabapa mukuli wakucita boobo.

¹⁹ Ikuti kaambo tiikamana nomwamana kusoleka cakwiinduluka-induluka kucita boobo—mwakaambaula anguwe kamuli nyobilo alimwi mwakamusikila kamuli amuntu omwe naa bobilo, alimwi mulimvwa kuti tamukonzyi kukaluba buyo—nkokuti makani aayo mweelede kwaambila balangizi bambungano. Kamuyeeyede kuti makanze aabo ngakubamba luumuno alimwi abusalali mumbungano. Mwamana kwaambila baalu, makani aayo mulaasiya mumaanza aabo akusyoma kuti Jehova ulaalanganya. Mutalekeli micito yamuntu umwi kuti imutyompye naa kumumanina lukkomano ndomujisi mumulimo wa Jehova.—Int. 119:165.

²⁰ Beembezi babutanga bayakwaavwuntauzya makani aanu. Ikuti naa calibonya antangalala kuti muntu ooyo ncobeni wakacita cibi cipati alimwi teempedwe amane tayandi kucinca akululamika ncaakacita, inga kwayandika kuti kkomiti yabalangizi imugusye mumbungano sizibi ooyo. Kwiinda mukucita boobo, bakwabilila butanga alimwi bapa kuti mbungano izumanane kusalala.—Mt. 18:17.

KULANGANYA MAKANI AAJATIKIZYA ZIBI ZIPATI

²¹ Zibi zipati, mbuli bwaamu, bumambe, koonana kwabasankwa naa bamakaintu balikke-likke, kusampaula Leza, luleyo, kukomba mituni, alimwi azibi zimbi zipati izili mbuli zyeezyi, taziyandiki buyo kulekelelwa amuntu wakabisyilwa pe. (1Kor. 6:9, 10; Gal. 5:19-21) Akaambo kakuti zibi zipati zili boobu zilakonzya kupa kuti mbungano kiitasalali kumuuya alimwi amukulilemeka, zyeelede kwaambwa kubaalu alimwi akulanganizyigwa ambabo. (1Kor. 5:6; Jak. 5:14, 15) Bantu bamwi balakonzya kusikila baalu kuti balyaambilile cibi ncobakacita naa kwaamba ncobazyi kujatikizya cibi ncaakacita muntu umwi. (Lev. 5:1; Jak. 5:16) Kunyina makani ambobasaanguna kwaamvwa baalu makani aajatikizya cibi cipati ncaakacita Kamboni umwi uubbapatizyidwe, baalu bobilo bayakusaanguna kwaavwuntauzya makani aayo. Ikuti naa kwajanika kuti makani ngobakaambilwa alaankoye alimwi kuli bumboni butondezya kuti cibi cipati cakacitwa ncobeni, kabunga kabaalu kayakusala kkomiti yalubeta yabaalu bataleli kuli botatwe kuti baalanganye makani aayo.

²² Baalu balipakamene kulanganya butanga, balasoleka canguzu kubukwabilila kuzintu zili zyoonse zikonzya kubunyonyoona kumuuya. Alimwi balasoleka kubelesya Jwi lya Leza cabusongo kuti basinse bantu bali boonse ibakalubizya alimwi akuti bapone kumuuya. (Jud. 21-23) Eeci cileendelana amalailile mwaapostolo Paulo ngaakapa Timoteyo naakalemba kuti: “Ndakulailila canguzu kumbele lya Leza a Kristo Jesu, ooyo uuyoobeteka baumi abafwu . . . kosinsa, kokalalila, alimwi kokulwaizya cakukkazika moyo kapati aluzyibo mukuyiisya.” (2Tim. 4:1, 2) Kucita boobo kulakonzya kutola ciindi cinji, pele eeci ncibeela camulimo ngobabeleka canguzu baalu. Mbungano ilalumba akaambo kakusoleka kwabo alimwi ibabona kuti “baleelela kupegwa bulemu kapati.”—1Tim. 5:17.

²³ Ciindi coonse nokujanika kuti cibi cakacitwa ncobeni, icipati ncobasola kucita balangizi nkugwasya sizibi kuti apone kumuuya. Ikuti naa sizibi weempwa ncobeni alimwi balangizi bamugwasya, ikumusinsa kali alikke naa akati kabakamboni bali boonse ibali kupa bumboni ciindi calubeta, kuyoopa kuti alaigwe alimwi akubapa kuyoowa aabo baliko aalubeta. (2Sam. 12:13; 1Tim. 5:20) Ciindi coonse muntu nasinswa mulubeta, kuli nzyalesyegwa kucita. Kwiinda mukucita boobo, sizibi ulakonzya kugwasyigwa “kululamika nzila” zyamaulu aakwe kuzwa waawo kuya kumbele. (Heb. 12:13) Mukuya kwaciindi, eelyo muntu ooyo naalibonya kuti wayumya kumuuya, ulazumizyigwa kutalika kucita zintu eezyo nzyaakalesyedwe kucita.

KWAAMBILIZYA KUSINSA

²⁴ Ikuti kkomiti yalubeta yabona kuti muntu ooyo weempwa pele cibi ncaakacita cilangilwa kuti ciyakuzyibwa mumbungano naa kubusena ooko nkwakkala naa ikuti mbungano iyandika kucenjela kujatikizya sizibi ooyo iweempwa, kuyakwaambilizyigwa mubufwaafwi kujatikizya muntu ooyo ku Muswaangano Wabuumi Amulimo. Kuyakwaambilizyigwa kuti: “Mukwesu naa mucizyi [Zina lyakwe] wasinswa.”

IKUTI KWASALWA KUTI SIZIBI AGUSYIGWE MUMBUNGANO

²⁵ Zimwi ziindi, sizibi ulakonzya kujanika kuti ulikakatide mucibi cakwe alimwi tayandi kumvwa nobasoleka kumugwasya. “Milimo yeendelana akweempwa” inga kaitalibonyi aciindi calubeta. (Mil. 26:20) Ino ncinzi ceelede kucitwa? Nozili boobo zintu, sizibi ooyo uuteempedwe uyandika kugusyigwa mumbungano, nkokuti kumulesya kuyanzana abantu ba Jehova basalala. Imuuya wakwe mubi ulagusyigwa mumbungano, calo icipa kuti mbungano ikwabililwe akuzumanana kusalala mumakani aakulilemeka alimwi akumuuya akuti izumanane kuba azina libotu. (Dt. 21:20, 21; 22:23, 24) Naakazyiba bukkale buusisya nsoni bwamuntu umwi wamumbungano yaku Korinto, mwaapostolo Paulo wakalailila baalu kuti ‘mumwaabe kuli Saatani mwaalumi ooyo kutegwa muuya wambungano ukafwutulwe.’ (1Kor. 5:5, 11-13) Paulo alimwi wakaamba kujatikizya bantu bamwi ibakagusyigwa mumbungano akaambo kakuzanga akuleya kuzwa mukasimpe mumwaanda wamyaka wakusaanguna.—1Tim. 1:20.

²⁶ Ciindi nokwasalwa kuti sizibi uuteempedwe agusyigwe mumbungano, kkomiti yalubeta yeelede kumuzyibya mbwaakosolwa makani muntu ooyo akumwaambila cakusalazya kaambo naa twaambo twamu Magwalo ncaagusyilwa mumbungano. Yamana kumwaambila mbwaakosolwa makani sizibi ooyo, kkomiti yalubeta iyoomwaambila kuti ikuti kayeeya kuti balubizya mulubeta alimwi uyanda kucita apiilu, ulakonzya kucita oobo kwiinda mukulemba lugwalo, cakusalazya alembe twaambo ncacitila apiilu. Kuzwa ciindi kkomiti noyamuzyibya kusala kwanjiyo, uyakupegwa mazuba aali ciloba kuti acite boobo. Ikuti naa kwatambulwa lugwalo lwaapiilu, kabunga kabaalu kayakuzyibya mulangizi wabbazu, eelyo walo uyakusala baalu ibeelela kuti babe mukkomiti yaapiilu kutegwa baaswiilile abalo makani aayo. Bayakusoleka canguzu ikwaaswiilila makani aayo mumvwiki yomwe kuzwa ciindi nobamana kutambula lugwalo lwaapiilu. Ikuti muntu ooyo wacita apiilu, kwaambilizya kuti wagusyigwa mumbungano kuyoosumpizyigwa. Naacilanganizyigwa makani aaya, muntu ooyo iwaambwa kuti wakacita cibi tazumizyidwe pe kwiingula akupaila lyamiswaangano alimwi akucita milimo yaalubazu.

²⁷ Ikupegwa ciindi cakucita apiilu ncitondezyo calubomba kumuntu iwaambwa kuti wakacita cibi alimwi cimupa coolwe cakuti matongoosi aakwe amvwugwe alimwi. Aboobo, ikuti sizibi tanaasika acaali kulubeta lwaapiilu, kuyakwaambilizyigwa kuti wagusyigwa mumbungano ikuti naa kwasolekwa kusikila mpoceela kuti babandike anguwe kulubeta.

²⁸ Ikuti sizibi katajisi muzeezo wakucita apiilu, kkomiti yalubeta iyakumupanduluda mbociyandika kuti eempwe alimwi antaamu nzyakonzya kubweza kutegwa kumbele aamazuba akeelele kupilusyigwa mumbungano. Kucita boobo kulagwasya alimwi citondezya luyando alimwi kweelede kucitwa abulangizi bwakuti muntu ooyo uyakucinca nzila zyakwe, mpoonya kumbele inga weelela kupiluka mumbunga ya Jehova.—2Kor. 2:6, 7.

KWAAMBILIZYA KUGUSYIGWA MUMBUNGANO

²⁹ Ciindi nokwayandika kumugusya mumbungano sizibi uuteempedwe, kuyakwaambilizyigwa mubufwaafwi kuti: “[Zina lyamuntu] tacili umwi wa Bakamboni ba Jehova.” Eeci ciyakucenjezya baabo ibasyomeka kuti baleke kuyanzana amuntu ooyo.—1Kor. 5:11.

KULIZANDULA

³⁰ Ibbala lyakuti “kulizandula” lyaamba ntaamu njabweza Kamboni uubbapatizyidwe pele ooyo acaali uufwutatila buumi bwakwe bwa Bunakristo kwiinda mukwaamba kuti taciyandi kubonwa, naa kwaambwa kuti ngumwi wa Bakamboni ba Jehova. Naa ulakonzya kusiya busena bwakwe mumbungano ya Bunakristo akaambo kamicito yakwe mwini, mbuli kwiinda mukunjila mumbunga iijisi makanze aakazyanya anjiisyo zyamu Bbaibbele, icaamba kuti ilabetekwa a Jehova Leza.—Is. 2:4; Ciy. 19:17-21.

³¹ Ikujatikizya baabo ibakasiya lusyomo lwabo lwa Bunakristo kuciindi cakwe, mwaapostolo Johane wakalemba kuti: “Bakazwa akati kesu, pele tiibakali bamwi besu; nkaambo ikuti nobakali bamwi besu, nobakazumanana kuba andiswe.”—1Joh. 2:19.

³² Ciindi muntu naalizandula, bukkale bwakwe mumeso aa Jehova buliindene kapati abwa Munakristo uutacisungweede, ooyo uutacitoli lubazu mumulimo wakukambauka. Muntu ulakonzya kuleka kusungwaala akaambo kakwaalilwa kubala Jwi lya Leza ciindi coonse. Naa ambweni wakajisi mapenzi naa wakali kupenzyegwa, kumane wakaleka kusungwaala kubelekela Jehova. Baalu kubikkilizya abamwi mumbungano balazumanana kumupa lugwasyo lwakumuuya ilweelede Munakristo uutacisungweede.—Rom. 15:1; 1Tes. 5:14; Heb. 12:12.

³³ Pele ikuti Munakristo wasala kulizandula mwini, kulaambilizyigwa mubufwaafwi kumbungano kuti: “[Zina lyamuntu] tacili umwi wa Bakamboni ba Jehova.” Muntu ooyo ucitwa mbubonya mbwacitwa muntu uugusyidwe mumbungano.

KUPILUSYIGWA MUMBUNGANO

³⁴ Muntu uugusyidwe mumbungano naa iwakalizandula ulakonzya kupilusyigwa mumbungano naapa bumboni busalede bwakuti weempwa alimwi kwaciindi cili mbocibede watondezya kuti ulibulekede bukkale bwakwe bubyaabi. Ulatondezya kuti uyanda kuba acilongwe alimwi a Jehova. Baalu babona masimpe kuti kwainda ciindi cikubwene—myezi minji, mwaka, nokuba kwiinda aawo, kweelana abukkale—kutegwa muntu atondezye kuti uleempedwe ncobeni. Kabunga kabaalu nokatambula lugwalo lwakulomba kupilusyigwa mumbungano, kkomiti yakupilusya iyoobandika amuntu ooyo. Kkomiti iyakulanga-langa bumboni ‘bwamilimo yeendelana akweempwa’ yamuntu ooyo akusala naa cileelela kumupilusya mumbungano aciindi eeco naa pe.—Mil. 26:20.

³⁵ Ikuti muntu uulomba kupilusyigwa mumbungano wakagusyilwa mumbungano iimbi, kkomiti yakupilusya yambungano nkwabede lino yeelede kuswaangana anguwe akulanga-langa kulomba kwakwe. Mpoonya ikuti kkomiti yakupilusya eeyo yabona kuti weelede kupilusyigwa, bayoolembela kabunga kabaalu kakumbungano iyakasaanguna kulanganya kaambo kakwe, ikubaambila ncoiyeeya. Imakkomiti aayo obilo ayoobelekela antoomwe kubona masimpe kuti twaambo toonse twalangwa-langwa alimwi akwaakosola cabululami makani. Pele kukosola kuti muntu ooyo apilusyigwe kulacitwa akkomiti yakupilusya yakumbungano iyakasaanguna kulanganya kaambo kakwe.

KWAAMBILIZYA KUPILUSYIGWA MUMBUNGANO

³⁶ Kkomiti yakupilusya noyakkutila kuti muntu ooyo uugusyidwe naa iwakalizandula uleempedwe ncobeni aboobo uyandika kupilusyigwa mumbungano, kupilusyigwa kwakwe kulaambilizyigwa mumbungano iyakasaanguna kulanganya kaambo kakwe. Ikuti muntu ooyo lino uli mumbungano imbi, weelede kwaambilizyigwa amwalo oomo. Kuyakwaambilizyigwa mubufwaafwi kuti: “[Zina lyamuntu] wapilusyigwa mumbungano, lino ngumwi wa Bakamboni ba Jehova.”

KULANGANYA ZIBI ZICITWA ABANA BASYOONTO BABBAPATIZYIDWE

³⁷ Zibi zipati izicitwa abana basyoonto ibabbapatizyidwe zyeelede kwaambwa kubaalu. Ciindi baalu nobalanganya cibi cipati icakacitwa amwana musyoonto, inga cainda kubota ikuti bazyali bamwana ooyo ibabbapatizyidwe kabaliko abalo. Beelede kubelekela antoomwe akkomiti yalubeta, ikutali kusola kuvwuninina mwanaabo iwakacita cibi kuti atapegwi cisubulo ceelede. Mbubonya mboicita noilanganya muntu mupati iwakabisya, kkomiti yalubeta ilasoleka kumusinsa akumujola sizibi. Pele ikuti mwana ooyo kateempedwe, ulagusyigwa mumbungano.

BASIKUMWAYA BATABBAPATIZYIDWE NOBACITA CIBI

³⁸ Ino ncinzi ceelede kucitwa ikuti basikumwaya ibatabbapatizyidwe bacita cibi cipati? Mbwaanga tabali Bakamboni ibabbapatizyidwe, tabakonzyi kugusyigwa mumbungano. Ambweni inga tabanazimvwisya zyeelelo zyamu Bbaibbele, aboobo lulayo ilupegwa amoyo mubombe lulakonzya kubagwasya “kululamika nzila” zyamaulu aabo.—Heb. 12:13.

³⁹ Ikuti sizibi uutabbapatizyidwe teempwi ciindi baalu bobilo nobaswaangana anguwe akusola kumugwasya, inga kwayandika kwiizyibya mbungano. Kulaambilizyigwa mubufwaafwi kuti: “[Zina lyamuntu] tacili sikumwaya uutabbapatizyidwe.” Mpoonya mbungano inoobona sizibi ooyo mbuli muntu wakunze. Nokuba kuti sizibi ooyo tabonwi kuti uligusyidwe mumbungano, Banakristo beelede kucenjela caboola kumakani aakuyanzana anguwe. (1Kor. 15:33) Kunyina malipooti aamulimo wamumuunda aayakutambulwa kuzwa kulinguwe.

⁴⁰ Mukuya kwaciindi, muntu uutabbapatizyidwe iwakalesyedwe kuba sikumwaya ulakonzya kuyanda kuba sikumwaya alimwi. Ikuti caba boobo, baalu bobilo bayakuswaangana anguwe akubona mbwaayaambele kumuuya. Ikuti naa uleelela, kuyakwaambilizyigwa mubufwaafwi kuti: “[Zina lyamuntu] waba sikumwaya uutabbapatizyidwe alimwi.”

JEHOVA ULABULONGEZYA BUKOMBI BWABANTU BASILUUMUNO ALIMWI BASALALA

⁴¹ Boonse ibazulilwa mumbungano ya Leza mazuba aano balakonzya kukkomana akaambo kaparadaiso yakumuuya iitaliboteli njaabapa Jehova bantu bakwe. Masimpe, imacelelo eesu aakumuuya azwide mweemvwe, alimwi tujisi meenda manji aakasimpe aakatalusya. Kunze lyaboobo, Jehova ulatukwabilila kwiinda mububambe bwakwe ibuli mumaanza aa Kristo mutwe wambungano. (Int. 23; Is. 32:1, 2) Ikuba muparadaiso yakumuuya mumazuba aano aamamanino aazwide mapenzi kutupa kulimvwa kuti tulikwabilidwe.

⁴² Kwiinda mukuzumanana kuba aluumuno abusalali mumbungano, tulazumanana kumwesya mumuni wesu wakasimpe ka Bwami. (Mt. 5:16; Jak. 3:18) Kwiinda mukulelekwa a Leza, tunookkomana kubona bantu abambi banji ibamuzyiba Jehova alimwi ibatusangana mukucita kuyanda kwakwe.