Ibabunyina Bakamantene

KWAMYAKA iitandila ku 1,500, Jehova Leza wakali kweendelezya cisi ca Israyeli kabali bantu bakwe baitwa azina lyakwe. Mpoonya Jehova ‘wakabikkila maano kubantu bamasi kuti mulimbabo ajane bantu bazina lyakwe.’ (Mil. 15:14) Bantu bazina lya Jehova bakali kuyooba bakamboni bakwe, ibakamantene mumizeezo alimwi amumicito kunyina makani acisi nkobakkala munyika. Lukamantano lwabantu ibaitwa azina lya Leza lwakali kuyoocitika akaambo kamulimo Jesu ngwaakapa basikumutobela naakati: “Kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala, mukabayiisye kutobela zintu zyoonse nzyondakamulailila.”—Mt. 28:19, 20.

² Kwiinda mukulyaaba kwanu kuli Jehova alimwi akubbapatizyigwa, mwaba sikwiiya wa Jesu Kristo. Muli cibeela cabunyina bwa Banakristo bakamantene nyika yoonse mboizulwa, aabo ibatalekeli cisi, musyobo naa kwiindana kwabuvwubi mbobajisi kubaandaanya. (Int. 133:1) Akaambo kaceeci, mulabayanda alimwi akubalemeka Banakristonyoko mumbungano. Bamwi akati kabaaba ambweni mbamubala umbi, mbakucisi cimbi naa baliindene lwiiyo andinywe alimwi ambweni tiimwakali kulyatana ambabo musyule oomu akaambo kakwiindana ooku. Lino mujisi cilongwe iciyeeme aluyando lwabunyina iciyumu kapati kwiinda cilongwe cili coonse icikonzya kuba akati kabantu bazwa mubukkale bomwe, cikombelo comwe naa mukwasyi omwe.—Mk. 10:29, 30; Kol. 3:14; 1Pet. 1:22.

KUCINCA MBOTUYEEYA

³ Ikuti bamwi cilabakatazya kuleka kusalaulana akaambo kamubala, cisi, bukkale naa makani aambi buyo, beelede kuyeeya Banakristo bakusaanguna iba Juda, aabo ibakaleka kusalaula bantu bamasi aambi oonse akaambo kabukombi bwabo bwaci Juda. Ciindi Petro naakaambilwa kuti aunke kuŋanda yasikalumamba muna Roma uutegwa Korneliyo, caluyando Jehova wakamugwasya Petro kulibambila kucita mulimo ooyo.—Mil., caand. 10.

⁴ Mucilengaano, Petro wakaambilwa kuti ajaye akulya banyama bamwi aabo ba Juda mbobakali kubona kuti balisofweede kweelana amulawo. Petro naakakaka, ijwi kuzwa kujulu lyakamwaambila kuti: “Koleka kwaamba zintu Leza nzyaasalazya kuti zilisofweede.” (Mil. 10:15) Leza wakacita kubweza ntaamu buya kutegwa Petro acince mizeezo yakwe kujatikizya mulimo ngwaakalaafwaafwi kupegwa, nkokuti wakuswaya muntu wamasi. Naakatobela malailile aa Jehova, Petro wakaambila bantu bakabungene kuti: “Mulizyi kabotu kuti cilatondwa kumu Juda ikuyanzana naa kuswaya muntu wamusyobo uumbi, pele lino Leza wanditondezya kuti tandeelede kwaamba muntu uuli woonse kuti ulisofweede naa kuti tasalali. Nkakaambo kaako tiindakakaka kuboola nindakaitwa.” (Mil. 10:28, 29) Kuzwa waawo, Petro wakalibonena bumboni bwakuti Jehova wakamutambula Korneliyo alimwi amukwasyi wakwe.

⁵ Saulo waku Tarso, imu Farisi uuyiide kapati, wakeelede kulicesya kutegwa ayanzane abantu mbaatakali kuyanzana limwi naaceya musyule. Alimwi mane wakali kuyandika kutambula malailile kuzwa kulimbabo. (Mil. 4:13; Gal. 1:13-20; Flp. 3:4-11) Amuyeeye buyo mbobakacinca kuyeeya kwabo bantu mbuli Sergio Paulu, Dionisiyo, Damarisi, Filimoni, Onesimo, alimwi abamwi nobakatambula makani mabotu alimwi akuba basikwiiya ba Jesu Kristo.—Mil. 13:6-12; 17:22, 33, 34; Flm. 8-20.

KUSUMPULA LUKAMANTANO LWESU MUNYIKA YOONSE

⁶ Cakutadooneka luyando ndobatondezya bakwesu abacizyi mumbungano lwakamugwasya nywebo kuba acilongwe a Jehova akuba afwaafwi ambunga yakwe. Mwakalibonena citondezyo cini-cini caluyando iluzyibya basikwiiya ba Jesu Kristo beni-beni, mbubonya Jesu mbwaakaamba kujatikizya ndulo kuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:34, 35) Kuyungizya waawo, mwakayandisya Jehova alimwi ambunga yakwe nomwakabona kuti luyando luli mumbungano ncitondezyo caluyando luliko akati kabakwesu munyika yoonse mboizulwa. Lino muli mukulibonena mbobuzuzikizyigwa businsimi bwamu Bbaibbele ibujatikizya kuyobololwa kwabantu kumazuba aamamanino kuti bakombe Jehova muluumuno alukamantano.—Mik. 4:1-5.

⁷ Twalanga zintu zinji izyaandaanya bantu mazuba aano, nguni wakali kunga wayeeya kuti inga cakonzyeka kukamantanya bantu “ibazwa muzisi zyoonse, mumisyobo yoonse, mumikowa yoonse alimwi amumilaka yoonse”? (Ciy. 7:9) Amuyeeye buyo kwiindana kuliko akati kabantu basumpukide mulwiiyo lwakupanga zintu alimwi abaabo ibacitobela zilengwa zyakaindi. Amubone mazwanga aaliko muzikombelo akati kabantu bamubala omwe alimwi bamucisi comwe. Akaambo kakuyandisya cisi cabo, bantu mazuba aano baindila kwaandaana azisi zimbi. Alimwi ikuti mwalanga-langa kwiindana kwabuvwubi mbobajisi bantu kubikkilizya azintu zimbi zinji izyaandaanya bantu, ikukamantanya bantu ibazwa muzisi zyoonse, mumilaka yoonse, misyobo yoonse, abukkale boonse, kuti babe aluyando luyumu alimwi aluumuno maleele aakonzya kucitwa buyo a Leza Singuzuzyoonse.—Zek. 4:6.

⁸ Pele lukamantano luli boobu nkoluli ncobeni, alimwi ciindi nomwakalyaaba akubbapatizyigwa kamuli Kamboni wa Jehova, mwakaba cibeela candulo. Akaambo kakuti mulagwasyigwa alukamantano oolu, mujisi mukuli wakugwasyilizya kulusumpula. Eeci cilacitwa kwiinda mukutobela majwi aamwaapostolo Paulo aali kulugwalo lwa Bagalatiya 6:10 aakuti: “Kufwumbwa leelyo notujisi coolwe, atucitile bantu boonse milimo mibotu, pele kapati ibaciinga cesu calusyomo.” Alimwi tuccilila lulayo oolu lwakuti: “Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda. Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.” (Flp. 2:3, 4) Kufwumbwa kuti twaliyiisya kubona bakwesu abacizyi mbuli mbwababona Jehova ikutali mbuli mbobalibonya atala, tuyoozumanana kukkala muluumuno alimwi amulukkomano ambabo.—Ef. 4:23, 24.

KUBIKKILANA MAANO

⁹ Mbubonya mwaapostolo Paulo mbwaakatupa cikozyanyo, mbungano tayaandeene pe, pele boonse ibali mumo balabikkilana maano. (1Kor. 12:14-26) Nokuba kuti inga katukkalene kulamfwu kapati abakwesu bamwi mubunyina bwesu bwanyika yoonse, tulabubikkila maano bukkale bwabo. Ikuti bakwesu bamwi kabapenzyegwa, toonse tulausa kapati. Ikuti bamwi kabapengede naa bacitikilwa ntenda, nkondo naa manyongwe aamucisi, toonse inga tulilibambilide kujana nzila mbotukonzya kubagwasya kumuuya alimwi akumubili.—2Kor. 1:8-11.

¹⁰ Toonse tweelede kubapailila bakwesu abacizyi buzuba abuzuba. Bamwi balasunkwa kucita zintu zibi. Bambi bainda mumapenzi ambweni aazyibidwe abantu banji. Kumane bambi balakazyigwa abantu mbobabeleka limwi alimwi abamumukwasyi batakombi, imapenzi aatazyibidwe abantu banji. (Mt. 10:35, 36; 1Tes. 2:14) Zyoonse eezyi tulazibikkila maano akaambo kakuti tuli babunyina banyika yoonse. (1Pet. 5:9) Akati kesu kuli baabo ibabeleka canguzu mumulimo wa Jehova, ibasololela mumulimo wakukambauka alimwi amumbungano. Alimwi kuli baabo ibalanganya mulimo wanyika yoonse. Boonse aaba bayandika mipailo yesu, yalo iili ninzila mbotutondezya kuti tulabayanda alimwi tulababikkila maano ncobeni, noliba leelyo swebo lwesu notutakonzyi kucita cintu cili coonse kuti tubagwasye.—Ef. 1:16; 1Tes. 1:2, 3; 5:25.

¹¹ Akaambo kamanyongwe aavwulide munyika kumazuba aano aamamanino, bantu ba Jehova beelede kulibambila kugwasyanya. Zimwi ziindi ntenda zyacibukilambuta, mbuli mizuzumo yanyika akupaya kwameenda, zipa kuti kuyandike kucita mulimo mupati wakupa lugwasyo alimwi akubikka bubambe bwakuyobolola zintu zinji zyakugwasya bantu kumubili. Banakristo bamumwaanda wamyaka wakusaanguna bakapa cikozyanyo cibotu mumakani aaya. Kabayeeyede lulayo lwa Jesu, caluyandisisyo basikwiiya mumasi aambi bakatumina ibanyina zipego mu Judaya ciindi nokwakali nzala. (Mil. 11:27-30; 20:35) Mwaapostolo Paulo wakeendelezya mulimo wakupa lugwasyo oolo cakunga zintu zyoonse zyakacitwa munzila yeelede. (2Kor. 9:1-15) Mazuba aano, ciindi bakwesu nobacitikilwa ntenda alimwi anobayandika kugwasyigwa kumubili, mbunga yesu alimwi a Munakristo umwi aumwi balafwambaana kubweza ntaamu yakugwasya akupa zintu ziyandika.

IBASALIDWE KUCITA KUYANDA KWA JEHOVA

¹² Bunyina bwesu bwanyika yoonse ibukamantene bulilibambilide kucita kuyanda kwa Jehova. Aciindi cino, Leza uyanda kuti makani mabotu aa Bwami akambaukwe munyika yoonse kuti bube bumboni kumasi oonse. (Mt. 24:14) Notucita mulimo ooyu, Jehova uyanda kuti katulilemeka kweelana azyeelelo zyakwe zyakulilemeka izisumpukide. (1Pet. 1:14-16) Toonse tuyandika kulibombya kubeenzuma alimwi akubeleka katujisi makanze aakutolaambele makani mabotu. (Ef. 5:21) Kwiinda lyoonse, ecino tacili ciindi cakuyandaula buyo zintu nzyotuyanda tobeni pe, nciindi cakubikka Bwami bwa Leza kumbele mubuumi bwesu. (Mt. 6:33) Ikuyeeya kaambo aaka notubelekela antoomwe mukumwaya makani mabotu kutupa kukkomana akukkutila lino, eelyo kumbele kuyootupa kutambula zileleko izitamani.

¹³ Mbotuli Bakamboni ba Jehova, tulilibedelede, tulisalidwe akati kabantu boonse mbotuli bantu basalala, ibasungu kubelekela Leza wesu. (Tit. 2:14) Kukomba Jehova kutupa kuba bantu baindene abamwi. Tatubeleki buyo calukamantano abakwesu munyika yoonse pele alimwi twaambaula mwaambo omwe wakasimpe akucita zintu kweelana akasimpe nkotwaambaula. Eeci cakasinsimwa ciindi Jehova naakaamba kwiinda mumusinsimi Zefaniya kuti: “Ndiyoosandula mwaambo wabantu kuba mwaambo uusalala, kutegwa boonse kabaita zina lya Jehova, akuti kabamubelekela calukamantano.”—Zef. 3:9.

¹⁴ Mpoonya Jehova wakasololela Zefaniya kupandulula mbobubede bunyina bwanyika yoonse mbotujisi mazuba aano kuti: “Ibasyeede akati kabana Israyeli tabakaciti zintu zitaluleme; tabakaambi zyakubeja pe, alimwi mukanwa lyabo tamukajaniki mulaka walweeno; bayoolya akulyoonena, alimwi kunyina muntu naba omwe uuyoobayoosya.” (Zef. 3:13) Akaambo kakuti tulalimvwisya Jwi lya Jehova lyakasimpe alimwi twacinca mizeezo yesu akutalika kupona kweelana azyeelelo zya Jehova, tulakonzya kubeleka calukamantano. Tucita zintu izilibonya kuti tazikonzyeki mumeso aabantu ibabona zintu munzila yabuntu. Masimpe tuli bantu balibedelede ncobeni, bantu ba Leza, ibamulemeka munyika yoonse.—Mik. 2:12.