Ino Mbuti Banakristo Mbobakonzya Kuba Alukamantano Lwini-Lwini?
1 Ino ncinzi cikonzya kukamantanya bantu bainda kutuulunzuma tuli cisambomwi bazwa mumanyika aali 234 amumisyobo iili 380? Kukomba Jehova Leza kolikke nkokukonzya kubakamantanya. (Mik. 2:12; 4:1-3) Bakamboni ba Jehova balizyi kuti lukamantano lwini-lwini lwa Banakristo lulakonzyeka akaambo kazintu zibacitikila mazubaano. Mbotuli “tanga lyomwe” lyeembelwa amweembezi omwe, tulikanzide kukazya muuya wanyika uupa kwaandaana.—Joh. 10:16; Ef. 2:2.
2 Imakanze aa Leza ataalilwi kucitika ngakuti, ibangelo abantu boonse bakamantane kukukomba kwakasimpe. (Ciy. 5:13) Akaambo kakuzyiba mbociyandika eeci, Jesu wakapailila lukamantano oolu kuti lube akati kabasikumutobela. (Joh. 17:20, 21) Ino mbuti aumwi mbwakonzya kukulwaizya lukamantano mumbungano ya Bunakristo?
3 Ilukamantano Mbolukonzya Kujanwa: Kuti kakunyina Ijwi lya Leza amuuya, ilukamantano lwa Bunakristo talukonzyi kukonzyeka pe. Ikucita nzyotubala mu Bbaibbele ciya kupa kuti muuya wa Leza kautusololela kakunyina mapenzi. Eeci citupa kulondola ‘lukamantano lupa Muuya Uusalala, tusoleke kulumba luumuno oolu lutuswaanganya.’ (Baefe. 4:3, Ci) Citupa kuti katweengelelana. (Kol. 3:13, 14; 1 Pet. 4:8) Sena mulatola ambele lukamantano kwiinda mukuzinzibala kuyeeya Ijwi lya Leza abuzuba?
4 Imulimo wesu wakukambauka akugwasya bantu kuba basikwiiya awalo ulatukamantanya. Notubeleka abamwi mumulimo wa Bunakristo, ‘tulwida lusyomo lwa Makani Mabotu’ alimwi “tu[ba] basikubelekanyina mumilimo yalusinizyo.” (Flp. 1:27; 3 Joh. 8) Notucita boobu, zyaanzyo zyaluyando mumbungano zilayuma. Sena inga tamwaambili umwi ngomwaabelekede limwi kaindi, kuti mubeleke limwi mumulimo wamumuunda nsondo iino?
5 Tuli acoolwe kuba bamwi babunyina bwanyika yoonse bolikke bwakasimpe anyika sunu. (1 Pet. 5:9) Ino-ino bantu banji bakalibonena ameso lukamantano mbolwakabede Kumiswaangano ya Masi yakajisi mutwe wakuti, “Amumulemeke Leza.” Umwi aumwi wesu weelede kugwasyilizya kulutola ambele lukamantano kwiinda mukubala Ijwi lya Leza abuzuba, kumanizya mazwanga munzila yaluyando alimwi akwiinda mukukambauka makani mabotu “camoyo omwe.”—Rom. 15:6.