Mukwasyi wa Jehova Ulaa Lukamantano Lubotu

“Ncobeni ncintu cibotu cibotezya, na babunyina bakala kabotu antoomwe.”—INTEMBAUZYO 133:1.

1. Ino mikwasyi minji ili muciimo nzi sunu?

IMUKWASYI uli mumapenzi sunu. Mumikwasyi minji, lukwatano lunengetede buyo. Kulekana ciyabuba cintu cinyinzi, alimwi bana banji babantu balekene bali mumause aatalikomeneni. Mamiliyoni aamikwasyi tiikondwi alimwi tiikamantene pe. Nokuba boobo nkuuli mukwasyi uukondwa ncobeni alimwi uulaa lukamantano lwini-lwini. Ooyu mmukwasyi wakoonse-koonse iwa Jehova Leza. Mulinguwo, zyuulu azyuulu zyabangelo balabeleka milimo njobatumidwe kweendelana akuyanda kwa Leza. (Intembauzyo 103:20, 21) Pele sena kuli mukwasyi aalo anyika uulaa lukamantano luli boobu?

2, 3. (a) Mbaani sunu ibali mumukwasyi wa Leza wakoonse-koonse alimwi inga twabakozyanisya aanzi Bakamboni ba Jehova sunu? (b) Mmibuzyo nzi njotutibandike?

² Mwaapostolo Paulo wakalemba kuti: “Ndilafugama kuli Taata, kuzwa kulinguwe mukwasyi oonse uuli mujulu auli ansi ulaitwa azina lyakwe.” (Baefeso 3:14, 15, Ci) Kufwumbwa mulongo wamikwasyi waanyika, ulyuulikidwe zina akaambo ka Leza, nkaambo ngo Mulengi. Nokuba kuti kunyina mikwasyi yabuntunsi kujulu, munzila yacikozyanyo, Leza uliikwete mbunga yakwe yakujulu, alimwi Jesu uyooswaangana anabwiinga wakwe wakumuuya kujulu. (Isaya 54:5; Luka 20:34, 35; 1 Ba-Korinto 15:50; 2 Ba-Korinto 11:2) Bananike basyomeka anyika lino ncibeela camukwasyi wa Leza wakoonse, azyalo “mbelele zimwi” zya Jesu izilaa bulangizi bwaanyika zilalangilwa kuunjila mukwasyi ooyu. (Johane 10:16; Ba-Roma 8:14-17; Ngazi Yamulindizi yamucingisi naa yamu Chichewa iya January 15, 1996, peeji 31) Nokuba boobo boonse Bakamboni ba Jehova sunu balakonzya kukonzyanizigwa amukwasyi wanyika yoonse mbwiizulwa uukamantene.

³ Sena nywebo momuli omu mumukwasyi mubotu waakati kamasi iwababelesi ba Leza? Kuti kamulimo, mulijisi cilongezyo cimwi cipati kwiinda imuntu uuli woonse ncanga wajana. Imamiliyoni aabantu inga apa bumboni bwakuti mukwasyi wa Jehova iwanyika yoonse mbwiizulwa—imbunga yakwe iilibonya—nkasensa kaluumuno alukamantano mucimpayuma canyika yamanyongwe alimwi alwaandaano. Ino inga lwapandululwa buti lukamantano lwamukwasyi wa Jehova wanyika yoonse mbwiizulwa? Alimwi nzintu nzi izileta lukamantano luli boobu?

Ncintu Cibotu Cibotezya!

4. Mumajwi enu nobeni, mbuti mbomunga mwacaamba eco nciyaamba Intembauzyo 133 kujatikizya lukamantano lwabunyina?

⁴ Sintembauzyo Davida wakali kulumba kapati ikubaa lukamantano lwabunyina. Mane mumuuya uusalala wakalwiimba buya! Amweezeezye buyo nkwalizya kantimbwa kakwe kumwi kaimba kuti: “Ncobeni ncintu cibotu cibotezya, na babunyina bakala kabotu antoomwe. Cili mbuli mafuta aayandika aatilwa amutwe, aakunkila kucilezu, cilezu ca-Aroni, aakunkila kunsingo yacikobela cakwe. Cili mbuli mume wakucilundu ca-Herimoni, uukunkila azilundu zya-Zioni. Nkaambo nkukooko Jehova nkwaakalailila kuti kube coolwe, nkokuti coolwe cabuumi butamani.”—Intembauzyo 133:1-3.

5. Kutobela Intembauzyo 133:1, 2, nkukonzyanisya nzi kucitwa akati kabana Israyeli alimwi ababelesi ba Leza ibasunu?

⁵ Aayo majwi akali kwaamba lukamantano lwabunyina ilwakajisi bantu ba Leza bansiku, ibana Israyeli. Ciindi nobakali mu Jerusalemu kumapobwe abo otatwe aamwakaa mwaka, ncobeni bakali kukkala kabotu antoomwe. Nokuba kuti bakali bamikowa-mikowa, bakali mukwasyi omwe. Ikubaamwi kwakali kubagwasya kapati, mbuli mafwuta aakunanika aalaa bunumfwu bubotelezya. Ciindi mafwuta ali boobu naakatilwa amutwe wa Aroni, akakunka acilezu cakwe akuyoosika ansingo yacikobela cakwe. Kubana Israyeli, ikubaamwi cakali cintu cigwasya icakali kubeleka mubantu boonse babungene antoomwe. Mazwanga akali kubandikwa, elyo eci cakali kuleta lukamantano. Kuli lukamantano luli boobu mumukwasyi wa Jehova iwanyika yooonse mbwiizulwa sunu. Ikuswaangana lyoonse abasyominyina kulabagwasya boonse banamukwasyi munzila yakumuuya. Kufwumbwa kuti kwaba kutamvwana kabotu naa kuzwangana zintu zilalulamikwa ciindi Jwi lya Leza nolibelesyegwa. (Matayo 5:23, 24; 18:15-17) Bantu ba Jehova balalumba kapati kukulwaizyanya ikuzwa mulukamantano lwabo lwabunyina.

6, 7. Mbuti lukamantano lwa Israyeli mbulwakali mbuli mume wa Mulundu wa Herimoni, alimwi nkuli zilongezyo zya Leza nkozijanika sunu?

⁶ Ino kubaamwi kwakali buti mbuli mume wa Mulundu wa Herimoni kubana Israyeli? Mbokunga ikuzwa atala lyalwizi kuli mamita aali 2,800 kusika eni-eni atala aamulundu, alajanika caanda kwacibeela cipati camwaka. Aawa atala lya Herimoni aali caanda apa kulemya-lemya kwamaanzi aali mumuuwo masiku, aboobo aya aleta mume munji-munji uusyuusya syokwe muciindi cilamfwu cacilimo. Muuwo uutontola uuzwa kumalundu aaku Herimoni ulakonzya kuyumuna sikunku kutozya kumusanza kuyoosika mane nokuba kucilawo ca Jerusalemu, kwalo nkwalemenena akuba mume. Aboobo sintembauzyo wakaliluzi naakaamba “mume wakucilundu ca-Herimoni, uukunkila azilundu zya-Zioni.” Cabota ciyeezyo eco icamuuya uukatalusya walo uuleta lukamantano mumukwasyi wabakombi ba Jehova!

⁷ Niyatakaningabambwa imbungano ya Bunakristo, Zioni, naa Jerusalemu, wakali ngomunzi mupati wabukombi. Aboobo momumo Leza mwaakalailide kuti mube zilongezyo. Mbokunga munzila yacikozyanyo, Intalisyo yazilongezyo yakakkede mu Jerusalemu, izilongezyo zyakali kunoomwaigwa ikuzwa mumo. Pesi akaambo kakuti bukombi bwini-bwini tabuciyeeme buyo abusena buli boonse, izilongezyo, luyando, alimwi alukamantano lwababelesi ba Leza zilajanika nyika yoonse mbwiizulwa sunu. (Johane 13:34, 35) Ino nzintu nzi zimwi zileta lukamantano olu?

Izintu Zileta Lukamantano

8. Ncinzi ncotwiiya kujatikizya lukamantano ilwaambwa kuli Johane 17:20, 21?

⁸ Lukamantano lwabakombi ba Jehova luyeeme akutobela Jwi lya Leza iliteeledwe kabotu, kubikkilizya aziyiisyo zya Jesu Kristo. Kwiinda mukutumwa kwa Mwanaa Jehova munyika eyi kuti ape bumboni bwakasimpe alimwi akuzoofwa lufwu lwacipaizyo, kwakajuka nzila yakuti kubambwe mbungano ya Bunakristo iikamantene. (Johane 3:16; 18:37) Ikaambo kakuti kwakeelede kuba lukamantano lwini-lwini akati kabasimbungano kakasalazigwa ciindi Jesu naakapaila kuti: “Tabali aba balo mbenkombela, pele abaabo boonse abandisyoma nkaambo kejwi lyabo, kuti boonse babe bamwi, mbuli nduwe Taata mboli mulindime, amebo mulinduwe, kuti abalo mbubonya babe mulindiswe, kuti inyika ikasyome kuti nduwe owakandituma.” (Johane 17:20, 21) Basikutobela Jesu ncobeni bakakonzya kujana lukamantano mbuli loolo luli akati ka Leza a Mwanaakwe. Eci cakacitika akaambo kakuti bakatobela Jwi lya Leza alimwi aziyiisyo zya Jesu. Ciimo nciconya eco cili akati kazintu zileta lukamantano mumukwasyi wa Jehova wanyika yoonse mbwiizulwa sunu.

9. Ino muuya uusalala ulaa lubazu nzi mulukamantano lwabantu ba Jehova?

⁹ Acimwi cintu icikamantanya bantu ba Jehova ncakuti tujisi muuya wa Leza uusalala, naa inguzu zyakwe. Utupa kukonzya kuteelela kasimpe ka Jwi lya Jehova kutegwa tumubelekele mulukamantano. (Johane 16:12, 13) Muuya ulatugwasya kutantamuka micito yanyika yaandaanya, mbuli mazwanga, munyono, bukali, alimwi akukwelana. Muciindi cazeezi, muuya wa Leza uzyala micelo iikamantanya mulindiswe, mbuli luyando, kukondwa, luumuno, busicamba, buuya, bubotu, lusyomo, bubombe, alimwi akulyeendelezya.—Ba-Galatiya 5:19-23.

10. (a) Nkweenzyanya nzi ikunga kwacitwa akati kaluyando lwamumukwasyi wabantu uukamantene alimwi aluyando ilulibonya akati kabaabo bakomba Jehova? (b) Ino umwi Sikabunga Keendelezya wakaamba kuti ulimvwa buti kujatikizya babunyina bakumuuya?

¹⁰ Ibamumukwasyi uukamantene, balakkomana kubaamwi. Mbweena abalo bali mumukwasyi wabakombi ba Jehova uukamantene balamuyanda walo, a Mwanaakwe, alimwi abasyominyina. (Marko 12:30; Johane 21:15-17; 1 Johane 4:21) Mbweena mukwasyi wini-wini waluyando mbuukondwa kulya zilyo antoomwe, aabo bakomba Leza balakkomana kujanika kumiswaangano ya Bunakristo yambungano, iyabbazu, ayacooko kutegwa bakagwasyigwe kwiinda mukuvwelana aabantu babotu alimwi amuli cakulya cakuumuuya citaliboteli. (Matayo 24:45-47; Ba-Hebrayo 10:24, 25) Umwi wa Kabunga Keendelezya ka Bakamboni ba Jehova wakaapandulula boobu makani: “Kulindime, kuswaangana antoomwe abakwesu, kuli akati kazintu ziinda kundibotela akundikulwaizya mubuumi bwangu. Ndilayandisya kuba ku Ŋanda ya Bwami nkeli akati kabataanzi kusika, akuba akati kabasyaalizi kukuzwa, kuti kacikonzeka. Ndilakondwa kapati mumoyo ciindi nendili mukwaambaula abantu ba Leza. Ciindi nendi akati kabo, ndilaliiba antoomwe abamukwasyi wangu.” Sena andinywe mbomulimvwa obo?—Intembauzyo 27:4.

11. Muumulimo nzi kapati Bakamboni ba Jehova mobajana lukkomano, alimwi ncinzi cizwa mukubikka mulimo wa Leza ambele mubuumi bwesu?

¹¹ Mukwasyi uukamantene ulakkomana ikucitilaamwi zintu. Mbweena aabo bali mumukwasyi wabakombi ba Jehova balakondwa abalo kukambaukilaamwi Bwami akucitilaamwi mulimo wakupa kuti bantu babe basiciiya antoomwe. (Matayo 24:14; 28:19, 20) Ikutola lubazu mulinguwo lyoonse kulapa kuyanzana abambi Bakamboni ba Jehova. Ikubikka mulimo wa Leza ambele mubuumi bwesu akwalo kulauyungizya muuya wamukwasyi akati kesu.

Bulondo bwa Teokrasi Bulayandika

12. Ino mbube nzi bwamukwasyi uukkomana uukamantene, alimwi mbubambe nzi bwakali kuleta lukamantano mumbungano ya Bunakristo yamumwaanda wakusaanguna?

¹² Imukwasyi uujisi bweendelezi buyumu, pele ibwaluyando alimwi bwabulondo, ulalangilwa kukamantana akukkomana. (Ba-Efeso 5:22, 33; 6:1) Jehova ngu Leza waluumuno abulondo, alimwi boonse abo ibali mumukwasyi wakwe bamubona kuti ngo “Sijulu wamajulu.” (Daniele 7:18, 22, 25, 27; 1 Ba-Korinto 14:33) Alimwi balazumina kuti usalide Mwanaakwe, Jesu Kristo, sikukona zyoonse zintu akumupa nguzu zyoonse kujulu aansi. (Matayo 28:18; Ba-Hebrayo 1:1, 2) Kali Silutwe Kristo, imbungano ya Bunakristo nimbunga yabulondo, alimwi ilikamantene. (Ba-Efeso 5:23) Ibusolozi bwamilimo yambungano mumwaanda wamyaka wakusaanguna bwakali kucitwa akabunga keendelezya mwalo mwakali baapostolo alimwi “abapati” basimide munzila yakumuuya. Yomwe-yomwe mbungano yakajisi balangizi basalidwe, naa baalu, alimwi abakutausi. (Incito 15:6; Bafilipi 1:1, Ci) Ikumvwida baabo bakali mubusolozi kwakali kuleta lukamantano.—Ba-Hebrayo 13:17.

13. Mbuti Jehova mbwaobola bantu, alimwi ncinzi ciletwa akucita boobo?

¹³ Lino sena obu bulondo butondezya kuti lukamantano lwabakombi ba Jehova lwakali kuletwa aabweendelezi bubeleka, pele ibutakwe luzyalo? Peepe! Kunyina lunya pe muli Leza nomuba mumbunga yakwe. Jehova ulabaobola bantu kwiinda mukubatondezya luyando, aboobo mwakaa mwaka myaanda yabantu ilalisungula alimwi ilakondwa kunjila mumbungano ya Jehova kwiinda mukubbapatizigwa ikutondezya kulyaaba kwabo kuli Leza. Balaa muuya uli mbuli wa Joshua, walo wakaambila bana Israyelinyina kuti: “Amulisalile buzuba obuno ngumuyanda kubelekela . . . Pele mebo abasiŋanda bangu tulabelekela Jehova.”—Joshua 24:15.

14. Nkaambo nzi ncotunga twaambila kuti mbunga ya Jehova njateokrasi?

¹⁴ Mbotuli akati kamukwasyi wa Jehova, kunze lyakukondwa tulaliiba. Kuli boobu akaambo kakuti mbunga yakwe njateokrasi. Bwami bwa Leza mbwateokrasi (ndibbala lizwa mumabala aa Cigiliki the·osʹ, leza, alimwi a kraʹtos, bulelo). Mbulelo bucitwaa Leza, ibusalwa akukkazikwa anguwe. “Cisi cisalala” ca Jehova cinanike cilalibombya kubulelo bwakwe, aboobo acalo ncateokrasi. (1 Petro 2:9) Siteokrasi Mupati, Jehova mbwali ngo Mubetesi wesu, Similawo, alimwi a Mwami, tujisi kaambo kabotu ikakuliibila. (Isaya 33:22) Nokuba boobo, ino kuti kwaba kwiimpana kumwi ikulangilwa kunyonyoona kukondwa kwesu, kuliiba alimwi alukamantano?

Kabunga Keendelezya Kakatola Ntaamu

15, 16. Nkwiimpana nzi ikwakaba mumwaanda wamyaka wakusaanguna, alimwi nkaambo nzi?

¹⁵ Kutegwa lukamantano lwamukwasyi lutabililwe, kulakonzya kuyandika kululamika makani nokwaba kwiimpana. Amweezeezye kuti kwayandika kumana penzi limwi kutegwa lutabililwe lukamantano lwamukwasyi wa Leza iwabakombi bakwe mumwaanda wamyaaka wakusaanguna C.E. Ncinzi cakali kunga cilacitika? Ikabunga keendelezya kakali kunga katola ntaamu, kwiinda mukukosola makani aajatikizya zyakumuuya. Tulijisi malembe aamu Magwalo aaluula ntaamu iili boobu iyakatolwa.

¹⁶ Kutandila kumwaka wa 49 C.E., ibakabunga keendeelezya bakaswaangana mu Jerusalemu kuti babandike penzi limwi pati kutegwa batabilile lukamantano “[lwa]ciinga ca Leza.” (Ba-Efeso 2:19) Myaka iili 13 eyo yakaindide, mwaapostolo Petro wakakambaukilide Korneliyo, aboobo Bamasi bakusaangana bakaba basyomi babbapatizidwe. (Incito, caandaano ca 10) Mulweendo lwa Paulo lwakusaanguna mubumishinali, Bamasi banji bakabuzumina Bunakristo. (Incito 13:1–14:28) Atwaambe kuti kwakatalisyidwe mbungano ya Banakristo Bamasi mu Antiokeya yaku Suriya. Bamwi Banakristo bama Juda bakali kusyoma kuti Bamasi basanduka beelede kupalulwa akutobela Mulawo wa Musa, kakuli bambi bakali kukazya. (Incito 15:1-5) Eli penzi nilyakakonzya kumaninizya buya kuleta lupyopyongano, nokuba kupa kuti kubambwe mbungano zyobile zyaandeene, yabama Juda aya Bamasi. Aboobo kabunga keendelezya kakafwambaana kutola ntaamu ikutabilila lukamantano lwa Bunakristo.

17. Ninzila nzi yalukamantano yateokrasi iipandululwa mu Incito caandaano ca 15?

¹⁷ Mbuli bwaamba Incito 15:6-22, “bakabungana baapostolo abapati kuti baambaule makani aya.” Ibambi bakajanika akati kabo bakali baiminizi baku Antiokeya. Kusaanguna Petro wakapandulula kuti ‘amulomo wakwe bamasi bakamvwa Makani Mabotu, alimwi bakasyoma.’ Mpoona “bantu boonse” bakaswiilila Barnaba a Paulo nobakali kuluula “zitondezyo amalele ngaakabacitya Leza kuli bamasi.” Ikuzwaawo Jakobo wakapa muzeezo wakwe wambuli mbuunga ulaingulwa mubuzyo oyo. Nobakamana kukosola makani ibakabunga keendelezya, twaambilwa kuti: “Kwakababotela baapostolo abapati, antoomwe embungano yoonse, kuti batumine ku-Antiokeya bantu abakasalwa kulimbabo, antoomwe aba-Paulo a-Barnaba.” Aabo “bantu abakasalwa”—Juda a Sila—bakatola lugwalo lwakukulwaizya kubasyominyina.

18. Kabunga keendelezya kakakosola buti makani aajatikizya Mulawo wa Musa, alimwi mbuti eci mbocakabajatikizya Banakristo bama Juda alimwi a Bamasi?

¹⁸ Ilugwalo lwakwaambilizya mbuli mbwaakakosolwa makani a kabunga keendelezya, lwakatalika amajwi aaya: “Tobaapostolo ababunyina bapati tulamwaanzya nobabunyina bamasi baku-Antiokeya, aku-Suriya, aku-Kilikiya.” Kumuswaangano oyu kwakajanika abantu bambi, pele kulibonya kuti “baapostolo abapati” mbabakali kubalilwa mukabunga keendelezya. Muuya wa Leza wakabasololela, nkaambo lugwalo lwaamba kuti: “Kwakabotela Muuya Uusalala, aswebo, kuti tutamubikili mukuli mulemu uuinda ezi izyeelede, zyakuti mulikasye kulya izipailwa mizimo akubulowa, akulizisinwa, akumamambi.” (Incito 15:23-29) Banakristo teebakayandika kuti kabapalulwa akutobela Mulawo wa Musa. Ooku kukosola kwamakani kwakagwasya Banakristo bama Juda alimwi a Bamasi kuti babeleke akwaambaula mulukamantano. Imbungano zyakakondwa, alimwi lukamantano lwakazumanana, mbubonya mbulucita mumukwasyi wa Leza iwanyika yoonse mbwiizulwa sunu kwiinda mubusolozi munzila yakumuuya ibwa Kabunga Keendelezya ka Bakamboni ba Jehova.—Incito 15:30-35.

Kamubeleka Mulukamantano Lwateokrasi

19. Nkaambo nzi lukamantano ncoluvwulide mumukwasyi wabakombi ba Jehova?

¹⁹ Lukamantano lulavwula ciindi banamukwasyi nobagwasyanya. Ncimwi buyo akwalo kubakombi ba Jehova. Mbobakali basiteokrasi, ibaalu abambi bambungano yamumwaanda wamyaka wakusaanguna bakabelekela Leza cakweendelana akabunga keendelezya alimwi bakazumina nzyokakali kusala. Mulugwasyo lwakabunga keendelezya, baalu ‘bakakambauka Makani’ alimwi basimbungano boonse ‘bakali kwaamba cintu comwe.’ (2 Timoteo 4:1, 2; 1 Ba-Korinto 1:10) Aboobo ngamwi aamu Magwalo masimpe aakali kukambaukwa mumulimo akumiswaangano ya Bunakristo, mube mu Jerusalemu, ku Antiokeya, ku Roma, ku Korinto, nokuba kumbi buyo. Teokrasi iili boobu asunu nkwiili.

20. Kutegwa tutabilile lukamantano lwesu lwa Bunakristo, ncinzi ncotweelede kucita?

²⁰ Kutegwa tutabilile lukamantano lwesu, toonse notuli akati kamukwasyi wa Jehova wanyika yoonse mbwiizulwa tweelede kujatisya kutondezya luyando lwateokrasi. (1 Johane 4:16) Tweelede kulibombya kukuyanda kwa Leza alimwi akumulemeka kapati ‘muzike musyomesi’ alimwi a Kabunga Keendelezya. Mbubonya mbuli kulyaaba kwesu kuli Leza, akwalo kumvwida kwesu nkwakulisungula alimwi kulapa kukondwa. (1 Johane 5:3) Ino sintembauzyo wakakuswaanganya kabotu kaka ikukondwa akumvwida! Wakaimba kuti: “Amutembaule Jehova. Uli acoolwe muntu uulemeka Jehova, uuyandisya milazyo yakwe.”—Intembauzyo 112:1.

21. Mbuti mbotunga twasinizya kuti tuli basiteokrasi?

²¹ Jesu, Silutwe wambungano, ngusiteokrasi loko alimwi lyoonse ulacita kuyanda kwa Wisi. (Johane 5:30) Aboobo atutobele Sikutunaanizya kwiinda mukucita kuyanda kwa Jehova munzila yateokrasi alimwi mulukamantano cakweendelana kapati ambunga Yakwe. Mpoona mukukondwa kwamoyo woonse alimwi akulumba, tulakonzya kwiindulula nyimbo yasintembauzyo iyakuti: “Ncobeni ncintu cibotu cibotezya, na babunyina bakala kabotu antoomwe.”

Inga Mwaingula Buti?

◻ Mbuti lukamantano lwesu lwa Bunakristo mboluswaangene a Intembauzo 133?

◻ Ino nzintu nzi zimwi zileta lukamantano?

◻ Nkaambo nzi bubambe bwateokrasi ncobuyandika kapati kulukamantano lwabantu ba Leza?

◻ Mbuti kabunga keendelezya kamumwaanda wamyaka wakusaanguna mbokakatola ntaamu kutabilila lukamantano?

◻ Ino kubeleka mulukamantano lwateokrasi caamba nzi kulindinywe?

[Cifwanikiso icili apeeji 13]

Ibakabunga keendelezya bakatola ntaamu ikubambilila lukamantano