Musa Wakasala Kukomba Jehova

Mu Egepita, mukwasyi wa Jakobo wakazikwiitwa kuti bana Israyeli. Ciindi Jakobo a Josefa nobakafwa, Farao mupya wakatalika kulela. Farao ooyu wakayoowa nkaambo bana Israyeli bakatalika kuba anguzu kwiinda bana Egepita. Aboobo Farao wakabapanga kuba bazike bana Israyeli. Wakali kubasinikizya kuuma zitina alimwi akubabelesya calunya mumyuunda. Pele ciindi bana Egepita nobakali kubasinikizya kubeleka kapati, bana Israyeli bakali kuyaabuvwula kapati. Farao cakamucima eeci, aboobo wakalailila kuti bana bavwanda basankwa boonse ibazyalwa kabajaigwa. Kociyeeyela buyo mbobakayoowa bana Israyeli!

Mukaintu muna Israyeli wazina lya Jokebedi wakajisi mwana musankwa mubotu. Kutegwa amukwabilile, wakamubikka mubbasiketi akwiisisa mumatete aakali mu Mulonga wa Nile. Mucizyi wamwana ooyu, Miriamu, wakakkala afwaafwi kutegwa abone cakali kuyoocitika.

Mwana musimbi wa Farao naakaunka kuyoosamba kumulonga, wakabona bbasiketi. Naakaivwununa, wakajana mwana uulila, aboobo wakamumvwida luse. Miriamu wakabuzya kuti: ‘Sena nduunke ndikakwiitile mukaintu uukonzya kukulelela mwana ooyu?’ Ciindi mwana wa Farao musimbi naakaamba kuti inzya, Miriamu wakaunka kuyakwiita banyina mwana, ba Jokebedi. Mwana musimbi wa Farao wakati kulinguwe: ‘Komubweza mwana ooyu, undilelele, eelyo ndinookuvwozya.’

Ciindi mwana naakakomena, Jokebedi wakamuleta kumwana musimbi wa Farao, walo iwakamuulika kuti Musa alimwi akumukomezya kali mwanaakwe. Musa wakakomena kali mwana wamwami alimwi wakali kupegwa kufwumbwa ncaakali kuyanda. Pele Musa kunyina naakamuluba Jehova. Wakalizyi kuti wakali muna Israyeli, kutali muna Egepita. Alimwi wakasala kubelekela Jehova.

Naakaba amyaka iili 40, Musa wakayeeya kugwasya bana Israyelinyina. Ciindi naakabona muna Egepita kauma muna Israyeli, Musa wakauma muna Egepita akumujaya, mpoonya mubili wakausisa mumusenga. Farao naakaazyiba makani aaya, wakali kuyanda kumujaya Musa. Pele Musa wakatijila ku Midiani. Kali kookuya, Jehova wakamulanganya.