Bakacita Kuyanda kwa Jehova

Lusyomo lwa Bazyali Lwakabaa Mpindu

KUBANA ba Israyeli, kuzyalwa kwa mwana mulombe kwakali kuleta kukkomana kupati. Cakali kwaamba kuti mulongo wamazyalane uyakutolelela alimwi akuti cikono canyika ciyakusyaala mumukwasyi. Pele kutandila kumwaka wa 1593 B.C.E., ikuzyala mwana mulombe kutegwa kwakaboneka kuba lutuko kutali cilongezyo kuba Hebrayo. Nkaambo nzi? Nkaambo Farao wa Egepita, mbwaakayoowede mweelwe waba Juda mbowakavwula cakufwambaana kapati mubusena mbwayendelezya, wakabikka mulawo wakuti boonse bana balombe bakali kuzyalwa ciindi eeci bakeelede kujaigwa.—Kulonga 1:12, 15-22.

Kwakali kuciindi eci cakusola mucito mubyaabi loko ooyu wacijayejaye ba Amramu a Jokebedi, banabukwetene ba Hebrayo, nibakazyala mwana mulombe uuyebeka. Ncuuba-uba kuyeeya mbuli kukkomana kwabo mbokwakasanduka kuba kuyoowa kupati nobakaibaluka mulawo wa Farao. Pele, ba Amramu a Jokebedi nobakayebela mwana wabo mulombe, bakasala cakusinizya kuti batamulekelezyi, kabanyinaa makani azyakali kuyakubacitikila.—Kulonga 2:1, 2; 6:20.

Kubeleka mu Lusyomo

Kwamyeezi yotatwe Amramu a Jokebedi bakalimusiside mwana wabo. (Kulonga 2:2) Nokuba boobo ooku kwakali kulyeetela mapenzi nkaambo kakuti ba Hebrayo abana Egepita bakalibambene kapati kukkala. Kufwumbwa muntu wajanika kasoleka kusotoka mulawo wa Farao wakali kulangilwa kupegwa cisubulo ca lufwu—naba mwana weelede kufwa awalo. Ono ncinzi buya aaba bazyali bakalisungwide boobu ncobakali kunga bacita kuti bavwune mwana wabo alwabo ibeni?

Jokebedi wakabungika matete aatana sima amatuvwu aawo. Matete ncisyango cilaa cisiko ciyumu, icikozyanya amasumpo, alimwi aayo alaa cisiko cilaa mbazu zyotatwe, icisika mbuli munwe. Alakonzya kusika kumamita aali 6 mubulamfwu. Bana Egepita bakali kuubelesya musamu ooyu mukubamba mapepa, minseme, masaili aamumeenda, mpato alimwi amaato masyoonto mauba-uba.

Jokebedi wakapanga cinzuma munga mwakkala mwana wakwe kuzwa kumibili yazisiko zyamatete. Mpoona wakacisyungululaa bulongo abunzuka kutegwa cijatane alimwi akuti kacitanjizyi meenda. Jokebedi mpoona wakabikka mwana wakwe mukati kacinzuma akati kamatete kumbali aankomwe ya Mulonga wa Nile.—Kulonga 2:3.

Imwana Wajanwa

Mwana musimbi wa Jokebedi, Miriamu, wakaima munsi-munsi kutegwa abone cakali kuya kucitika. Mpoona mwana musimbi wa Farao wakasika ku mulonga wa Nile kuzyi kusamba.a Ndiza Jokebedi wakalizyi kuti mwana musimbi wamwami wakali kuvwula kuba kubusena bwa Mulonga Nile oobu ncaakacisiila nkuko cinzuma kutegwa cijanwe kufwambaana. Eelyo aboobo mwana musimbi wa Farao wakabukaa kucibona kacisyonkedwe akati kamatete, wakaita omwe wabalanda bakwe kuti acibweze. Naakabona mwana kalila mukati, wakamufwida luzyalo. Wakazyiba kuti ooyu wakali mwana muna Hebrayo. Pele, ino inga wayanda buti kuti mwana mubotu boobu ajaigwe? Kunze lya buuya bwakuzyalwaa bwalo, mwana musimbi wa Farao kutegwa wakaongelezegwa akuzumina kwabana Egepita kwakazizyilwe kapati kwakuti kutambulwa kujulu kwakasimpide aakubaa mpuwo mbotu kuncito zyabuuya ciindi umwi aumwi nacipona.b—Kulonga 2:5, 6.

Miriamu, walo wakali kulangilizizyaa laale, wakaswenena kumwana musimbi wa Farao. “Sa njinke kuyookuyandawida sikumulela akati kabanakazi ba-Hebrayo, kuti akulelele mwana?” wakabuzya. Mwana musimbi wamwami wakavwiila: “Koya” Miriamu wakabalika waya waita banyina. Tiilyakalampa, Jokebedi wakaliimvwi kale munsi lya mwana musimbi wa Farao. “Bweza oyu mwana, undilelele,” mwana musimbi wamwami waakamwaambila kuti “nookuvozya mali.” Cilakonzeka kuti aciindi eeci mwana musimbi wa Farao wakazyiba kuti Jokebedi ngowaali mbabanyina bamwana.—Kulonga 2:7-9.

Jokebedi wakamulela mwana wakwe kusikila mane waba mulesi.c Eeci cakamupa ziindi zibotu zinji kuti amuyiisye zya Leza wakasimpe, Jehova. Mpoona Jokebedi wakamubweedezya kumwana musimbi wa Farao, walo wakamuulika izina lyakuti Musa, lyaamba kuti ‘wakanunwa mumaanzi.’—Kulonga 2:10.

Ciiyo Kuli Ndiswe

Amramu a Jokebedi bakacibelesya cini-cini ciindi cisyoonto ncobakalaa mwana wabo kuti bamuyiisye malailile aabukombi busalala. Bazyali bamazubaano baleelede kucita mbubwena. Mukasimpe, ncintu cipati alimwi ceelede kuti bacite oobo. Saatani Diabolosi “uleendeenda mbuli syuumbwa wabutambo uuya buyandaula ngwatilye.” (1 Pita 5:8, Ci) Mbayandisya kunyonyauna mbaabo bakubusi bayandika loko—basimbi abasankwa— balo bajisi coolwe kumbele cakuba basimilimo baluleme ba Jehova. Maccu! Aakaka, taaku nabamvwidaa luzyalo nomuba muciindi cabukubusyi bwabo. Mukuzyiba ceeci, bazyali basongo balayiisya bana babo kabacili basyoonto, ikuyoowa Leza wakasimpe, Jehova.—Tusimpi 22:6; 2 Timoteo 3:14, 15.

Kuba Hebrayo 11:23, ikusungwaala kwaba Amramu a Jokebedi ikusisa mwana wabo kwa myeezi yotatwe yakusaanguna yabuumi bwakwe kwalembwa kuba incito ya lusyomo. Aaba bazyali basikuyoowa Leza bakatondezya lusyomo munguzu zivwuna zya Jehova ciindi nobakakaka kumulekelezya mwana wabo, aboobo akaambo kakaaka bakalongezegwa. Andiswe tweelede kutondezya lukakatilo kumilawo amalailile aa Jehova, kumwi katusinizizye kuti kufwumbwa Jehova ncaazumizya kutucitikila, mukuya kwaciindi ciya kutuletela bukkale bubotu bwa ciindi coonse aluumuno.—Ba-Roma 8:28.

Bupanduluzi buyungizidwe