Jehova Wamugwasya Jehosafati

Jehosafati, mwami wa Juda, wakazinyonyoona zipaililo zya Baala alimwi abaleza bakubeja. Wakali kuyanda kuti bantu baizyibe milawo ya Jehova. Aboobo wakatuma basilutwe aba Levi mu Juda moonse kutegwa bakayiisye bantu milawo ya Jehova.

Zisi izyakali afwaafwi zyakali kuyoowa kulwana cisi ca Juda nkaambo zyakalizyi kuti Jehova wakali abantu bakwe. Mane buya bakali kuleta zipego ku Mwami Jehosafati. Pele bana Moabu, bana Amoni, alimwi abana Seiri bakaboola kuzoolwana cisi ca Juda. Jehosafati wakalizyi kuti uyandika lugwasyo lwa Jehova. Wakaambila bamaalumi, bamakaintu, alimwi abana kuti baboole ku Jerusalemu. Kaimvwi kumbele lyabo boonse wakapaila kuti: ‘Jehova, kuti tiitwagwasyigwa anduwe, tatukonzyi kuzunda pe. Twalomba kuti utwaambile cakucita.’

Jehova wakaingula kuti: ‘Mutayoowi. Ndilamugwasya. Amwiime mumasena aanu, mwiime nji, akubona mbonditiimufwutule.’ Ino Jehova wakabafwutula buti?

Buzuba bwakatobela mafwumofwumo, Jehosafati wakasala baimbi akubaambila kuti babe kumbele aabasikalumamba. Bakeenda kuzwa mu Jerusalemu mane kusikila kubusena nkobakali kulwanina ibutegwa Tekowa.

Ciindi baimbi nobakali kumutembaula Jehova kwiinda mukwiimba cakukondwa, Jehova wakabalwanina nkondo bantu bakwe. Wakanyonganya bana Amoni abana Moabu cakuti bakatalika kujayana mulicabo alimwi kunyina naba omwe wakafwutuka. Pele Jehova wakabavwuna ba Juda, basikalumamba alimwi abapaizi. Bantu boonse ibakali muzisi zyakeengelede bakamvwa Jehova ncaakacita, aboobo bakazyiba kuti Jehova wakacili kubagwasya bantu bakwe. Ino Jehova ubafwutula buti bantu bakwe? Ulacita oobo munzila zinji. Tayandiki kugwasyigwa abantu kutegwa acite boobo.