Basikalumamba ba Jehovah Ibayaka Mulilo

Mwami waku Siriya, Beni-hadadi, wakazumanana kulwana bana Israyeli. Pele musinsimi Elisha lyoonse wakali kumucenjezya mwami wa Israyeli, aboobo wakatija. Mpoonya Beni-hadadi wakayeeya buyo kujata Elisha. Bakamwaambila kuti Elisha wakali mumunzi wa Dotani, mpoonya wakatuma basikalumamba bana Siriya kuti bakamujate.

Bana Siriya bakaboola ku Dotani masiku. Mafwumofwumo, mubelesi wa Elisha naakazwa anze wakajana kuti munzi ulizingulukidwe abasikalumamba banji kapati. Wakayoowa akoompolola kuti: ‘Elisha, ino tulacita buti?’ Elisha wakamwaambila kuti: ‘Aabo mbotuli limwi mbanji kwiinda baabo mbobali limwi.’ Aciindi nciconya eeco, Jehova wakapa kuti mubelesi wa Elisha abone kuti mumalundu moonse kuzinguluka munzi kwakazwide mabbiza aamulilo alimwi ankalaki zyankondo.

Ciindi basikalumamba bana Siriya nobakasola kuti bamujate Elisha, wakapaila kuti: ‘Akaka Jehova koboofwazya.’ Cakutayeeyela, nokuba kuti bakacili kubona, basikalumamba tiibakali kucikonzya kuzyiba nkobakabede. Elisha wakaambila basikalumamba kuti: ‘Mwasweeka. Amunditobele, ndilamutola kumuntu ngomuyandaula.’ Bakamutobela Elisha mane ku Samariya nkwaakali kukkala mwami wa Israyeli.

Mpoonya bana Siriya bakazyiba nkobakabede. Lino mwami wa Israyeli wakabuzya Elisha kuti: ‘Sena ndibajaye?’ Sena Elisha wakabona kuti eeci ncecoolwe cakuti apilusye cibi kubantu aaba ibakali kuyanda kumujaya? Peepe. Elisha wakati: ‘Utabajayi pe. Kobapa zyakulya mpoonya ubaleke baunke.’ Aboobo mwami wakabapangila pobwe pati, kumane wakabaleka kuti baunke kwabo.