Mbaani Bayoofwutuka “Buzuba bwa-Jehova”?

“Nywebo muleelede kuba bantu bali buti mukweenda munzila iisalala amukulemeka Leza? [Ka]mucilangila akuyandisya buzuba bwakusika kwa-Leza.”—2 PETRO 3:11, 12.

1. Mbaani babeleka amuuya alimwi anguzu zya Eliya?

JEHOVA LEZA wasala akati kabantu aabo bantu bayakuba basikukona limwi a Mwanaakwe Jesu Kristo mu Bwami bwakujulu. (Ba-Roma 8:16, 17) Banakristo bananike babeleka amuuya anguzu zya Eliya nobacili aansi. (Luka 1:17) Mucibalo cainda, twakabona kuti milimo yabo imwi yalikukozyanya aya musinsimi Eliya. Ino yalo milimo ya musinsimi Elisha iwakali simulya zina wa Eliya mbuti?—1 Bami 19:15, 16.

2. (a) Ino wakacita maleele nzi aamamanino Eliya, alimwi Elisha wakacita maleele nzi aakusaanguna? (b) Ino ncisinizyo nzi ciliko cakuti Eliya taakaunka kujulu?

² Maleele aamamanino ngaakacita Eliya akali kujatikizya kwaandaanya maanzi aamu Mulonga wa Jordano kwiinda mukwaaumya jansi lyakwe lyabusinsimi. Eeci cakapa kuti Eliya a Elisha bazubuke anyika njumu. Nobakacili kuyabweenda kulubazu nkouli kujwe mulonga, iguwo lyakamunyamuna Eliya lyamutola kubusena bumbi bwanyika. (Amubone kabbokesi aapeeji 12 kamutwe wakuti “Nkuujulu nzi Nkwaakatanta Eliya?”) Ijansi lyabusinsimi lya Eliya lyakacaala musule. Elisha naakalyuumya maanzi aamu Jordano, akaandaana alimwi maanzi, elyo wakakonzya kubweeda, wazubukilaa nyika njumu. Aya maleele akatondezya munzila itakwe abudooneke kuti Elisha ngosimulya zina wa Eliya mumulimo wakusumpula bukombi bwakasimpe mu Israyeli.—2 Bami 2:6-15.

Ciimo Cabunaleza Cilayandika

3. Ino ncinzi Paulo a Petro ncobakaamba kujatikizya kubako kwa Jesu alimwi ‘abuzuba bwa-Jehova’?

³ Kakuli kwainda myaanda yamyaka kuzwa ciindi lyakali kupona Eliya a Elisha, bamaapostolo ba Paulo a Petro kuboola ‘kwabuzuba bwa-Jehova’ bakakuswaanganyaa kubako kwa Jesu Kristo alimwi ‘ajulu ipya anyika mpya’ zyakacili kulangilwa ciindi eco. (2 Ba-Tesalonika 2:1, 2; 2 Petro 3:10-13) Ikutegwa tukafwutuke buzuba bupati bwa Jehova—ciindi Leza nayakunyonyoona basinkondonyina akufwutula bantu bakwe—tweelede kuyandaula Jehova akuba bantu babombe alimwi ibaluleme. (Zefaniya 2:1-3) Pele kuli acimbi ciimo cilibonya kuti cilayandika ikuti twalanga zintu zyakacitika kujatikizya musinsimi Elisha.

4. Ino busungu ncintu cipati buti mumulimo wa Jehova?

⁴ Ibusungu mumulimo wa Leza bulayandika kapati kutegwa tukafwutuke “buzuba bwa-Jehova.” Eliya a Elisha bakali basungu mumulimo wa Jehova. Abalo Banakristo bananike baceede balamubelekela Jehova cabusungu sunu alimwi balapa cikozyanyo mukukambauka makani mabotu.a Ikuzwa mumyaka yaakati-kati yamuma 1930, balikukulwaizya boonse batambula makani aa Bwami ibalangila kupona kukabe kutamani aanyika kuti balyaabe kuli Jehova akubbapatizigwa. (Marko 8:34; 1 Petro 3:21) Akaambo kakukulwaizigwa oku, bantu basika kutuulunzuma tuli mbotubede babweza ntaamu yeelede. Kale-kale bakali mumudima munzila yakumuuya alimwi bakalifwide mucinyonyoono, pele lino baiya kasimpe ka Leza, babaa bulangizi bwabuumi butamani muparadaiso anyika alimwi balisungweede mumulimo wa Jehova. (Intembauzyo 37:29; Ciyubunuzyo 21:3-5) Akaambo kabusungu bwabo, muuya wakubelekelaamwi awakusamausya ngobajisi alimwi amilimo yabo imbi mibotu, baleta lukatalusyo lupati kubanyinaa Kristo ibakumuuya ibacili aanyika.—Matayo 25:31-46.

5. Nkaambo nzi ncocili cipati kapati kucitila ‘babunyina’ Jesu zintu zibotu, alimwi tujisi zikozyanyo nzi zyaciindi ca Elisha?

⁵ Aabo bacitila ‘babunyina’ ba Jesu zintu zibotu akaambo kakuti aaba bantu bananike mbaasikumutobela Jesu balijisi bulangizi bwakufwutuka “buzuba bwa-Jehova.” Banabukwetene bamwi kumunzi waku Sunemu bakalelekwa kapati akaambo kaluse ndobakamutondezya Elisha amubelesi wakwe alimwi akubasamausya nkobakabasamausya. Aaba banabukwetene teebakajisi mwana, alimwi mulumi wakalicembeede. Pele Elisha wakasyomezya mukaintu oyu muna Sunemu kuti uyoozyala mwana mulombe, eci cakacitika. Ooyu mwana mulombe iwakali ngobakajisi alikke naakafwa kakuli kwainda myaka, Elisha wakaya ku Sunemu waakumubusya. (2 Bami 4:8-17, 32-37) Ikaka bakalumbulwa kapati akaambo kakusamausya Elisha!

6, 7. Ncikozyanyo nzi ncaakasiya Naamani, alimwi eci ciswaangene buti akufwutuka “buzuba bwa-Jehova”?

⁶ Ikulibombya kulayandika kutegwa tutambule malailile aamu Bbaibbele aazwa ‘kubanyina’ ba Kristo ikutegwa tube aabulangizi bwakufwutuka buzuba bwa Jehova. Naamani mupati wabasilumamba waku Suriya iwakali kuciswa cipele naa cinanta wakali kuyandika kulibombya kutegwa atobele muzeezo wakapegwa akana kasimbi kazike kana Israyeli kuti aye ku Israyeli kuyakuyandaula lugwasyo lwakusilikwa kuli Elisha. Muciindi cakuzwa muŋanda yakwe kutegwa akamucinge Naamani, Elisha wakatuma mulomo, wakati: “Koya ukasambe ziindi zili musanu azibili mu-Jordano, elyo nyama yako iyoosanduka, uyoosalala.” (2 Bami 5:10) Akaambo kakulisumpula, eco teecakamukonda Naamani pe, wakanyema, pele naakaunka cakulibombya akulinika muli Jordano ziindi zili musanu azibili, “nyama yakwe yakasanduka, yaba mbuli nyama yamwana muniini, aboobo wakasalazigwa.” (2 Bami 5:14) Katana bweeda kuya kuŋanda, Naamani wakeenda musinzo woonse kupilukila ku Samariya kuyoolumba musinsimi wa Jehova. Katayandide kujana mpindu yakumubili kunguzu nzyaakamupa Leza, Elisha wakazwa waya kukucinga Naamani, pele wakakaka kutambula cipego cili coonse. Naamani wakaambila Elisha cakulibombya, wakati: “Ndemulanda wako nsikooyoocita limbi zipaizyo niziba zituuzyo kumizimu imbi cita kuli-Jehova luzutu.”—2 Bami 5:17.

⁷ Akaambo kakutambula lulayo lwamu Magwalo iluzwa kubananike, ibantu basika kutuulunzuma tuli mbotubede balelekwa sunu. Kunze lyaboobo, aaba bantu balomene basalazigwa munzila yakumuuya akaambo kalusyomo ndobajisi mucipaizyo ca Jesu cacinunuzyo. Lino bajisi coolwe cakuba balongwe ba Jehova Leza a Jesu Kristo. (Intembauzyo 15:1, 2; Luka 16:9) Alimwi kulipa nkobalipa kuli Leza akumilimo yakwe kuyoolumbulwa kwiinda mukufwutulwa kwabo kulunyonyooko lutamani ‘lwabuzuba bwa-Jehova,’ ilulaafwi kuboolela basizibi ibateempwi.—Luka 13:24; 1 Johane 1:7.

“Mbobani Bayanda Ndime? Mbani?”

8. (a) Aabo bayoofwutuka “buzuba bwa-Jehova” bakulanga buti kucita luyando lwa Leza? (b) Ino wakatumwa mulimo nzi Jehu? (c) Ino ncinzi cakali kuzoocitikila Jezebeli?

⁸ Aabo balangila kufwutuka “buzuba bwa-Jehova” tabeelede kuwayawaya nobacita kuyanda kwa Leza. Eliya cakutayoowa wakasinsima kunyonyoonwa kwamukwasyi wabujayi wa Mwami Ahabu wakali kukomba Baala. (1 Bami 21:17-26) Pele oolu lunyonyooko kalutanacitwa, Elisha simulya zina wa Eliya wakeelede kumanizya mulimo watakaninga mana. (1 Bami 19:15-17) Ciindi ca Jehova nocakakkwana, Elisha wakalailila mubelesi wakwe kuti aunke akananike Jehu mupati wabasilumamba kutegwa abe ngomwami mupya wa Israyeli. Sikutumwa naakamana kutila Jehu mafwuta amutwe, wakamwaambila kuti: “Mbuboobu mbwaamba Jehova Leza wa-Israyeli. Ndakunanika kuti ube mwami wabantu ba-Leza, ba-Israyeli. Lino uleelede kunyonyoona luzubo lwa-Ahabu simalelo wako, kuti nkaliye inkoto kuli-Jezebeli yabulowa bwabalanda bangu basinsimi ayabulowa bwabalanda boonse ba-Jehova. Luzubo loonse lwa-Ahabu luyoonyonyooka.” Jezebeli Mukamwami oyu mubi uyoosowelwa babwa alimwi takazikkwi pe.—2 Bami 9:1-10.

9, 10. Ino majwi aa Eliya akazuzikizigwa buti kujatikizya Jezebeli?

⁹ Ibantu ba Jehu bakakkomana akunanikwa kwakwe akumwaambilizya kuti ngomwami mupya wa Israyeli. Ndilyonya Jehu wakazuzaanina kuya ku Jezreeli kuyootalika mulimo wakwe wakunyonyoona basiluleyo basololi babukombi bwa Baala. Ngwaakasaanguna kujaya amuvwi Jehu, Mwami Joramu mwanaa Ahabu. Ooyu Mwami Wakatanta bbiza wazwa mumunzi waya kuyoobuzya naa Jehu wakaboola caluumuno. “Kulaba buti luumuno, mavuule aabanyoko Jezebeli amalozi aakwe naacili manji?” Mbwaakaingula obo Jehu. Ucimana kwaamba boobo Jehu, wakayasa Joramu abuta bwakwe, muvwi waakuugama buya moyo wakwe.—2 Bami 9:22-24.

¹⁰ Bamakaintu banaleza baleeleba kuba mbuli Jezebeli nokuba kukozya baabo bali mbuli nguwe. (Ciyubunuzyo 2:18-23) Ciindi Jehu naakasika ku Jezreeli, Jezebeli wakalisolede kulibotya-botya. Wakalanga ampulungwido akumwaanzya cakunyansya. Jehu wakabuzya babelesi ba Jezebeli wati: “Mbobani bayanda ndime? Mbani?” Ndilyonya basimilimo bobile nanka botatwe bakalanga ansi. Sena bakali kulubazu lwa Jehu? Wakabaambila, wati, “Amumuwaale ansi.” Mpoona-mpoona bakamuwaala Jezebeli mukaintu mubyaabi ansi kuzwa ampulungwido. Kuboneka anga wakalyataulwa amabbiza. Ibantu nobakaboola kutegwa bamuzikke, ‘taakwe ncobakajana cita kapompo kaboongo azituta zyamaulu azyamaboko.’ Ijwi lya Eliya lyakazuzikizigwa munzila igambya lyakuti: “Babwa bayoolya nyama ya-Jezebeli”!—2 Bami 9:30-37.

Ikugwasilizya Bukombi Bwakasimpe Camoyo Woonse

11. Ino Jonadabu wakali muntu uuli buti, alimwi mbuti mbwaakatondezya kugwasilizya kwakwe bukombi bwakasimpe?

¹¹ Aabo balangila kufwutuka “buzuba bwa-Jehova” akukkala kukabe kutamani anyika beelede kugwasilizya bukombi bwakasimpe camoyo woonse. Beelede babe mbuli Jehonadabu naa Jonadabu imwaalumi wakali kukomba Jehova watakali muna Israyeli. Jehu naakali kuyabuya kazuzikizya mulimo ngwaakatumwa cabusungu, Jonadabu wakali kuyanda kutondezya kuti ulikkomene acakali kucita Jehu alimwi ulayanda kumugwasilizya. Aboobo wakanyamuka waya kuyoocinga mwami wa Israyeli oyu mupya wakali kutozya ku Samariya kuyoonyonyoona baŋanda ya Ahabu bakaceede. Mbwaakamubonena buyo Jonadabu, Jehu wakamubuzya kuti: “Sa moyo wako ncobeni ulazuminana amoyo wangu, mbubonya mbuli moyo wangu mbuuzuminana awako?” Ikuvwuwa kwa Jonadabu kwakuzumina kwakapa kuti Jehu atambike janza lyakwe akutamba Jonadabu kutanta anguwe munkalaki yakwe yankondo, wati: “Twiinke ayebo, ubone busungu bwangu muli-Jehova.” Ndilyonya, Jonadabu wakacizumina coolwe cakutondezya kuti ugwasilizya sikunyonyoona uunanikidwe aa Jehova.—2 Bami 10:15-17.

12. Nkaambo nzi Jehova ncayelela kuyanda kuti kakombwa nguwe alikke?

¹² Ikugwasilizya bukombi bwakasimpe ncintu ceelede nkaambo Jehova Mmulengi alimwi Mmwami Mupatikampatila, walo uuyanda alimwi weelede kukombwa alikke. Wakalailila bana Israyeli kuti: “Utalicitili cikozyanyo cibezedwe cacintu cili buti cili kujulu nanka cili ansi ano nanka cili mumaanzi kunsi anyika. Utazikotamini nekuba kuzimanina milimo, nkaambo ndime Jehova Leza wako, ndi Leza sibuzuba.” (Kulonga 20:4, 5) Aabo balangila kufwutuka “buzuba bwa-Jehova” beelede kukomba nguwe alikke, bamukombe “mumuuya amubwini.” (Johane 4:23, 24) Beelede kusungwaalila bukombi bwakasimpe mbuli bwakacita Eliya, Elisha alimwi a Jonadabu.

13. Mbaani bazumina Mwami Mesiya mbweena mbuli Jonadabu mbwaakazumina Jehu camoyo oonse, alimwi bacitondezya buti eco?

¹³ Naakamana kunyonyoona baŋanda ya Ahabu, Mwami Jehu wakabweza ntaamu zimbi zyakuziba baabo bakomba Baala kutegwa abugwisizye limwi bukombi obu boonse bwakubeja mu Israyeli. (2 Bami 10:18-28) Sunu, Mwami wakujulu Jesu Kristo wapegwa mukuli wakunyonyoona basinkondonyina Jehova alimwi akusumpula bulelo Bwakwe bwazintu zyoonse. ‘Ibankamu mpati’ iba “mbelele zimwi” zya Jesu sunu bamuzumina Kristo camoyo woonse kuti ngo Mesiya Mwami mbweena mbuli Jonadabu mbwaakamuzumina Jehu camoyo woonse, alimwi babelekela antoomwe ababunyina bakumuuya ibacili ansi. (Ciyubunuzyo 7:9, 10; Johane 10:16) Eeci bacitondezya kwiinda mukucita milimo yabukombi bwakasimpe akutola lubazu cakusungwaala mukukambauka kwa Bunakristo, ikucenjezya basinkondonyina Leza ‘zyabuzuba bwa-Jehova’ ibuzaabuswena afwaafwi cakufwambaana.—Matayo 10:32, 33; Ba-Roma 10:9, 10.

Izintu Zigambya Ziyandoocitika!

14. Ncinzi ciyakucitika kubukombi bwakubeja?

¹⁴ Jehu wakabweza ntaamu yakugwisya bukombi bwakubeja mu Israyeli. Mazubaano, kwiinda muli Jehu Mupati, Jesu Kristo, Leza uyoonyonyoona bukombi bwakubeja ibujatikizya nyika yoonse ibwa Babuloni Mupati. Ino-ino tuyoobona kuzuzikizigwa kwamajwi aamungelo ngaakaambila mwaapostolo Johane kuti: “Ameja aali ikumi ngowabona kucinyama, aba balamusula mwanakazi sikuvuula [Babuloni Mupati], balamusyaazya alike, balamusamununa, balalya mubili wakwe akumuumpa amulilo. Nkaambo Leza wakabika mumyoyo yabo oyu muyeeyo wakulomya bukanze bwakwe. Boonse balazumina camoyo omwe kupa cinyama bwami bwabo, mane majwi aa-Leza akalondolwe.” (Ciyubunuzyo 17:16, 17; 18:2-5) “Meja aali ikumi” aiminina bulelo alumamba lwabo ibulimukulela nyika. Nokuba kuti lino balimukucita bumambe munzila yakumuuya a Babuloni Mupati, iciindi cakwe camana. Ibulelo bwanyika obu buyoonyonyoona bukombi bwakubeja, alimwi “cinyama” eci—iciiminina United Nations naa Ciinga Calukamantano Lwazisi—ciyooba alubazu lupati “ameja aali ikumi” mukunyonyoona mwanakazi oyu.b Eeco ciyooba ciindi kaka cakutembaula Jehova!—Ciyubunuzyo 19:1-6.

15. Ncinzi ciyoocitika ciindi nokuyoosolwa kunyonyoona mbunga ya Leza yaansi?

¹⁵ Mwami Jehu naakamana kunyonyoona bukombi bwa Baala, basiŋanda yakwe yabwami bakasandukila basinkondonyinaa bulelo bwa Israyeli. Awalo Mwami Jesu Kristo mbwayakucita obo. Ibulelo bwanyika buyakucaala bwaakunyonyoonwa bukombi bwakubeja ibuli mbuli bwa Baala. Akaambo kakuyungwaa Saatani Diabolosi, aaba basinkondonyinaa bulelo bwa Jehova bayoosandukila mbunga ya Leza yaansi ikusola kuti bainyonyoone. (Ezekiele 38:14-16) Pele Jehova uyoobelesya Mwami Jesu Kristo kubanyonyoona munkondo ya Harmagedoni, yalo iinooli “nkondo yabuzuba bupati bwa-Leza Singuzuzyoonse,” ooko kunooli nkokumaninizya kusumpula bulelo bwa Jehova bwazintu zyoonse.—Ciyubunuzyo 16:14, 16; 19:11-21; Ezekiele 38:18-23.

Ikubeleka Abusungu Buli Mbuli bwa Elisha

16, 17. (a) Ino tuzi buti kuti Elisha wakali musungu kusikila ciindi naakafwa? (b) Ncinzi ncotweelede kucita amivwi yakasimpe?

¹⁶ Ibabelesi ba Leza banooli basicamba alimwi banoosungweede mbweena mbuli Elisha kusikila mane “buzuba bwa-Jehova” bwanyonyweeda limwi bweende boonse bwazintu bwa Saatani. Kunze lyamulimo wakwe naakali mubelesi wa Eliya, Elisha wakabeleka alikke kali musinsimi wa Jehova kwamyaka iinda ku 50! Alimwi Elisha wakali musungu mubuumi bwakwe boonse mbwaakapona kwaciindi cilamfwu kusikila ciindi naakafwa. Katana buyo kufwa, wakaswaigwaa Mwami Joasi wakali muzyukulu wa Jehu. Elisha wakamwaambila kuti afwuse muvwi wabuta bwakwe ampulungwido. Muvwi wakwe wakaakwiiyasa biya mbaakani, mpoonya Elisha wakoompolola wati: “Ngooyu muvwi waluzundo lwa-Jehova, muvwi wakuzunda ba-Aramu. Uyookoma ba-Aramu mu-Afeki mane lumwi ukabamaninizye.” Ucizwa waawo Joasi wakauma ansi amuvwi wakwe naakaambilwa kucita boobo a Elisha. Pele eco taakacicita cabusungu, wakauma buyo ansi ziindi zyotatwe. Mpoonya Elisha wakamwaambila kuti akaambo kaboobo, Joasi uyoopegwa luzundo lwaba Aramu ziindi zyotatwe buyo, aboobo eco ncicakacitika. (2 Bami 13:14-19, 25) Mwami Joasi taakauma ba Aramu cakumaninizya, ‘taakabamaninizya.’

¹⁷ Pele bananike baceede baluujisi kulwana bukombi bwakubeja cabusungu mbuli bwa Elisha. Abalo beenzinyina ibajisi bulangizi bwakukkalilila ansi balacita mbubonya. Kunze lyaboobo, boonse balangila kufwutuka “buzuba bwa-Jehova” beelede lyoonse kuyeeya majwi aa Elisha wakali musungu aajatikizya kuuma ansi. Atubweze mivwi yakasimpe, katuujisi cabusungu kwiindulula kuumya njiyo—ee, kusikila mane Jehova atwaambile kuti mbubo kwazulila.

18. Ino tweelede kwaatambula buti majwi aa 2 Petro 3:11, 12?

¹⁸ “Buzuba bwa-Jehova” ino-ino bulagwisya bweende obu bubi bwazintu. Aboobo atusoselwe amajwi aamwaapostolo Petro aakulwaizya. “Lino zintu ezi mbuziti kamaninine obo, nywebo muleelede kuba bantu bali buti mukweenda munzila iisalala amukulemeka Leza? [Ka]mucilangila akuyandisya buzuba bwakusika kwa-Leza.” (2 Petro 3:11, 12) Zyoonse zibeela zyabweende obu zyaakuti zyeenzemuka mumulilo wabukali bwa Leza ibuyootondezegwa kwiinda muli Jesu Kristo, balikke bayookonzya kutija mbaabo bajisi mpuwo yabukkale bululeme alimwi abwabunaleza. Ikusalala kulayandika munzila njotulilemeka alimwi amunzila yakumuuya. Alwalo luyando lwabantuma lulayandika, ilutondezegwa kwiinda mukubagwasya nobayandika lugwasyo, ikapati kubagwasya munzila yakumuuya kwiinda mukukambauka kwa Bunakristo.

19. Ncinzi ncotweelede kucita kutegwa tukafwutuke “buzuba bwa-Jehova”?

¹⁹ Sena ŋambawido yanu alimwi amicito yanu imuzibya kuba mubelesi wa Leza uusyomeka alimwi musungu? Ikuti naa mbombubo, mulakonzya kulangila kufwutuka “buzuba bwa-Jehova” akuyoonjila munyika ya Leza mpya njaakasyomezya. Ee, mulakonzya kuyoofwutuka kuti kamubacitila zintu zibotu ibanyinaa Kristo bakumuuya akaambo kakuti mbaasikumutobela, mbweena mbuli bwakacita banabukwetene bana Sunemu ibakasamausya Elisha. Ikutegwa mukafwutuke anywebo mweelede kuba mbuli Naamani wakatobela malailile aa Leza cakulibombya akuba mukombi wa Jehova. Ikuti kamuyandisisya kupona kukabe kutamani munyika iiyooba paradaiso, mweelede kutondezya kuti mulagwasilizya bukombi bwakasimpe camoyo woonse mbuli bwakacita Jonadabu. Elyo mulakonzya kuyooba akati kababelesi ba Jehova basyomeka ino-ino ibatikalibonene kuzuzikizigwa kwamajwi aa Jesu aakuti: “Amuboole, inywe nomuyandwa kuli-Taata, amukone bwami mbumubambilidwe kuzwa kumalengelo aanyika.”—Matayo 25:34.

Bupanduluzi buyungizidwe

Mulaingula Buti?

◻ Ino nciimo nzi ciyandika kutegwa tukafwutuke “buzuba bwa-Jehova”?

◻ Ncikozyanyo nzi cakasiya banabukwetene bana Sunemu muciindi ca Elisha?

◻ Nciiyo nzi cinga cayiigwa kuzwa kuli Naamani?

◻ Ino inga twacitobela buti cikozyanyo ca Jonadabu?

◻ Ino lugwalo lwa 2 Petro 3:11, 12 lweelede kutujatikizya buti?