Mungelo wa Jehova Wakamukwabilila Hezekiya

Bwami bwa Asuri bwakabweza bwami bwa Israyeli bwamisyobo iili 10. Lino Sanakeribu, mwami wa asuri, wakali kuyanda kubweza bwami bwamisyobo yobilo ya Juda. Wakatalika kubweza munzi omwe-omwe wa Juda. Pele munzi ngwaakali kuyandisya kapati, munzi wa Jerusalemu. Ncaatakazyi Sanakeribu ncakuti Jehova wakali kuukwabilila munzi ooyu.

Hezekiya, mwami wa Juda, wakapa Sanakeribu mali manji kapati kutegwa aleke kupenzya bantu bamu Jerusalemu. Nokuba kuti Sanakeribu wakaabweza mali aayo, wakacili kutuma basikalumamba bakwe basinguzu kuyoolwana munzi wa Jerusalemu. Bantu bamu Jerusalemu bakayoowa kapati nkaambo bana Asuri bakali kuyaabuswena afwaafwi. Mpoonya Hezekiya wakabaambila kuti: ‘Mutayoowi pe. Nokuba kuti bana Asuri balaanguzu kapati, Jehova ulatupa nguzu zinji kapati kwiinda zyabo.’

Sanakeribu wakatuma mutumwa wakwe Rabisake ku Jerusalemu kutegwa akafwubaazye bantu. Rabisake wakaima anze aamunzi akoongolola kuti: ‘Jehova takonzyi kumugwasya pe. Atamucengi Hezekiya! Kunyina leza uukonzya kumuvwuna kulindiswe.’

Hezekiya wakabuzya Jehova kuti amwaambile ncakeelede kucita. Jehova wakaingula kuti: ‘Utayoowi azintu nzyaamba Rabisake. Sanakeribu takoowubweza munzi wa Jerusalemu.’ Icakatobela ncakuti, Hezekiya wakatambula magwalo kuzwa kuli Sanakeribu. Magwalo aayo akali kwaamba kuti: ‘Kolibombya buyo. Jehova takonzyi kukufwutula.’ Hezekiya wakapaila kuti: ‘Akaka Jehova, kotugwasya kutegwa bantu boonse bazyibe kuti yebo olikke ndonduwe Leza mwini-mwini.’ Jehova wakamwaambila kuti: ‘Mwami wa Asuri takoosika ku Jerusalemu. Ndilaukwabilila munzi wangu.’

Sanakeribu wakali kuyeeya kuti munzi wa Jerusalemu ino-ino ulaba wakwe. Pele busiku bumwi, Jehova wakatuma mungelo wakwe kunze aamunzi ooko basikalumamba ba Sanakeribu nkobakabede. Mungelo ooyo wakajaya basikalumamba ibali 185,000! Basikalumamba boonse mbaakali kusyoma Mwami Sanakeribu bakafwa. Wakabula cakucita, aboobo wakapiluka buyo kuŋanda nkaambo wakazundwa. Jehova wakamukwabilila Hezekiya alimwi amunzi wa Jerusalemu mbubwenya mbwaakasyomezyede. Ikuti nookaliko ku Jerusalemu, sena nookamusyoma Jehova?