Bwami Ibuyookkalilila Kukabe Kutamani

Busiku bumwi, Mwami Nebukadinezara wakalota ciloto ciyoosya. Cakamukatazya kapati cakuti wakaba aacilabila. Wakaita basimajiki akubaambila kuti: ‘Amundipandulwide ciloto cangu.’ Bakaamba kuti: ‘Kotwaambila ncoolota, O mwami.’ Pele Nebukadinezara wakabaambila kuti: ‘Peepe! Kamundaambila ncondalota, buyo-buyo ndilamujaya.’ Alimwi bakati kulinguwe: ‘Kotwaambila ncoolota, mpoonya swebo tulacipandulula.’ Wakabaambila kuti: ‘Nywebo nyoonse musola kunduupa-upa ameso. Kamundaambila ncondalota!’ Bakaambila mwami kuti: ‘Kunyina muntu uupona uukonzya kucicita eeco. Cintu ncoyanda kuti tucite, tacikonzyeki pe.’

Nebukadinezara wakanyema kapati cakuti wakalailila kuti baalumi basongo boonse bamucisi bajaigwe. Basongo aabo bakali kubikkilizya Daniele, Sadirake, Mesaki a Abedinego. Daniele wakalomba mwami kuti amupe ciindi. Mpoonya walo abeenzinyina bakapaila kuli Jehova kutegwa abagwasye. Ino Jehova wakacita nzi?

Mucilengaano, Jehova wakatondezya Daniele ciloto ca Nebukadinezara alimwi akumwaambila ncocakali kupandulula. Buzuba bwakatobela, Daniele wakaunka kumubelesi wamwami akumwaambila kuti: ‘Utajayi mwaalumi musongo naba omwe. Mebo inga ndacipandulula ciloto camwami.’ Kumane, mubelesi wakatola Daniele kuli Nebukadinezara. Daniele wakaambila mwami kuti: ‘Leza wakuyubunwida zintu mboziyooba kumbele. Nceeci ciloto ncookalota: Wakabona cibumbwa cipati icakajisi mutwe wangolida, camba amaanza aansiliva, ida azibelo zyamukuba, maulu aabutale, alimwi azituta zyabutale busangene abulongo. Mpoonya kwakakolomoka bbwe kuzwa kucilundu ilyakauma zimpata zyacibumbwa. Kumane cibumbwa eeco cakapwayaulwa akuba busu mpoonya muwo wakacipupulula. Mpoonya bbwe eelyo lyakaba cilundu cipati icakazuzya nyika.’

Kumane Daniele wakati: ‘Mboobu mbocaamba ciloto cako: Bwami bwako bwiimininwa amutwe wangolida. Nsiliva iiminina bwami ibuyootobela kuzwa bwami bwako. Mpoonya kuyooba bwami bumbi ibuli mbuli mukuba, bwalo ibuyooyendelezya nyika yoonse. Bwami ibuyootobela bunooli anguzu mbuli butale. Kumamanino kuyooba bwami ibwaandanizyidwe, zibeela zimwi zyambubo zinooli ziyumu mbuli butale mpoonya zimbi zinooli ziteteete mbuli bulongo. Ibbwe ilyakaba cilundu, liiminina Bwami bwa Leza. Bwami oobo buyoopwayaula mami aaya oonse mpoonya bwalo buyookkalilila mane kukabe kutamani.’

Nebukadinezara wakakotama kumbele lya Daniele kalangide ansi. Wakaamba kuti: ‘Leza wako wakuyubunwida ciloto eeci. Kunyina Leza uumbi uuli mbuli nguwe.’ Muciindi cakumujaya Daniele, Nebukadinezara wakamubikka kuba silutwe wabaalumi basongo boonse alimwi akuba mweendelezi wacooko ca Babuloni. Sena wabona Jehova mbwaakawiingula mupailo wa Daniele?