Bwami Ibuli Mbuli Cisamu Cipati

Busiku bumwi, Nebukadinezara wakalota ciloto ciyoosya kapati. Aboobo wakaita baalumi bakwe basongo kuti bamupandulwide ncocakali kwaamba. Pele kunyina naba omwe iwakakonzya kucipandulula. Mpoonya mwami wakaambila Daniele makani aaya.

Nebukadinezara wakaambila Daniele kuti: ‘Muciloto cangu, ndabona cisamu. Cali cilamfwu kapati cakuti calikusika akujulu. Cali kukonzya kubonwa amuntu uuli woonse uukkala anyika. Calijisi matewo mabotu alimwi amicelo minji. Banyama balikupumuna mucimvwule cancico, alimwi bayuni balikupanga ziteente mumitabi yancico. Mpoonya kwaboola mungelo kuzwa kujulu. Waamba kuti: “Amucigonke cisamu akugonkaula mitabi yancico. Pele cisiko mucileke antoomwe amiyanda yancico, alimwi mucaange ansimbi yabutale amukuba. Moyo wacisamu uyooleka kuba wamuntu pele uyoosanduka kuba wamunyama alimwi cinooli boobo kusikila zikainde ziindi zili 7. Bantu boonse bayoozyiba kuti Leza ngo Mweendelezi akuti ulakonzya kupa bwami kumuntu uuli woonse ngwayanda.”’

Jehova wakamuyubunwida Daniele ncocakali kupandulula ciloto eeco. Ciindi Daniele naakazyiba ncocakali kupandulula ciloto, wakayoowa kapati. Wakaamba kuti: ‘O mwami, nicabota kuti ciloto eeci nocali kwaamba basinkondonyoko, pele caamba nduwe. Cisamu cipati icakagonkwa, nduwe. Uyoonyangwa bwami bwako, alimwi uyoolya bwizu musyokwe mbuli banyama bamusyokwe. Pele akaambo kakuti mungelo waamba kuti cisiko amiyanda yancico ilekwe, nkokuti uyooba mwami alimwi.’

Nokwakainda mwaka omwe, Nebukadinezara wakali kweendeenda atala aaŋanda yakwe kanyomenena munzi wa Babuloni. Mpoonya wakaamba kuti: ‘Amubone munzi ooyu weebeka kapati ngondakayaka. Eelo kaka ndili musongo!’ Naakacili kwaambaula, kwakalimvwisya jwi kujulu ilyakaamba kuti: ‘Nebukadinezara! Lino ulanyangwa bwami bwako.’

Aciindi eeco, Nebukadinezara wakasondoka mpoonya wakaba mbuli munyama wamusyokwe. Wakatandwa muŋanda yakwe yabwami akuyookkala abanyama bamusyokwe. Masusu aakwe akalampa mbuli mapepe aasikwaze, alimwi mala aakwe akaba mbuli aabayuni.

Nokwakainda myaka iili 7, Nebukadinezara wakaba amaano alimwi mpoonya Jehova wakamubikka alimwi kuba mwami wa Babuloni. Kumane Nebukadinezara wakaamba kuti: ‘Ndatembaula Jehova, Mwami wakujulu. Lino ndazyiba kuti Jehova ngo Mweendelezi. Ulabasubula aabo ibalisumpula, alimwi ulakonzya kupa bwami kumuntu uuli woonse ngwayanda.’