Bulembo Kubwaanda

Mukuya kwaciindi, Belisazara wakaba mwami wa Babuloni. Busiku bumwi, wakatamba bantu banji bamucisi ibalemekwa kuti baboole kupobwe. Wakalailila babelesi bakwe kuti balete nkapu zyangolida eezyo Nebukadinezara nzyaakabwezede mutempele lya Jehova. Belisazara abeenzu bakwe bakanywida munkapu eezyo akutembaula baleza babo. Cakutayeeyela, kwakalibonya janza lyamwaalumi ilyakatalika kulemba mabala aagambya kubwaanda mubusena mobakali kulida.

Belisazara wakayoowa kapati. Wakaita basimajiki bakwe akubasyomezya kuti: ‘Ikuti umwi acikonzye kwaapandulula mabala aaya, uyooba muntu watatu uulemekwa mucisi ca Babuloni.’ Boonse bakasola, pele kunyina iwakakonzya kwaapandulula mabala aayo. Mpoonya mukaintu wamwami wakaboola akwaamba kuti: ‘Kuli mwaalumi wazina lya Daniele iwakali kupandulula zintu kuli Nebukadinezara. Ulakonzya kukupandulwida mabala aaya.’

Daniele wakaboola kumwami. Mpoonya Belisazara wakati kulinguwe: ‘Ikuti ucikonzye kwaabala akwaapandulula mabala aaya, ndilakupa kalungu kamunsingo kangolida alimwi ndilakubikka kuba muntu watatu uulemekwa mucisi ca Babuloni.’ Daniele wakati: ‘Tandiziyandi zipego zyako, pele ndilakwaambila ncaapandulula mabala aaya. Bauso ba Nebukadinezara bakali kulisumpula, aboobo Jehova wakabasubula. Ulizizyi zyoonse izyakabacitikila bauso, pele yebo tonoomulemeka Jehova nkaambo wanywida munkapu zyangolida izyakazwa mutempele lyakwe. Aboobo Leza walemba mabala aaya aakuti: Mene, Mene, Tekeli, alimwi a Parsini. Mabala aaya apandulula kuti bana Medi abana Persia bayoozunda Babuloni, alimwi yebo tokazumanani kuba mwami pe.’

Cakali kulibonya mbuli kuti kunyina iwakali kukonzya kuzunda munzi wa Babuloni. Munzi ooyu wakalikwabilidwe abwaanda bupati alimwi amulonga mulamfwu kapati. Pele busiku mbubwenya oobo, bana Medi alimwi abana Persia bakaulwana munzi. Mwami wa Persia wazina lya Koresi wakaayuminizya meenda kutegwa basikalumamba bakwe bainde kuya kumilyango yamunzi. Nobakasika ookuya, bakajana milyango ilijukide. Basikalumamba bakanjila mumunzi akuunyonyoona mpoonya akumujaya mwami. Kumane Koresi wakaba mweendelezi wa Babuloni.

Kautanamana mwaka ooyo, Koresi wakaambilizya kuti: ‘Jehova wandaambila kuti ndiyakulule tempele lyakwe mu Jerusalemu. Kufwumbwa muntu akati kabantu bakwe uuyanda kugwasya, inga waunka.’ Aboobo mbubwenya Jehova mbwaakasyomezyede, ba Juda banji bakajokela kumunzi wabo nokwakainda myaka iili 70 kuzwa ciindi Jerusalemu naakanyonyoonwa. Koresi wakaipilusya ngolida, nkapu zyansiliva alimwi azibelesyo zimwi eezyo Nebukadinezara nzyaakabwezede mutempele. Sena wabona Jehova mbwaakamubelesya Koresi kugwasya bantu bakwe?