TUBBOKESI TWAKUYIISYA 1B
Makani Mubufwaafwi Aali Mubbuku lya Ezekieli
Mubwini, bbuku lya Ezekieli lilakonzya kwaandanizyigwa muzibeela zitobela:
CAANDAANO 1 KUSIKA KU 3
Mu 613 B.C.E., kali mubuzike mu Babuloni aba Juda, Ezekieli wakabona zilengaano zya Jehova alimwi wakalaililwa kusinsima kuba Juda ibakali kukkala kumbali aamulonga wa Kebara.
CAANDAANO 4 KUSIKA KU 24
Akati kamwaka wa 613 alimwi awa 609 B.C.E., Ezekieli wakapa mulumbe wabusinsimi iwakajisi makani aalubeta lwa Jerusalemu abantu bakwe bazangi, ibakali kukomba mituni.
CAANDAANO 25 KUSIKA KU 32
Kutalikila mu 609 B.C.E., imwaka Babuloni naakatalika kusaala Jerusalemu, imulumbe wa Ezekieli walubeta wakazwa mu Jerusalemu akusika mumasi aabasinkondonyina aakazingulukide, Amoni, Edomu, Egepita, Moabu, Filisitiya, Sidoni a Turo.
CAANDAANO 33 KUSIKA KU 48
Kutalikila mu 606 B.C.E., Jerusalemu alimwi atempele kazinyonyoodwe kubusena ibwakali kulamfwu kapati a Babuloni, Ezekieli wakabikkila maano kumulumbe wabulangizi, ikubukulusyigwa kukkomanisya kwabukombi busalala bwa Jehova Leza.
Aboobo bbuku lya Ezekieli lilembedwe kweelana ambozyakali kutobelana kucitika zintu alimwi akweelana ambwaatobelene makani. Businsimi ibujatikizya kunyonyoonwa kwamunzi wa Jerusalemu atempele lyanguwo mbobusaanguna mpoonya bulatobelwa abusinsimi bunji ibujatikizya kubukulusyigwa kwabukombi busalala. Eeci cileelela, akaambo kakuti businsimi bwakubukulusyigwa kwabukombi butondezya kuti bukombi ibwakali kucitwa aatempele bwakalimanide.
Kuyungizya waawo, businsimi bwa Ezekieli ibujatikizya masi aazingulukide aabasinkondonyina (caandaano 25 kusika ku 32) bujanika akati kamulumbe wakwe walubeta kujatikizya Jerusalemu alimwi abusinsimi bwakubukulusyigwa kwabukombi busalala. Syaazibwene umwi wakaamba boobu kujatikizya mulumbe walubeta wa Ezekieli kumasi: “Mulumbe ooyu upa kuti makani atobelane kabotu, kusaanguna amulumbe wabukali bwa Leza mpoonya ulatobelwa amulumbe uutondezya luse lwakwe kubantu bakwe, akaambo kakuti cisubulo kucigama ncaakapa kuli basinkondonyina cakali cibeela cakuvwuna bantu bakwe.”