CIIYO 18

Makani Aagwasya Baswiilizi

1 Bakorinto 9:19-23

NCOMWEELEDE KUCITA: Amubakulwaizye baswiilizi banu kwaayeeyesya makani ngomubandika kutegwa babone kuti kuli cintu cimwi cigwasya ncobaiya.

Amulange-lange zintu nzyobazyi kale baswiilizi banu. Muciindi cakwiinduluka buyo kwaamba zintu nzyobazyi kale, amubagwasye kwaabona munzila iindene makani aayo.

Ciindi nomukanana twaambo ntobazyi kale, amufwambaane kutukanana pele mutabindi ciindi nomukanana twaambo tupya.
Amuvwuntauzye alimwi akuzinzibala kuyeeya. Ikuti kakuyandika, amubikkilizye atwaambo twamasimpe tutazyibidwe kapati naa zintu izyakacitika ino-ino ikukankaizya twaambo tuyandika kapati. Amuzinzibale kuyeeya kujatikizya makani aanu alimwi akweendelana kuliko akati kamakani aayo atwaambo ooto twamasimpe ntomuyanda kuyakwaamba.

Ciindi nomulanga-langa makani, amuyeeyesye kapati kwiinda mukulibuzya mibuzyo mbuli yakuti ‘ncinzi, nkaambo nzi, ndilili, nkuli, nguni alimwi mbuti.’ Amwaape munzila iikkomanisya makani aanu kwiinda mukubuzya mibuzyo iili boobu alimwi akuyiingula.
Amutondezye mbougwasya mulumbe uuli mumakani aanu. Amupandulule twaambo ituli mu Magwalo mbotukonzya kubagwasya baswiilizi banu mubuumi bwabuzuba abuzuba. Amubandike bukkale bugaminide, bube bwabantu alimwi amicito njobabikkila maano kapati baswiilizi banu.