Amubale Jwi lya Leza, Mumubelekele Mukasimpe

“Njiiyisya inzila yako, O Jehova, kuti njeende mulusinizyo lwako.”—INTEMBAUZYO 86:11.

1. Ncinzi cini-cini cakaambwa amagazini yakamwaigwa kusaanguna kumakani aakasimpe?

JEHOVA ulatuma mumuni alusinizyo kasimpe. (Intembauzyo 43:3) Alimwi ulatupa maanu aakubala Jwi lyakwe Ibbaibbele kuti twiiye kasimpe. Magazini yakusaanguna kumamagazini aaya—July 1879—yakaamba kuti: “Mbuli kaluba kaniini munkanda yabuumi, kasimpe kalizingulukidwe alimwi kayanda kupatila munsaku zyalucengo. Kuti kamuyanda kukajana mweelede kucenjela ciindi coonse. Kuti kamuyanda kubona bubotu bwako mweelede kuyumbila ambali nsaku alimwi amaamvwa aakuyuma moyo. Kuti kamuyanda kubaako mweelede kulitola ansi. Mutazulili akaluba buyo komwe kakasimpe. Kuti komwe nokalizulide nokutacikwe pe. Kamuujisi kubwezelela, kamuciyandaula.” Kubala akwiiya Jwi lya Leza kutupa kuti tujane luzibo lwini-lwini alimwi akweenda mukasimpe kakwe.—Intembauzyo 86:11.

2. Ncinzi cakacitika ciindi Ezara naakababalila Mulawo wa Leza bama Juda mu Jerusalemu yansiku?

² Ibwaanda bwa Jerusalemu nobwakamana kuyakululwa mu 455 B.C.E., mupaizi Ezara abamwi bakabalila bama Juda Mulawo wa Leza. Kuzwa waawo kwakaba kusekelela Kwamatente, kulilekelela zibi alimwi akutangana “mulongo walusinizyo.” (Nehemiya 8:1–9:38) Kulembedwe kuti: “Bakabala ibbuku lyamulao wa-Leza kabotu akupandulula majwi mbwaamba, aboobo bantu bakamvwisya majwi aakabalwa.” (Nehemiya 8:8) Bamwi bayeeya kuti bama Juda teebakali kuciteelela kabotu Cihebrayo, elyo kwakapandululwa mu Ciaramaiki. Pele cibalo tacitondezyi pe kuti obo mbupanduluzi buyo bwamajwi aamwaambo. Ezara abamwi-bamwi bakaupandulula Mulawo kutegwa bantu bateelele njiisyo zyawo akuzitobela. Mabbuku aa Bunakristo alimwi amiswaangano yambungano zilatugwasya kuteelela ‘caamba’ Majwi aa Leza. Mbweena buyo abaalu babikkidwe ibajisi “maanu aakufundisya kabotu.”—1 Timoteo 3:1, 2; 2 Timoteo 2:24.

Impindu Zitamani

3. Ndugwasyo nzi ndotujana mukubala Bbaibbele?

³ Kuti naa mikwasyi ya Bunakristo ilabala Bbaibbele antoomwe ilalangilwa kujana mpindu zitamani. Balaiziba milawo ya Leza alimwi akuziziba bwini njiisyo, makani aabusinsimi alimwi amakani aambi. Nokwamanwaa kubala cibeela cimwi ca Bbaibbele, silutwe waŋanda ulakonzya wabuzya kuti: Ino eci ceelede kutujatikizya buti? Ino ciswaangene buti anjiisyo zimwi zya Bbaibbele? Ino twaambo otu inga twatubelesya buti mukukambauka makani mabotu? Mukwasyi ulakonzya kuteelelesya kuti kauyandaula bupanduluzi kwiinda mukubelesya Watch Tower Publications Index naa maindekisi aambi. Acimbi cinga cagwasya nkubelesya mabbuku obile aa Insight on the Scriptures.

4. Ino Joshua wakeelede kwaatobela buti malailile aalembedwe kuli Joshua 1:8?

⁴ Injiisyo iziyiigwa mu Magwalo zilakonzya kutusololela mubuumi. Kunze lyaboobo kubala alimwi akwiiya ‘malembe aasalala kulakonzya kutusongwaazya kuti tukafwutuke.’ (2 Timoteo 3:15) Kuti naa twasololelwa a Jwi lya Leza, tulazumanana kweenda mukasimpe kakwe alimwi azintu nzyotuyanda ziluleme ziyoozuzikizigwa. (Intembauzyo 26:3; 119:130) Pele tweelede kuyandaula kumvwisya mbuli mbwaakacita Joshua iwakazoonjilila Musa abusena. “Ibbuku lyamulao” teelyakeelede kutantamuka kumulomo wakwe alimwi wakeelede kulibala sikati amasiku. (Joshua 1:8) Ikutazumizya “ibbuku lyamulao” kutantamuka kumulomo wakwe cakali kupandulula kuti Joshua taakeelede kuleka kwaambila beenzinyina majwi aaluzibo ngolyakali kwaamba. Ikubala Mulawo sikati amasiku caamba kuti Joshua wakeelede kuuyeeya cakuzinzibala, kuuiya. Awalo mwaapostolo Paulo wakalailila Timoteo kuti ‘alitakate amoyo wakwe woonse’—ayeeyesye—bukkale bwakwe, mulimo alimwi akuyiisya kwakwe. Mbwaakali mwaalu Munakristo, Timoteo wakeelede kapati kujatisya kuti bukkale bwakwe kabuli kabotu alimwi kayiisya kasimpe kamu Magwalo.—1 Timoteo 4:15

5. Ino ncinzi ciyandika kuti tujane kasimpe ka Leza?

⁵ Ikasimpe ka Leza ndubono lutakonzyi kuulwa. Kutegwa kajanwe kuyandika kusya, kuzumanana kuyandaula mu Magwalo. Cilikke cinga catupa kujana busongo alimwi akuteelela kuyoowa Jehova kwabulemu, nkuba mbuli bana baniini bayiisigwa a Mwiiyi Mupati. (Tusimpi 1:7; Isaya 30:20, 21) Aino tweelede kubelesya Magwalo kusinizya zintu. (1 Petro 2:1, 2) Bama Juda baku Bereya “bakaliluleme kwiinda abo baku-Tesalonika, nkaambo bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi [izyakaambwa a Paulo] mbozibede.” Muciindi cakusinswa, ibaku Bereya baka lumbaizigwa akaambo kakucita ceeci.—Incito 17:10, 11.

6. Nkaambo nzi Jesu ncaakaamba kuti taakwe nocakabagwasya bama Juda kuyandaula mu Magwalo?

⁶ Jesu wakaambila bama Juda bamwi kuti: “Mulalangisya Magwalo nkaambo mweezeezya kuti mulijisi buumi ubutamani mulingao, ngangao aandilungulula. Pele mwakaka kuza kulindime kuti mube abuumi.” (Johane 5:39, 40) Bakajisi muzeezo uuluzi mukuyandaula mu Magwalo—iwakuti Magwalo aya abatole kubuumi. Ee, Magwalo ajisi businsimi bwa Mesiya ibwakatondezya kuti Jesu njenzila ya buumi. Pele bama Juda bakamukaka. Aboobo kuyandaula mu Magwalo teecakabagwasya pe.

7. Ncinzi ciyandika kutegwa tukomene mukuteelela Bbaibbele, alimwi nkaambo nzi?

⁷ Ikutegwa tukomene mukuteelela Bbaibbele, tuyandika kusololelwa amuuya wa Leza, naa nguzu zyakwe. “Muuya ulagulunganya makani oonse, naaba makani malamfu aabulondo bwa-Leza” kutegwa bupanduluzi bwawo buboole antangalala. (1 Ba-Korinto 2:10) Ibanakristo baku Tesalonika bakeelede kuti “[ba]sunke zintu zyoonse” mubusinsimi buli boonse mbobakamvwa. (1 Ba-Tesalonika 5:20, 21) Ciindi Paulo naakalembela baku Tesalonika (ikutandila mu 50 C.E.), icibeela cilikke cakalembedwe kale ca Magwalo aa Cigiliki Makani Mabotu aa Matayo. Aboobo baku Tesalonika abaku Bereya bakali kukonzya kusunka zintu zyoonse ambweni kwiinda mukubelesya cibeela ca Cihebrayo ca Magwalo aa Septuagint aa Cigriki. Bakali kuyandika kubala alimwi akwiiya Magwalo, andiswe mbweena buyo.

Iciyandika Kapati Kuliboonse

8. Nkaambo nzi baalu babikkidwe ncobeelede kuti kabajisi luzibo lunji lwa Bbaibbele?

⁸ Ibaalu babikkidwe mbobeelede kuliziba kapati Bbaibbele. Beelede kabali bantu bali “amaanu aakufundisya kabotu” alimwi beelede “kujatisya makani aasyomeka.” Mulangizi Timoteo wakeelede ‘kupandulula makani aalusinizyo mbukweelede.’ (1 Timoteo 3:2; Tito 1:9; 2 Timoteo 2:15) Ba Eunike banyina alimwi abakaapanyina ba Loisi bakamuyiisya malembe aasalala kuzwa kubuvwanda, bakali kumuyiisya ‘lusyomo lwini-lwini’ nokuba kuti bawisi teebakali basyomi. (2 Timoteo 1:5; 3:15) Bamawisi basyomi beelede kukomezya bana babo “mulwiiyo lwa-Mwami [Jehova],” ikapati baalu bamawisi tabeelede kubaa bana ‘batalabulaye nobaba bana bajisi mulandu wabudakwi.’ (Ba-Efeso 6:4; Tito 1:6) Aboobo notuli muciimo cili buti, tweelede kujatisya kubala, kwiiya, alimwi akutobela Jwi lya Leza.

9. Nkaambo nzi Bbaibbele ncolyeelede kuyiigwa antoomwe a Banakristonyoko?

⁹ Kunze lyaboobo tweelede kwiiya Bbaibbele antoomwe abantu mbotusyoma limwi. Paulo wakali kuyanda kuti Banakristo baku Tesalonika kababandika lulayo lwakwe muli cabo. (1 Ba-Tesalonika 4:18) Kutegwa kasimpe tukateelelesye, kunyina nzila imbi inga yagwasya kwiinda yakuswaangana abasikwiiya bambi basungweede mukulingula Magwalo. Kalabeleka kasimpi kakuti: “Lubulo lulanona lubulonyina, mbubonya obo muntu ulanona busyu bwamweenzinyina.” (Tusimpi 27:17) Ikeembe kalakonzya kubaa nkalaya kuti kakkala kaindi kakatabelesegwi alimwi kakatanonwi. Mbubonya andiswe, tweelede kuti katuswaangana lyoonse katunonana kwiinda mukupana luzibo ndotwajana kuzwa mukubala, kwiiya, alimwi akuzinzibala kuyeeya Jwi lya Leza lyakasimpe. (Ba-Hebrayo 10:24, 25) Kunze lyaboobo eyi ninzila imwi yakusinizya kuti twagwasigwa akumweka kwamumuni waluzibo lwakumuuya.—Intembauzyo 97:11; Tusimpi 4:18.

10. Ino caamba nzi kweenda mukasimpe?

¹⁰ Notwiiya Magwalo, cililuzi kupaila kuli Leza mbuli mbwaakacita sintembauzyo naakati: “Tuma mumuni wako alusinizyo lwako, zindeenzye.” (Intembauzyo 43:3) Kuti katuyanda kukkomanisya Leza, tweelede kweenda mukasimpe kakwe. (3 Johane 3, 4) Eeci cilabikkilizya akutobela milawo yakwe alimwi akumubelekela cakusyomeka amoyo omwe. (Intembauzyo 25:4, 5; Johane 4:23, 24) Tweelede kubelekela Jehova mukasimpe nkaatondezya mu Jwi lyakwe alimwi ikapandululwa mumabbuku “[a]muzike musyomesi uucenjede.” (Matayo 24:45-47) Eci ciyanda luzibo lwini-lwini lwa Magwalo. Aboobo muunzila nzi njotweelede kubala akwiiya Jwi lya Leza? Sena tweelede kutalika kulibala kuzwa kubbuku lya Matalikilo caandaano 1, kapango ka 1, kusikila twaabala oonse mabbuku aali 66 mbwaatobelene? Ee, oonse Munakristo uujisi Bbaibbele lizwide mumulaka wakwe weelede kulibala kuzwa kubbuku lya Matalikilo mane kuyakusika ku Ciyubunuzyo. Alimwi muzeezo ngotweelede kubaa walo notubala Bbaibbele amabbuku aa Bunakristo ngwakuti tuluteelele kabotu luzibo lunji kapati lwakasimpe kamu Magwalo Leza nkaakatupa kwiinda ‘mumuzike musyomesi.’

Amupozye Kubala Jwi Lya Leza

11, 12. Nkaambo nzi ncocigwasya kuti kalibalwa cakupozya Bbaibbele kumiswaangano?

¹¹ Tulakonzya kubalila mumoyo notuli atulikke. Pele kaindi, muntu uubala alikke wakali kupozya. Aboobo ciindi muna Etiyopia walupati-pati naakali kuyabweenda munkalaki yakwe, Muvwangeli Filipo wakamumvwa kabala businsimi bwa Isaya. (Incito 8:27-30) Ibbala lya Cihebrayo lyakasandululwa kuti “bala” ikapati lyaamba kuti “ita.” Aboobo aabo kumatalikilo batacikonzyi kuteelela kabotu kuti naa babalila mumoyo tabeelede kutyompezegwa kupozya kubala bbala lyomwe-lyomwe. Icintu cipati nkwiiya Jwi lya Leza kwiinda mukulibala.

¹² Cilagwasya kuti Bbaibbele lilabalwa cakupozya kumiswaangano ya Bunakristo. Mwaapostolo Paulo wakalailila mubelesinyina Timoteo kuti: “Sungwaala [kukubalila buleya, NW] akukukambauka akukufundisya.” (1 Timoteo 4:13) Mboobu mbwaakaamba Paulo ku Bakolose: “Lugwalo oluno lwamana buyo kubalwa kulindinywe, amucite kuti lubalwe akwalo kumbungano yabaku-Laodikeya, nkabela anywebo mukabale lugwalo ndundakatuma ku-Laodikeya.” (Ba-Kolose 4:16) Ibbuku lya Ciyubunuzyo lyaamba kuti: “Uli acoolwe uubala [cakupozya NW], abaabo baswiilila majwi aabusinsimi obuno, akubamba zintu ezyo zilembedwe mulimbubo, nkaambo ciindi cili afwaafwi.” Aboobo sikukanana makani kubuleya weelede kubala tupango twamu Bbaibbele kutegwa asinizye makani ngaambila mbungano.

Ikwiiya Kwakutobela Mutwe Wamakani

13. Ninzila nzi iigwasya kapati kuya ambele mukwiiya luzibo lwini-lwini lwamu Bbaibbele alimwi ncinzi cinga catugwasya kujana magwalo?

¹³ Ikwiiya kwiinda mukubala twaambo tubandikwa ninzila iigwasya kapati kuya ambele mukwiiya luzibo lwini-lwini lwamu Magwalo. Makkonkodansi aajisi mulongo wamabala aamu Bbaibbele aalembedwe kutobelezya alufabeti mbuli mbwaakakananwa mubbuku, mucaandaano alimwi amukapango apa kuti cuubaube kujana makani aaswaangene akaambo kamwi kabandikwa. Magwalo ayo alimwi alakonzya kuswaanganizigwa nkaambo Sikwaanza Bbaibbele talikazyi mwini pe. Kwiinda mumuuya uusalala, wakapa kuti baalumi bali 40 balembe Bbaibbele kwaciindi ciinda kumyaanda yamyaka iili 16, elyo kwiiya Bbaibbele icakutobela mutwe wamakani ninzila yakwiiya yasinizigwa kwaciindi cilamfwu.

14. Nkaambo nzi Magwalo aa Cihebrayo aa Bunakristu aa Cigriki ncaayelede kuyiilwaamwi?

¹⁴ Kuti naa tulalumba kubaa makani aamasimpe aa Bbaibbele, tweelede kubala akwiiya Magwalo aa Bunakristo aa Cigiliki alimwi aa Cihebrayo. Eci cilatondezya mbwaaswaangene Magwalo aa Cigiliki amakanze aa Leza alimwi akugwasya kuteelela businsimi bwamu Magwalo aa Cihebrayo. (Ba-Roma 16:25-27; Ba-Efeso 3:4-6; Ba-Kolose 1:26) Cigwasya kapati ndi Bbaibbele lya New World Translation of the Holy Scriptures. Lyakabambwa ababelesi ba Leza balyaabide aabo bakabelesya luzibo lunji lwakaliko ilujatikizya malembe aa Bbaibbele aakusaanguna kubikkilizya ambwaakalembwa alimwi amajwi aamaambila mbali. Acimbi cigwasya kapati mabbuku aagwasya kwiiya Bbaibbele Jehova ngaatupa kwiinda “[mu]muzike musyomesi uucenjede.”

15. Ino inga mwatondezya buti kuti cililuzi kuzubulula aawa awaawa mu Bbaibbele?

¹⁵ Bamwi balakonzya kwaamba kuti ‘mabbuku aanu alazubulula zyuulu zyazibalo kuzwa mu Bbaibbele, pele nkaambo nzi ncomuzizubulula awa awaawa?’ Kwiinda mukuzubulula awa awaawa mumabbuku aamu Bbaibbele aali 66, aaya mabbuku alakonzya kubelesya bakamboni banjaanji ibakalemba kwiinda mumuuya kusinizya kuti njiisyo ililuzi. Jesu lwakwe wakaibelesya nzila eeyi yakuyiisya. Ciindi naakakanana Mulumbe wakwe Waacilundu, wakazubulula zibalo zili 21 kuzwa mu Magwalo aa Cihebrayo. Mumakani aayo kuli zibalo zyotatwe zyakazubululwa kuzwa mubbuku lya Kulonga, zyobile kuzwa ku Levitiko, comwe kuzwa ku Myeelwe, izili cisambomwi kuzwa ku Deuteronomo, comwe kuzwa ku 2 Bami, zyone kuzwa mu Intembauzyo, zyotatwe kuzwa muli Isaya alimwi comwe kuzwa muli Jeremiya. Kwiinda mukucita boobo sena Jesu wakali kusoleka ‘kusinizya kufwumbwa buyo cintu’? Peepe nkaambo kakuti wakali kubayiisya ‘mbuli muntu uujisi nguzu, kutali mbuli balembi.’ Eci Jesu wakacicita kusinizya kuti ncaakali kuyiisya cakali kuzwa Mujwi lya Leza lyakalembedwe. (Mateyo 7:29, Ci) Mbubonya amwaapostolo Paulo mbwaakacita.

16. Ino Paulo wakazubulula zibalo nzi zyamu Magwalo ku Ba-Roma 15:7-13?

¹⁶ Muzibalo zyamagwalo izijanika ku Ba-Roma 15:7-13, Paulo wakazubulula kuzwa muzibeela zyotatwe zya Magwalo aa Cihebrayo—Mulawo, Basinsimi, alimwi a Intembauzyo. Wakatondezya kuti bama Juda alimwi abamasi bayakulemya Leza elyo Banakristo beelede kutambula bantu bamisyobo yoonse. Paulo wakati: “Nkaambo kaako amusamausyanye, mbubonya mbuli Kristo mbwatusamausya kubulemu bwa-Leza. Ndaamba kuti Kristo wakaba mulanda wabasibupalule nkaambo kalusinizyo lwa-Leza, kuti azuzye insyomezyo nzibakapegwa bamataata, akuti bamasi balemeke Leza nkaambo kalweetelelo lwakwe, mbuli mbukulembedwe [ku Intembauzyo 18:49] kuti: ‘Nkaambo kaako nzookutembaula akati kabamasi, Nzooimbila izina lyako. Alimwi [ku Deuteronomo 32:43] kuti: ‘Amusekelele nubamasi, antoomwe abantu bakwe. Alimwi [ku Intembauzyo 117:1] kuti: ‘Amutembaule Jehova numasi oonse, Amumutembaulisye, numisyobo yoonse.’ Alimwi Isaya [11:1, 10] wati: ‘Kuzooba muntenga wa-Jese, Nguzoobukila kuba abwami bwabamasi, Nguwe ngubazoosyoma bamasi.’ Lino Leza wabulangizi amuzuzye bukondwi boonse aluumuno mukusyoma kwanu, kuti mwiinde kuba abulangizi kunguzu zya-Muuya Uusalala.” Kwiinda munzila eeyi yakubelesya kaambo kakananwa, Paulo wakatondezya mbwaazubululwa magwalo kusinizya twaambo twamasimpe twamu Bbaibbele.

17. Ino Banakristo batobela bani nobazubulula aawa awaawa mu Bbaibbele lyoonse?

¹⁷ Mulugwalo lwakusaanguna ndwaakalemba Petro kwiinda mumuuya, kuli zibalo zili 34 izizwa mumabbuku aali kkumi aamu Mulawo, mu Basinsimi alimwi amu Intembauzyo. Mulugwalo lwakwe lwabili, Petro ulazubulula ziindi zili cisambomwi mumabbuku otatwe. Mumulumbe wa Matayo kuli zibalo zili 122 izyakazubululwa kuzwa kubbuku lya Matalikilo kusikila kuli Malaki. Mumabbuku aali 27 aa Magwalo aa Cigriki, kuli zibalo zili 320 izyakazubululwa kuzwa mubbuku lya Matalikilo kusikila kuli Malaki kubikkilizya amyaanda yazibalo zimbi zyaambwa zyamu Magwalo aa Cihebrayo. Ikutobela nzila eeyo yakacitwa a Jesu alimwi a bamapositolo, Banakristo bamazubaano abalo balazubulula aawa awaawa mu Bbaibbele lyoonse ciindi nobaiya kaambo kamwi kamu Magwalo. Eci cileelela ikapati “kumazuba aakumamanino” aaya naazuzikizigwa Magwalo manji aa Cihebrayo a Cigriki. (2 Timoteo 3:1) ‘Muzike musyomesi’ ulabelesya Bbaibbele munzila eyi, pele tayungizyi ku Jwi lya Leza naa kugwisya mulindilyo.—Tusimpi 30:5, 6; Ciyubunuzyo 22:18, 19.

Lyoonse Kamweenda Mukasimpe

18. Nkaambo nzi ncotweelede ‘kweenda mukasimpe’?

¹⁸ Tatweelede kugwisya cintu cili coonse mu Bbaibbele, nkaambo zyoonse antoomwe njiisyo zya Bunakristo mu Jwi lya Leza “[nd]usinizyo” naa “lusinizyo lwa-Makani Mabotu.” Ikutobela lusinizyo olu naa kasimpe—“[kw]eenda” mulinkako—kulayandika kapati kuti tufwutuke. (Ba-Galatiya 2:5; 2 Johane 4; 1 Timoteo 2:3, 4) Mbwaanga Bunakristo “[n]inzila yabwini,” tulakonzya kuba “basikubelekanyina mumilimo yalusinizyo” kwiinda mukugwasya bamwi kucita milimo ya Bunakristo.—2 Petro 2:2; 3 Johane 8.

19. Ino mbuti mbotunga “[tw]eenda mulusinizyo”?

¹⁹ Kuti tukonzye “[kw]eenda mulusinizyo,” tweelede kubala Bbaibbele alimwi akutambula lugwasyo lwakumuuya Leza ndwapa kwiinda ‘mumuzike musyomesi.’ (3 Johane 4) Atucite eci kutegwa tugwasigwe alimwi akuti tukonzye kuyiisya bamwi makani aa Jehova Leza, Jesu Kristo, alimwi amakanze aabuleza. Alimwi atulumbe kuti muuya wa Jehova ulatugwasya kuteelela Jwi lyakwe alimwi akuzwidilila mukubelekela nguwe mukasimpe.

Ino Mulaingula Buti?

◻ Nimpindu nzi zitamani izinga zyajanwa mukubala Bbaibbele?

◻ Ino nkaambo nzi ncomweelede kwiiya Bbaibbele antoomwe abasyominyoko?

◻ Ino nkaambo nzi ncociluzi kuzubulula kuzwa mumasena aaindene-indene mu Bbaibbele lyoonse?

◻ Ino caamba nzi ‘kweenda mukasimpe,’ alimwi inga twacita buti obo?

[Cifwanikiso icili apeeji 15]

Nobazyali, amuyiisye bana banu Magwalo

[Cifwanikiso icili apeeji 17]

Mumulumbe wakwe Waacilundu, Jesu wakazubulula kuzwa muzibeela ziindene-indene zya Magwalo aa Cihebrayo