Ciindi Kulangana Ziimo Nokuyoomaninina!

KULUULWA kuti haazibwene wasayaansi Albert Einstein kuli naakaamba kuti munyika eyi yuusisya, nciyumu ikuzunda muuya wakulangana ziimo kwiinda kwaanzaanya kaatomu. Awalo Edward R. Murrow, simubweza twaambo iwakabaa mpuwo lya Nkondo Yanyika Ya II alimwi kumbele iwakazooba mweendelezi wa U.S. Information Agency, wakaamba kuti “kwiina muntu uunga wagwisya muuya wakulangana ziimo—inga wuubona buyo.”

Sena aaya majwi alimvwisya kuba amasimpe? Sena ncintu citakonzeki ikugwisya kusalana akulangana mibala? Ino Leza ukubona buti kulangana ziimo?

Leza Talangi Ciimo Camuntu

Ibaibbele lilakasya kulangana ziimo. (Tusimpi 24:23; 28:21) Lilaamba ikuti “busongo buzwa kujulu, lutaanzi bulasalala, alimwi mbwaluumuno, bulatontola, bulibombede, bulizwide lweetelelo amicelo mibotu, tabujisi lwaanzaano lwamoyo niluba luupaupo ameso.” (Jakobo 3:17) Ibusongo buli boobu bwakaambisigwa kubabetesi

mu Israyeli yansiku. Bakaambilwa ategwa: “Mutaciti zitaluleme mukubeteka kwanu; mutalangi ciimo camucete nekuba kuyoowa basimpuo; ubeteke mweenzinyoko cakululama.”—Levitiko 19:15.

Iciimo ca Bbaibbele citazungaani kumakani aakukasya kusalana akulangana ziimo wakacaambisya Jesu Kristo alimwi abaapostolo bakwe ba Petro a Paulo. Jesu taakali kusala pe kuli baabo bategwa “bakalikatede akumwaika mbuli imbelele zitakwe mweembezi.” (Matayo 9:36) Wakayiisya kuti: “Mutabeteki aciimo, pele amubeteke cakululama.”—Johane 7:24.

Petro a Paulo balatusyomezya kuti Jehova Leza lwakwe talangi ciimo pe. Petro wakaamba kuti: “Nkasimpe ndabona kuti Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” (Incito 10:34, 35) Mwaapostolo Paulo ulatwaambila ategwa: “Nkaambo kwa-Leza takulangililwi ciwa pe.”—Ba-Roma 2:11.

Ibbaibbele Mbolibajatikizya Bantu

Ibbaibbele lilaa nguzu zyakucinca bube bwabantu aabo ibasololelwa andilyo. Lugwalo lwa Ba-Hebrayo 4:12 lwaamba kuti: “Nkaambo ijwi lya-Leza lili abuumi, lili anguzu.” Mulugwasyo lwa Jehova imuntu uulaa muuya wakulanga ciimo ulakonzya nokuba kucinca kuyeeya kwakwe akuba muntu uutalangi ciimo mukweendelezya bambi.

Mucikozyanyo amulange Saulo waku Tarso. Mbuli mbwaluulwa mu Bbaibbele, kuli ciindi naakali kwiilwana kapati mbungano ya Bunakristo nkaambo wakali kutobela ziyanza zyabukombi ziyumu. (Incito 8:1-3) Walo wakalisyomede cakumaninina kwiinda muziyanza zyaci Juda ikuti boonse Banakristo mbaasiluleyo alimwi mbaasinkondonyina abukombi bwini-bwini. Ikulanga ciimo kwakamupa kuti agwasyilizye mukujaya Banakristo. Ibbaibbele lyaamba kuti “wa[kal]ifundilide kupenzya akujaya basikwiiya ba-Mwami.” (Incito 9:1) Naakali kucita boobu, wakali kucitaanga ucitila Leza mulimo.—Amweezyanye a Johane 16:2.

Pesi Saulo waku Tarso wakakonzya kuleka muuya wakulanga ciimo. Mane wakasika nkwaba Munakristo ilwakwe! Kuciindi cakumbele, lino kali Paulo, mwaapostolo wa Jesu Kristo, wakalemba kuti: “Kuciindi cakamana ndakali sikasankusanku asikakomokomo asikazundozundo, nekuboobo ndakafwidwa luzyalo nkaambo teendakazi ncendakali kucita cakutazumina.”—1 Timoteo 1:13.

Paulo tali alikke iwakacinca kapati boobu mukuyeeya kwakwe. Mulugwalo lwakwe kuli Tito, muvangelinyina, Paulo wakakulwaizya Banakristo kuti “batanoosampaula muntu pe, batabi bandwane, pele ababe batontozi, akuba babombe-moyo kubantu boonse. Nkaambo aswebo iciindi twakali bafubafuba, twakali basigama, twakali kugowela buyo, twakali mubuzike bwazisusi zibi zyamisyobo misyobo abwamisalo yaansi ano, twakali kupona muzibi amubbivwe, akuba alukoyeko alusulano.”—Tito 3:2, 3.

Ikumwaya Munyinza Wakulangana Ziimo

Sunu, Banakristo beni-beni balasoleka kutobela lulayo olo. Bayanda kulikasya kulanga buyo ciwa cabantu. Eci cilabakasya ‘kusampaula’ beenzinyina. Balaa bunyina bwaakati kamasi ibusotoka minyinza yanyika eyi yoonse yazisi, misyobo, alimwi amibala.

Amuyeeye makani aaluulwa kujatikizya Henrique, imuntu usiya muna Brazil. Walo lwakwe mbwaakali muntu uulangwa ciimo, wakabasulaika kapati bamakuwa. Ulapandulula ategwa: “Bakamboni bobile batuba bakasika kuŋanda kwangu kuti bazoobandike zina lya Leza. Kutaanguna nseendakali kuyanda kuswiilila pe nkaambo nseendakali kubasyoma pe bamakuwa. Pesi nokwakainda-inda buyo kaindi imulumbe wabo wakalimvwisya-mvwisya kuba wakasimpe. Mpoona ndakazumina ciiyo ca Bbaibbele. Imubuzyo wakusaanguna ngundakajisi ngwakuti, ena kuli bantu basiya banji mucikombelo cenu?’ Eelyo bakaingula ategwa, ‘Ee.’ Bamane bakanditondezya cifwanikiso camamanino mubbuku litegwa Ibbuku Lyangu Lyamakani Aa-Bbaibbele,a icitondezya bana bamibala yiindene. Akati kabo kwakali mwana musankwa uusiya, eelyo eci cakandikulwaizya. Kumbele ndakazoounka ku Ŋanda ya Bwami ya Bakamboni ba Jehova, kwalo nkundakaakubona bantu bamibala yiindene-indene kabeendelezyanya cabulemu. Eeci cakali cintu cipati kapati kulindime.”

Lino mbwali umwi wa Bakamboni ba Jehova, Henrique ulabotelwa kuba akati kabunyina bwa Banakristo beni-beni. Ulizi kuti bulemu obu tabuyi kumuntu uuli woonse pe. Ulaamba ategwa: “Sunu ndilamulumba Jehova alimwi a Jesu izintu zyoonse nzyobandicitila. Ndilabeleka amamiliyoni aababelesi ba Jehova basyomeka ibamisyobo yoonse, mibala yoonse, alimwi baindene mobazwa, kabakamantene mumakanze.”

Ciindi naakacili kuyaabukomena, Dariyo awalo wakali muntu uulangwa ciimo. Kalaa myaka iili 16 yakuzyalwa, wakatalika kwiiya Bbaibbele a Bakamboni ba Jehova. Mboobu mbwaakazibona zintu: “Akati ka Bakamboni, ndajana kuti kunyina kulisumpula pe.” Wakalamwa kubona muuya waluyando lwini-lwini. Ikapati wakabona kuti bantu bamibala yiindene-indene bakali muzyuuno zyakweendelezya mikuli yambungano. Kufwumbwa ciindi natondezegwa muuya wakulanga ciimo anze lyambungano, Dariyo ulaibaluka kuti Jehova ulabayanda bantu bamuzisi zyoonse, misyobo yoonse alimwi amilaka yoonse.

Mbokuligwasyigwa

Toonse tulayanda kweendelezegwa cabulemu. Ncencico ncecikatazizya ikuliyumya mumusunko wakulangwa ciimo. Imbungano ya Bunakristo tiitukwabilili pe kumuuya woonse wakulangana ciimo iwanyika eyi mbyaabi. Kufwumbwa kuti Saatani Diabolosi keendelezya zintu zyanyika, kunooli kutalulama. (1 Johane 5:19) Ciyubunuzyo 12:12 caamba kuti: “Pele nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.” Imakanze aakwe taali buyo akupenzya pe. Ulakozyanisyigwa akabwenga. Mwaapostolo Petro ulatwaambila ategwa: “Sinkondonyoko Saatani uleendeenda mbuli syuumbwa wabutambo akuya buyandaula ngwati lume.”—1 Petro 5:8.

Alimwi Bbaibbele lilatwaambila kuti: “Eno amulibombye kuli-Leza. Amumukazye Saatani, uyoomucija.” (Jakobo 4:7) Icimwi cintu cigwasya mukweendelezya muuya wakulangana ziimo nkulangila lugwasyo kuli Leza, mbuli bwakacita Mwami Davida iwakati: “O Leza wangu, undivune kumaanza aabasizibi, kumaanza aabantu bataluleme bakali.” (Intembauzyo 71:4) Tulakonzya nokuba kupaila mbuli sintembauzyo ikuti: “Undifwide luzyalo, O Leza, nkaambo bantu balandivwima. Ciindi coonse balandipenzya kukundilwisya.”—Intembauzyo 56:1.

Ino Leza uya kuyiingula buti mipailo iili boobu? Ibbaibbele lilaingula ategwa: “Nkaambo ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula.” (Intembauzyo 72:12, 13) Cilakondezya kaka ikuziba kuti muciindi ceelede Jehova uyoobalemununa aabo ibalangwa ciimo!

“Tabakooyoo . . . nyonyoona”

Imfwulumende zyanyika eyi inga zyazumanana ikulwana muuya wakulangana ziimo kwiinda mumilawo yabo amunzila zyabo. Inga bazumanana ikusyomezya kweelana alimwi akululama. Pesi tabakonzi kuzwidilila pe. (Intembauzyo 146:3) Alikke Leza nguukonzya alimwi nguuyoogwisya muuya wakulangana ziimo. Uyoobacinca bantu kuti babe mukwasyi omwe uukamantene. “inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse” iyoofwutuka kumamanino aabweende obu bubyaabi akuyookkala muluumuno.—Ciyubunuzyo 7:9, 10.

Jehova uyoogwisya macise aaletwa akulangana ciimo camubala naa cabukkale. Amuyeeye buyo, kunyina muntu uuyooenzegwa bubi pe! “Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.” (Mika 4:4) Alimwi Isaya 11:9 yaamba kuti: “Tabakooyoo . . . nyonyoona.”

Kuti kamujatikizidwe amuuya wakulanga ciimo lino, oobu bulangizi bwakumbele buyoomuyumya kukuyanzana a Jehova. Kuyoomugwasya kuliyumya mukutalulama kwabweende oobu bubyaabi. Mbomulwana muuya wakulangwa ciimo amulange kumbele, mutobele lulayo lwa Bbaibbele lwabusongo ilwakuti: “Amuyume, amyoyo yanu ibe abukozu, nyoonse nomulangila Jehova.”—Intembauzyo 31:24.

Bupanduluzi buyungizidwe

[Nkotwakajana cifwanikiso icili apeeji 4]

Ifoto ya U.S. National Archives