Bali Acoolwe Aabo Balangilila!
“Amubone, ndaboola mbuli mubbi. Uli acoolwe oyo uulangilila akubamba zyakusama zyakwe.”—CIYUBUNUZYO 16:15.
1. Mbokunga buzuba bwa Jehova bulaafwi, ncinzi ncotunga twalangila?
BUZUBA bupati bwa Jehova buli aafwaafwi, alimwi eco caamba nkondo! Mucilengaano, mwaapostolo Johane wakabona twaambo twa “myuuya yabadaimona,” itubaanga mbaacula katuya “kubami” naa baleli banyika. Ikuyootyani? Nkuya “kuti ibabungike kunkondo yabuzuba bupati bwa-Leza Singuzuzyoonse.” Johane ulayungizya akwaamba kuti: “Lino bakababungika antoomwe mubusena butegwa muci-Hebrayo Harmagedoni.”—Ciyubunuzyo 16:13-16.
2. Nguni Gogo waku Magogo, alimwi ncinzi ciyoocitika ciindi aakulwana bantu ba Jehova?
2 Ino-ino Jehova uyoobucita kuti bweende obu bwamapolitikisi bwalino bunyonyoone Babuloni Mupati, ibulelo bwanyika yoonse bwabukombi bwakubeja. (Ciyubunuzyo 17:1-5, 15-17) Mpoona Gogo waku Magogo, Saatani Diabolosi uuwidide kucilawo canyika, uyoobungika mpi zyakwe akulwana nkondo ino-ino kubantu ba Jehova basiluumuno, ibabaanga tabakwe bukwabilizi. (Ezekiele 38:1-12) Pesi Leza uyootola ntaamu ikuvwuna bantu bakwe. Aayo ngaayooba matalikilo aa “buzuba bwa-Jehova obo bupati buyoosya.”—Joeli 2:31; Ezekiele 38:18-20.
3. Mbuti mbomunga mwapandulula zyakacitika kuli Ezekiele 38:21-23?
3 Ee, Jehova uyoovwuna bantu bakwe akunyonyoona nuuba buyo mukondo wabweende bwa Saatani ciindi twaakusika aciimo canyika icitegwa Harmagedoni, naa Amagedoni. Amubale majwi aabusinsimi bwa Ezekiele 38:21-23 akweezeezya mbocinoobede. Jehova ubelesya nguzu kuleta makumbi aavwumbilila, civwulamabwe cinyonyoona, minsi yamulilo, malwazi aajaya. Cidyobedyobe caide kuba nyika yoonse mbwiizulwa mbwaakopana makamu-makamu aa Gogo akutalika kulwana muli cabo. Kufwumbwa basinkondonyina Leza Singuzuzyoonse ibafwutuka waawo balajaigwa azilwanyo zya Jehova zyamuuya ikuvwuna babelesi bakwe. Caakumaninina ciindi ca “mapenzi mapati,” taakwe ciyoosyaala icabweende bwa Saatani ibutali bwabunaleza. (Matayo 24:21) Pele nomuba mumacise aalufwu lwabo, ibabi aaba bayooziba kuti ngooyu wabaletela manyongwe. Leza wesu sikuzunda lwakwe waamba kuti: “Nkabela bayooziba kuti ndime Jehova.” Eezi zintu zyamaleele ziyoocitika kuciindi cesu cino, mukubako kwa Jesu.
Kuboola Mbuli Mubbi
4. Muunzila nzi Jesu mwayooboola kuzoonyonyoona bweende bubyaabi obu bwazintu?
4 Mwami Jesu Kristo mubulemu bwakwe wakaamba kuti: “Amubone, ndaboola mbuli mubbi.” Imubbi uboola natayeeyelwi, aciindi ncatalangilwi, ciindi bunji bwabantu noboona. Ciindi Jesu naza mbuli mubbi kuzoonyonyoona bweende obu bubyaabi, uyoobavwuna aabo ibalangila ncobeni. Wakaambila Johane kuti: “Uli acoolwe oyo uulangilila akubamba zyakusama zyakwe, kuti ataendi acinswe akubonwa kuusa kwakwe.” (Ciyubunuzyo 16:15) Ino aaya majwi aamba nzi? Mbuti mbotunga twazumanana kulangila munzila yakumuuya?
5. Mbubambe nzi bwamulimo watempele ibwakaliko ciindi Jesu naakali ano ansi?
5 Kanjikanji inga mulindizi tasamununi pe kuti woona amulimo. Pesi eco cakali kucitika kutempele lyaku Jerusalemu ciindi Jesu naakali anyika alimwi kwakali nkamu zyabapaizi aba Levi ibakali kubelekela kutempele mu Jerusalemu. Mwakali mumwaanda wamyaka wa 11 B.C.E. ciindi Mwami Davida naakabunganya myaanda yabapaizi ba Israyeli alimwi azyuulu zyaba Levi bagwasilizi kuti ibe mbunga iijisi nkamu zili 24. (1 Makani 24:1-18) Imwi aimwi nkamu yabantu bainda kucuulu ibabelesi bayiisidwe yakalaa ciindi cayo cakulanganya mbazu zyamulimo wakutempele ziindi zisika kuli zyobile amwaka kwansondo yomwe iizwide cimwi acimwi ciindi. Pesi kwalo kuciindi ca Pobwe Lyazilawo, zyoonse nkamu zili 24 zyakaliwo amulimo. Alimwi kwakali kuyandika lumbi lugwasyo kuciindi capobwe lya Pasika.
6. Ncinzi Jesu ncaakali kuzuminizya ciindi naakaamba kuti, “Uli acoolwe oyo uulangilila akubamba zyakusama zyakwe”?
6 Ciindi Jesu naakati, “Uli acoolwe oyo uulangilila akubamba zyakusama zyakwe,” ulakonzya kuti wakali kwaamba bubambe bwakali kutobelwa kuciindeeco ibwamulimo wabulindizi kutempele. Mishnah yaci Juda yaamba kuti: “Ibapaizi bakali kulindilila mumasena otatwe ku Tempele: ku Ŋanda ya Abatina, ku Ŋanda ya Mulimo, aku Ŋanda ya Cikko; alimwi iba levi bakali kumasena aali makumi obile abumwi: bosanwe bakali kucitendele ca Mulundu wa Tempele, bone bakali muzyooko zyone zya mukati, bosanwe bakali kuzitendele zyosanwe zya Lubuwa lwa Tempele, bone bakali kuzyooko zyone zyandulo mpoluli anze, umwi wakali ku Ŋanda ya Zipo, uumbi ku Ŋanda ya Cisitilizyo, mpoona umwi wakali kunze lya busena bwa Cuuno Caluzyalo [anze lyabwaanda bwakusyule lya Busena Busalalisya]. Walo Silutwe wa Mulundu wa Tempele wakali kuzinguluka moonse mwakali balindizi kajisi amizenge iiyaka kumbele lyakwe, elyo kuti naa umwi mulindizi watanyamuka antela kumwaambila kuti, ‘O Silutwe wa Mulundu wa Tempele, luumuno alube kulinduwe!’ aboobo calibonya kuti uloona, walo wakali kunga nkumuuma amusako wakwe, alimwi wakalijisi nguzu zyakutenta zikobela zyakwe.”—Mishnah, Middoth (“Zyeeleko”), 1, mincali 1-2, yakasandululwa a Herbert Danby.
7. Nkaambo nzi bapaizi aba Levi ibakali kulindilila kutempele ncobakeelede kulangila?
7 Ba Levi abapaizi abo banji bakali kubelekela munkamu ezyo bakali kulangila busiku boonse kutegwa balindilile akukasya kufwumbwa muntu uutasalali kunjila mulubuwa lwatempele. Mbokunga ooyo “silutwe wa Mulundu wa Tempele” antela “silumamba wacikombelo” wakali kuzinguluka kusika kuzibaka zyoonse zili 24 kuziindi zyoonse zyamasiku, umwi aumwi mulindizi wakali kweelede kuti kalangila awo mpaimvwi kuti katayandi kujanikizigwa.—Incito 4:1.
8. Ino zikobela zyacikonzyanyo zya Munakristo ninzi?
8 Ibanakristo bananike alimwi ababelesinyina, bayandika kuti kabalangila alimwi kabasamine izikobela zyabo munzila yacikozyanyo. Eezi nzezitondezyo zilibonya izyakusalwa kwesu kumulimo waku tempele lya Jehova yakumuuya. Mukuzumina makani aya, tujisi muuya uusalala wa Leza, naa inguzu zyakwe, izitugwasya kucita milimo yesu akubelesya coolwe cesu cakuba basikwaambilizya Bwami. Ikoona muzibaka zyesu motubelekela Leza, inga kwatubikka muntenda yakujanikizigwa a Jesu Kristo, Silutwe wa tempele lyakumuuya lipati. Kuti twajanika tuloona kuciindeeco, inga cakozyanya akuti twasamununwa alimwi twatentelwa zikobela zyesu zyacikonzyanyo. Aboobo mbuti mbotunga twalangila?
Mbotunga Twalangila
9. Nkaambo nzi kwiiya Bbaibbele alugwasyo lwamabbuku aa Bunakristo ncocili cintu cipati boobu?
9 Ikusungwaala kwiiya Magwalo mulugwasyo lwamabbuku aa Bunakristo ncintu cikulwaizya kulangila munzila yakumuuya. Ikwiiya kuli boobu kuyootugwasya kulibambila mulimo, kuyootugwasya kulwana buyumuyumu, alimwi kuyootutondezya nzila iitola kulukkomano lutamani. (Tusimpi 8:34, 35; Jakobo 1:5-8) Kwiiya kwesu kweelede kuloma alimwi ikuyaambele. (Ba-Hebrayo 5:14–6:3) Cilyo cibotu iciligwa lyoonse cilakonzya kutugwasya kuzumanana kulangila akupakamana. Cilakonzya kukasya kuungumana kwalo kunga kwatondezya kutalya kabotu. Tatukwe kaambo kakutalya kabotu akufwa ŋonzi, nkaambo Leza ulimukutupa maunda-maunda aazilyo zyakumuuya kwiinda mu “muzike musyomesi uucenjede” munanike. (Matayo 24:45-47) Kulya cilyo cakumuuya lyoonse kwiinda mukuliyiisya alimwi amuciiyo camukwasyi ninzila imwi yakulangila akuti “[tuk]kale kabotu mulusyomo.”—Tito 1:13.
10. Mbuti miswaangano ya Bunakristo, mipati amisyoonto mbwiitugwasya kuzumanana kulangila munzila yakumuuya?
10 Miswaangano ya Bunakristo mipati amisyoonto ilatugwasya kulangila munzila yakumuuya. Ilakulwaizya alimwi ilapa ziindi zya “[k]ubusyanya-busyanya mukuyandana akucita milimo mibotu.” Ikapati tuleelede kuzumanana kubungana mbotubwene kuti “buzuba bwa-Kristo buli afwaafwi.” Oobo buzuba ncobeni lino buli aafwaafwi. Bwalo “[m]buzuba bwa-Jehova,” iciindi nayoosalazya bulelo bwakwe. Kuti buzuba oobo kabuli buzuba bupati ncobeni kuli ndiswe,—mbuli mbobweelede kuba—‘tatukaleki kubungana antoomwe.’—Ba-Hebrayo 10:24, 25.; 2 Petro 3:10.
11. Nkaambo nzi ncokunga kwategwa mulimo wa Bunakristo ncintu citasyaali mukulangila munzila yakumuuya?
11 Ikutola lubazu camoyo woonse mumulimo wa Bunakristo ncintu citasyaali pe mukuzumanana kulangila kwakumuuya. Ikutola lubazu lyoonse alimwi cabusungu mukukambauka makani mabotu kulatupa kuti katupakamene. Mulimo wesu ulatupa ciindi cinji cakwaambaula abantu kujatikizya Jwi lya Leza, Bwami bwakwe, alimwi amakanze akwe. Ncintu cikkomanisya ikukambauka kuŋandaa ŋanda, kucita nyendo zyakupilukila, alimwi akweendelezya ziiyo zya Bbaibbele zyaamunzi mumabbuku mbuli lya Luzibo Lutola Kubuumi Butamani. Ibaalu mumbungano yaku Efeso bakali kukonzya kupa bumboni bwakuti Paulo wakabayiisya “mukati kabantu akunjilauka mumaanda.” (Incito 20:20, 21) Aneeno, bamwi Bakamboni basyomeka ba Jehova balaa buyumuyumu bwakutapona kabotu bwalo ibubasinkilila mumulimo wabo munzila imwi, pele balajana nzila zyakwaambila bambi zya Jehova abuleli bwakwe alimwi balakondwa kapati kucita boobo.—Intembauzyo 145:10-14.
12, 13. Nkaambo nzi ncotuteelede kwiindilizya kulya akunywa?
12 Kutantamuka buhaacivwule mwangu kuyootugwasya kuzumanana kulangila munzila yakumuuya. Ciindi naakali kwaamba zyakubako kwakwe, Jesu wakakulwaizya baapostolo bakwe kuti: “Amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno, abuzuba obuya nobuyoomutilimuna mbuli kooze. Nkaambo buyoobasikila boonse abakala ansi.” (Luka 21:7, 34, 35) Kwiindilizya kulya akunywa takweendelani pe anjiisyo zya Bbaibbele. (Deuteronomo 21:18-21) Tusimpi 23:20, 21 yaamba kuti: “Utakali akati kabacakolwa, nanka akati kamadyanyama, nkaambo mukolwi asindya bayoosikilwa bucete, alimwi butolo bulasamika muntu madeludelu.”—Tusimpi 28:7.
13 Nokuba kuti kwiindilizya kulya akunywa takuna kusisya aciimo eco, kulakonzya kupa muntu kuungumana, nokuba kutolwaala alimwi akuyambaala kukucita kuyada kwa Leza. Kulalangilwa kuti kunooli kulibilika kujatikizya buumi bwamukwasyi, buponi, azimwi-zimwi. Nokuba boobo tuyookkomana kuti twabikka zintu zya Bwami ambele mubuumi akusyoma kuti Taata wesu wakujulu uyootwaabila swebo. (Matayo 6:25-34) Buyo-buyo, “buzuba obo” buyootusikila mbuli “kooze,” ambweni mbuli kakole kasisidwe kalo kayootuca katutabwene naa mbuli kooze kabikkidwe coongelezyo, mbuli tuya tubelesyegwa koongelezya akujata banyama batakwe ancobabwene. Eci inga tacikacitiki kuti twazumanana kulangila, katuzi kabotu-kabotu kuti tukkede “kumamanino aaciindi.”—Daniele 12:4.
14. Nkaambo nzi ncotweelede kucita mipailo yakusinizya?
14 Kupaila cakusinizya akwalo ncintu cimwi cigwasya kuzumanana kulangila munzila yakumuuya. Mubusinsimi bwakwe bupati, Jesu ulazumanana akukulwaizya kuti: “Pele amulinde lyoonse, mukombe, kuti mukakonzye kuyokoka kuzintu zyoonse ezi iziyoocitika, akwiima kumbele lya-Mwana a-Muntu.” (Luka 21:36) Ee, atupaile kuti lyoonse tube kulubazu lwa Jehova akubaa ciimo cizuminidwe ciindi Jesu, Mwanaa muntu, nayooboola kukunyonyoona bweende bwazintu bubi oobu. Kutegwa tuligwasye tobeni alimwi tugwasye basyomima mbotupailila, tweelede kuti “[t]ujatisye kukomba, [t]usungwaalile nkuko.”—Ba-Kolose 4:2; Ba-Efeso 6:18-20.
Ciindi Ciyaabumana
15. Ncinzi cikonzeka kwiinda mumulimo wesu wabukambausi bwabululami?
15 Mbotulindilila buzuba bupati bwa Jehova, cakutadooneka, tuyanda kuti tucite zyoonse nzyotukonzya mumulimo wakwe. Kuti twapaila kulinguwe cakusinizya kujatikizya makani aya, inga “[twa]jalwidwa mulyango mupati wakucita milimo mibotu.” (1 Ba-Korinto 16:8, 9) Kuciindi cakwe mwini Leza, uyoocita kuti Jesu akacite lubeta akwaandaanya “mbelele” zyalo ziluleme izyeelede buumi butamani kuzwa ku “mpongo” izyeelede lunyonyooko lutamani. (Johane 5:22) Tatuli ndiswe twaandaanya mbelele kuzwa kumpongo pe. Pesi mulimo wesu wakukambauka bululami lino upa bantu ciindi cakuti basale buumi bwakubelekela Leza kutegwa babe abulangizi bwakusalilwa kulubazu lwabuumi ciindi Jesu “naazooboola mubulemu bwakwe.” Ikufwiimpa kwaciindi cisyeede cabweende obu bwazintu kupa kuti kuyandike kapati kubeleka camoyo woonse mbotuyaa bubayandaula ‘aabo beelela buumi butamani.’—Matayo 25:31-46; Milimo 13:48, Ci.
16. Nkaambo nzi ncotweelede kuba basikwaambilizya Bwami basungweede?
16 Ciindi cakabamanina ibanyika yakuciindi ca Nowa, alimwi ino-ino ciyoobumanina bweende obu bwazintu. Aboobo atube basikwaambilizya Bwami basungweede. Mulimo wesu wakukambauka uyaabuzwidilila, nkaambo mwakaa mwaka kulabbapatizigwa myaanda yazyuulu yabantu mukutondezya kulyaaba kwabo kuli Leza. Bayaabuba akati kambunga ya Jehova iilongezedwe—“bantu bakwe, imbelele zyamafula aakwe.” (Intembauzyo 100:3) Ma! Cilakonda kaka ikutola lubazu mumulimo wakukambauka Bwami walo uletela bantu banji boobu ibulangizi nobutanasika “buzuba bwa-Jehova obo bupati buyoosya”!
17, 18. (a) Mbotukambaukila, tweelede kulangila kutambulwa buti kulibamwi? (b) Ncinzi iciyoobajanikizya ncobeni basikasankusanku?
17 Mbuli Nowa, tujisi lugwasyo lwa Leza alimwi abukwabilizi. Ee, ibantu, ibangelo bakasamide mibili yanyama, alimwi aba Bbabbani baleelede kuti bakuunyansya mulumbe wa Nowa, pele eeco teecakamulesya pe. Asunu bamwi balanyansya ciindi notubatondezya bumboni bwini-bwini bwakuti tukkede mu “mazuba aakumamanino.” (2 Timoteo 3:1-5) Kusampaula kuli boobo kuzuzikizya businsimi bwa Bbaibbele bujatikizya kubako kwa Kristo, nkaambo Petro wakalemba kuti: “Kumazuba aakumamanino kuyoosika basabuzi beenda muzisusi zibi zyamyoyo yabo beni, bayoosabula cakwaamba kuti, Ino kuli kuli kuboola [“kubako,” NW] kwakwe ukwakasyomezegwa? Nkaambo kakuti kuzwa kuciindi nibakafwa mataateesu, zintu zyoonse zicili mbubonya mbozyakabede kuzwa kumalengelo.”—2 Petro 1:16; 3:3, 4.
18 Basikasankusanku basunu abalo balakonzya kuyeeya kuti: ‘Taakwe cintu cacinca kuzwa kumalengelo. Buumi bwiide kuya, bantu balalya, balanywa, balakwatana, akulela mikwasyi. Nokuba kuti Jesu kaliwo, takaciti lubeta muciindi ncendi muumi mebo.’ Ma! Ino nkulubila oko. Ikuti kwatabajaya cintu cimbi cisyeede, ibuzuba bupati bwa Jehova buyoosya buyoobajanikizya kabali akati kazyalani eeli libyaabi mbubonya lunyonyooko lwa Zambangulwe mbulwakalobya maumi aazyalani libyaabi elyo lyakuciindi ca Nowa.—Matayo 24:34.
Tuleelede Kulangila!
19. Mbuti mbotweelede kuulanga mulimo wakucita bantu kuti babe basiciiya?
19 Kuti katulyaabide kuli Jehova, inga tatubutikwi kuti toone kwiinda mukuyeeya kutaluzi. Eeci nciindi cakulangila, kusyoma mubusinsimi bwa Leza, alimwi akucita mulimo ngotutumidwe iwakuti “mukabaiisye bantu bamisyobo yoonse.” (Matayo 28:19, 20) Mbobuyaabuya kumamanino bweende oobu bwazintu, inga tatubi acoolwe ciinda ali ceeci cakubelekela Jehova Leza mubusolozi bwa Jesu Kristo kwiinda mukutola lubazu mumulimo wanyika yoonse mbwiizulwa iwakukambauka “aya Makani Mabotu aa-Bwami” mamanino naatanasika.—Matayo 24:14; Marko 13:10.
20. Ncikonzyanyo nzi ncobakapa ba Kalebi a Joshua, alimwi ino kusala kwabo kututondezya nzi swebo?
20 Bamwi bantu ba Jehova bali kumubelekela kwamakumi aamyaka, ambweni buumi bwabo boonse. Nokuba kuti twakazwaa kuzumina bukombi bwini-bwini, atube mbuli Kalebi muna Israyeli, walo “wa[ka]tobela Jehova camoyo woonse.” (Deuteronomo 1:34-36) Walo a Joshua bakalilibambilide kabotu-kabotu kunjila mu Cisi Cakasyomezedwe mbubakamanina buyo kufwutulwa kuzwa kubuzike bwaku Israyeli mu Egepita. Pele ibunji bwa bana Israyeli bapati bakabula lusyomo elyo bakapegwa myaka iili 40 yakuzemba munkanda, mwalo mobakafwida. Kalebi alimwi a Joshua bakaliyumya mubuyumuyumu antoomwe ambabo ciindi coonse eco, pele imuya ciindi aaba baalumi bobile bakanjila mucisi cakasyomezedwe. (Myeelwe 14:30-34; Joshua 14:6-15) Kuti aswebo ‘twatobela Jehova camoyo woonse’ akuzumanana kulangila munzila yakumuuya, tuyookondwa ikunjila munyika mpya ya Leza iisyomezedwe.
21. Ino cinzi ciyootucitikila kuti twazumanana kulangila munzila yakumuuya?
21 Bumboni bulasinizya kabotu-kabotu kuti tukkede kuciindi cakumamanino akuti buzuba bwa Jehova bulaafwi. Eeci tacili ciindi cakufwa ŋonzi akuyambaala mukucita kuyanda kwa Leza. Tuyoolongezegwa buyo kuti twazumanana kulangila munzila yakumuuya akusamide zikobela zyesu zituzibya kuba babelesi Banakristo alimwi batwanga ba Jehova. Acibe cintu ncotukanzide kuti “[t]ulangile, [t]ukakatile mulusyomo. A[t]ube baalumi benibeni, [t]uyume.” (1 Ba-Korinto 16:13) Mbotuli babelesi ba Jehova, umwi aumwi wesu akakatile akuba sicamba. Eelyo tuyooba akati kabaabo ibanoolibambide ciindi buzuba bupati bwa Jehova bwaazoosika, kababeleka akati kamakamu aabantu bakkomana ibalangila.
Inga Mwaingula Buti?
◻ Mbuti mbomunga mwazipandulula zikobela zyesu zyacikonzyanyo, alimwi mbuti mbotunga twazumanana kuzisama?
◻ Ninzila nzi zimwi zyakuzumanana kulangila munzila yakumuuya?
◻ Nkaambo nzi ncotweelede kulangila basikasankusanku, alimwi mbuti mbotweelede kubalanga?
◻ Mbuti mbotweelede kulanga mulimo wesu wakucita bantu kuti babe basiciiya mumazuba ano aakumamanino?
[Majwi aakwelelezya sikubala aali apeeji 25]
Sena mulikanzide ikulangila munzila yakumuuya kamusamide zikombela zyanu zyacikonzyanyo?
[Cifwanikiso icili apeeji 26]
Muuya uusalala ulabagwasya Banakristo ikulangila akucita milimo yabo