“Kamulindila”
1 Naakamanizya kupandulula zintu ziyandika kapati zyakali kuyootondezya mazuba aamamanino aabweende obu bwazintu, Jesu wakakulwaizya basikwiiya bakwe kuti “kamulindila.” (Mk. 13:33) Nkaambo nzi Banakristo ncobeelede kulindila? Nkaambo tukkede kuciindi camapenzi aatanabwenwe mubuumi bwabantu. Tatuyandi koona munzila yakumuuya akaambo kakuti eci cilakonzya kutubikka muntenda. Eco inga capa kuti katutakkomene pe amulimo ngwaakatupa Jehova kuti tuucite kuciindi ecino camamanino. Ino mulimo nzi ooyo?
2 Jehova watuma bantu bakwe ikuti baambilizye makani mabotu aa Bwami bwakwe nyika yoonse mbwiizulwa—bwalo buyoozuzikizya zyoonse nzyobayanda bantu. Ikubelekelaamwi kwesu ambunga ya Leza citondezya kuti tuli Banakristo bakasimpe ibabikkila maanu kuciindi ncotukkede alimwi akuyandika kwakugwasya bamwi kuti abalo bamvwe “majwi aabuumi ubutamani.” (Joh. 6:68) Kwiinda mukutola lubazu cabusungu mumulimo ooyu uuyandika kapati, tutondezya kuti tulalindila munzila yakumuuya.
3 Kukulwaizigwa Kukambauka: Mbotuli Bakamboni ba Jehova, tweelede kuukkomanina mulimo wesu. Iluyando ndotujisi kuli Leza alimwi abasimukoboma, ndolutukulwaizya kutola lubazu mumulimo wakukambuka. (1 Kor. 9:16, 17) Twanoocita boobo, tuyoolifwutula tobeni abaabo ibatuswiilila. (1 Tim. 4:16) Aboobo aabe makanzeesu aakutola lubazu lyoonse alimwi akubeleka kwamawoola manji cakusungwaala mukukambauka zyabwami bubotu kwiinda bwami buli boonse bantu mbobanga babaambubo—Bwami bwa Leza!
4 Kuli kaambo kapati katupa kuti tucite mulimo wesu cakufwambaana—mapenzi mapati ayootalika katucibeleka mulimo ooyu. Akaambo kakuti tatuzi buzuba alimwi aciindi, tweelede kulindila alimwi katulibambilide lyoonse akupaila calusyomo kuli Jehova. (Ef. 6:18) Mulimo wakukambauka uciyaa bukomena. Pele mulimo wabukambausi uutalikomeneni iwacitwa kubantu kuzwa kaindi uyoosika kumamanino buzuba bumwi.
5 Cakusyomeka atutobele malailile aa Jesu aakuti “kamulindila.” Eeci cilayandika kapati lino kwiinda lyoonse. Atwaatobele malailile aaya cakufwambaana. Sunu alimwi amazuba oonse, atubikkile maanu kuzintu zyakumuuya, akupakamana alimwi akusungwaala mumulimo wa Jehova. Inzya, “atukalinde, tube bapakamani.”—1 Tes. 5:6.