Icoolwe Ncobajisi Bana
1 Ibunji bwabazyali sunu balayeeya kabotu-kabotu coolwe ncobakalaancico cakukomenena mukasimpe—kutola lubazu mumulimo wa Buzuba bwakumwaya Mamagazini. Mulimo ooyu wakatalisigwa mumbungano zyoonse mumwaka wa 1949. Buzuba bomwe mvwiki amvwiki muntu amuntu wakeelede kubikkila maanu kukumwaya Ngazi Yamulindizi alimwi a Awake! mumigwagwa, kuŋandaa ŋanda, kucintoolo acintoolo alimwi amunzila zimbi. Basikumwaya bana-bana bakali kubulangila kapati buzuba oobu kutegwa bakatole lubazu mumulimo nkaambo bwakali kubapa coolwe cakutola lubazu mumulimo antoomwe abapati mumbungano. Sena eeci mbucakabede akulindinywe nomwakacili bana?
2 Amubeleke Antoomwe Abana Banu: Bana ibacili baniini aabo batakonzyi kutalisya mubandi wamu Magwalo aŋanda yamuntu balakonzya kwaabila mamagazini. Kuyandika kubayiisya mbobanga basikila muntu kwiinda mukubelesya majwi buyo masyoonto munzila nguba-uba. Majwi masyoonto, ambweni ikupandulula buyo cifwanikiso cili aacivwumbyo cabbuku. Basiŋanda banji balafwambaana kwaatambula mabbuku eesu ikapati eelyo naamwaigwa abana, kanjikanji balabalumbaizya bana aaba akaambo kakusyomeka akulilemeka kwabo. Ikuti naa bagwasigwa bana, balakonzya kucita kabotu mumulimo ooyu, ikugwasilizya mukumwaya mulumbe wa Bwami. Inzya, bana mbobayaabukomena, bazyali babo bayanda kubagwasya kuzumanana kuyaambele muluzibo lwamulimo wabukambausi.
3 Manuel wakatalika kukambauka kuŋandaa ŋanda naakacili amyaka yotatwe yakuzyalwa. Bazyali bakwe bakamuyiisya kupeta twaambo tumwi mbwakonzya kusikila bantu. Ulakambauka cabusungu antoomwe ambabo, akumwaya mamagazini, mabroshuwa alimwi amatulakiti manji. Alimwi ulacita abukambausi bwamukwiizya. Bumwi buzuba bazyali bakwe nobakamutola kupaaki kuyoosobana, kabali kubusena oobu wakaabila matulakiti kubantu bamwi ibakali nkweena ooko. Nokuba kuti Manuel ucili muniini, bazyali bakwe alimwi ambungano yoonse balakulwaizigwa abusungu mbwajisi mumulimo.—Tus. 22:6.
4 Mazuba aamu Mujibelo oonse abikkidwe kuti “Mazuba aakumwaya Mamagazini” a Kkalenda yamu 2000 ya Bakamboni ba Jehova. Nobazyali, twamukulwaizya kuti mubikkile maanu kapati kumulimo ooyu, mugwasye bana banu kunootola lubazu lyoonse mbuli mbokukonzyeka mumulimo ooyu uulibedelede.