Sena Kuponya Kwamaleele Kucicitika Asunu?
“AMUMUSYOME Jesu mulapona!” Twaambyo mbuli bwakaaka twakamucitya kuti mulombwana uutegwa Alexandre, sicikombelo ca Evangelical, atalike kusyoma kuti kunywa musamu kutegwa apone kukuciswa kwakwe kutondezya kubula lusyomo. Wakatalika kuzumina kuti lusyomo lwakwe lulikke lwakali kuya kumuponya munzila yamaleele njaakali kuyanda. Benedita, Katolika munkutwe, wakakkomana kapati naakamvwa zyamaleele aakuponya aakali kucitwa muntempele ya Aparecida do Norte, mudolopo lya São Paulo, kucisi ca Brazil. Kabelesya mabala aamasalamuzi ngaakaiisigwaa banyina bamwi ibapati babanyina Benedita wakapaila ku Mwami Mukaintu waku Aparecida, kuli Anthony, alimwi aku “basaante” bambi kutegwa apegwe nguzu zyakuponya baciswa.
Cilibonya kuti, nomuba mumazubaano aakumamanino kwamwaanda wamyaka wa 20, bunji bwabantu bacisyoma mukuponesegwa munzila yamaleele—pele ino nkaambo nzi? Kulalangilwa kuti, bamwi balacimwa ciindi bamadokota nobatazwidilili kuponya bulwazi, kucisa, akupenga kwabayandwa babo, ikapati bana babo. Aabo baciswa malwazi mapati inga bayeeya kuti akaambo kakudula kupati kwamisamu yacikuwa, ikuti bayandaula nkobanga baponesegwa kwiinda mulusyomo taaku ncibasowa pe. Bamwi balabona aa TV zikombelo zinjaanji zyabantu buyo kabatamba bantu kuti baponesegwe kumalwazi mbuli AIDS, kutyompokelwa, kkansa, kusondoka, kutiyaanisya kwa bulowa, amalwazi amwi. Basinizizye abatasinizizye boonse kunyina makani, basikulangilila aaba balangila kuunka kuli basikuponya aaba mbuli mamanino aakusola kwabo. Bamwi alimwi ibasyoma kuti kuciswa kwabo kwakaletwaa myuuya mibi inga bayeeya kuti misamu yakapangwaa bantususu inyina nguzu zyakubagwasya.
Kunze lyaboobo, kuli abambi baukazya loko, mane akuusulaika buya, muzeezo wakuponesegwaa “basaante” bafwide munzila yamaleele nebaba basikuponya bacili baumi. Kweelana abwakaamba pepa lyamakani litegwa Jornal da Tarde, haazibwene wabukwabilizi bwa mubili kumalwazi wazina lya Dráusio Varella usyoma kuti kusyoma ooku “kwiile kupenzya buyo bafwubafwuba abaabo bazingwa.” Ulayungizya ategwa: “Akaambo kakusyoma mumaleele, bantu banji balakuleka kusilikwaa misamu yacikuwa nkaambo kabaaba ibabacenga.” Alimwi The New Encyclopædia Britannica ipandulula kuti: “Kuponya kutali kwacikuwa mazubaainda aaya kwaali kuyeeyelwa kucitikila aamasena aategwa alasalala alimwi aziyanza zya bukombi, aboobo sayaansi yamisamu kanjikanji yali kwaamba kuti kuponya oku kucitika buyo akaambo kakuti naa cintu cimwi waciyeeyela, cilalangilwa kukucitikila, alimwi omo kamuli muciimo ceelela.” Pele, alimwi mpobali bantu banji basyoma gagaaga kuti bakapona kwiinda mumaleele. Kuli mbabo, ategwa kuponya ooku kwakabeleka!
Aabo balibala Bbaibbele balizyi kuti Jesu Kristo wakabaponya balwazi ziindi zinji-zinji, kacita oobu “anguzu mpati zya-Leza.” (Luka 9:42, 43) Aboobo inga banyandwa akubuzya kuti, ‘Sena nguzu zya Leza zicibeleka akuponya munzila yamaleele asunu?’ Ikuti naa mboobo, nkaambo nzi kusoleka kwakuponya ncokutazwidilili akuleta zilangilwa? Sena nkaambo kakuti mulwazi unyina lusyomo lweelede naa nkaambo kakuti kusanga kwakwe nkusyoonto? Sena cililuzi ku Munakristo kuyanda kuponesegwa munzila yamaleele ciindi nalaa bulwazi bucisa kapati naa butasilikiki? Alimwi sena kuponya kuzwidilila kwamaleele mbuli kwakacitwaa Jesu kuli nokuya kucitika alimwi? Kwiingula kwamibuzyo mipati eeyi inga mwakujana mucibalo ciccilila.