Naavwula Buti Masukusyo, Amukakatile Kulusyomo Lwanu!
“Nobakwesu, kamukkomana nomusikilwa makatazyo [masukusyo] manji-manji.”—JEMUSI 1:2, Ci.
1. Ncinzi citakasyi bantu ba Jehova kumubelekela mulusyomo alimwi “acamoyo mubotu”?
BANTU ba Jehova balamubelekela kabali Bakamboni bakwe bamusyoma alimwi “acamoyo mubotu.” (Deuteronomo 28:47; Isaya 43:10) Balacita oobo nokuba kuti lyoonse balayaana amasukusyo manji. Nokuba kuti bali mumapezi, bajana luumbulizyo kumajwi aakuti: “Nobakwesu, kamukkomana nomusikilwa makatazyo [masukusyo] manji-manji. Mulizi kuti mwayuma mukusyoma nomutepaulwa mulaiya kukakatila.”—Jemusi 1:2, 3, Ci.
2. Makani nzi aazibidwe kujatikizya mulembi walugwalo lwa Jakobo?
2 Imakani aaya akalembwa mumwaka wa 62 C.E. asiciiya Jakobo, imunyinaa Jesu Kristo. (Marko 6:3) Jakobo wakali mwaalu mumbungano yaku Jerusalemu. Walo, Kefa (Petro) alimwi a Johane “baambwa kuti misemu yambungano”—ibayumu, ibazyandamene mukugwasilizya mumbungano. (Ba-Galatiya 2:9) Iciindi kaambo kakupalulwa nokakaletwa ku “baapostolo abapati” mu 49 C.E., Jakobo wakapa muzeezo mubotu wamu Magwalo walo iwakatalika kutobelwa akabunga keendelezya kamumwaanda wamyaka wakusaanguna.—Incito 15:6-29.
3. Mapenzi nzi amwi Banakristo bamumwaanda wamyaka wakusaanguna ngobakalaawo, alimwi ino inga twalujana buti lugwasyo lupati luzwa mulugwalo lwa Jakobo?
3 Akaambo kakuti wakali mweembezi munzila yakumuuya uubikkila maanu, Jakobo ‘wakalizi imbelele zyakwe mbozibede.’ (Tusimpi 27:23) Wakaziba kuti Banakristo kuciindi eco bakali mumasukusyo mapati. Ikuyeeya kwabamwi akati kabo kwakeelede kululamikwa, nkaambo bakali kusalululana kabavwuninina bavwubi. Kubanakristo bali mbobabede, ikukomba cakali ciyanza buyo. Bamwi bakali kubisizya bamwi kwiinda muŋambawido yabo iipilingene. Imuuya wakunyika wakabanyonganya, aboobo ibanji teebakacili kukkazika camba alimwi bakacileka kupaila lyoonse. Alimwi, Banakristo bamwi bakali kuciswa munzila yakumuuya. Ilugwalo lwa Jakobo lubandika makani aaya munzila iikulwaizya, alimwi lulayo lwakwe lulagwasya sunu mbubwena mbuli mbolwakali kugwasya mumwaanda wamyaka wakusaanguna C.E. Tuyakugwasigwa kapati ikuti naa lugwalo oolu twalubona kuti lulembeledwe umwiumwi wandiswe.a
Iciindi Notuli Mumasukusyo
4. Mbuti mbotweelede kwaabona masukusyo?
4 Jakobo ulatutondezya mbotweelede kulanganya masukusyo. (Jakobo 1:1-4) Katalyaambi kuti wakali mwanookwabo a Mwanaa Leza, mukulicesya ulyaamba kuti “muzike wa-Leza awa-Mwami Jesu Kristo.” Jakobo ulembela ku “mikowa iili ikumi aibili” yaba Israyeli bakumuuya “iimwaikide koonse koonse,” akaambo kakupenzegwa kumatalikilo. (Incito 8:1; 11:19; Ba-Galatiya 6:16; 1 Petro 1:1) Mbotuli Banakristo, aswebo tulapenzegwa alimwi ‘tulasikilwa masukusyo aayindene-indene.’ Pele ikuti twayeeya kuti ikuliyumya mumasukusyo kuyumya lusyomo lwesu, tuyakucibona kuba “coolwe cipati” ciindi naatusikila. Ikuti naa twazumanana cakusyomeka kuli Leza ciindi camasukusyo, eci ciyakutuletela lukkomano lutamani.
5. Ncinzi masukusyo eesu ncaakonzya kujatikizya, alimwi ncinzi cicitika iciindi notuliyumya mulingawo?
5 Imasukusyo eesu ajatikizya zintu zibyaabi zyoonse zivwula kucitikila banamaleya. Mucikozyanyo, ikuciswa-ciswa kulakonzya kutupenzya. Leza taciponyi kwiinda mumaleele mazubaano, pele ulaingula mipailo yesu njotumulomba kuti atupe busongo alimwi anguzu ziyandika kuzunda bulwazi buli boonse. (Intembauzyo 41:1-3) Alimwi tulasukusigwa akaambo kabululami mbotuli Bakamboni ba Jehova ibapenzegwa. (2 Timoteo 3:12; 1 Petro 3:14) Iciindi notuliyumya nomuba mumasukusyo aali boobo, ilusyomo lwesu lulasinizigwa, alimwi luba lusyomo ‘lusunkidwe.’ Alimwi ciindi lusyomo lwesu nolwazunda boobo, ‘luleta lukakatilo.’ Ilusyomo lwesu ilwayumizigwa kwiinda mumasukusyo luyakutugwasya kuliyumya mumasunko aali kumbele.
6. Mbuti ‘lukakatilo mbolulondola mulimo walo woonse,’ alimwi nintaamu nzi zigwasya izinga zyatolwa iciindi notusunkwa?
6 “Eno,” Jakobo ulaamba, “lukakatilo alukalondole mulimo walo woonse.” Ikuti naa twalekela isukusyo ikuzumanana kakunyina kulilesya cakufwambaana kwiinda mukubweza inzila iiteendelani amagwalo, ilukakatilo luyakumanizya “mulimo” wakutucitya kuti tube Banakristo bakkwene, ibatabulide mulusyomo. Aino, ikuti naa isukusyo lyayubununa kukompama kwesu, tweelede kulomba lugwasyo kuzwa kuli Jehova kutegwa tuzunde penzi elyo. Ino mbuti kuti isukusyo eelyo musunko wakoonana? Atulipailile penzi eelyo alimwi akubweza ntaamu kweelana anzyotwalomba mumipailo yesu. Ndiza zimwi ziindi inga twayandika kucinca busena bwakubelekela nokuba kucinca mulimo naa kubweza intaamu zimwi zinga zyatucitya kuti tuzumanane kusyomeka kuli Leza.—Matalikilo 39:7-9; 1 Ba-Korinto 10:13.
Ikuyandaula Busongo
7. Mbuti mbotunga twagwasigwa kuzunda masukusyo?
7 Jakobo ulatutondezya ncotweelede kucita ikuti naa tatuzi ncotunga twacita ikulwana isukusyo limwi. (Jakobo 1:5-8) Jehova kwiina natikatutongooke akaambo kakubula busongo alimwi akubupailila mulusyomo. Uyakutugwasya kuti isukusyo eelyo tukalilanganye munzila yeelede alimwi akukonzya kukakatila. Tulakonzya twayeezegwa magwalo abasyomima neciba ciindi notulibalila Bbaibbele naa notuli kumuswaangano. Izintu izicitika kwiinda munguzu zya Leza zilakonzya kutugwasya kuziba ncotweelede kucita. Tulakonzya kusololelwaa muuya wa Leza. (Luka 11:13) Ikutegwa tugwasigwe boobo, tweelede kukakatila muluyanzano lwesu a Leza alimwi abantu bakwe.—Tusimpi 18:1.
8. Nkaambo nzi sikudonaika ncatakonzyi kulangila kutambula cintu kuli Jehova?
8 Jehova ulatupa busongo bwakulwana masukusyo ikuti naa twazumanana ‘kukumbila cakusyoma, kakunyina kudonaika’ (Ci). Muntu uudonaika “uli mbuli mayuwe aalwizi aayo aavwandauka akutonkaikwa aluuwo” (Ci), kufwumbwa ciindi, naatalibambilide. Ikuti naa tuli bantu batakkalikide boobu munzila yakumuuya, ‘tutayeeyi kuti tulapegwa cintu kuli Jehova pe.’ Tutabi bantu ‘bajisi myoyo yobile’ alimwi abantu ‘bapilauka’ notupaila nomuba munzila zimwi zimbi. Pele, atube aa lusyomo muli Jehova, nkaambo kulinguwe Nkokujanwa busongo.—Tusimpi 3:5, 6.
Ibavwubi Abacete Balakonzya Kubotelwa
9. Mbotuli bakombi ba Jehova, nkaambo nzi ncotulaa kaambo kakubotelwa?
9 Nokuba kuti bucete bulaakati kazintu zituletela masukusyo, tweelede kuzyiba kuti Ibanakristo boonse bavwubi alimwi abacete balakonzya kubotelwa. (Jakobo 1:9-11) Kabatanaba basikutobela Jesu, ibunji bwa Banakristo bananike bakusaanguna tiibakali bavwubi alimwi bakali kusampaulwa abantu banyika. (1 Ba-Korinto 1:26) Pele bakali kukonzya kubotelwa akaambo ka ‘kusumpulwa’ kwabo kuba bantu bakali kulindila kuba basikukona ba Bwami. (Ba-Roma 8:16, 17) Pele, ibantu bavwubi balo kumatalikilo ibakali kulemekwa bakali kuyooba bantu ‘bacesedwe’ mukuba basikutobela Kristo akaambo kakusampaulwa abantu bamunyika. (Johane 7:47-52; 12:42, 43) Pele mbotuli babelesi ba Jehova, toonse tulakonzya kubotelwa akaambo kakuti lubono lwanyika alimwi akulemekwa tazikwe mpindu twazyeelanisyaa lubono lwakumuuya ndotuli aalo. Aboobo, tatulilumbili kuti akati kandiswe kwiina uukonzya kulisumpula akaambo kabulemu mbotujisi!—Tusimpi 10:22; Incito 10:34, 35.
10. Mbuti Munakristo mbwayelede kubona buvwubi bwakumubili?
10 Jakobo utugwasya kuti tuzyibe kuti buumi bwesu tabujisilidi alubono alimwi akuzwidilila kwesu munyika. Mbubwena mbuli kweebeka kwamalangalanga mbokutakonzyi kulilesya kunyana akufwa “izuba lyapasula acisansa,” mbubwena oobo abwalo buvwubi mbobutakonzyi kumulansizya buumi muvwubi. (Intembauzyo 49:6-9; Matayo 6:27) Ulakonzya kufwa kacili “mukweenda kwakwe,” ndiza kacili mukukutauka mumakwebo. Aboobo, icintu cipati kwiinda zyoonse nkuba “bavubi kuli-Leza” alimwi akucita kufwumbwa ncotukonzya kutola ambele ziyandika zya Bwami.—Luka 12:13-21; Matayo 6:33; 1 Timoteo 6:17-19.
Balaacoolwe Aabo Ibayuma Mumasukusyo
11. Mbulangizi nzi mbobajisi aabo ibakakatila kulusyomo lwabo ciindi nobali mukusukusigwa?
11 Kwiina makani tuli bavwubi naa bacete, tulakonzya kuti katukkomene kufwumbwa kuti katukakatila naa kuliyumya mumasukusyo eesu. (Jakobo 1:12-15) Ikuti naa twaliyumya mumasukusyo aayo, ilusyomo lwesu kalutazungaanisigwi, tulakonzya kwaambwa kuti tulikkomene, nkaambo kayi tee kuli lukkomano mukucita zintu ziluleme mumeso aa Leza. Kwiinda mukukakatila mulusyomo lwabo mane do nobakafwa, Ibanakristo bananikidwe amuuya batambula “musini wabuumi,” butafwiki kujulu. (Ciyubunuzyo 2:10; 1 Ba-Korinto 15:50) Ikuti katujisi bulangizi bwabuumi bwaanyika akuzumanana mulusyomo lwesu kuli Leza, tulakonzya kulangila kupona buumi butamani muparadaiso anyika. (Luka 23:43; Ba-Roma 6:23) Taliboteli Jehova kuli baabo boonse ibamusyoma!
12. Iciindi notwanjila mumapenzi, nkaambo nzi ncotuteelede kwaamba kuti: “Ndatepaulwa kuli-Leza”?
12 Sena cilakonzeka kuti Jehova lwakwe atutepaule amapenzi? Peepe, tatweelede kwaamba kuti: “Ndatepaulwa kuli-Leza.” Jehova kwiina nasola kutoongelezya kucita bubi pele ulatugwasya akutupa nguzu zyeelede ikutegwa tuliyumye ikuti naa twazuunyana mulusyomo. (Ba-Filipi 4:13) Leza ulisetekene, aboobo takonzya kutubikka mubukkale bunga bwatupa kuti tuwide mucibi. Ikuti naa twalijana muciimo cibyaabi akucita cibi, tatweelede kutongooka nguwe pe, “nkaambo Leza tatepauliki kucibi, alimwi walo mwini tatepauli muntu pe.” Nokuba kuti Jehova zimwi ziindi ulazumizya masukusyo kutusikila ikutegwa tululamikwe akugwasigwa, kwiina natutepaula kumwi kajisi muzeezo mubyaabi. (Ba-Hebrayo 12:7-11) Saatani ulakonzya kututepaula naa kutusunka kucita cintu cibyaabi, pele Leza ulakonzya kutuvwuna kumubi ooyo.—Matayo 6:13.
13. Ncinzi cinga cacitika ikuti naa icisusi cibyaabi naa muzeezo mubyaabi tiitwausowela ambali?
13 Lyoonse tweelede kucenjela nkaambo ciimo cimwi cilakonzya kutupa kuti tube aacisusi cinga catoongelezya kucita cibi. Jakobo waamba kuti: “Pele muntu amuntu ulatepaulwa naongelezegwa akucegwa azisusi zyakwe mwini” (Ci). Kwiina notunga twatongauka Leza kucibi cesu ikuti naa twalekela moyo wesu kuzumanana kuyeeya cisusi cibi. Ikuti naa tatuusoweli kumbali muzeezo mubi, ‘ulasima,’ unikuyeeyegwa lyoonse mumoyo, alimwi ‘ulazyala cibi.’ Cibi cacitwa, ‘cilazyala lufu’ (Ci). Aino lyoonse tweelede kwiikwabilila myoyo yesu akukazya mizeezo mibyaabi. (Tusimpi 4:23) Kaini wakacenjezegwa kuti cibi cakalaafwaafwi kumuzunda, pele kwiina naakacikazya pe. (Matalikilo 4:4-8) Eelyo, ino mbuti kuti naa tuyanda kutalika kukkala bukkale butayendelani amagwalo? Tweelede kubalumba baalu Banakristo naa batusikila kutegwa batululamike akutuboozya kutegwa tutaciti cibi kuli Leza.—Ba-Galatiya 6:1.
Leza—Nguupa Zintu Zibotu Zyoonse
14. Munzila nzi mbotunga twaamba kuti zipego zya Leza ‘zililondokede’?
14 Lyoonse tweelede kuyeeya kuti kuli Jehova kulikke Nkokuzwa zintu zibotu, takuzwi masukusyo pe. (Jakobo 1:16-18) Jakobo basyominyina wakabaita kuti “nobakwesu bayandwa” alimwi utondezya kuti Leza Ngosikupa ‘wazipego zibotu zyoonse azyoolwe zyoonse zilondokede.’ Izipego zya Jehova zyakumuuya alimwi azyakumubili ‘zililondokede,’ naa zilizulide, kwiina mpozibulide pe. “Zilazwa kujulu,” kujulu kwini nkwakkala Leza. (1 Bami 8:39) Jehova ‘ngu Wisi wamimuni’—izuba, imwezi alimwi anyenyeezi. Alimwi ulatupa mumuni wakumuuya alimwi akasimpe. (Intembauzyo 43:3; Jeremiya 31:35; 2 Ba-Korinto 4:6) Leza tali mbuli zuba lipa kuti zimvwule kazicinca-cinca nolyeenda alimwi libalisya buyo ciindi nolili akalangabwaaseme, walo lyoonse kwiina nacinca, tacesyi kupa zintu zyoonse zibotu. Uyootugwasya akutucitya kuti tulibambile kulwana masukusyo ikuti naa izipego zyakumuuya zyoonse twazibelesya izipegwa kwiinda mu Jwi lyakwe alimwi akwiinda mu “muzike musyomesi uucenjede.”—Matayo 24:45.
15. Ncipego nzi cimwi ciliko akati kazipego zimwi zibotu kapati zya Jehova?
15 Ncipego nzi cimwi cili akati kazipego zibotu kapati zya Leza? Nkuzyalwa kwabana bakumuuya kwiinda munguzu zyamuuya uusalala, kababeleka kweelana amakani mabotu, naa “makani aalusinizyo.” Aabo ibazyalwa munzila yakumuuya bali akati kabaabo ibategwa “mbuli bakabalwebalwe” ibakasalwa akati kabanamaleya kuti babe “bami abapaizi” mubwami bwakujulu. (Ciyubunuzyo 5:10; Ba-Efeso 1:13, 14) Jakobo ulakonzya kuti wakali kuyeeya bakabalwebalwe babbaale ibakatuulwa mu Nisani 16, bwalo bwakali mbobuzuba Jesu naakabusigwa, alimwi abwakutuulwa kwazinkwa zyobilo zyamaila mubuzuba bwa Pentekoste, iciindi muuya uusalala nowakatilwa. (Levitiko 23:4-11; 15-17) Munzila eeyi, Jesu inga ngounga waambwa kuti ngokabalwebalwe alimwi basikukonanyina inga baambwa kuti bali “mbuli bakabalwebalwe.” Ino kuti katujisi bulangizi bwakuponena anyika? Ikuyeeya bulangizi bwesu oobu kuyakutugwasya kukakatila kulusyomo lwesu muli Sikwaabila wa “zipego zibotu zyoonse,” walo iwacitya kuti buumi butamani bukonzeke mubweendelezi bwa Bwami.
Amube ‘Basikucita ba Makani’
16. Nkaambo nzi ncotweelede kuba “amutwe muuba” pele ‘bamuka kwaamba akunyema’?
16 Kwiina makani naa lusyomo lwesu luli mukusukusigwa ono naa pe, tweelede kuba “basikucita makani.” (Jakobo 1:19-25) Tweelede ‘kuba aamutwe muuba’ mukumvwisya jwi lya Leza, tube basikucita ibalitobela jwi eeli. (Johane 8:47) Kunze lyaboobo, atube bantu ‘bamuka kwaamba,’ tucenjele amajwi oonse ngotukanana. (Tusimpi 15:28; 16:23) Aawa Jakobo utukulwaizya ikutafwambaana kwaamba kuti masukusyo ngotuli mukuyaanaawo azwa kuli Leza. Alimwi twalaigwa kuti tweelede ‘kumuka kunyema, nkaambo bukali bwamuntu tabweendelani abululami bwa-Leza.’ Ikuti naa cintu cimwi umwi ncaamba catunyemya, ‘tutafwambaani kubweza ntaamu’ ikutegwa tutaingulwi camfwundiilili. (Ba-Efeso 4:26, 27) Imuuya wabukali uunga watuletela mapenzi alimwi akuba isukusyo kulibamwi kwiina nounga waambwa kuti nkulilemeka kweelede bantu balaalusyomo muli Leza wesu uululeme. Kunze lyaboobo, ikuti naa ‘katucenjede loko,’ naa katujisi bupampu ‘tuyakumuka kukalala,’ alimwi ibakwesu abacizi bayakutuyanda akutukkomanina.—Tusimpi 14:29.
17. Ncinzi cijanwa kwiinda mukugwisya busofwaazi abubi boonse mumoyo amumizeezo?
17 Tatweelede kujatikizigwa mu “busofwaazi boonse abubi”—kufwumbwa cintu cisesemya Leza akuleta bukali. Kunze lyaboobo, atulisalazye “[ku]busofwaazi boonse abubi bufwasukide.” Toonse tweelede kugusya mubuumi bwesu busofwaazi boonse bwamubili nibuba bwamoyo. (2 Ba-Korinto 7:1; 1 Petro 1:14-16; 1 Johane 1:9) Ikugusigwa kwabubi kuzwa mumoyo alimwi amumizeezo nkokwakatugwasya kuti ‘tutambule makani aakasimpe amyoyo iilibambide kabotu.’ (Incito 17:11, 12) Noivwula buti myaka njotwazumanana katuli Banakristo, tweelede kuzumanana ikuzumizya ikasimpe kamu Magwalo ikutambulwa mumyoyo yesu. Nkaambo nzi? Nkaambo kwiinda mumuuya wa Leza, aaya imajwi aatambulwa azyala “buntu bupya” bwalo bupa kuti lufwutuko lukonzeke.—Ba-Efeso 4:20-24.
18. Mbuti muntu sikuswiilila buyo makani mbwaimpene amuntu uwaaswiilila alimwi akwaacita?
18 Mbuti mbotutondezya kuti jwi eelyo ndelitusololela? Nkwiinda mukuba bantu “basikucita makani” ibasyomeka, ‘kutali basikuswiilila buyo.’ (Luka 11:28) “Basikucita” bajisi lusyomo ilucitya kuti bacite milimo mbuli yakutola lubazu cabusungu mumulimo wa Bunakristo alimwi akutola lubazu mumiswaangano yabantu ba Leza. (Ba-Roma 10:14, 15; Ba-Hebrayo 10:24, 25) Sikuswiilila buyo wamakani “ulikozyene amuntu uulilanga mucimboni kubusyu mbwaakalengwa abo.” Ulalilanga, mpoonya ulaya akuluba ncayelede kucita kululamika busyu bwakwe. Mbotuli ‘basikucita makani,’ tulaiya kabotu-kabotu akutobela ‘mulao wa Leza mulondosi,’ ikujatikizyaa kucita zintu zyoonse nzyayanda kulindiswe. Ilwaanguluko ndotujisi ncintu ciimpene abwaange kucibi alufwu, nkaambo lwalo lutola kubuumi. Aboobo ‘atukakatile mumulao mulondosi,’ lyoonse katuulingula akuutobela. Elo amuyeeye buyo! Mbotuli ‘basikucita mulimo, ikutali basikuswiilila amatwi buyo baluba,’ tujisi lukkomano nkaambo tuli bantu bakkomaninwaa Leza.—Intembauzyo 19:7-11.
Ikutali Kukomba Buyo
19, 20. (a) Kweelana a Jakobo 1:26, 27, bukombi busalala buyanda nzi kulindiswe? (b) Nzikozyanyo nzi zimwi zyabukombi bunyina kampenda?
19 Ikuti naa katuyanda kukkomanisya Leza, tweelede kuyeeya kuti bukombi bwakasimpe tacili cintu cicitwa buyo mumugunkilwa. (Jakobo 1:26, 27) Tukonzya kuyeeya kuti tuli ‘bakombi ba Jehova bazuminidwe,’ kunyina makani ambotumukomba, pele cintu cipati ninzila mbwalanga muntu umwi aumwi wandiswe. (1 Ba-Korinto 4:4) Ikulubizya kupati kumwi nkotunga twacita nkukakilwa ‘kwaanga lulimi.’ Inga katwiile kulyeena ikuti naa twayeeya kuti Leza ulabukkomanina bukombi bwesu ikuti naa kumwi katuvwiya, katubeja nokuba kutalubelesya kabotu lulimi lwesu munzila zimbi. (Levitiko 19:16; Ba-Efeso 4:25) Mmasimpe, kwiina notuyanda kuti ‘busyomi bwesu’ bube ‘bwabuyo’ alimwi butatambuliki kuli Leza akaambo kakampenda kamwi naa kaambo kamwi.
20 Nokuba kuti Jakobo tanaamba nzila zyoonse zyabukombi naa busyomi busalala, waamba kuti zijatikizya ‘kuswaya bamusyaala abamukabafwu mumapenzi aabo.’ (Ba-Galatiya 2:10; 6:10; 1 Johane 3:18) Ikapati mbungano ya Bunakristo ilabagwasya bamukabafwu. (Incito 6:1-6; 1 Timoteo 5:8-10) Mbwaanga Leza Ngomukwabilizi wabamukabafwu alimwi abamucaala, atubelekele antoomwe anguwe kwiinda mukusoleka mbuli mbotukonzya kubagwasya munzila yakumuuya alimwi akumubili. (Deuteronomo 10:17, 18) Bukombi busalala alimwi bujatikizya ‘kuliyobola cakutaba akabala nikaba komwe kaansi,’ iciinga cabantunsi bataluleme ibayendelezyegwaa Saatani. (Johane 17:16; 1 Johane 5:19) Aboobo atuzumanane kutajatikizigwa mukulilemeka kwanyika ikutegwa tukalumbaizye Jehova alimwi akuba bantu basyomwa mumulimo wakwe.—2 Timoteo 2:20-22.
21. Mmibuzyo nzi iimbi kujatikizya lugwalo lwa Jakobo, iyeelede kulingulwa andiswe?
21 Ilulayo lwa Jakobo ndotwalingula kusikila waawa lweelede kutugwasya kukuzunda masukusyo akukakatila kulusyomo lwesu. Lweelede kukomezya luyando lwesu kuli Sikwaabila wazipego zibotu siluyando. Alimwi imajwi aa Jakobo atugwasya kuti katukomba munzila iisalala. Ino ncinzi cimbi ncayanda kuti tubikkile maanu? Nintaamu nzi zimbi nzyotunga twabweza kutegwa tutondezye kuti tujisi lusyomo lwakasimpe muli Jehova?
Bupanduluzi buyungizidwe
a Ciindi nomubaa ciiyo canu nobeni naa caantoomwe amukwasyi cacibalo eeci alimwi azibalo zyobilo zyicitobela, ciyakumugwasya kapati kubala cibeela caambwa cimwi acimwi calugwalo lwa Jakobo luyumya lusyomo.
Inga Mwaingula Buti?
◻ Ncinzi ciyootugwasya kuliyumya mumasukusyo?
◻ Nokuba kuti kuli masukusyo, nkaambo nzi Banakristo ncobakonzya kubotelwa?
◻ Mbuti mbotunga twaba basikucita makani?
◻ Bukombi busalala bujatikizya nzi?
[Cifwanikiso icili apeeji 5]
Ciindi nomusukusigwa, amusyome munguzu zya Jehova zyakwiingula mipailo
[Zifwanikiso izili apeeji 7]
“Basikucita makani” bali mukwaambilizya makani aa Bwami bwa Leza nyika yoonse mbwiizulwa