Kuliyumya Kulaletela Bulumbu
1 “Amujatisisye muzyandamane, nkaambo oobu mbomuyoolivuna nobeni.” (Luka 21:19, Ci) Aayo majwi aali mucibeela camajwi aamwi aa Jesu aabusinsimi bujatikizya “mamanino aaciindi,” alacisalazya kuti mukusyomeka kwesu tweelede kuti katulibambide kunjila mumapenzi manji aakonzya kutusikila. Pele kwiinda munguzu zya Jehova, aumwi ulakonzya “[ku]liyumya kusikila kumamanino” ‘akufwutulwa.’—Mt. 24:3, 13; Flp. 4:13.
2 Kupenzyegwa, kuciswa-ciswa, kubulilwa mali alimwi akukopana mumoyo lilakonzya kuba penzi lipati. Pele tatweelede kuluba kuti Saatani uyanda kuti tucileke kusyomeka kuli Jehova. Ibuzuba abumwi mbotwasyomeka kuli Taateesu, mbuzuba bwakutondezya kuti twamwiingula Ooyo waamba kuti kunyina uukonzya kusyomeka. Elo kaka cilakkomanisya kuzyiba kuti “misozi” yesu iizwa akaambo kakuliyumya kwesu mumapenzi taili yabuyo! Mibotu kuli Jehova alimwi kuliyumya kwesu kulaukkomanisya moyo wakwe.—Int. 56:8; Tus. 27:11.
3 Kuyuma Akaambo Kakwiinda Mumapenzi: Mapenzi alakonzya kutondezya kukompama kwalusyomo naa kwakumubili mbuli kulisumpula naa kutakkazyika moyo. Muciindi cakuyandaula nzila yakuleya naa kumana mapenzi munzila iitali yamu magwalo, tweelede kuccilila lulayo lwa Jwi lya Leza lwakuti “kusukusigwa kwalusyomo lwanu nkokuleta lukakatilo.” Nkaambo nzi? Nkaambo kakuti kuliyumya cakusyomeka mumapenzi kulatugwasya “kuba aciimo cizulide cakutabula cintu.” (Jak. 1:2-4) Kuliyumya kulakonzya kutugwasya kuba abube oobu buyandika kapati mbuli bwakunyoneka, lubomba alimwi aluzyalo.—Rom. 12:15.
4 Kusunkwa Akaambo Kalusyomo: Notuliyumya mumapenzi, tuba abube busumpukide bwalusyomo luyandika kapati mumeso aa Leza. (1 Pet. 1:6, 7) Lusyomo luli boobo lulatugwasya kuliyumya mumapenzi oonse aboola kumpela. Kunze lyaboobo, tulakonzya kubona Leza mbwatuzumina, alimwi eeci cilabuyumya bulangizi bwesu kuti tabuli bwakweezyeezya buya pe.—Rom. 5:3-5.
5 Bulumbu bwesu bupati buboola akaambo kakuliyumya, bulakankaizyigwa kuli Jakobo 1:12 kuti: “Ngusicoolwe oyo muntu [uuliyumya] mumasukusyo, nkaambo na wabonwa kuti muyumu, ulapegwa musini wabuumi.” Aboobo atuzumanane kusyomeka kuli Jehova, katusyoma kuti uya kupa bulumbu “kulibaabo bamuyanda.”