“Sa Moyo Wako Ncobeni Ulazuminana Amoyo Wangu?”
“Twiinke ayebo, ubone busungu bwangu muli-Jehova.”—2 BAMI 10:16.
1, 2. (a) Ino ciimo cabukombi mu Israyeli cakaindila buti kubija? (b) Mu 905 B.C.E., nkucinca kuli buti kwakali kulangilwa kucitika mu Israyeli?
IMWAKA wa 905 B.C.E. cakaba ciindi cakucinca kupati mu Israyeli. Imyaka iitandila ku 100 musyule, Jehova wakaandaanya bwami bwakakamantenye bwa Israyeli akaambo kaluleyo lwa Solomoni. (1 Bami 11:9-13) Ibwami bwakumusanza bwa Juda bwakatalika kulelwaa mwanaa Solomoni, Roboamu kakuli bwami bwakunyika bwa Israyeli bwakalelwaa Mwami Jeroboamu muna Efraimu. Mukubula coolwe, bwami bwakunyika kunyina nobwakatalika kabotu pe. Jeroboamu tanaakali kuyanda kuti balelwa bakwe kabeenda kuya kubwami bwakumusanza ikuyakukomba kutempele nkaambo wakali kuyoowa kuti inga babaa muzeezo wakupilukila kuŋanda ya Davida. Aboobo wakatalisya bukombi bwamoombe mu Israyeli elyo kukomba mituni kwakatalikwa kwalo kwakacitwa mubukkale boonse bwabwami bwakunyika.—1 Bami 12:26-33.
2 Izintu zyakaindila kubija ciindi Ahabu mwanaa Omri naakaba mwami. Imukaintu wakwe watakali sicisi Jezebeli, wakatalisya bukombi bwa Baala alimwi wakali kujaya basinsimi ba Jehova. Nokuba kuti musinsimi Eliya wakali kucenjezya caantangalala, Ahabu taakwe naakamukasya mukaintu wakwe pe. Nokuba boobo, mu 905 B.C.E. Ahabu wakafwa elyo mwanaakwe Joramu wakatalika kulela. Lino cakasika ciindi cakuti cisi cisalazigwe. Elisha walo wakalya busena bwa Eliya wakaambila silumamba Jehu kuti Jehova wakamunanika kuti nguyootobela kuba bwami mu Israyeli. Mulimo nzi ngwakeelede kucita? Nkunyonyoona luzubo lwa Ahabu sizibi alimwi akubweedezya bubi kumfwu zyabasinsimi mbaakajaya Jezebeli!—2 Bami 9:1-10.
3, 4. Ino Jonadabu wakatondezya buti kuti moyo wakwe ‘ulizuminene amoyo wa Jehu’?
3 Ikutobela malailile aa Leza, Jehu wakajaya sizibi Jezebeli amane wakatalika kusalazya Israyeli kwiinda mukunyonyoona luzubo lwa Ahabu. (2 Bami 9:15–10:14, 17) Mpoonya wakajana uumugwasya. “Wakajana Jonadabu mwana wa-Rekabu uleza kuzoomucinga. Amane kumujuzya, wakamubuzya kuti, Sa moyo wako ncobeni ulazuminana amoyo wangu, mbubonya mbuli moyo wangu mbuuzuminana awako? Nkabela Jonadabu wakavuwa kuti, Mbukubede. Wakati, Na mbukubede, undipe ijanza lyako. Elyo wakamupa ijanza lyakwe, aboobo wakamutantika munkalaki mwaakabede. Wakati, Twiinke ayebo, ubone busungu bwangu muli-Jehova. Lino wakamutolelela munkalaki yakwe.”—2 Bami 10:15, 16.
4 Jonadabu (naa Johanadabu) taakali muna Israyeli pe. Nokuba boobo ikweendelana azina lyakwe (ilyaamba kuti “Jehova Uliyandide,” “Jehova Ulisumpukide,” naa kuti “Jehova Mwaabi”) wakali kukomba Jehova. (Jeremiya 35:6) Masimpe wakali kuyandisya kubona ‘busungu bwa Jehu muli Jehova.’ Ino tuzi buti obo? Ikuswaangana kwakwe amwami uunanikidwe wa Israyeli teecakali citikila buyo pe. Jonadabu wakali kuzabuza “kuzoomucinga,” alimwi awa nciindi Jehu kajayide kale Jezebeli abamwi bamuŋanda ya Ahabu. Jonadabu wakalicizyi cakali kucitika ciindi naakazumina kunjila munkalaki ya Jehu. Cakutadooneka wakali kulubazu lwa Jehu—a Jehova—mumanyongwe aaya aabukombi bwakubeja alimwi abwakasimpe.
Jehu Wasunu alimwi a Jonadabu Wasunu
5. (a) Nkucinca kuli buti kuyoocitikila bantu boonse lino-lino? (b) Nguni Jehu Mupati, alimwi mbaani bamwiiminina anyika?
5 Sunu, izintu ziyoobacincila bantu boonse lino-lino akubijisya mbubwenya mbucakacitika ku Israyeli mu 905 B.C.E. Iciindi lino casika afwaafwi lyalo Jehova nayoogwisya bubi boonse anyika buletwaa Saatani kubikkilizyaa bukombi bwakubeja. Ino nguni Jehu wasunu? Cakutadooneka, ngu Jesu Kristo walo waambwaa majwi aya aabusinsimi aakuti: “Anga ipanga lyako akasolo, O sintaze; lisakile bulemu abupati bwako. Mubulemu bwako koya butantide akuzunda, kukugwasya lusinizyo abaluleme bapengede.” (Intembauzyo 45:3, 4) Anyika, Jesu wiimininwaa “ba-Israyeli ba-Leza,” Banakristo bananike balo “babamba milazyo ya-Leza akujata bumboni bwa-Jesu Kristo.” (Ba-Galatiya 6:16; Ciyubunuzyo 12:17) Ikuzwa mu 1922 aba bananike, banabakwabo Jesu bali kucenjezya cakutayoowa ikujatikizya micito yalubeta lwa Jehova iluboola.—Isaya 61:1, 2; Ciyubunuzyo 8:7–9:21; 16:2-21.
6. Mbabani bakazwa mumasi ikuzyoogwasya Banakristo bananike, alimwi banjila buti munkalaki ya Jehu Mupati?
6 Ibanakristo bananike tabali balikke pe. Mbubwenya Jonadabu mbwaakaboola kuzoocinga Jehu, ibanji kuzwa mumasi baboola kuzyoogwasya Jesu, Jehu Mupati alimwi abaiminizi bakwe baanyika balo baimvwi nji mubukombi bwakasimpe. (Zekariya 8:23) Aabo Jesu mbaita kuti ‘nimbelele zyakwe zimwi,’ mu 1932 bakazibwa kuti mbabakozyenye a Jonadabu wansiku alimwi bakatambwa kuti ‘batante munkalaki’ ya Jehu wasunu. (Johane 10:16) Munzila nzi? Nkwiinda ‘mukubamba milazyo ya Leza’ akubelekela antoomwe abananike mumulimo “[w]akujata bumboni bwa-Jesu Kristo.” Sunu, oyu mmulimo ubikkilizya kukambauka makani mabotu aa Bwami bwa Leza bukkazikidwe bweendelezyegwaa Jesu Mwami. (Marko 13:10) Mu 1935 aba bana “Jonadabu” bakaambwa kuti “[n]inkamu impati” iilembedwe ku Ciyubunuzyo 7:9-17.
7. Ino Banakristo batondezya buti kuti ‘moyo wabo ucizuminene’ amoyo wa Jesu sunu?
7 Ikuzwa kuma 1930, inkamu mpati alimwi abanabakwabo bananike basinizya cabusicamba kuti bali kulubazu lwabukombi bwakasimpe. Ibanji bafwa akaambo kalusyomo lwabo mumanyika amwi Europe nkwiili Kumbo a Kujwe, ku Far East alimwi amu Afulika. (Luka 9:23, 24) Mumasi amwi, bali kubikkwa muntolongo, kuzingwaa bantu naa kupenzyegwa buya. (2 Timoteo 3:12) Elo nkubota ciimo calusyomo ncobatondezya! Alimwi Lipooti ya Mulimo ya Mwaka ya 1997 itondezya kuti bacikanzide kubelekela Leza ziyume zitete. Imoyo wabo ‘ucizuminana’ amoyo wa Jesu. Eci cakatondezyegwa mu 1997 ciindi basikumwaya ba Bwami ibali 5,599,931 ibalangilwa kuti mbana “Jonadabu” boonse nobakabeleka mawoola aali 1,179,735,841 mumulimo wakucitila Jesu bumboni.
Bacikambauka Cabusungu
8. Ino Bakamboni ba Jehova babutondezya buti busungu bwabo kubukombi bwakasimpe?
8 Jehu wakazibidwe kuti weenzya nkalaki yakwe mbuli sikalalu—ikutondezya busungu bwakucita mulimo wakwe. (2 Bami 9:20) Jesu, Jehu Mupati upandululwa kuti ‘waaligwa’ abusungu. (Intembauzyo 69:9) Aboobo, tacigambyi pe kuti sunu Banakristo bakasimpe balazibwa akaambo kabusungu bwabo. Mumbungano alimwi akubuleya ‘balakambauka Makani lyoonse. Balajatisya muciindi ceelede aciteelede.’ (2 Timoteo 4:2) Ibusungu bwabo bwakabonwa ikapati mucibeela cakusaanguna ca 1997 nokwakali cibalo mu Mulimo Wesu Wabwami icakakulwaizya kuti banji batole lubazu mumulimo wabupainiya bwakugwasilizya. Mucisi acisi imweelwe wabapainiya bakugwasilizya wakabikkwa. Ino kwakacitwa buti? Cakagambya! Imitabi minji yakaindilila amweelwe wakabikkidwe. Icisi ca Ecuador cakabikkide mweelwe wa 4,000, pele mu March ibapainiya bakugwasilizya ibali 6,936 mbobakatola malipooti. Mucisi ca Japan ibali 104,215 mbabakatola malipooti mumyezi yotatwe eyo. Mu Zambia, mwalo mwakabikkidwe mweelwe wa 6,000, ibapainiya bakugwasilizya ibali 6,414 mbobakatuma malipooti mu March; ibali 6,532 mu April; alimwi ibali 7,695 mu May. Imweelwe waatala wabapainiya bakugwasilizya alimwi abaciindi coonse inyika yoonse mbwiizulwa wakasika ku 1,110,251, wakayungizigwaa 34.2 pasenti kwiinda wamu 1996!
9. Kunze lyamumulimo waŋanda aŋanda, muunzila nzi azimbi Bakamboni ba Jehova mobajana bantu akubaambila makani mabotu?
9 Imwaapostolo Paulo wakaambila baalu baku Efeso ategwa: “Nsikamusisilide akaniini kumwaambila aamweelede, ndakamwiisya mukati kabantu akunjilauka mumaanda.” (Incito 20:20) Sunu, Bakamboni ba Jehova batobela cikozyanyo ca Paulo elyo balakambauka makani mabotu cabusungu ŋanda aŋanda. Nokuba boobo cilakonzya kacitali cuuba-uba pe kujana bantu mumaanda abo. Aboobo “muzike musyomesi uucenjede” ukulwaizya basikumwaya ba Bwami ikusikila bantu kumakwebo abo, mumigwagwa, kumilonga, mumapaaki—kufwumbwa nkobakonzya kujanika bantu. (Matayo 24:45-47) Izyakacitika zyakali zibotu kapati.
10, 11. Muunzila nzi basikumwaya bamumasi obile mobatondezya kuliyeeyela mukuyandaula baabo bayanda kwiiya balo batakonzyi kujanwa aŋanda?
10 Ku Copenhagen, mu Denmark, kakamu kasyoonto kabasikumwaya kali kukambauka mumigwagwa munsi-munsi aazitisyini zyacitima. Ikuzwa mu January kusika mu June, bakamwaya mamagazini aali 4,733, bakakonzya kubandika abantu banji alimwi bakacita nyendo zyakupilukila zinji. Ibunji bwabasikumwaya mucisi eco bakonzya kubaa mantoolo mobasiya mamagazini lyoonse. Mudolopo limwi kulaakuba makwebo muli Bwasanu lyoonse elyo zyuulu-zyuulu zyabeenzu zilajanika. Aboobo imbungano ilaabubambe bwakukambaukila kumusika oyu lyoonse. Kubusena bumwi, izikolo zilaswayigwa kumwi kabajisi amabbuku aajisi makani aayelede bamayi.
11 Amwalo mu Hawaii kulasolekwa ikusikila baabo batajaniki aŋanda. Imasena aakubelekela abikkilizya masena aabuleya (mumigwagwa, mumapaaki, imusiigwa myootokala alimwi amukkwelelwa mabbaasi), kumantoolo akumabuwaa ndeke, ibukambausi bwaaluwaile, muzyeendelo zyabuleya (ikukambauka mumabbaasi) alimwi amuzikolo zipati. Imbungano ilasoleka kubona kuti mweelwe weelede wa Bakamboni batumwa kuyoobelekela mubusena bumwi abumwi alimwi akuti abo batumwa kabayiisidwe kabotu. Ikusoleka kuli boobu kulaluulwa mumanyika manji. Aboobo, bantu bayanda kwiiya balasikilwa balo bakonzya kuti nobatakajanika mumulimo waŋanda aŋanda.
Ikwiima Nji
12, 13. (a) Ndweeno nzi ndwaakabelesya Saatani kuli Bakamboni ba Jehova mu 1997? (b) Ino kulengelela kwakabajokela buti abo bakakwaamba mucisi cimwi?
12 Mumasena manji mumwaka wa 1997, Bakamboni ba Jehova bakatamikizigwa makani aakubeja kakukanzidwe kuti kutolwe ntaamu yakubasubula kwiinda mumulawo. Pele kunyina anobakayoowa! (Intembauzyo 112:7, 8) Bakayeeya mupailo wasintembauzyo wakuti: “Basikamikami bandilengelela zyakubeja, pele ndabamba milazyo yako camoyo woonse.” (Intembauzyo 119:69) Ikulengelela kuli boobu kusinizya buyo kuti Banakristo bakasimpe balisulidwe mbubwenya mbwaakasinsima Jesu. (Matayo 24:9) Alimwi muziindi zimwi ikulengelela oku kwabajokelela bakucita. Umwi mwaalumi mu Belgium wakabala cibalo cimwi mupepa lyamakani lizibidwe kapati cakali kusampaula Bakamboni ba Jehova. Akaambo kakugambwa kuzintu zyakalembedwe wakajanika kumuswaangano ku Ŋanda ya Bwami mu Nsondo mvwiki yakatobela. Wakabaa ciiyo ca Bbaibbele a Bakamboni elyo wakayaambele cakufwambaana. Oyu muntu wakali munkamu yabasikutyola milawo. Iciiyo cakwe ca Bbaibbele cakamugwasya kubotezya buumi bwakwe, calo cakabonwa abantu basimukobonyina. Masimpe, sikulemba cibalo ciya camasampu taakali kuyeeya kuti naa zintu zili boobu zilakonzya kucitika!
13 Ibantu bamwi babombe myoyo mu Belgium balakutongauka kulengelela oku kucitwa. Umwi uuli akati kabaaba bantu nguyooyo wakali minisita walo wakazumina kuti ulazilombozya ezyo nzyobakonzya kucita Bakamboni ba Jehova. Alimwi uumutobela mubulelo wakalemba kuti: “Ikwiindana amasampu aambwa ziindi zimwi, [Bakamboni ba Jehova] tandibaboni kuti inga bazangila cisi pe. Mbaasicisi bayanda luumuno, balomenye alimwi balemeka bweendelezi.” Masimpe, mabotu majwi aamwaapostolo Petro aakuti: “Amujatisye kweenda kwanu kubotu akati kabamasi, kuti nobamusendaula sunu kuti muli babi, bakamulemye Leza kubuzuba bwakulingula nkaambo kakulangilila milimo yanu mibotu.”—1 Petro 2:12.
Iciibalusyo Ciluulwa
14. Nkuluula nzi kumwi kubotu ikujatikizya bantu bakajanika ku Ciibalusyo mu 1997?
14 Cileelela kuti abo bacitila Jesu bumboni beelede kulanga Ciibalusyo calufwu lwakwe kuti cintu ciyandika mumwaka wabo. Mu 1997, ibali 14,322,226 bakajanika kukusekelela oku mu March 23. Eci camba kuti mweelwe wamu 1996 wakaindwa 1,400,000. (Luka 22:14-20) Mumasena manji ibakajanika ku Ciibalusyo bakali kuwiinda kule-kule mweelwe wabasikumwaya ba Bwami, ikutondezya kuti ikuyungizigwa kulalangilwa kapati mazubaa boola. Mucikonzyano, mu Haiti, kwakaba mweelwe waatala wabasikumwaya uusika ku 10,621 mumwaka wa 1997, kakuli ibali 67,259 mbobakajanika ku Ciibalusyo. Mulakonzya kulanga lipooti yamwaka apeeji 28 kusika kupeeji 31 mubone kuti naa nzisi nzi azimwi izyakajisi mweelwe waatala wabantu bakajanika kuciibalusyo kwiinda mweelwe wabasikumwaya.
15. Ino bakaakonzya buti mapenzi bakwesu mumasi amwi ikutegwa basekelele Ciibalusyo?
15 Ikujanika ku Ciibalusyo teecakali cuuba-uba kuli bamwi. Mu Albania kwakabikkidwe mulawo uukasya kweenda kufwumbwa kuti ciindi ca 7:00 p.m. casika akaambo kamanyongwe mucisi. Mutukamu tusyoonto-syoonto ituli 115 mucisi, Ciibalusyo cakatalika aciindi ca 5:45 p.m. Izuba lyakabbila aciindi ca 6:08 p.m., elyo yakatalika Nisani 14. Izitondezyo zyakainzigwa ambweni aciindi ca 6:15 p.m. Muzibeela zinji mupailo wakujala wakapegwa aciindi ca 6:30 p.m., elyo abo bakajanika ku Ciibalusyo bakamwaika akufwaambana kweenda kuya kuŋanda kabatana talika kukasya kweenda. Nokuba boobo ibakajanika ku Ciibalusyo bakali 3,154, ikubeelanyaa mweelwe waatala wabasikumwaya ibali 1,090. Mucisi cimwi mu Afulika, imanyongwe aamucisi akapa kuti kacitakonzyeki pe kusika ku Ŋanda ya Bwami aboobo baalu bobile bakayeeya kuti baunke kuŋanda yamwaalu watatu kutegwa babandike mbobanga basekelela Ciibalusyo mutubunga tusyoonto-syoonto. Ikutegwa bakonzye kusika kuŋanda yamwaalu oyu, ibaalu bobile bakeelede kukosola lulindi lwiinda meenda aatombe. Pele kwakali nkondo mubusena obu alimwi basinkondo bakali kudubula kufwumbwa uusoleka kukosola lulindi olu. Umwi mwaalu wakakosola cakufwambaana kakunyina acicitika. Iwabili kacikosola wakamvwa kudima kwantobolo. Wakaide kuliwaala ansi akutalika kukalaba nkaambo nkulu zyakali kwiide kwiindana atalaa mutwe wakwe. Imuswaangano oyu wabaalu wakacitwa alimwi izyakali kuyandika kumbungano zyakalanganizigwa.
“Bazwa Kuzisi Zyoonse Akumisyobo . . . Akumyaambo Yoonse”
16. Ino baciinga camuzike musyomesi alimwi uucenjede bacita bubambe buli buti bwakuti makani mabotu amwaigwe akumilaka misyoonto-syoonto?
16 Imwaapostolo Johane wakaamba kuti nkamu mpati “[iyoo]zwa kuzisi zyoonse akumisyobo yoonse akumikowa yoonse akumyaambo yoonse.” (Ciyubunuzyo 7:9) Aboobo Kabunga Keendelezya kalabamba mabbuku mumilaka minji—kubikkilizya ayeeyo yaambaulwaa misyobo misyoonto-syoonto alimwi atubunga tusyoonto twabantu. Mucikozyanyo, mu Mozambique, itulakiti iitegwa Buumi Munyika Impya Yaluumuno yakamwaigwa mumilaka aimbi yosanwe. Mu Nicaragua, ibroshuwa ya Mutangale Abuumi Butamani a-Nyika! yakasandululwa mumulaka waci Miskito—ndebbuku lyakusaanguna lyakalembwaa aba Watch Tower Society mumulaka oyu. Bansame bamulaka waci Miskito banji bakaikkomanina kapati broshua eyi mbubakaibonena buyo mumulaka wabo. Mu 1997 iba Sosaiti bakazumizya kumwayigwa kwamabbuku mumilaka aimbi iili 25 alimwi bakasimba mamagazini aayinda kutuulunzuma tuli cuulu.
17. Ninkamu nzi yakagwasigwa mu Korea, alimwi mavidiyo augwasya buti mweelwe oyu wabantu?
17 Aimbi nkamu yakagwasigwa mu Korea. Imwaka wa 1997 wakaba wakusaanguna kubaa muswaangano mupati mumulaka wakutambaika muci Korea. Kuli mbungano zili 15 zyamulaka wakutambaika mu Korea zyalo zijisi basikumwaya ibali 543, pele ibali 1,174 mbobakajanika kumuswaangano alimwi ibali 21 bakabbapatizigwa. Ikugwasya bacuulutwi balo batakonzyi kuteelela caambwa naa cilembedwe, imavidiyo alabambwa aamumilaka yakutambaika yaandeene-andeene iili 13. Aboobo bacuulutwi balagwasigwa “kubala” alimwi akwiiya makani mabotu elyo kuli mpindu zibotu kapati. Mu United States cakali kutola myaka yosanwe kuti sicuulutwi asike aciimo cakubbapatizigwa. Lino mbwaanga kuli mavidiyo manji aaliko Mumulaka Wakutambaika waci Amelika, eco ciindi camfwiinsigwa kuli basicuulutwi bamwi kusika kumwaka omwe buyo.
‘Ikukkala Munkalaki’
18. Naakamana kuswaanganya Jonadabu, ncinzi ncaakatalika kucita Jehu?
18 Mu 905 B.C.E., Jehu naakasanganaa Jonadabu wakagama kunyonyoona bukombi bwakubeja. Wakaambila bakombi ba Baala ulaamba: “Amubambile Baala imbungano iisalala.” Mpoonya wakatuma mucisi coonse kutegwa kutabi naba omwe sikukomba Baala uucaala. Aya makamu-makamu naakali kunjila mutempele pati lyaleza wakubeja, kwakalangisigwa kapati kutegwa kutajaniki mukombi wa Jehova. Limwi Jehu abasilumamba bakwe bakanyonyoona bakombi ba Baala. “Mbuboobo Jehu mbwaakanyonyoona inkombelo ya-Baala mucisi ca-Israyeli.”—2 Bami 10:20-28.
19. Ikulanga cintu ciyoocitikila bantu lino-lino, mmuuya uli buti ngotweelede kutondezya alimwi mulimo nzi ngotweelede kucita cabusungu?
19 Sunu lubeta lwamamanino lwabukombi boonse bwakubeja lwasika afwaafwi kapati. Kwiinda mukusololelwaa bangelo, Banakristo balaambilizya makani mabotu kubantu boonse ikubakulwaizya kuyoowa Leza akulitantamuna kubukombi bwakubeja. (Ciyubunuzyo 14:6-8; 18:2, 4) Ibabombe myoyo bakulwaizigwa kumvwida Bwami bwa Leza bweendelezyegwaa Mwami uubikkidwe wa Jehova, Jesu Kristo. (Ciyubunuzyo 12:10) Aciindi awa tatweelede kulekela busungu bwesu kuyaansi mbotuya buzumanana kwiima nji kubukombi bwakasimpe.
20. Ncinzi ncomukanza kuyoocita mumwaka wamulimo wa 1998?
20 Iciindi cimwi Mwami Davida naakakatazyidwe kapati wakakomba ategwa: “Moyo wangu ulaanzikidwe, O Leza; moyo wangu ulaanzikidwe. Njooimba akutembaula. Njookulumba, O Mwami, akati kabantu.” (Intembauzyo 57:7, 9) Aswebo atwiime nji. Mumwaka wamulimo wa 1997 ikoongolola kwakutembaula kwakacitwa ikulumbaizya bulemu bwa Jehova Leza nokuba kuti kwakali mapenzi manji. Akumvwugwe koongolola kuli boobu naa kwiinda awa mumwaka uno wamulimo. Alimwi acibe boobu kufwumbwa ciindi Saatani nasola kututyompya naa kutukazya. Aboobo tuyootondezya kuti moyo wesu ulazuminana amoyo wa Jehu Mupati, Jesu Kristo alimwi tuyoocita camoyo omwe icaamba majwi aakalembwa kwiinda mukusololelwaa muuya uusalala aakuti: “Amubotelwe muli-Jehova nyoonse nobalulami, amusekelele nyoonse nemululememyoyo.”—Intembauzyo 32:11.
Sena Mulakonzya Kupandulula?
◻ Nkucinca nzi kwakacitika mu Israyeli mu 905 B.C.E.?
◻ Ino Jehu wasunu nguni, alimwi “inkamu impati” yatondezya buti kuti ‘moyo wabo ulizuminene’ amoyo wakwe?
◻ Myeelwe nzi iili kulipooti lyamwaka iitondezya busungu bwa Bakamboni ba Jehova mumwaka wamulimo wa 1997?
◻ Kufwumbwa naa ncinzi ncacita Saatani kulindiswe, muuya nzi ngotuyootondezya mumwaka wamulimo wa 1998?
[Ccaati iili apeeji 28-31]
LIPOOTI YAMWAKA WAMULIMO WA 1997 YA BAKAMBONI BA JEHOVA NYIKA YOONSE MBWIIZULWA
Amubone Bbaundi Volyumu
[Cifwanikiso icili apeeji 25]
Imyeelwe iigambya yabantu bajanika ku Ciibalusyo itondezya kuti kuyungizigwa kulalangilwa kumazubaa boola
[Cifwanikiso icili apeeji 26]
Mbubwenya Jonadabu mbwaakagwasya Jehu ayalo “inkamu impati” sunu yagwasya Jehu Mupati, Jesu Kristo abanabakwabo bananike