Izikombelo Zyakuzumina Kulubizya Kwazyo

“Paapa Wasunka Cikombelo.” “Ikubeteka Akusalaula Bantu Calunya—Icikombelo Cili Mukulibambila Kuzyibya Bantu Kuti Cililubide (Mea Culpa).”a “Ikuzumina Kuti Cikombelo Cakajatikizigwa Mukunyonyooka kwa Bantu Banji Munkondo.” “Ba Methodist Balomba Kulekelelwa Kuzwa ku Bansame ba [kumbo kwa United States].”

SENA kuli nomwakabalide mitwe yamakani iili mbuli yeeyi? Izikombelo ono kanjikanji zili mukuzumina kulubizya kwazyo alimwi zili mukulomba kulekelelwa kuzintu nzyozyakacita mumyaanda-myaanda yamyaka yainda. Basimubweza twaambo lyoonse bali mukwaamba kuzumina kumbi kwapaapa kwakuti wakalubizya.

Paapa Nalomba Kulekelelwa

Akati ka 1980 a 1996, John Paul Wabili ‘wakazumina kuti Cikombelo cakalubizya myaka yainda naa wakalomba kulekelelwa’ iziindi zitaleli ku 94, mbwaamba simuluula twaambo waku Vatican wazina lya Luigi Accattoli mubbuku lyakwe litegwa Quando il papa chiede perdono (Paapa Nalomba Kulekelelwa). Accattoli waamba kuti, “mu Cikombelo caba Katolika, paapa alikke nguulanguzu zyakuzumina kuti balilubide.” Eci wacicita, kumwi kaamba zyakacita ba Katolika mumyaka yamanyongwe—Inkondo zya Banakristo, inkondo zyanyika, ikusumpula bulelo bwalunya, kuzwangana muzikombelo, Kusalaulana, Kubeteka calunya, Itubunga twamaseseke twabasikujaya bantu itutegwa Mafia alimwi akulisumpula akaambo kacikanda. Mulugwalo lwakatumwa mu 1994 kubasololi bacikombelo batobela paapa (lwalo bamwi ndobabona kuti lwakali lugwalo lwapaapa luyandika kapati), John Paul Wabili wakapa muzeezo “wakuzumina zibi zyabantu boonse.”

Bama bbishopo bapati abalo batobela cikozyanyo capaapa. Mu December 1994 ipepa lyamakani lyaku Italy litegwa Il Giornale lyakati: “Bama bbishopo banji baku Amelika bakatondezyegwaa televisyoni, alimwi caantangalala bakalomba kulekelelwa.” Kulekelelwa kunzi? Kutalangisya penzi lyabapaizi lyakoonanaa bana, ilyanyonyoona bunji bwabana. Mu January 1995 ipepa lyamakani litegwa La Repubblica lyakaluula “cintu cakacitika cacitwa kuzwa ciindi cikombelo caba Katolika nocakatalika”—ikutatola ntaamu kwa Paapa Pius Wakkumi Mubabili kujatikizya kunyonyooka kwabantu munkondo ya Cijayejaye. Mu January 1995 ipepa ndimunya lyakaamba kuti ikakamu kabama bbishopo kamwi ku German kakalomba kulekelelwa akaambo “kakulubizya kunji” kwaba Katolika ibakatola lubazu mukusumpula kujaya kwakacitwa aba Nazi. Izikombelo zinji zimwi izitali zyaba Protestanti azyalo zyalitongooka kapati.

Ino Nkaambo Nzi?

Ibbaibbele litukulwaizya kulomba kulekelelwa ciindi notwalubizya, alimwi ibantu banji balazilumbaizya zikombelo ciindi nozilitongooka. (Jakobo 5:16) Pele ino nkaambo nzi zikombelo ncozili mukucicita eci? Ino eci inga cajatikizya buti mbotuzilanga?

Bupanduluzi buyungizidwe