Imwami Wakajisi Lubono a Busongo
Sena muyeeya kuti lubono lulakonzya kumuletela lukkomano? Ikuti naa muntu wamupa mali manji, sena inga tamukkomani? Ambweni mulakonzya kukkomana. Kulalangilwa kuti mulakonzya kuyeeya mbomunga mwaabelesya mali ayo.
CAKUTADOONEKA, zintu zinji nzyomukonzya kuula ikutegwa mukkale kabotu mubuumi alimwi kamukondwa. Alimwi mali alakonzya ‘kutabilila’ mapenzi aatalangilwi naaboola mbuli malwazi alimwi akubula milimo.—Mukambausi 7:12.
Pele ino mali akukkomana ziswaangene buti? Sena muyeeya mbuli banamunji mbobayeeya kuti kukkomana kulaboola kuti kamujisi lubono? Ikujana bwiinguzi kumibuzyo eyi kulakonzya kuba cintu ciyumu nkaambo imali alakonzya kupimwa naa kubalwa kakuli kukkomana takukonzyi kucitwa boobo. Tamukonzyi kubikka kukkomana acikkelo akukupima.
Alimwi bantu bamwi balaalubono baboneka kuti balakkomana kakuli bamwi baluuside. Akwalo kubantu bacete mbocibede mbubwena obo. Pesi ibantu banji—nobaba baabo ibajisi kale lubono lunji—basyoma kuti mali manji ayoobaletela kukkomana kunji.
Imuntu umwi wakalemba kujatikizya makani aali boobu Mwami Solomoni wamu Israyeli wansiku. Wakali umwi wabantu bainda kuvwuba iwakaponede. Mulakonzya kubala mbolupanduludwe lubono lwakwe lutalivwulili mucaandaano ca 10 cabbuku lyamu Bbaibbele lya Bami Bakusaanguna. Mucikonzyanyo amubone kuti kapango ka 14 kaamba kuti: “Bulemu bwangolida iyakatambulwa mumaanza aa-Solomoni mumwaka omwe bwakali matalenta aangolida aali mya[a]nda iili musanu aumwi amakumi aali musanu alimwi amusanu alimwi.” Oyo mweelwe uleelene amataani aali 25 aangolida. Sunu ingolida yabulemu buli boobo ilakonzya kuulwa mali aainda ku $200,000,000, U.S.!
Pele taluli lubono buyo ndwaakajisi Solomoni; Leza wakalimupede busongo. Ibbaibbele liluula kuti: “Mwami Solomoni kali mupati kwiinda bami boonse baansi mubuvubi amubusongo. Nkabela bami boonse baansi bakali kuyandaula kubona busyu bwa-Solomoni, kuti baswiilile busongo bwakwe Leza mbwaakabikide mumoyo wakwe.” (1 Bami 10:23, 24) Aswebo tulakonzya kugwasigwaa busongo bwa Solomoni nkaambo malembe akwe ndubazu lwamakani aa Bbaibbele. Atubone ncaakaamba kujatikizya lubono mboluswaangene akukkomana.
[Nkotwakajana cifwanikiso icili apeeji 3]
Cakajanwa mu Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart