Amuzibikke Kumbele Izintu Ziyandika Kucitwa Kusaanguna!
Mbuzuba bwamiswaangano pele mulaamilimo imbi yakucita. Ncinzi ncomuyoobikka kumbele?
MULIKWETE alimwi mulaabana. Ibuzuba bwamilimo mbobwasika kumamanino imizeezo yanu yagama kuyeeya miswaangano iiliko mangolezya. Ikuti naa mwakotoka ndilyonya lino mulabaa ciindi cakusamba, kucinca zyakusama alimwi akulya kamutanaya kumuswaangano. Pele, imupati waamulimo waboola akumwaambila kuti muzumanane kubeleka. Wasyomezya kumupa mali mabotu. Mulaayanda mali.
Naa mulikwetwe alimwi mulaabana. Kamucibamba cakulya cakumazuba, mwabona mulwi wazisani izitaccisidwe izikonzya kuyooyandika zimwi juunza. Mwalibuzya kuti, ‘Ikuti naa nduunke kumiswaangano sunu, ino ndiyoojana lili ciindi cakuccisa?’ Mbumwakatalika ino-ino milimo, mwabona mbuli mbocikatazya ikulanganya milimo yaamunzi kumwi kamuyanda kuti mujane mali aakuligwasya.
Naa muli basicikolo. Adesiki lyamuŋanda yanu kuzwide milimo yakucikolo njomweelede kulembela kuŋanda. Ibunji bwamilimo eyi mwakapedwe kaindi pele mwakali kwiisumpya aboobo lino milimo minji iyandika buzuba bomwe. Mwayeeya kuti mulombe bazyali banu kuti bamuzumizye kutaunka kumiswaangano kutegwa mumanizye milimo eyo.
Ncili ncomunga mwabikka ambele: imulimo wakubeleka kakuli cainda kale ciindi cakukotoka, ikuccisa, ikulemba milimo njomwakapegwa kucikolo naa muswaangano wambungano? Ino caamba nzi kubikka zintu mubusena bwakusaanguna munzila yakumuuya? Ino Jehova uzilanga buti zintu?
Ncinzi Ceelede Kucitwa Kusaanguna?
Kakwiindide buyo ciindi cisyoonto kuzwa ciindi nobakatambula Milawo iili Kkumi bana Israyeli, imwaalumi umwi wakajanwa katebba nkuni mubuzuba bwa Sabata. Imulawo wakali kukasya kucita boobu. (Myeelwe 15:32-34; Deuteronomo 5:12-15) Ino nomwakakabeteka buti kaambo aka? Sena nomwakamulekelela mwaalumi oyu akwaamba kuti kayi tanaakali kubelekela kuti asumpule bukkale bwakwe pele wakali kucita mulimo uugwasya mukwasyi wakwe? Sena nomwakaamba kuti kunooli ziindi zinji mwaka oonse mbuuzulwa izyakulemeka Sabata akuti mbwaanga nciindi buyo comwe muntu oyu ncaatalemeka Sabata akaambo kakutalibambilila limwi ulakonzya kulekelelwa kakunyina abuyumuyumu?
Eci Jehova wakacibona kuti mulandu mupati. Ibbaibbele lyaamba kuti, “mpoonya awo Jehova wakaambila Musa kuti, Oyo muntu ncobeni uleelede kujayigwa.” (Myeelwe 15:35) Nkaambo nzi ncaakacibona munzila eyi Jehova ncaakacita muntu oyo?
Ibantu bakalijisi mazuba aali cisambomwi aakutebba nkuni alimwi akubeleka milimo imwi kujatikizya cakulya, zyakusama alimwi amaanda. Ibuzuba bwaciloba bwakeelede kwaabwa kukucita milimo yakumuuya. Nokuba kuti teecakalubide kutebba nkuni, tiicakaluzi pe ikubelesya ciindi eco ikucita boobo calo cakeelede kubelesyegwa kukomba Jehova. Nokuba kuti Banakristo tabeendelezyegwi a Mulawo wa Musa, sena eci cakacitika tacituyiisyi ciiyo sunu cakuzibikka kumbele izintu ziyandika kusaanguna?—Ba-Filipi 1:10.
Nobakamana myaka iili 40 munkanda, ibana Israyeli bakalibambila kunjila Munyika Yakasyomezyedwe. Bamwi bakali katede kulya mana alo aakali kupegwa a Leza, aboobo cakutadooneka bakali kulangila kubaa zyakulya zyamusyobo umbi. Ikutegwa bagwasigwe kuzilanga munzila iiluzi zintu ciindi nobakali kunjila munyika “iikunka malili abuci,” Jehova wakabayeezya kuti: “Teensi insim[a] ilike iiponya muntu; muntu ulapona kumajwi oonse aazwa mumulomo wa-Jehova.”—Kulonga 3:8; Deuteronomo 8:3.
Ibana Israyeli bakeelede kubeleka canguzu kutegwa bajane “malili abuci.” Kwakali mpi nzyobakeelede kuzunda, imaanda ngobakeelede kuyaka alimwi amyuunda njobakeelede kusyanga. Nokuba boobo, Jehova wakaambilide bantu kuti babikke ambali ciindi buzuba abuzuba cakuzinzibala kuyeeya zintu zyakumuuya. Alimwi bakeelede kubaa ciindi cakuyiisya bana babo izila zya Leza. Jehova wakati: “Alimwi amwaaiyisye bana banu [malailile angu], amwaambaule ciindi cakukala muŋanda aciindi cakweenda munzila, ciindi cakulala aciindi cakubuka.”—Deuteronomo 11:19.
Iziindi zyotatwe mumwaka ibaalumi bana Israyeli abasandule bamucisi bakalailidwe kuti balibonye kubusyu bwa Jehova. Akaambo kakuziba kuti mukwasyi oonse ulakonzya kugwasigwa munzila yakumuuya kuzwa kuziindi zili boobu, basilutwe bamikwasyi banji bakali kubweza bamakaintu babo antoomwe abana kuti babasindikile. Pele ino nguni wakali kunga wakwabilila minzi yabo antoomwe amyuunda kuli basinkondo imikwasyi yaguumuka? Jehova wakasyomezya kuti: “Takukooyooba muntu uuyanda kutola nyika yanu kuziindi zyakuboneka kubusyu bwa-Jehova Leza wako, ziindi zyotatwe mumwaka.” (Kulonga 34:24) Kwakali kuyandika kubaa lusyomo kubana Israyeli ikutegwa basyome kuti babikka zintu zyakumuuya mubusena bwakusaanguna, tabakonzyi kusowekelwa munzila yakumubili. Sena nzyaakaamba Jehova zyakazuzikizigwa? Inzya!
Amusaangune Kuyandaula Bwami
Jesu wakayiisya basikumutobela kuti babikke zintu zyakumuuya kumbele aazintu zimwi zyoonse. Mumulumbe wakwe Waacilundu wakalailila baswiilizi bakwe ategwa: “Mutalibiliki cakwaamba kuti, Tukalyenzi? Tukanywenzi? Tukasamenzi? . . . Amusaangune kuyandaula Bwami bwa-Leza abululami bwakwe, elyo zintu ezi zyoonse [iziyandika] mulaziyungizizigwa azyalo.” (Matayo 6:31, 33) Mbulwakaindila-indila buyo lufwu lwa Jesu, Ibanakristo bakazwaa kubbapatizigwa bakaatobela malailile ayo. Ibanji bakali bama Juda naa bama Juda basandule balo bakaunkide ku Jerusalemu kuyakusekelela pobwe lya Pentekoste yamu 33 C.E. Kabacili nkukonya kuya kwakacitika cintu cimwi cikankamanisya. Bakamvwa akutobela makani mabotu kujatikizya Jesu Kristo. Akaambo kakuyandisya kwiiya zinji kujatikizya lusyomo lwabo lupya, bakazumanana kukkala mu Jerusalemu. Izyakulya zyakali kuya bumana pele izintu zili boobu teezyakali kuyandika kapati pe kulimbabo. Bakamujana Mesiya! Ibabunyina Banakristo bakabaabila zintu nzyobakajisi kutegwa boonse bazumanane ‘kusungwaala mukuyiisya kwabaapostolo amukukomba.’—Incito 2:42.
Mukuya kwaciindi Ibanakristo bamwi bakaleka kubikkila maanu kumakani aambuli mbokuyandika kuswaangana antoomwe lyoonse kumiswaangano. (Ba-Hebrayo 10:23-25) Ambweni bakatalika kuyandisya lubono, ikusulaika zintu zyakumuuya kakuli basoleka kulilundikila lubono antoomwe amikwasyi yabo. Naakamana kukulwaizya bakwesu kuti batanooleki kuswaangana, imwaapostolo Paulo wakalemba kuti: “Buumi bwanu butabi bwakuyanda mali, pe, mutabi basyaacivulemwangu, nkaambo Leza wakati, Nsikwe nenti kamulekelezye nokuba kuyoomuleka buyo pe, pe.”—Ba-Hebrayo 13:5.
Ilulayo lwa Paulo lwakasika aciindi ceelede. Nokwakainda myaka yosanwe kuzwa ciindi Paulo naakalemba lugwalo kubana Hebrayo, impi yaba Roma iyakali kweendelezyegwaa Cestius Gallus yakazinguluka Jerusalemu. Ibanakristo basyomeka bakakuyeeya kucenjezya kwa Jesu kwakuti: “Mwaakubona [ceeci] . . . ., uuti kajanwe alululi atakaseluki nikuba kunjila kuti agwisye cintu niciba comwe camuŋanda, ayooyo uuti kajanwe mumuunda, atakapilukili kuleta cikobela cakwe.” (Marko 13:14-16) Bakalizi kuti ilufwutuko lwabo teelwakayeeme akukkalikila kwamilimo yabo naa kuvwula kwazintu nzyobajisi pele kwakayeeme akumvwa malailile aa Jesu. Abo bakatobela lulayo lwa Paulo akubikka zintu zyakumuuya mubusena bwakusaanguna cakabaubaubila ikusiya maanda, mulimo, zyakusama azintu zyabo zimwi ziyandisi akuccijila kumalundu ikwiinda baabo ibakacili kuyandisisya mali.
Bamwi Sunu Mbobazibikka Kumbele Izintu Ziyandika Kucitwa Kusaanguna
Ibanakristo basyomeka sunu balakuyandisya kuswaangana ababunyina lyoonse alimwi banji balasolekesya kujanika kumiswaangano. Mumasena amwi imilimo iiliko ijatikizya kubeleka ciindi caandeene-andeene. Imukwesu umwi ulalisungula kubelekela babelesinyina mu Mujibelo masiku lyalo bantu banji bakubusena oko nobalombozya kulikondelezya, ikuti naa balo bazumina kumubelekela mumazuba aakwe aamiswaangano. Ibakwesu bamwi ibabeleka milimo yaciindi caandene-andeene bajanika kumiswaangano yambungano iilaafwaafwi ikuti naa mulimo wabo taubazumizyi kujanika kumbungano yabo. Munzila eyi kunyina nobatajaniki pe kumiswaangano. Umwi muntu uucili mupya alimwi wakazwaa kutambula kasimpe ku Canada wakaziba mbuli mboiyandika miswaangano ya Cikolo Camulimo Wateokrasi alimwi a Muswaangano Wamulimo pele mulimo wakwe teewakali kumuzumizya kujanika kumiswaangano lyoonse. Aboobo wakalikubbadela umwi mubelesinyina kuti kamubelekela kutegwa kajana ciindi cakuunka kumiswaangano eyi iiyandika.
Ibanji baciswa-ciswa balajanika kanjikanji kumiswaangano. Balaiswiilila pulogilamu kuŋanda kwiinda mufooni naa ateepu ciindi nobaalilwa kusika ku Ŋanda ya Bwami. Balatondezya kulumba kapati kuzipego zya Jehova zyakumuuya kwiinda ‘mumuzike wakwe musyomesi uucenjede’! (Matayo 24:45) Ibanakristo balanganya bazyali babo bacembeede balalumba kapati ciindi mukwesu naa mucizi naamba kuti ulabakkalilila bazyali kutegwa sikubalanganya oyo ajanike kumuswaangano wambungano.
Amulibambilile Limwi!
Ibazyali ibazyi kuti bayandika zintu zyakumuuya balabagwasya bana babo kuti bayandisye miswaangano. Mbuli mulawo balangila bana babo kuti kabaulemba ndilyonya mulimo ngubapegwa kucikolo muciindi cakulekela kuti ilundane. Mumazuba aamiswaangano ibana bailembela limwi milimo eyo njibapegwa kucikolo mbubakotokela buyo. Ikusobana alimwi amilimo imwi tayeelede kunyonganya miswaangano yambungano.
Inywebo nobaalumi bakwete alimwi balaabana, sena kujanika kumiswaangano mukubikka mubusena bwakusaanguna? Inywebo nobanakazi bakwetwe alimwi balaabana, sena mulasoleka kwiilangila-langila limwi milimo yanu kutegwa musiye ciindi camiswaangano? Inywebo nobakubusi, sena milimo yanu yakucikolo mwiibona kuti ilayandika kwiinda miswaangano naa kuti miswaangano ilayandika kwiinda milimo yanu yakucikolo?
Imuswaangano wambungano ncipego caluyando kuzwa kuli Jehova. Tweelede kusolekesya kutola lubazu mububambe obo. Jehova uyoomulongezya ikuti naa mwabikka zintu ziyandika kucitwa kusaanguna kumbele!