Ikujanika Lyoonse Kumiswaangano—Ncintu Cakusaanguna
1 Kujanika lyoonse kumiswaangano yambungano ncintu cakusaanguna mumikwasyi ya Banakristo. Pele zintu zicitwa abuzuba sunu zilakonzya kupa kuti eeci cikatazye. Sena milimo yaaŋanda, yakumubili naa yakucikolo yatalika kunyonganya ciindi cibikkidwe ambali cakukomba Jehova? Ikuzilanga mbwazilanga zintu Jehova kuyootugwasya kuzumanana kuzibikka mpozyeelede zintu.—1 Sam. 24:6; 26:11.
2 Kwiinda mukutebba nkuni mu Sabata, imwaalumi muna Israyeli umwi acaali tanaakazilanga mbwazilanga zintu Jehova. Ulakonzya wakayeeya kuti wakacita boobo kutegwa agwasye mukwasyi naa kuti cakali cintu cinyina makani. Pele kweelana alubeta lwakapegwa, Jehova wakatondezya kuti ikucita zintu zyakuligwasya mubuumi aciindi cibikkilidwe kukomba, mmakani mapati.—My. 15:32-36.
3 Kuliyumya Abuyumuyumu: Kubanji ncintu cikatazya kulesya mulimo wakumubili kunyonganya kujanika kumiswaangano. Ibamwi balimana penzi eeli kwiinda mukubandika abasikubalemba milimo, kucincana ciindi cakubeleka abamwi, ikujana mulimo uubapa ciindi naa kuubya-ubya bukkale bwabo. Cakutadooneka, ikulyaaba kuli boobo kujatikizya bukombi bwakasimpe kulamukkomanisya kapati Leza.—Heb. 13:16.
4 Milimo yazyakucikolo ayalo ilakonzya kuba penzi. Imukubusi umwi wakati: “Zyakucikolo zimwi ndilazicita kacitanasika ciindi camiswaangano amane izimbi zyoonse ndizicita ndapiluka.” Ikuti zyakucikolo zicitilwa kuŋanda tazikonzyi kumanizyigwa mubuzuba bwamiswaangano, ibazyali bamwi bapandulwida bamayi kuti ikujanika kumiswaangano ya Bunakristo ncecintu cakusaanguna kucita mumukwasyi wabo.
5 Ikubelekelaamwi alimwi akulibambila kabotu ninzila zigwasya kumanizya milimo yaaŋanda kaciciliko ciindi imukwasyi noulibambila kujanika kumiswaangano. (Tus. 20:18) Nobaba bana basyoonto balakonzya kuyiisyigwa kusama akulibambila kweenda kuya kumiswaangano aciindi cigaminide. Kwiinda mucikozyanyo cabo, ibazyali balakonzya kuyiisya bana babo mboiyandika miswaangano.—Tus. 20:7.
6 Imapenzi aamubweende oobu bwazintu mbwaayaabuvwula, cilayandika kapati kuti katujanika lyoonse kumiswaangano yambungano. Atuzumanane kuzilanga mbwazilanga Jehova zintu akubona kujanika lyoonse kumiswaangano kuba cintu cakusaanguna.—Heb. 10:24, 25.