Mulongo Wazyakucita Zyamukwasyi—Miswaangano Yambungano
1 Ikuti kamuli bazyali Banakristo, muyanda kuti bana banu bakomene kabayanda Jehova akumubelekela alimwi mane kumamanino bakajane buumi butamani munyika mpya njaakasyomezya Leza. Mbuti mbomukonzya kubagwasya kubikka bukombi bwa Jehova mubusena bwakusaanguna mubuumi bwabo? Iciyandika kapati ncikozyanyo canu. (Tus. 20:7) Naakayeeya cikozyanyo cabanyina bali Mbaakamboni, mucizyi umwi wakaamba kuti: “Kwakanyina kudooneka ikuti naa tulaunka kukuswaangana.” Eeci cakamujatikizya mubuumi bwakwe boonse.
2 Sena mukwasyi wanu ulamvwisya ncokuli miswaangano yambungano? Imalailile ngotutambula amiswaangano eeyi alatuyumya kuti tuzumanane kucita kuyanda kwa Leza alimwi ikuyanzana nkotuba ankuko abakwesu kulatukulwaizya kapati. (Is. 54:13; Rom. 1:11, 12) Nokuba boobo, cintu cipati ncotuswaanganina boobu nkuti tumutembaule Jehova “akati kambungano.” (Int. 26:12) Imiswaangano ya Bunakristo itupa coolwe cakutondezya luyando lwesu kuli Jehova alimwi akumukomba.
3 “Amucenjele”: Ikulumba mulimo uusetekene wamiswaangano yesu kuyootupa ‘kucenjela’ kutegwa tutabi acilengwa cakutajanika kumiswaangano akaambo kakuyanda kulanganya zintu zitayandiki kapati. (Ef. 5:15, 16; Heb. 10:24, 25) Nomubamba mulongo wazyakucita zyamukwasyi wanu, inga mwasaanguna kulemba ciindi camiswaangano yambungano. Eelyo amubone kuti kunyina milimo imbi iicitwa muciindi eeco.
4 Lyoonse tulakulwaizyigwa notubala zya bakwesu baliyumya mumakatazyo kutegwa bajanike kumiswaangano misyoonto amipati, sena tabusyi na? Nokuba kuti bukkale bwanu tabukonzyi kweelanyizyigwa abwabamwi, kulangilwa kuti anywebo kuli buyumu-yumu mbomujisi. Saatani wazumanana kupa kuti cibayumine bantu ba Leza kukomba Jehova. Pele amusyome kuti bana banu bayoobona kusoleka ikucitwa amukwasyi wanu ikujanika kumiswaangano yambungano. Kwiinda mukucita boobo, muyoobapa cipego cakumuuya ncobatakalubi.