“Bwini Buyoomunununa”
“Muyooziba bwini, abwalo bwini buyoomunununa.” Mbwaakaamba obo Jesu ciindi naakali kuyiisya zyuulu-zyuulu zyabantu mutempele ku Jerusalemu. (Johane 8:32) Ibaapostolo ba Jesu bakakuziba ndilyonya kuyiisya kwa Jesu kuti mbwini. Bakabona bumboni bunji bwakuti ikuyiisya kwamwiiyi wabo kwakali kuzwa kuli Leza.
NOKUBA boobo, bamwi sunu balakonzya kujana buyumuyumu ikuziba bwini mbwaakali kwaamba Jesu. Mbubwenya mbuli kumazuba aamusinsimi Isaya, sunu kuli “baabo baamba kuti bubotu mbubi, bubi mbubotu; babika mumuni mucibaka camudima amudima mucibaka camumuni; babika kulula mucibaka cabunono abunono mucibaka cakulula.” (Isaya 5:20) Akaambo kakuvwula kwamizeezo, busongo alimwi abukkale ibutobelwa sunu, ibantu banji bayeeya kuti izintu zyoonse nzyakweeleka akuti kwiina cintu cikonzya kwaambwa kuti mbwini.
Jesu naakaambila baswiilizi bakwe kuti bwini bwakali kukonzya kubaangulula, bakaingula akwaamba kuti: “Swebo tuli bana ba-Abrahamu, tatunavubidwe buzike kumuntu, uamba buti kuti muyoonununwa?” (Johane 8:33) Kunyina nobakali kulimvwa kuti bayandika kuti umwi muntu naa cimwi cintu cibaangulule. Pele Jesu wakapandulula kuti: “Ncobeni ndamwaambila kasimpe, Muntu woonse uucita cibi ngomuzike wacibi.” (Johane 8:34) Ibwini mbwaakali kwaamba Jesu bulakonzya kujula nzila yalwaanguluko kuzwa kucibi. Jesu wakati: “Kuti Mwana wamunununa, ncobeni mulaba banunukide.” (Johane 8:36) Aboobo, ibwini bunununa bantu, mbwini bujatikizya Jesu Kristo, Mwanaa Leza. Nkwiinda buyo mukubaa lusyomo mucipaizyo cabuumi bwa Jesu bwabuntunsi bulondokede ikukonzya kunununa muntu uli woonse kuzwa kucibi alufwu.
Kuciindi cimbi, Jesu wakati: “Ubasalazye abwini bwako, ijwi lyako mbobwini.” (Johane 17:17) Ijwi lya Leza mbuli mbolyaambidwe mu Bbaibbele mbwini ibukonzya kutwaangulula kumalweza alimwi akubukombi bwakubeja. Ibbaibbele lijisi bwini kujatikizya Jesu Kristo bwalo bupa kuti bantu bamusyome alimwi bujalula nzila yabulangizi bubotu kumbele. Ncintu cibotu kuziba bwini bwa Jwi lya Leza!
Ino ciyandika kapati buti kuziba bwini? Nokuba kuti izikombelo zinji sunu zilyaamba kuti zitobela Bbaibbele, zilayungwa kapati abusongo alimwi azilengwa zyabantu. Ikanjikanji basololi bazikombelo baboneka kuti babikkila kapati maanu kukuyandwa kwabo abantu kwiinda mbubabikkila maanu kumakani aakululama kwamulumbe wabo. Ibamwi bayeeya kuti Leza ulakukkomanina kukomba koonse kufwumbwa buyo kuti kabasinizizye. Pele Jesu Kristo wakapandulula kuti: “Ciindi cilasika, ncencico cino, abakomba cakasimpe ncobayoomukomba Taata mumuuya amubwini, nkaambo mbambabo abo mbayanda Taata, kuti babe basikumukomba.”—Johane 4:23.
Ikuti katuyanda kumukomba Leza munzila iiluzi, tweelede kuziba bwini. Aka kaambo nkapati. Ilukkomano lwesu lutamani luyeemi ali mbubo. Aboobo umwi aumwi weelede kulibuzya kuti: ‘Sena kukomba kwangu kulamukkomanisya Leza? Sena ndilayandisya kwiiya bwini bwa Jwi lya Leza? Naa sena ndilalibilika kujatikizya ciyoojanika mubuvwuntauzyi obu?’