Ino Leza Nguni?

MBUTI mbomukonzya kuuvwiila mubuzyo ooyu? Bantu bamwi bayeeya kuti balimuzyi kabotu Leza alimwi baamba kuti mweenzinyina. Bamwi Leza bamubona mbuli mbobakonzya kubona muntu umwi ngobatazyi kabotu. Balizyi kuti Leza nkwali pele tabamuzyi kabotu. Ikuti kamumusyoma Leza, mbuti mbomukonzya kwiivwiila mibuzyo iili ansi aawa?

1. Sena Leza muntu mwini-mwini?

2. Sena Leza ulaazyina?

3. Sena Jesu ngu Leza Singuzuzyoonse?

4. Sena Leza ulandibikkila maano?

5. Sena Leza ulabuzumina bukombi boonse?

Ikuti mwababuzya bantu mibuzyo eeyi, mulakonzya kujana bwiinguzi bwiindene-indene. Aboobo tacigambyi kuti kuli twaambo tunji twakubeja kujatikizya Leza.

Bwiinguzi Bulayandika Kapati

Jesu Kristo naakali kwaambaula amukaintu ngwaakajana amugoti wameenda iwakali kumusyoma Leza, wakamwaambila kuti wakeelede kumuzyiba kabotu Leza. Mukaintu ooyo muna Samariya wakazumina kuti Jesu wakali musinsimi. Pele kuli cintu cimwi cakali kumukatazya. Cikombelo ca Jesu cakaliindene acakwe. Mukaintu ooyu naakaamba mbwaakali kulimvwa kujatikizya makani aaya, Jesu wakamwaambila kuti: “Mulakomba ncomutezi.” (Johane 4:19-22) Kakunyina akudooneka, tulakonzya kubona kuti Jesu wakali kuyiisya kuti tabali bantu boonse bakomba bamuzyi kabotu Leza.

Sena majwi aa Jesu atondezya kuti kunyina uukonzya kumuzyiba ncobeni Leza? Peepe. Mpoonya Jesu wakamwaambila boobu mukaintu ooyu: “Bakomba cakasimpe ncobayoomukomba Taata mumuuya amubwini, nkaambo mbambabo abo mbayanda Taata, kuti babe basikumukomba.” (Johane 4:23) Sena muli akati kabaabo bamukomba Leza “mumuuya amubwini”?

Kulayandika kuti mubuzyibe bwiinguzi bwamubuzyo ooyo. Nkaambo nzi? Jesu wakatondezya mboluyandika luzyibo lwini-lwini naakali kupaila kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Masimpe, buumi bwanu bwakumbele buyeeme akumuzyiba kabotu Leza.

Sena cilakonzyeka kuzyiba bwini mbwabede Leza? Ee, cilakonzyeka. Aboobo, mbuti mbomukonzya kumuzyiba? Jesu wakalyaamba boobu naakati: “Ndime nzila, ndime bwini, ndime buumi. Takukwe uuza kuli-Taata, pele mulindime.” (Johane 14:6) Alimwi wakaamba kuti: “Taakwe uuzi Mwana na nguni, pele Taata, a-Taata na nguni, pele Mwana, ayooyo ngwakanza Mwana kumuyubulwida.”—Luka 10:22.

Aboobo, tulakonzya kumuzyiba Leza kwiinda muzyintu mwanaakwe, Jesu Kristo, nzyaakali kuyiisya. Alimwi Jesu wakatusyomezya kuti: “Mwajatisya majwi aangu, ncobeni mwaba basikwiiya bangu, alimwi muyooziba bwini, abwalo bwini buyoomunununa.”—Johane 8:31, 32.

Aboobo, mbuti Jesu mbwaakali kukonzya kwiivwiila mibuzyo yosanwe yabuzyigwa kumatalikilo?

[Cifwanikiso icili apeeji 4]

Sena mukomba Leza ngomutazyi kabotu?