Ino Inga Mwalicesya Buti Cini-Cini?

IKULICESYA kwini-kwini kulaampindu mpati mumeso aa Leza. Jakobo wakalemba kuti: “Leza ulabakazya basikulisumpula, pele batete-myoyo ulabapa luzyalo.” (Jakobo 4:6) Jakobo aawa ulakonzya wakali kwaamba twaambo tunjaanji itwakabandikwa mu Magwalo aa Cihebrayo. “Jehova ulisumpukide, nekubaboobo ulibabwene abaniini, pele basikamikami ulibezi nibacili kule.” “Kulisumpula kwamuntu kuyoobombesegwa, akulilemeka kwabantu kuyoosisigwa ansi. Jehova alike nguuyoolemekwa mubuzuba obo.” “Basimucobwe ulabacobola [Leza], pele babomb[e]myoyo ulabafwida luzyalo.”—Intembauzyo 138:6; Isaya 2:11; Tusimpi 3:34.

Mwaapostolo Petro awalo wakakulwaizya kulicesya. Wakalemba kuti: “Nyoonse amusame myoyo mitete akugwasyanya, nkaambo Leza ulabakazya basikulisumpula, pele batete-myoyo ulabapa luzyalo.”—1 Petro 5:5.

Cikozyanyo ca Kristo Cakulicesya

Mulakonzya kubuzya kuti, Mbubotu nzi buliko mukuba muntu uulicesya? Kumuntu uusoleka kuba Munakristo mwini-mwini ibwiinguzi ncecintu cipati—ikulicesya nkuba mbuli Kristo. Jesu wakatondezya kulicesya kwakwe kwiinda mukuzumina mulimo uulibedelede wakuboola anyika kuzwa kujulu akuzikuba muntunsi mubombe, uuindwa abangelo kubulemu. (Ba-Hebrayo 2:7) Nokuba kuti wakali Mwanaa Leza, wakaliyumya mukusampaulwa ikwakalundikwa aalinguwe abasinkondonyina basicikombelo. Mumasukusyo wakapenga cakaumuumu nokuba kuti wakali kukonzya kulomba malegioni aabangelo kuti amugwasye.—Matayo 26:53.

Mpoonya Jesu wakalengelela camasampu aacisamu cakupenzezya, nokuba boobo wakazumanana kusyomeka kuli Usyi. Aboobo, kujatikizya nguwe Paulo wakali kukonzya kulemba kuti: “Amube amoyo oyo nguwenya iwakali muli-Kristo Jesu. Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. Wakalilonzya, wakalisalila ciimo cabuzike akuba mbubonya mbuli bantu balya maila. Lino naakabonwa kuti waba acikozyano camuntu, wakalibombya akuzumina nikuba kufwa, nkukuti kufwa kwakubambulwa aci[samu cakupenzezya].”—Ba-Filipi 2:5-8.

Aboobo mbuti mbotunga twatondezya kulicesya kwini-kwini? Nokutucitikila zintu zimwi, mbuti mbotweelede kulimvwa munzila yakulicesya kutali yakulisumpula?

Muntu Uulicesya Mbwalimvwa

Atulange-lange kulicesya notuli kumulimo, kube kumulimo wakumubili naa mumulimo wa Bunakristo. Ikutegwa mulimo ucitwe cakuzwidilila, balangizi, beendelezi bamilimo alimwi abakapitawu balayandika. Muntu umwi weelede kusala zyakucita. Mulimvwa buti? Sena inga muyeeya kuti, “Uyeeya kuti muntu loko na ino nandaambila nceelede kucita? Ndaubeleka mulimo oyu kwamyaka minji kwiinda nguwe.” Inzya, ikuti kamulisumpula muyootongooka mukulibombya kwanu. Kulubazu lumwi, imuntu uulicesya usoleka ‘kutacita cintu niciba comwe cabbivwe nanka cakulisumpula, pele cakulibombya mumoyo, akuyeeya kuti mweenzuma mubotu kwiinda ndime.’—Ba-Filipi 2:3.

Mulimvwa buti nokuboola muzeezo kuzwa kumwanike naa mukaintu? Ikuti kamulicesya, muyooulanga-langa. Ikuti kamulisumpula mulacimwa nokuba kuukaka mpoonya-mpoonya. Sena inga mwayanda kutembaulwa akunyengelelwa ikusololela kulunyonyooko lwanu naa inga mwayanda lulayo lugwasya kutegwa muyumizigwe?—Tusimpi 27:9; 29:5.

Sena inga mwabulwana buyumuyumu bwakupenzyegwa? Kulicesya kuyoomugwasya kuliyumya muziimo zikatazya alimwi akukakatila, mbubwena Jobu mbwaakacita. Ikuti kamulisumpula, muyootyompwa alimwi mulakonzya kuzanga caboola kubukkale bwamapenzi alimwi amutuntu tusyoonto ntomuyeeyela kuti ntubi.—Jobu 1:22; 2:10, 27:2-5.

Kulicesya Kulaaluyando Alimwi Kulalekelela

Bantu bamwi cilabakatazya kwaamba kuti, “Amundijatile. Ndalubizya. Mwaliluzi.” Nkaambo nzi? Balalisumpula kapati! Pele ikulilekelela kwini-kwini kanjikanji kulesya kuzwangana kwamulukwatano.

Sena mulilisungwide kulekelela iciindi muntu umwi naamulubizizya? Naa sena mukulisumpula kwanu mubaa cikoto kumoyo ambweni kwamazuba aali mbwaabede naa myeezi kamutakanani amuntu ngomuyeeyela kuti wakamubisizya? Sena mane mulanyema kwaciindi cilamfwu kutegwa kubonwe kuti mwacipilusya ncobeni cibi? Bantu bajaigwa kwiinda mukunyema kwaciindi cilamfwu. Kuli bamwi, ikuvwiya muntu cakwaamba zintu zitaluleme yali nenzila. Mukwiimpana, imuntu uulicesya ngusiluyando alimwi ulalekelela. Nkaambo nzi? Nkaambo luyando taluyeeyi inkoto yabubi. Jehova wakalilisungwide kulekelela bana Israyeli ikuti nobakaleka kulisumpula. Sikutobela Jesu uulicesya ulilisungwide kujatila, noziba ziindi zinji!—Joeli 2:12-14; Matayo 18:21, 22; 1 Ba-Korinto 13:5.

Muntu uulicesya ‘ulasungwaala kukulemekana.’ (Ba-Roma 12:10) Ibbaibbele lya New International Version lyaamba kuti: “Amulemekane ikwiinda mbomulilemeka nobeni.” Sena mulabatembaula bamwi akubalumba akaambo kazintu nzyobakonzya kucita naa nzyobazyi kabotu? Naa lyoonse inga muyandaula cintu cimwi cibyaabi kutegwa mubisye mpuwo yabo? Sena mulakonzya kutembaula bantu bambi cakusinizya? Ikuti kamujisi penzi mumakani aaya, ikulibilika naa kulisumpula ambweni ngamapenzi aanu.

Muntu uulisumpula takkaziki moyo. Imuntu uulicesya ulakkazika moyo alimwi ulaliyumya. Ino mbuti nywebo? Sena mulacimwa kufwumbwa ciindi nomubona kuti tiimweendelezyegwa kabotu? Ikulimvwa boobo kuliimpene akuliyumya. Ikuti kamulicesya, kwiina nomunooliyeeyela kuti muli bantu loko kwiinda bamwi. Amuyeeye cakacitika basikwiiya ba Jesu nobakalibona kuti mbantu loko—bakanjila mukuzwangana kapati kujatikizya wakali mupati akati kabo. Bakaluba kuti bakali “bazike buyo” boonse!—Luka 17:10; 22:24; Marko 10:35-37, 41.

Imulembi mu Fulenci wazina lya Voltaire wakapandulula kulicesya kuti “nkubomba kwamuntu . . . imusamu uulesya kulisumpula.” Inzya, kulicesya nkubomba moyo. Muntu uulicesya mubombe moyo, tali simapuwo pe. Mmuntu uulemeka kapati alimwi uubikkila bamwi maanu.

Aboobo nkaambo nzi ncotweelede kusoleka kuba bantu balicesya? Nkaambo kulicesya ulakukkomanina Leza alimwi kutugwasya kuti tujane busolozi bwabunaleza. Akaambo kakulicesya kwa Daniele, Jehova wakabona musinsimi oyu kuba muntu “uuyandwa loko” alimwi wakatuma mungelo kulinguwe acilengaano! (Daniele 9:23; 10:11, 19) Ikulicesya kuletela bulumbu bunji. Kujanya balongwe beni-beni ibamuyanda. Cipati kwiinda, kuletela zilongezyo zya Jehova. “Kulibombya akuyoowa Jehova kulaleta buvubi abulemu abuumi.”—Tusimpi 22:4.

[Cifwanikiso icili apeeji 7]

Ijwi lyaambwa cakulicesya ilyakulilekelela lilakonzya kukondelezya buumi