Amuzumanane Kweenda Munzila Njayanda Jehova
“Lindila kuli-Jehova akubamba inzila yakwe, lino ulakusumpula kuti ukone nyika.”—INTEMBAUZYO 37:34.
1, 2. Ino kweenda munzila njayanda Jehova kwakajatikizya nzi ku Mwami Davida, alimwi ncinzi ncocijatikizya kulindiswe sunu?
“UNDIZIBYE inzila njinjeelede kweenda, nkaambo kulinduwe nkombikide moyo wangu.” (Intembauzyo 143:8) Ibanakristo sunu balaaindulula majwi aayo aa Mwami Davida camoyo woonse. Balayandisisya ikukkomanisya Jehova akweenda munzila yakwe. Ino kucita boobo kujatikizya nzi? Kuli Davida, cakali kwaamba kutobela mulawo wa Leza. Cakali kujatikizya kusyoma muli Jehova muciindi cakuyanzanaa masi. Inzya, alimwi cakali kujatikizya kubelekela Jehova cakusyomeka ikutali kubelekela baleza bakali kukombwaa bantu bakeengelede. Kubanakristo, ikweenda munzila njayanda Jehova kujatikizya zintu zinji kwiinda waawo.
2 Atwaambe kuti, ikweenda munzila njayanda Jehova mazubaano caamba kusyoma mucinunuzyo ca Jesu Kristo, ikumubona kuti ‘nenzila, bwini abuumi.’ (Johane 3:16; 14:6; Ba-Hebrayo 5:9) Alimwi caamba kuzuzikizya “mulao wa-Kristo,” uujatikizya kuyandana, ikapati ikuyanda ibanabakwabo Jesu bananike. (Ba-Galatiya 6:2; Matayo 25:34-40) Aabo ibeenda munzila njayanda Jehova balazikkomanina njiisyo zyakwe amilawo. (Intembauzyo 119:97; Tusimpi 4:5, 6) Balacikkomanina coolwe cabo cibotu cakutola lubazu mumulimo wa Bunakristo. (Ba-Kolose 4:17; 2 Timoteo 4:5) Ikupaila ncitu ncobacita lyoonse mubuumi bwabo. (Ba-Roma 12:12) Alimwi ‘balicenjede loko mbubeenda, kuti batanooendi mbuli bafwubafwuba, pe, pele mbuli basimaanu.’ (Ba-Efeso 5:15) Kwiina nobayanda kulusowela ambali lubono lwakumuuya akaambo buyo kazintu zyakumubili zyakaindi kasyoonto naa kulikondelezya azintu zyanyama izitali mumulawo. (Matayo 6:19, 20; 1 Johane 2:15-17) Kunze lyaboobo, ikusyomeka kuli Jehova alimwi akusyoma nguwe kulayandika kapati. (2 Ba-Korinto 1:9; 10:5; Ba-Efeso 4:24) Ino nkaambo nzi? Nkaambo bukkale bwesu bulikozyenye kapati aboobo bwa Israyeli yansiku.
Mbokuyandika Ikumusyoma Akusyomeka
3. Nkaambo nzi kusyomeka, kubaa lusyomo alimwi akusyoma ncozitugwasya kuzumanana kweenda munzila njayanda Jehova?
3 Icisi ca Israyeli cakali cisi ciniini icakazingulukidwe aabasimukobonyina balwani balo ibakajatikizidwe muzilengwa zyakutalyeendelezya mubukombi bwabaleza bakupanga. (1 Makani 16:26) Ibana Israyeli balikke mbobakali kubelekela Leza omwe wakasimpe uutalibonyi Jehova, alimwi wakayanda kuti bazumanane azyeelelo zyakulilemeka zisumpukide. (Deuteronomo 6:4) Mbubonya buyo asunu, ntuulunzuma buyo tusyoonto twabantu ibakomba Jehova, alimwi bakkede munyika iijisi bantu batandila ku 6,000,000,000 ibajisi zyeelelo alimwi abukombi bwiimpene kapati abwabo. Ikuti katuli akati katuulunzuma oto tusyoonto, tweelede kucenjela kapati kuti tutayungwi munzila iitaluzi. Munzila nzi? Kusyomeka kuli Jehova Leza, ikumusyoma alimwi akusyoma cakusinizya kuti uyoozizuzikizya zisyomezyo zyakwe inga caakutugwasya kapati. (Ba-Hebrayo 11:6) Ikucita boobo kuyootugwasya kweeleba kusyoma zintu zisyomwaa bantu banyika.—Tusimpi 20:22; 1 Timoteo 6:17.
4. Nkaambo nzi masi ‘ncaasizidwe mumiyeeyo’?
4 Imwaapostolo Paulo wakatondezya mbuli mbobeelede kwaandana Banakristo anyika naakalemba kuti: “Lino makani ngiŋamba akulungulula mu-Mwami ngaaya. Kuzwa sunu mutanooendi mbuli mbubeenda bamasi mubufubafuba bwamyoyo yabo, ikuti balisizidwe mumiyeeyo yabo, balipambukide kubuumi bwa-Leza nkaambo kakutaziba kuli mulimbabo kuzwa kubuyumu bwamyoyo yabo.” (Ba-Efeso 4:17, 18) Jesu “ngo-Mumuni mwinimwini.” (Johane 1:9) Boonse ibamukaka naa ibalyaamba kuti balamusyoma pele ibatatobeli “mulao wa-Kristo” “balisizidwe mumiyeeyo yabo.” Tabeendi munzila njayanda Jehova, “balipambukide kubuumi bwa-Leza.” Nokuba kuti inga kabayeeya kuti mbasongo kapati munzila yakunyika, ‘kwiina luzibo luli mulimbabo’ kujatikizya luzibo lusololela kubuumi, iluzibo lwa Jehova Leza a Jesu Kristo.—Johane 17:3; 1 Ba-Korinto 3:19.
5. Nokuba kuti mumuni uli mukumweka munyika, nkaambo nzi myoyo yabantu banji ncoili miyumu?
5 Nokuba boobo, imumuni wakasimpe ulimukumweka munyika! (Intembauzyo 43:3; Ba-Filipi 2:15) “Busongo [bwini-bwini] bulaita mumigwagwa.” (Tusimpi 1:20) Mwakali, Bakamboni ba Jehova bakabeleka mawoola aainda ku 1,000,000,000 kabaambila basimukobonyina makani aajatikizya Jehova Leza a Jesu Kristo. Imyaanda-myaanda yazyuulu zyabantu bakaatobela. Pele sena tweelede kugambwa akaambo kakuti ibanji kwiina nobakaatobela? Peepe. Paulo wakaamba ‘zyakuyuma kwamyoyo yabo.’ Bamwi bajisi myoyo miyumu nkaambo kakulisumpula naa kuyandisya mali. Ibambi bayungidwe aabukombi bwakubeja naa ikuyandisya lwiiyo lwakumubili ilwaduma mazubaano. Ikuyuma kwabukkale kwapa kuti banji bamufwutatile Leza. Ibambi balakaka kutobela zyeelelo zya Jehova zyakulilemeka zisumpukide. (Johane 3:20) Sena imoyo wamuntu uuli mukweenda munzila njayanda Jehova ulakonzya kusizigwa mumbazu eezi?
6, 7. Nokuba kuti bana Israyeli bakali bakombi ba Jehova Leza, muuzyakucitika nzi mobakazanga, alimwi ino nkaambo nzi?
6 Eci cakacitika kubana Israyeli bansiku, mbubwena mbwaakatondezya Paulo. Wakalemba kuti: “Aya makani atubeda incenjezyo, kuti tutabi mukususa zintu zibi mbubakasusa balo. Mutabi basikukomba mituni mbuli bamwi akati kabaabo, mbuli mbukulembedwe kuti, Bantu bakakala kuti balye akunywa, elyo bakabukila kusobana. Alimwi tutaciti bwaamu mbubakacita balo, lino kwakawa mubuzuba bomwe bantu bali zyuulu zili makumi obile azitatu akati kabo.”—1 Ba-Korinto 10:6-8.
7 Paulo lutaanzi waamba cakacitikila ibana Israyeli nobakakomba mwanaa ŋombe wangolida uufwulidwe munselelo lya Cilundu ca Sinai. (Kulonga 32:5, 6) Ooku kwakali kukazya mulawo wa Leza cakaanzambwene ooyo ngobakazumide kutobela imvwiki zisyoonto buyo musyule. (Kulonga 20:4-6; 24:3) Mpoonya, Paulo waamba zyaciindi bana Israyeli nobakakomba Baala abana basimbi baku Moabu. (Myeelwe 25:1-9) Ikukomba moombe kwakali kujatikizya kutalyeendelezya kwiindilide, ‘ikubukila kusobana.’a Kukomba Baala kwakali kujatikizya bwaamu butaambiki. (Ciyubunuzyo 2:14) Ino nkaambo nzi bana Israyeli ncobakacitila zinyonyoono ezi? Nkaambo bakalekela myoyo yabo kuyandisisya “zintu zibi”—kube kukomba mituni naa micito yabwaamu izyakajatikizidwe mubukombi obo.
8. Ncinzi ncotwiiya kuzintu zyakacitikila bana Israyeli?
8 Paulo wakatondezya kuti tweelede kwiiya kuzintu eezi zyakacitika. Ikwiiya nzi? Cilagambya kuti Munakristo inga wayanda kukotamina Mutuni wamoombe wangolida naa leza wansiku wabana Moabu. Pele ino mbuti kujatikizya bwaamu naa kutalyeendelezya mukucita zintu? Ezi zilidumide mazubaano, elyo ikuti twatalika kuzilombozya mumyoyo yesu, ziyootupambula kuli Jehova. Iciyoocitika cinookozyenye buyo mbuli kuti twakomba mituni—ikupambuka kuzwa kuli Leza. (Amweezyanisye Ba-Kolose 3:5; Ba-Filipi 3:19.) Cileelela kuti Paulo wamanizya mubandi wakwe kujatikizya zintu eezyo zyakacitika kwiinda mukulaya basyominyina kuti: “Amucije kukomba mituni.”—1 Ba-Korinto 10:14.
Ilugwasyo Kujatikizya Kweenda Munzila Njayanda Leza
9. (a) Ndugwasyo nzi ndotupegwa kuti lutugwasye kuzumanana munzila njayanda Jehova? (b) Ninzila nzi yomwe motumvwa ‘ijwi kusule lyesu’?
9 Ikuti naa tulikanzide kuzumanana kweenda munzila njayanda Jehova, tatusiidwe buyo kakunyina lugwasyo. Isaya wakasinsima kuti: “Matwi aako ayoomvwa ijwi kusule lyako liti, Njeeyi inzila, amweende mulinjiyo, kufumbwa ciindi nimuleya nikuba kululyo nikuba kulumwensi.” (Isaya 30:21) Ino ‘matwi eesu’ alimvwa buti ijwi eelyo ‘lili kusule lyesu’? Kwiina muntu mazubaano uumvwa ijwi lini-lini naa kutambula mulumbe uumugeme kuzwa kuli Leza. “Ijwi” limvwugwa lilatusikila toonse munzila yomwe. Inzila yakusaanguna alimwi mpati njakuti lilatusikila kwiinda mu Magwalo ngaakamunikila Leza, Ibbaibbele, lyalo ilijisi mizeezo ya Leza alimwi amakani aamicito yakwe kujatikizya bantunsi. Mbwaanga abuzuba tulaamvwa makani aakubeja aazwa kubantu “bapambukide kuzwa kubuumi bwa-Leza,” tweelede kulibala Bbaibbele akuzinzibala kuyeeya ncolyaamba lyoonse ikutegwa tube bantu bayumu munzila yakumuuya. Eci ciyootugwasya kulikasya ‘kuzintu zyabuyo’ akuba ‘balibambide, ibazulide kukumana milimo mibotu yoonse.’ (Incito 14:14, 15; 2 Timoteo 3:16, 17) Liyootukulwaizya, ikutuyumya akutugwasya ‘kubotya inzila yesu akutuletela coolwe.’ (Joshua 1:7, 8) Aboobo, Ijwi lya Leza likulwaizya kuti: “Lino, nobana bangu, amundiswiilile; bali acoolwe boonse babamba inzila zyangu. Amuswiilile lulayo, musongwaale; mutaluleki.”—Tusimpi 8:32, 33.
10. Ninzila nzi yabili motumvwa ‘ijwi kusule lyesu’?
10 Alimwi ‘ijwi lili kusule lyesu’ lilatusikila kwiinda ‘mumuzike musyomesi uucenjede,’ uuabila ‘zilyo kuciindi ceelede.’ (Matayo 24:45-47) Inzila imwi mocaabilwa cakulya eci, nkwiinda mumabbuku aasimbidwe aabandika makani aa Bbaibbele alimwi mumyaka ino ikwaabila cakulya eci kwavwula. Mucikozyanyo, kwiinda mumagazini ya Ngazi Yamulindizi ikuteelela kwesu kujatikizya businsimi kwasalazigwa. Mumagazini eyi, twali kukulwaizigwa kuliyumya mumulimo wakukambauka akugwasya bamwi kuba basikwiiya nokuba kuti ikutabikkila maanu kwabantu kwavwula, twagwasigwa kulilesya kunjila mutooye, alimwi twakulwaizigwa kubaa bube bwa Bunakristo bubotu. Tulacikkomanina kaka cakulya cili boobo icipegwa kuciindi ceelede!
11. Amupandulule nzila yatatu mbotunga tulamvwa ‘ijwi kusule lyesu.’
11 Muzike musyomesi uucenjede alimwi ulaabila zilyo kwiinda mumiswaangano iicitwa lyoonse. Eyi ijatikizya miswaangano yambungano, yabbazu ayaalubazu alimwi amiswaangano mipati iicitwa ciindi comwe amwaka. Mmunakristo nzi uusyomeka uutaibikkili maanu miswaangano iili boobu? Ilatugwasya kapati kuzumanana kweenda munzila njayanda Jehova. Mbwaanga banji batola ciindi cilamfwu kabali kumilimo naa kucikolo kabali abantu ibatasyomi nzyobasyoma, ikuyanzana kwa Bunakristo lyoonse masimpe kufwutula buumi. Miswaangano itupa ciindi cibotu ‘cakubusyanya-busyanya mukuyandana akucita milimo mibotu.’ (Ba-Hebrayo 10:24) Tulabayanda bakwesu alimwi tulakukkomanina kuyanzana ambabo.—Intembauzyo 133:1.
12. Mmakanze nzi Bakamboni ba Jehova ngobajisi, alimwi mbuti mbobakaatondezya onoono?
12 Akaambo kakuyumizigwaa cakulya cakumuuya cili boobu, ibantu batandila kutuulunzuma tuli cisambomwe sunu bali mukweenda munzila njayanda Jehova, tuulunzuma tumbi twabantu bali mukwiiya Bbaibbele kuti bazibe mbobanga bacita boobo. Sena balatyompwa naa kulengaana akaambo kakuti mbace kwiinda mweelwe wabantu munyika uubalilwa kuzyuulu-zyuulu zyatuulunzuma? Peepe! Balikanzide kuzumanana kutobela ‘ijwi lili kusule lyabo,’ ikucita kuyanda kwa Jehova cakusyomeka. Ikutegwa batondezye makanze aya kubuleya, ibakajanika ku Miswaangano ya Cooko Ayamasi ya “Kupona Munzila Njayanda Leza” iyakacitwa mu 1998/99, bakazumina kutobela makanze ayo camoyo woonse kujatikizya ciimo cabo. Imakani aatobela ncibeela camakanze aayo.
Mmakanze
13, 14. Ino Bakamboni ba Jehova babulanga munzila iili buti bukkale bwamunyika?
13 “Swebo, to Bakamboni ba Jehova notubungene aa Muswaangano wa ‘Kupona Munzila Njayanda Leza,’ tulazumina camoyo woonse kuti kupona mbwayanda Leza nenzila yabukkale iyiinda zyoonse kubota. Pele, tulizyi kuti banamunji sunu tabuli mbobalimvwa obo pe. Bantu basoleka kutobela mizeezo minji, ibusongo alimwi amizeezo yabukombi kabayeeya kuti eezi mbobukkale bubotu. Ikuti twalanga zyacitika musyule alimwi azicitika sunu tulabona kuzuzikizigwa kwamajwi aa Leza aalembedwe kuli Jelemiya 10:23, BT kuti: ‘Muntu talyeenzyi ntaamo zyakwe pe.’”
14 “Abuzuba tulabona bumboni abumbi ibusinizya kululama kwamajwi aayo. Kanjikanji bantu tabaponi munzila njayanda Leza. Ibantu batobela zintu kufwumbwa zibakkomanisya. Akaambo kakucita boobo, izintu zyabacitikila nzibyaabi—kunyongana kwamikwasyi ikwacitya kuti bana basyaale kabanyina busolozi; ikusungwaalila buvwubi, icaletela kuzyingwa akutyompokelwa; ikuvwula kwamilandu akulwana ikwalobya bantu batalivwulili mulufwu; imazwanga alimwi ankondo akati kamisyobo izyanyonyoona bantu bataambiki; ikuvwula kwabwaamu ikwaleta kuvwula kwamalwazi aayindene-indene aajanwa mukoonana. Aaya mapenzi masyoonto buyo aakati kamapenzi aataambiki alimwi aakatazya aasinkila lukkomano, luumuno alimwi aluliibo mubukkale.
15, 16. Nkusinizya nzi ikwakatondezyegwa mumakanze ikujatikizya nzila njayanda Leza?
15 “Akaambo kaciimo cibyaabi cabantu alimwi ‘ankondo yabuzuba bupati bwa-Leza Singuzuzyoonse,’ iitegwa Harmagedoni iilaafwaafwi (Ciyubunuzyo 16:14, 16), to Bakamboni ba Jehova tukanza kuti:
16 “Cakusaanguna: Tulibona kuba bantu ba Jehova Leza, mbotwakalyaaba tobeni kulinguwe camoyo woonse, alimwi tulazumanana kusyoma mucipego ca Jehova cacinunuzyo kwiinda mu Mwanaakwe, Jesu Kristo. Tulikanzide kuzumanana kweenda munzila njayanda Leza, kubeleka katuli Bakamboni bakwe alimwi akulibombya kubweendelezi bwakwe ibutondezyedwe mubweendelezi bwa Jesu Kristo.
17, 18. Nciimo nzi ncobatizumanane kutobela Bakamboni ba Jehova kujatikizya kulilemeka alimwi abunyina bwa Banakristo?
17 “Cabili: Tulazumanana kutobela zyeelelo zisumpukide zyakulilemeka azyakumuuya izili mu Bbaibbele. Tulikanzide kukazya muuya wakweenda mbuli mbobeenda bamasi ibeenda mubufwubafwuba bwamoyo yabo. (Ba-Efeso 4:17-19) Tulikanzide kuzumanana katunyinaa kampenda mumeso aa Jehova alimwi akuliyobola kutegwa tutabi aakabala kanyika ino.—Jakobo 1:27.
18 “Catatu: Tulajatisya kuciimo cesu ceendelanaa Magwalo katuli Banakristo babunyina banyika yoonse mbwiizulwa. Tulazumanana aciimo cesu ca Bunakristo cakutatola lubazu munkondo zyacisi, ikutacegwa mutooye twakusalaulana musyobo, cisi naa kuzwangana akaambo kamusyobo naa kutamvwana.
19, 20. (a) Ncinzi bazyali Banakristo ncobaticite? (b) Mbuti Banakristo bakasimpe boonse mbobatizumanane kulitondezya kuti mbaasikwiiya ba Kristo?
19 “Cane: Swebo tobamazyali tulayiisya bana besu inzila ya Leza. Tulatondezya cikozyanyo mubukkale bwa Bunakristo, ibujatikizya kubala Bbaibbele lyoonse, kubaa ciiyo camukwasyi lyoonse alimwi akutola lubazu camoyo woonse mumbungano ya Bunakristo amumulimo wamumuunda.
20 “Casanu: Toonse tulasolekesya kwiiya ciimo cabunaleza Mulengi wesu ncatondezya alimwi tulasungwaala kwiiya ciimo cakwe anzila zyakwe, mbubwena Jesu mbwaakacita. (Ba-Efeso 5:1) Twakanza kuti tucite zintu zyoonse muluyando, nkaambo mukucita boobo tulalizyibya kuti tuli basikwiiya ba Kristo.—Johane 13:35.
21-23. Ncinzi ncobatizumanane kucita Bakamboni ba Jehova, alimwi ncinzi ncobasyomede?
21 “Cacisambomwi: Kakunyina kulengaana tulazumanana kukambauka makani mabotu aa Bwami bwa Leza, ikugwasya bamwi kuba basikwiiya alimwi akubayiisya kupona munzila njayanda Leza akubakulwaizya kutambula lwiiyo luyungizidwe aamiswaangano yambungano.—Matayo 24:14; 28:19, 20; Ba-Hebrayo 10:24, 25.
22 “Caciloba: Omwe-omwe wesu alimwi toonse antoomwe mbuli mbunga yabukombi, tulazumanana kubikka kuyanda kwa Leza kumbele mubukkale bwesu. Kwiinda mukutobela Jwi lyakwe Ibbaibbele, tatukaleeli kululyo naa kulumwensyi, elyo tuyoosinizya kuti inzila ya Leza ilisumpukide kapati kwiinda inzila zyamunyika. Tulikanzide kutobela nzila njayanda Leza—cakusinizya acakusyomeka, ono akuzumanana kukabe kutamani!
23 “Tulaa makanze aaya nkaambo tulacisyoma kapati cisyomezyo ca Jehova caluyando cakuti ooyo uucita kuyanda kwa Leza ulakkalilila kukabe kutamani. Tulaa makanze aaya nkaambo tusyoma kuti ikutobela njiisyo, lulayo alimwi amalailile aamu Magwalo kucitya kuti tupone munzila iigwasya kapati mazubaano alimwi kucitya kuti tuliyobwede ntalisyo mbotu yaciindi cakumbele, ikutegwa tujatisye aabuumi bwini-bwini. (1 Timoteo 6:19; 2 Timoteo 4:7b, 8) Ikapati, tulaa makanze aaya nkaambo tulamuyandisisya Jehova Leza amoyo wesu woonse, buumi, miyeeyo anguzu zyesu zyoonse!
24, 25. Nkwiingula nzi kwakacitwa kumakanze aakapegwa, alimwi ncinzi aabo ibeenda munzila njayanda Jehova ncobasinizizye kucita?
24 “Nyoonse nomwajanikaa muswaangano uno nomuzumina kutobela makanze aaya, amwaambe kuti INZYA!”
25 Imyaanda-myaanda yazilabba amabbuwa musobaninwa zisobano munyika yoonse mbwiizulwa zyakayooma ciindi boonse ibakajanika nobakaingula cakoongolola kuti “INZYA!” Bakamboni ba Jehova tabadooneki kuti bayoozumanana kweenda munzila njayanda Jehova. Balasyoma cakumaninina muli Jehova akuti uyoozuzikizya zisyomezyo zyakwe. Balazumanana kusyomeka kulinguwe, nokucitika cili buti. Alimwi bakanzide kucita kuyanda kwakwe.
‘Leza uli Aswe’
26. Muubukkale nzi bubotu mobakkede aabo ibeenda munzila njayanda Jehova?
26 Bakamboni ba Jehova balakuyeeya kulaya kwasintembauzyo kwakuti: “Lindila kuli-Jehova akubamba inzila yakwe, lino ulakusumpula kuti ukone nyika.” (Intembauzyo 37:34) Kwiina nobaaluba majwi aa Paulo aakulwaizya aakuti: “Anooli Leza kali aswe, ino nguni uukonzya kutulwisya? Oyo iwatakatukasya Mwanaakwe mwini, pele wakamwaabila ndiswe toonse, sa takooyootupa buyo antoomwe anguwe zintu zimwi zyoonse?” (Ba-Roma 8:31, 32) Inzya, ikuti twazumanana kweenda munzila njayanda Jehova, uyootufwonkweda “zintu zyoonse kuti katunga katuligwasya nzizyo.” (1 Timoteo 6:17) Mbusena nzi bubotu buliko kwiinda boobu motubede—ikweenda munzila njayanda Jehova antoomwe abakwesu abacizi bayandwa. Jehova mbwanootugwasya, atukanze kuzumanana munzila omo alimwi akuliyumya kusikila kumamanino, katusinizizye kuti kuciindi ncabikkide mwini, tuyoolibonena kazuzikizya zisyomezyo zyakwe zyamamanino zyoonse.—Tito 1:2.
Bupanduluzi buyungizidwe
a Kaamba zyabbala lya Cigiliki awa ilyakasandululwa kuti ‘kubukila kusobana,’ sikupandulula umwi waamba kuti lyaamba kuzyana ikwakacitwa mumapobwe aabantu batakombi Leza alimwi uyungizya kuti: “Ibunji bwazizyano ezi mbubwena mbuli mbokuzibidwe zyakali kubusya mizeezo yakuyandisya koonana.”
Sena Mulayeeya?
◻ Ncinzi ciyandika kutegwa Munakristo ayende munzila njayanda Jehova?
◻ Nkaambo nzi ncotweelede kumusyoma kapati Jehova alimwi akuba bantu basyomeka kulinguwe?
◻ Ndugwasyo nzi luliko mbotuyabweenda munzila njayanda Jehova?
◻ Amunoomone twaambo tupati-pati twamakanze aakazuminwa aa Miswaangano ya “Kupona Munzila Njayanda Leza.”
[Zifwanikiso izili apeeji 18]
Imakanze aayandika kapati akazuminwa aa Miswaangano Yamasi aya Cooko ya “Kupona Munzila Njayanda Leza”