Nkaambo nzi Ncotweelede Kusyoma Muli Jesu Kristo?
“IBUNJI bwabantu ibatali Banakristo abalo basyoma kuti Wakali mwiiyi mupati alimwi sibusongo. Wakali muntu ulaa mpuwo iikweelelezya kwiinda woonse wakaponede.” (The World Book Encyclopedia) Ino “Nguni” oyo? Ngu Jesu Kristo, sikutalisya Bunakristo.
Nokuba kuti lyaamba boobo eli bbuku lya encyclopedia, imyaanda yatuulunzuma twabantu ba Kujwe alimwi akumbi buyo Jesu Kristo tabamuzi pe, ndizina buyo ndyobakonzya kwiibaluka kuzwa mumabbuku aalwiiyo aakucikolo cakusekondali. Nomuba muzikombelo zya Kristendomu kuli baabo bategwa mbaahaabupampu mulwiiyo lwabukombi alimwi abasololi bazikombelo ibaamba kuti tatumuzyi pe swebo Jesu alimwi balaadooneka magwalo one aamba zyabuumi bwakwe (Makani Mabotu) aajanika mu Bbaibbele.
Sena balembi bamabbuku aa Makani Mabotu bakalengelezya cakubeja buya kujatikizya makani aamba zyabuumi bwa Jesu? Peepe! Sikwiiya zyaciindi uuzizilwe kapati Will Durant naakamana kwaalangisisya mabbuku aa Makani Mabotu wakalemba kuti: “Ikwaamba kuti bantu basyoonto buyo muzyalani lyomwe bakalipungila zyamuntu singuzu uukwelelezya boobu, abukkale busumpukide boobu alimwi amuzeezo uukulwaizya wabunyina inga aba maleele aagambya kwiinda woonse aalembedwe mu Makani Mabotu. Nokwakainda myaanda yamyaka yobile Ibbaibbele kalikazigwa, imakani aajatikizya buumi aciimo antoomwe anjiisyo zya Kristo azumanana kulimvwisya alimwi aba makani aakondelezya mumakani aansiku aajatikizya muntu wa Kumbo.”
Nokuba boobo, kucili bantu batamubikkili maanu Jesu Kristo akaambo kazintu nzyobacita aabo balyaamba kuti mbaasikumutobela. Bamwi mucisi ca Japan baamba kuti aaba ‘bakalosya bbomba lyalunyonyooko kapati mumunzi wa Nagasaki. Alimwi mu Nagasaki mwakali Banakristo banji kwiinda minzi yoonse ili mucisi ca Japan.’ Pele sena inga mwapa mulandu kumusilisi akaambo kakuciswa kwamulwazi iwatatobela malailile aamusilisi? Ibantu banji balitaminina kuba Banakristo kwaciindi cilamfwu tabaatobeli malailile a Jesu akusilika malwazi aamuntu. Pele Jesu wakapa musamu wakusilika mapenzi eesu aabuzuba abuzuba alimwi azintu zipenzya muntu anyika yoonse mbwiizulwa. Nkakaambo kaako twamulomba kuti mubale cibalo citobela akulimvwida nobeni naa wakali muntu uli buti.