MAKANI AAYEEME AMUTWE UULI ACIVWUMBYO | NKAAMBO NZI JESU NCAAKAPENGELA AKUFWA?
Sena Lwakacitika Ncobeni?
Mumwaka wa 33 C.E., Jesu waku Nazareta wakajaigwa. Wakatamikizyigwa kubukila cisi, wakaumwa citaambiki, akugagailwa acisamu cakupenzyezya. Wakafwa lufwu lucisa kapati. Pele Leza wakamubusya, mpoonya nokwakainda mazuba aali 40, Jesu wakaunka kujulu.
Eeci cibalo cilibedelede tucijana mumabbuku one aa Makani Mabotu aazwa mu Magwalo aa Banakristo aa Chigiriki, kanji-kanji aitwa kuti Cizuminano Cipya. Sena zintu eezyi zyakacitika ncobeni? Ooyu mubuzyo uuyandika kapati. Ikuti naa tiizyakacitika, nkokuti lusyomo lwa Banakristo alimwi abulangizi bwakuyooba abuumi butamani mu Paradaiso, zili mbuli ciloto buyo. (1 Bakorinto 15:14) Kulubazu lumwi, ikuti naa zintu eezyi zyakacitika ncobeni, nkokuti kuli bulangizi bubotu kubantu, bwalo oobo mbomukonzya kulangila. Aboobo, sena zibalo izili mu Makani Mabotu nzyamasimpe naa nzyakuyeeyela buyo?
MASIMPE NCAATONDEZYA
Mukwiimpana atwaano twakaindi twakuyeeyela buyo, Makani Mabotu akalembwa munzila iiluzi alimwi iisyomeka. Mucikozyanyo, alijisi mazina aamasena manji aaliko ncobeni, bunji bwangawo alakonzya kuswaigwa mazuba aano. Alatwaambila kujatikizya bantu ibakapona ncobeni alimwi ibakasinizyigwa abasikulemba makani aakaindi.—Luka 3:1, 2, 23.
Jesu ulaambwa abasikulemba makani bamumwaanda wamyaka wakusaanguna awabili.a Mbolupanduludwe lufwu lwakwe kweelana a Makani Mabotu, kuleendelana anzila bana Roma nzyobakali kubelesya kujaya bantu kuciindi eeco. Kuyungizya waawo, zintu izyakacitika zyakalembwa munzila iitondezya kuti zyamasimpe alimwi zilasyomeka, mane buya akuyubununa bulubizi bwabasikwiiya ba Jesu bamwi. (Matayo 26:56; Luka 22:24-26; Johane 18:10, 11) Twaambo ootu toonse tutondezya kuti balembi ba Makani Mabotu bakali kusyomeka alimwi bakaliluzi kumakani ngobakalemba kujatikizya Jesu.
INO MBUTI KUJATIKIZYA BUBUKE BWA JESU?
Nokuba kuti Jesu ulizyibidwe kapati kuti wakapona akufwa, bamwi balabudooneka bubuke bwakwe. Nobaba baapostolo bakwe kumatalikilo tiibakaasyoma makani aakuti wabuka. (Luka 24:11) Nokuba boobo, kudooneka koonse kwakamana ciindi balo alimwi abasikwiiya bambi nobakamubona ziindi ziindene-indene Jesu iwakabusyigwa. Mubwini, aciindi cimwi, bantu bainda ku 500 bakamubona ntongolameso.—1 Bakorinto 15:6.
Kwiinda mukulibikka muntenda yakwaangwa akujaigwa, basikwiiya bakakambauka cabusicamba kujatikizya bubuke bwa Jesu kubantu boonse—nokuba kuli baabo ibakamujaya. (Milimo 4:1-3, 10, 19, 20; 5:27-32) Sena basikwiiya banji boobu nobakaba basicamba ikuti nobatakali masimpe kuti Jesu wakabusyigwa ncobeni? Mubwini, bubuke bwa Jesu mbombubo bwakali kukulwaizya Bunakristo kaindi alimwi amazuba aano.
Makani Mabotu aamba zyalufwu alimwi abubuke bwa Jesu alazizumina zintu zyoonse ziyandika zyamasimpe, izyakalembwa kaindi. Kuzibala cakusitikila kuyakumugwasya kusyoma kuti zintu eezyi zyakacitika ncobeni. Lusyomo lwanu lulakonzya kuyuma ciindi nomumvwisya kaambo ncozyakacitikila. Cibalo citobela cilaabandika makani aaya.
a Tacitus, iwakazyalwa kuma 55 C.E., wakalemba kuti “Kristo, ooko ikwakazwa zina lyakuti [Banakristo], wakapenga kapati mubweendelezi bwa Tiberiyo kuli Ponto Pilato imuleli wesu.” Jesu alimwi ulaambwa a Suetonius (mumwaanda wamyaka wakusaanguna); sikulemba zyakaindi mu Juda uutegwa Josephus (mumwaanda wamyaka wakusaanguna); alimwi a Pliny mweendelezi waku Bithynia (kumatalikilo aamwaanda wamyaka wabili).