Ikugwasya Bantu Kuti Baswenenene Kuli Jehova

“Takukwe uuza kuli-Taata, pele mulindime.”—JOHANE 14:6.

1. Mmalailile nzi ngaakapa basikwiiya bakwe Jesu kabusidwe kale, alimwi ncinzi cacitika akaambo kakuti baatobela Bakamboni ba Jehova?

JESU KRISTO wakalailila basikumutobela kuti “baiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala.” (Matayo 28:19) Mumyaka iili kkumi yainda, Bakamboni ba Jehova bagwasya bantu bainda kutuulunzuma totatwe kuti baboole kuli Leza mpoonya akubabbapatizya kuti batondezye kulyaaba kwabo kulinguwe kuti bacite kuyanda kwakwe. Tulikkomene kaka kuti twabagwasya kuswenenena kuli Leza!—Jakobo 4:8.

2. Nokuba kuti mbanji bantu bapya ibali mukubbapatizigwa, ncinzi icacitika?

² Pele muzisi zimwi basikwiiya banji ibapya mobali kubbapatizigwa kwiina nowayungizigwa pe mweelwe wabasikumwaya ba Bwami. Ee abalo aabo ibakafwa mbanji mbwaanga imweelwe wabantu bafwa amwaka ubalilwa ku 1 pasenti. Nokuba boobo, mumyaka misyoonto yainda ibantu banji kapati bawa kulusyomo akaambo kazintu zimwi. Ino nkaambo nzi? Icibalo eci alimwi acitobela zilabandika mbobakwelelwa kuli Jehova bantu alimwi atwaambo itucitya kuti bamwi bawe kulusyomo.

Imulimo Wabukambausi Bwesu

3. (a) Mbuti mulimo uupedwe basikwiiya ba Jesu mboweendelana awamungelo waambwa ku Ciyubunuzyo 14:6? (b) Ninzila nzi iyabeleka kapati ikubusya luyandisisyo lwabantu mumulumbe wa Bwami, pele ino ndipenzi nzi liliko?

³ Okuno “kumamanino aaciindi,” basikwiiya ba Jesu bajisi mulimo wakumwaya “luzibo [lwini-lwini]” kujatikizya “Makani Mabotu aa-Bwami.” (Daniele 12:4; Matayo 24:14) Imulimo wabo uleendelana awamungelo ‘iwakajisi Makani Mabotu aateeli aakukambaukila baabo ibakala ansi akuli bamasi boonse akumisyobo yoonse akumyaambo yoonse akumikowa yoonse.’ (Ciyubunuzyo 14:6) Munyika ino iijisi bubi muzintu zyaansi, icintu cigwasya kutegwa tucitye bantu kubaa luyandisisyo mu Bwami bwa Leza alimwi akubagwasya kuswenenena kuli Jehova nkubaambila makani aajatikizya buumi butamani munyika yaparadaiso. Nokuba kuti imakani ali boobu, aabo ibayanzana aabantu ba Leza akaambo buyo kakuti bayanda kuyoonjila mu Paradaiso tabali mukweenda cakusinizya munzila yakumuuya munzila iipatide iisololela kubuumi butamani.—Matayo 7:13, 14.

4. Kweelana a Jesu alimwi amungelo wuuluka mumulengalenga, mulimo nzi uucitwaa bukambausi bwesu?

⁴ Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Imungelo uuwuluka mumulengalenga waamba “Makani Mabotu aateeli” alimwi waambila baabo ibakkala anyika kuti: “Amuyoowe Leza akumupa bulemu, nkaambo casika ciindi calubeteko lwakwe. Amukombe oyo iwakalenga ijulu anyika alwizi atusensa twamaanzi.” (Ciyubunuzyo 14:7) Aboobo imulimo mupati wabukambausi bwesu bwamakani mabotu ujatikizya kugwasya bantu kuswenenena kuli Jehova kwiinda muli Kristo Jesu.

Lubazu Ndotujisi Mumulimo wa Jehova

5. Ntwaambo nzi itwakaambwaa Paulo alimwi a Jesu itutondezya kuti tuli mukucita mulimo wa Jehova ikutali wesu?

⁵ Kalembela Banakristo bananikenyina, imwaapostolo Paulo waamba zya “milimo yaluyanzano” alimwi waamba kuti Leza ulabayanzanya bantu kulinguwe kwiinda mucipaizyo cacinunuzyo ca Jesu Kristo. Paulo waamba kuti cili mbuli kuti “Leza ulamukumbila kumaanza esu,” alimwi akuti “tulamukombelezya muzina lya-Kristo kuti, Amuyanzanye a-Leza.” Elo muzeezo oyu ulakkazika moyo kaka! Kunyina makani naa “tuli bangambela ba-Kristo” bananike naa tuli basikwiiminina buyo ibajisi bulangizi bwaanyika, tatweelede kuluba kuti ooyu mmulimo wa Jehova, tauli wesu pe. (2 Ba-Korinto 5:18-20) Ncobeni ngu Leza uubakwela bantu alimwi akuyiisya baabo ibaboola kuli Kristo. Jesu wakati: “Takukwe muntu uukonzya kuza kulindime Taata uwakandituma atamukwela, amebo ndiyoomubusya kubuzuba bwakumamanino. Kulilembedwe mubasinsimi kuti, Boonse bayooiisigwa [Jehova] Leza. Umwi umwi uwakamvwa kuli-Taata, akwiiya kulinguwe, uleza kulindime.”—Johane 6:44, 45.

6. Mbuti Jehova mbwali mukuzungaanya zisi ono alimwi aciindi ncoona mbaani ibajana lukwabililo ‘muŋanda’ yakwe yakukombela?

⁶ Mumazuba ano aakumamanino, mbuti Jehova mbwakwela bantu alimwi akubajulila “mulyango walusyomo”? (Incito 14:27, 2 Timoteo 3:1) Inzila mpati kwiinda njeeyo yakubelesya Bakamboni bakwe ikwaambilizya milumbe yakwe yalufwutuko ayalubeta kujatikizya bweende obu bwazintu ibubyaabi. (Isaya 43:12; 61:1, 2) Ooku kwaambilizya kucitwa nyika yoonse mbwiizulwa kuli mukuzungaanya masi—icitondezyo calunyonyooko iluyoocitika onoono. Abalo bantu ‘bayandisi’ mumeso aa Leza bali mukukwelwa kuzwa mubweende obu alimwi baliiba mu “ŋanda” yabukombi bwakasimpe. Aboobo Jehova uli mukuzuzikizya majwi aakwe aabusinsimi aakalembwaa Hagai aakuti: “Njoozungaanya zisi zyoonse, kuti zintu ziyandisi zyazisi zyoonse ziboole, elyo njoozuzya iŋanda eyi bulemu.”—Hagai 2:6, 7; Ciyubunuzyo 7:9, 15.

7. Mbuti Jehova mbwajula myoyo yabantu alimwi akubakwelela kulinguwe aku Mwanaakwe?

⁷ Jehova ulaijalula myoyo yabantu aaba bayoowa Leza—“izintu ziinda kubota muzisi zyoonse”—ikutegwa “babikkile maanu kuzintu izili mukukananwaa” Bakamboni bakwe. (Hagai 2:7, Jewish Publication Society; Incito 16:14) Mbubwenya mbuli mumwaanda wamyaka wakusaanguna, zimwi ziindi Jehova ubelesya baangelo bakwe ikusololela Bakamboni bakwe kubantu basinizizye ibamukwiilila kuti abagwasye. (Incito 8:26-31) Ibantu mbobayiila kujatikizya zipego zibotu nzyapa Leza kwiinda mu Mwanaakwe Jesu Kristo, bakwelelwa kuli Jehova kwiinda muluyando lwakwe. (1 Johane 4:9, 10) Inzya, Leza ulabakwela bantu kulinguwe aku Mwanaakwe kwiinda mu ‘luzyalo lwakwe,’ naa “luyando lutamani.”—Jeremiya 31:3.

Ino Mbaani Mbakwela Jehova?

8. Ino mbantu bali buti Jehova mbakwela?

⁸ Boonse abo bamuyandaula Jehova ubakwelela kulinguwe aku Mwanaakwe. (Incito 17:27) Aaba bajatikizya bantu aabo “balila akutongela nkaambo kazisesemyo zyoonse zicitwa” muli Kristendomu, atwaambe kuti munyika yoonse mbwiizulwa. (Ezekieli 9:4) Balabikkila maanu ‘kubucete bwabo bwakumuuya.’ (Matayo 5:3) Ee, balikke “babombede [ibalitesya] baansi,” mbabayookkala muparadaiso aanyika kukabe kutamani.—Zefaniya 2:3.

9. Ino Jehova ubona buti kuti bantu ‘basalilidwe buumi butamani,’ alimwi ino bali boobo ubakwela buti?

⁹ Jehova ulakonzya kuzyiba cili mumoyo wamuntu. Mwami Davida wakaambila mwanaakwe Solomoni kuti: “Jehova ulalingula myoyo yoonse, ulazibisya makanze oonse amiyeeyo yoonse. Na ulamuyandaula, ulamujana.” (1 Makani 28:9) Kweelana amboubede moyo wamuntu alimwi aciimo ncajisi, Jehova ulakonzya kubona naa muntu oyo ulangilwa kuti inga wazibikkila maanu zipego nzyapa Leza kujatikizya kulekelelwa kwazibi alimwi abulangizi bwabuumi butamani mubweende bwa Leza bupya bululeme. (2 Petro 3:13) Kwiinda mu Jwi lyakwe ilikambaukwa akuyiisigwaa Bakamboni bakwe, Jehova ubakwelela kulinguwe alimwi aku Mwanaakwe ‘boonse basalilidwe buumi butamani,’ elyo aba ‘balasyoma.’—Incito 13:48.

10. Ncinzi citondezya kuti ikukwela nkwakwela bamwi Jehova akusiya bamwi takujatikizyi kusalila limwi?

¹⁰ Sena ikukwela Jehova nkwakwela bamwi akusiya bamwi kujatikizya ciimo cimwi cakusalila limwi? Peepe! Ikukwela nkwakwela bantu Leza kuyeeme aakuyandisisya kwabo beni. Iciimo cakulisalila ncobajisi ulacilemeka kapati. Noliba sunu Jehova upede bantu boonse bakkede munyika inguzu zyakulisalila mbubwenya mbuli nzyaakapede bana Israyeli imyaka iyiinda ku 3,000 yainda Musa naakati: “Ndamubikila buumi acoolwe, lufu amapenzi. . . . Ndatamba ijulu anyika buzuba obuno, kuti zyoonse zibe bakamboni bangu, kuzibwe kuti buumi alufu, lulongezyo alutuko, zyoonse ndazibika kuti mulisalile. Amusale buumi, kuti mupone, nywebo abana banu. Amuyandisye Jehova Leza wanu, amuswiilile ijwi lyakwe, amumukakatile, nkaambo kucita obo kulamuletela buumi akoongola.”—Deuteronomo 30:15-20.

11. Ino bana Israyeli bakali kuyoobusala buti buumi?

¹¹ Amubone kuti bana Israyeli bakeelede kusala buumi ‘kwiinda mukuyandisya Jehova, kuswiilila ijwi lyakwe alimwi akwiinda mukukakatila kulinguwe.’ Imajwi aayo naakaambwa ibana Israyeli tiibakaningaikona pe Nyika Yakasyomezegwa. Bakacili mu Mimpata ya Moabu kabalibambila kuzubuka Mulonga wa Jordano akunjila mu Kenani. Nokuba kuti cakali kweelela kuti babikkile maanu kapati kujatikizya “nyika imbotu iikwazeme, [i]nyika iikunka malili abuci” yalo njobakali afwaafwi kutambula, ikuzuzikizigwa kwakulombozya kwabo koonse kwakayeeme aakuyandisya Jehova, ikuswiilila kwabo kujwi lyakwe alimwi akukakatila kulinguwe. (Kulonga 3:8) Eci Musa wakacisalazya kabotu naakati: “Na mwaswiilila milumbe ya-Jehova Leza wanu njendamulailila buzuba obuno, na mwayandisya Jehova Leza wanu, na mweenda munzila zyakwe akubamba malailile aakwe amilazyo yakwe ambeta zyakwe, muyoopona akwaanda, nkabela Jehova Leza wanu uyoomulongezya omo munyika njemuyoovuba.”—Deuteronomo 30:16.

12. Ino cikozyanyo cabana Israyeli ceelede kutuyiisya nzi kujatikizya mulimo wesu wakukambauka akuyiisya?

¹² Sena makani aaya aabandikwa atalaawa taayelede kutuyiisya cimwi cintu kujatikizya mulimo wesu wakukambauka akuyiisya kuciindi cino camamanino? Tulayeeya kujatikizya nyika ya Paradaiso alimwi tulaibandika mumulimo wesu. Pele swebo alimwi abaabo mbotugwasya kuba basikwiiya tatukaliboneni kuzuzikizigwa kwacisyomezyo eco ikuti naa tubelekela Leza nkaambo kakuyanda kulikkomanisya buyo tobeni. Mbubwenya mbuli bana Israyeli, swebo abaabo mbotuyiisya tweelede kwiiya ‘kuyandisya Jehova, kuswiilila ijwi lyakwe alimwi akukakatila kulinguwe.’ Ikuti lyoonse notucita mulimo wesu katuciyeeya eci, tunoobelekelaamwi a Leza mukukwela bantu kulinguwe.

Babelesinyina a Leza

13, 14. (a) Kweelana a 1 Ba-Korinto 3:5-9, mbuti mbotunga twaba basimilimonyinaa Leza? (b) Nkuuli ni nkobweelede kuunka bulemu kujatikizya kuvwula kuli koonse kucitika alimwi ino nkaambo nzi?

¹³ Paulo wakatondezya kubelekelaamwi a Leza kwiinda mukupa cikozyanyo cakulima muunda. Wakalemba kuti: “Ino Apolo munyamanzi? Alakwe Paulo munyamanzi? Bali balanda buyo mbaakabelesya Mwami kukumusyomya, umwi aumwi mbuli mulimo ngwaakapegwa. Mebo ndakazikila, Apolo nguwakatililila, pele Leza nguwakamenya. Mbubo, sikuzikila taakwe makani, alakwe sikutililila taakwe makani, pele Leza uumenya nguujisi makani. Oyo uuzikila ayooyo uutililila, boonse baleelene, nekubaboobo balavola umwi aumwi bulumbu bwakwe mwini mbuli mulimo wakwe ngwaakamana. Nkaambo tuli basimilimonyina Leza. Ndinywe muunda wa-Leza uulimwa.”—1 Ba-Korinto 3:5-9.

¹⁴ Mbotuli basimilimonyinaa Leza, tweelede kubyala “makani aa-Bwami” cakusyomeka mumyoyo yabantu alimwi akutililila luyandisisyo lwakatondezyegwa kwiinda munyendo zyakupilukila izilibambilidwe kabotu alimwi aziiyo zya Bbaibbele. Ikuti naa ivwu, nkokuti moyo kauli kabotu, Jehova uyoocita lubazu lwakwe kwiinda mukucitya kuti imbuto yakasimpe ka Bbaibbele ikomene kuba musamu uuzyala micelo. (Matayo 13:19, 23) Uyoomukwela muntu oyo kulinguwe alimwi aku Mwanaakwe. Elyo kumamanino kufwumbwa kuvwula ikuyooba kujatikizya basikwaambilizya Bwami kuyoocitika akaambo kamulimo Jehova ngwacita kumyoyo yabantu, ikucitya imbuto yakasimpe kukomena alimwi akukwela bantu bali boobo kulinguwe alimwi aku Mwanaakwe.

Imulimo Wakuyaka Uuzumanana

15. Ncikozyanyo nzi ncaakabelesya Paulo kutondezya mbotugwasya bamwi kubaa lusyomo?

¹⁵ Nokuba kuti tulakukkomanina kuvwula ikucitika, tulayandisisya kubona kuti bantu bazumanana kuyanda Jehova, kuswiilila ijwi lyakwe alimwi akukakatila kulinguwe. Tulausa kapati notubona bamwi kabayaabuleka muluyandisisyo lwabo mane kusika bawa. Sena kuli ncotunga twacita kutegwa eci tucilesye? Mucikozyanyo cimbi, Paulo watondezya mbotunga twagwasya bamwi kubaa lusyomo. Wakalemba kuti: “Taakwe muntu uukonzya kubamba intalisyo imbi pele njiyonya iibambidwe kale, nguwenya Jesu Kristo. Lino alinjiyo muntu ulakonzya kuyasya ingolida niiba insiliva naaba mabwe mayandisi naaba masamu nibuba bwizu naaba matete, pele milimo yaumwi aumwi iyoobonwa mbwiibede. Buzuba bwalubeta mbobuyooitondezya mbwiibede, nkaambo obo buzuba buyooca amulilo, nkabela mulilo uyoosunka milimo yaumwi aumwi mbwiibede.”—1 Ba-Korinto 3:11-13.

16. (a) Ino zikozyanyo zyobile nzyaakabelesya Paulo ziindene buti mumulimo ngozibeleka? (b) Mbuti mulimo wesu mbounga waba oyo uunyonyooka alimwi uupya amulilo?

¹⁶ Mucikozyanyo ca Paulo camuunda, ikukomena kuyeeme aakubyala kubotu, ikwiida kucitwa lyoonse alimwi alulongezyo lwa Leza. Icikozyanyo camwaapostolo cimbi citondezya mukuli wamubelesi Munakristo kujatikizya mbouba kumbele imulimo wakwe wakuyaka. Sena wayakila aantalisyo njumu aziyasyo ziyumu cini-cini? Paulo ucenjezya kuti: “Umwi aumwi acenjele mbwayaka.” (1 Ba-Korinto 3:10) Twamana kubusya luyandisisyo lwamuntu kwiinda mukumwaambila zyabulangizi bwabuumi butamani mu Paradaiso, sena njiisyo zyesu ziyaama buyo aaluzibo lwantalisyo lwa Magwalo mpoonya akukankaizya zintu muntu oyo nzyayelede kucita kutegwa akajane buumi butamani? Sena kuyiisya kwesu kuyeeme kapati kuli ceeci: ‘Ikuti kamuyanda kupona kukabe kutamani mu Paradaiso, mweelede kwiiya, mweelede kujanika kumiswaangano alimwi mweelede kutola lubazu mumulimo wakukambauka’? Ikuti mbotuyiisya obo, nkokuti tatuli mukuyaka lusyomo lwamuntu oyo antalisyo njumu alimwi eco ncotuyaka ambweni inga tacikonzyi kuzwidilila mumulilo wamasukusyo naa kuzumanana kwaciindi cilamfwu. Ikusola kukwela bantu kuli Jehova kwiinda mukubaambila buyo zyabulangizi bwabuumi mu Paradaiso ibuyookonzeka akaambo kamyaka misyoonto buyo yakabelekwa mukumubelekela cili mbuli kuyakaa ‘masamu, bwizu amatete.’

Ikukomezya Luyando Kuli Leza a Kristo

17, 18. (a) Ncinzi ciyandika kapati ikutegwa lusyomo lwamuntu luzumanane? (b) Mbuti mbotunga twagwasya muntu kuti Kristo akkale mumoyo wakwe?

¹⁷ Ikutegwa lusyomo luzumanane, lweelede kuyaama aacilongwe ncotujisi a Jehova Leza kwiinda muli Jesu Kristo. Mbotuli bantunsi batalondokede, tulakonzya kucijana cilongwe cili boobo caluumuno a Leza kwiinda mu Mwanaakwe nzu. (Ba-Roma 5:10) Amuyeeye kuti Jesu wakati: “Takukwe uuza kuli-Taata, pele mulindime.” Mukugwasya bamwi kukomezya lusyomo lwabo, “taakwe muntu uukonzya kubamba intalisyo imbi pele njiyonya iibambidwe kale, nguwenya Jesu Kristo.” Ino eci cijatikizya nzi?—Johane 14:6; 1 Ba-Korinto 3:11.

¹⁸ Ikuyaka antalisyo ya Kristo caamba kuyiisya munzila iipa kuti sikwiiya Bbaibbele amuyandisisye kapati Jesu kwiinda mukubaa luzibo lwini-lwini lwamulimo ngwajisi kali Mufwutuli, Silutwe wambungano, Mupaizi Mupati siluyando alimwi a Mwami uuli mukulela. (Daniele 7:13, 14; Matayo 20:28; Ba-Kolose 1:18-20; Ba-Hebrayo 4:14-16) Caamba kucitya Jesu kuba muntu mwini-mwini kuli mbabo cakuti mane waba mumyoyo yabo. Imupailo wesu kujatikizya mbabo weelede kuba mbuli kukombelezya kwa Paulo nkwaakacitila Banakristo ku Efeso. Wakalemba kuti: “Ndafugama kuli-Wisi, . . . kuti bulemu bwakwe bugambya bucitye kuti . . . Kristo akale mumyoyo yanu nkaambo kalusyomo, kuti muzyate akubombomana muluyandisyo.”—Ba-Efeso 3:14-17.

19. Ncinzi ceelede kucitika mwamana kuyaka luyando lwa Kristo mumyoyo yabasikwiiya Bbaibbele mbomuyiisya, pele ino ncinzi ceelede kuyiisigwa?

¹⁹ Ikuti naa twayaka munzila eyo cakuti luyando ndobajisi kuli Kristo lwakomena mumyoyo yabasikwiiya mbotuyiisya, eci ciyoocitya kuti luyando ndobajisi kuli Jehova Leza alwalo lukomene. Luyando lwa Jesu, inkumbu alweetelelo mbube bwa Jehova. (Matayo 11:28-30; Marko 6:30-34; Johane 15:13, 14; Ba-Kolose 1:15; Ba-Hebrayo 1:3) Aboobo bantu bamuziba akumuyanda Jesu, bayoomuziba akumuyanda Jehova awalo.a (1 Johane 4:14, 16, 19) Tuyandika kubayiisya basikwiiya Bbaibbele kuti Jehova ngowakacitya kuti zicitike zyoonse Kristo nzyaakacitila bantu akuti ezyo zyeelede kupa kuti tumulumbe akumutembaula akumukomba kuti ngu “Leza walufutuko lwesu.”—Intembauzyo 68:19, 20; Isaya 12:2-5; Johane 3:16; 5:19.

20. (a) Ino bantu inga twabagwasya buti kuti baswenenene kuli Leza aku Mwanaakwe? (b) Ncinzi ciyoobandikwa mucibalo citobela?

²⁰ Mbotuli basimilimonyinaa Leza, atugwasye bantu kuswenenena kulinguwe aku Mwanaakwe, tubagwasye kukomezya luyando lwabo alusyomo mumyoyo yabo. Elyo Jehova uyooba muntu mwini-mwini kulimbabo. (Johane 7:28) Kwiinda muli Kristo bayookonzya kujana cilongwe cibotu a Leza alimwi bayoomuyanda akukakatila kulinguwe. Imulimo wabo ngobacita kwiinda muluyando banoucita ciindi coonse banoosyoma kuti zisyomezyo zya Jehova zibotu ziyoozuzikizigwa aciindi cakwe ncabikkide. (Malilo 3:24-26; Ba-Hebrayo 11:6) Pele notugwasya bamwi kubaa lusyomo, bulangizi alimwi aluyando, aswebo tweelede kuyaka lusyomo lwesu kuti lube mbuli bwaato buyumu ibukonzya kuzwidilila muguwo pati. Eci ciyoobandikwa mucibalo citobela.

Ikwiinduluka

◻ Ino kanjikanji tulutalisya buti luyandisisyo lwabantu mumulumbe wa Bwami, pele ino nintenda nzi iiliko?

◻ Mbantu bali buti Jehova mbakwelela kulinguwe aku Mwanaakwe?

◻ Ikunjila kwabana Israyeli mu Nyika Yakasyomezegwa kwakayeeme anzi, alimwi nciiyo nzi ncotunga twaiya kuli ceeci?

◻ Ndubazu nzi ndotujisi mukugwasya bantu kuswenenena kuli Jehova aku Mwanaakwe?

Bupanduluzi buyungizidwe

[Cifwanikiso icili apeeji 10]

Nokuba kuti tulabaambila bantu kujatikizya bulangizi bwabuumi butamani mu Paradaiso, imulimo wesu mupati ngwakubakwelela kuli Jehova

[Zifwanikiso izili apeeji 13]

Inyendo zyesu zyakupilukila inga zyabaa mpindu kapati naa twalibambila kabotu