Sena Mulimo Wanu Taukapyi Amulilo?
“Umwi aumwi acenjele mbwayaka [aantalisyo].”—1 BA-KORINTO 3:10.
1. Mbulangizi nzi Banakristo basyomeka mbobajisi kujatikizya bantu balangilwa kuba basikwiiya?
IBANABUKWETENE Banakristo balanga mwanaabo wazwaa kuzyalwa. Sikumwaya wa Bwami wabona citondezyo aameso aasikwiiya Bbaibbele wakwe cakuti uliyandide kwiiya. Munakristo mwaalu uuyiisya acibumbili wabona muntu mupya akati kabaswiilizi uujisi bubi kuyandaula magwalo mu Bbaibbele lyakwe. Imyoyo yabaaba babelesi ba Jehova ibasyomeka izwide bulangizi. Balalibuzya kuti, ‘Sena muntu ooyu uyoomuyanda Jehova akumubelekela—kazumenene kusyomeka?’ Aino eezi zintu tazibooli buyo pe. Ziyanda kubeleka canguzu.
2. Ino mwaapostolo Paulo wakabayeezya buti Banakristo ba Hebrayo bupati bwamulimo wakuyiisya, alimwi ino eci inga catupa kuti tulilingule buti?
2 Mwiiyi munkutwe mwaapostolo Paulo lwakwe wakaamba mbuli mbouyandika kapati mulimo wakuyiisya akugwasya bantu kuba basikwiiya ciindi naakalemba kuti: “Kukuyeeya ciindi mpomwakabeda bazumini, sunu mwali kweelede kuba baiyi.” (Ba-Hebrayo 5:12) Ibanakristo mbaakali kwaambila teebakali kuyaambele mbuli bweelede kulanga kulampa kwaciindi ncobakali basyomi. Kunze lyakutayiisya bamwi, bakali kuyandika kuyeezya zintu zyuuba-uba zyakasimpe. Sunu, toonse tweelede kuti ciindi aciindi katulilanga mbotuyiisya tubone naa kuli mpotuyandika kujatisya. Imaumi aabantu ali muntenda. Ncinzi ncotunga twacita?
3. (a) Ino mulimo wakugwasya muntu kuba sikwiiya Munakristo wakaweezyanisyaa nzi mwaapostolo Paulo? (b) Ncoolwe nzi cipati ncotujisi to Banakristo bayaki?
3 Mulimo wakugwasya bantu kuba basikwiiya Paulo wakaukozyanisyaa mulimo wakuyaka ŋanda. Wakatalika amajwi aakuti: “Tuli basimilimonyina Leza. Ndinywe muunda wa-Leza uulimwa, alimwi muli iŋanda ya-Leza iiyakwa.” (1 Ba-Korinto 3:9) Aboobo tutola lubazu mumulimo uujatikizya bantu; tugwasya kubayaka kuti babe basikwiiya ba Kristo. Tulacita obo mukuba basimilimonyina Ayooyo “wakayaka zintu zyoonse.” (Ba-Hebrayo 3:4) Eeci ncoolwe kaka! Atubone mbolunga lwatugwasya kuuziba kabotu mulimo wesu lulayo lwa Paulo ndwaakamunikilwa kuti alembele bana Korinto. Ncotutilangisye kapati ‘nkwiisya kwesu.’—2 Timoteo 4:2.
Ikuyaka Ntalisyo Iluzi
4. (a) Ino Paulo wakajisi lubazu nzi mukuyaka kwa Bunakristo? (b) Nkaambo nzi ncokunga kwaambwa kuti Jesu abaswiilizi bakwe bakalizi mbocili cipati kuyaka ntalisyo zili kabotu?
4 Ikutegwa ŋanda kiili njumu alimwi ikkale, yeelede kailaa ntalisyo iili kabotu. Aboobo Paulo wakalemba kuti: “Kuluzyalo lwa-Leza ndundakapegwa, mbuli muyaki musongo ndakabamba intalisyo yaŋanda.” (1 Ba-Korinto 3:10) Kabelesya citondezyo cikozyenye aceeci, Jesu Kristo wakaluula zyaŋanda yatakamwaigwa aguwo nkaambo muyaki wayo wakasala ntalisyo njumu. (Luka 6:47-49) Jesu wakalizi intalisyo mboziyandika kapati. Wakaliko Jehova naakayaka ntalisyo ya nyika.a (Tusimpi 8:29-31) Abalo baswiilizi ba Jesu bakalizi mboziyandika ntalisyo ziyumu. Zilikke ŋanda zijisi ntalisyo ziyakidwe kabotu nzezinga tazinyonyoonwi amaanzi amizuzumo yanyika yakali kucitika mu Palestine. Ino Paulo wakali kwaamba ntalisyo nzi?
5. Ino ntalisyo yambungano ya Bunakristo nguni, alimwi mbuti eci mbocakasinsimwa?
5 Paulo wakalemba kuti: “Taakwe muntu uukonzya kubamba intalisyo imbi pele njiyonya iibambidwe kale, nguwenya Jesu Kristo.” (1 Ba-Korinto 3:11) Eeci tacili ciindi cakusaanguna Jesu naakakozyanisigwaa ntalisyo. Kuli Izaya 28:16 kwakasinsimwa kuti: “Lino mboobu mbwaamba Mwami [Jehova], ‘Amubone! ndabikka mu Ziyoni bbwe jumu, bbwe lyacooko bbotu kuti libe lyantalisyo njumu.’” [BT] Jehova wakakanza kaindi kuti Mwanaakwe abe ntalisyo yambungano ya Bunakristo.—Intembauzyo 118:22; Ba-Efeso 2:19-22; 1 Petro 2:4-6.
6. Mbuti Paulo mbwaakayaka ntalisyo iili kabotu mu Banakristo bamu Korinto?
6 Ino intalisyo ya Munakristo umwi aumwi ninzi? Paulo wakaamba kuti kunyina imbi ntalisyo ya Munakristo wini-wini kunze lyayeeyo iiyakidwe mu Jwi lya Leza—nkokuti Jesu Kristo. Intalisyo eyi Paulo masimpe wakaiyaka. Mumunzi wa Korinto mwakavwulide busongo bwabantu, taakasola kubelesya busongo bwanyika kutegwa alumbaizigwe abantu. Pele Paulo wakali kukambauka ‘Kristo wakakankaminwa’ ibamasi ncobakali kuti “mbufubafuba buyo.” (1 Ba-Korinto 1:23) Paulo wakali kuyiisya kuti Jesu ngomusemu mumakanze aa Jehova.—2 Ba-Korinto 1:20; Ba-Kolose 2:2, 3.
7. Ncinzi ncotunga twaiya kuli Paulo nalyaamba kuti “muyaki musongo”?
7 Paulo wakaamba kuti wakali kuyiisya “mbuli muyaki musongo.” Aaya taakali majwi aakulisumpula pe. Akali majwi aakulumba buyo cipego cibotu Jehova ncaakamupede—icakweendelezya mulimo. (1 Ba-Korinto 12:28) Masimpe iswebo sunu tatujisi zipego zyamaleele mbuli zyakapedwe Banakristo bamumwaanda wamyaka wakusaanguna. Alimwi tulakonzya katutaliboni kuba bamayi bajisi cipego cakuyiisya. Pele munzila imwi mpati tuli bamayi bajisi cipego eco. Amuyeeye buyo: Jehova ulatupa muuya wakwe uusalala wakutugwasya. (Amweezyanisye Luka 12:11, 12.) Tulamuyanda Jehova alimwi tulizizi njiisyo zyantalisyo zya Jwi lyakwe. Eezi masimpe nzipego zibotu zyakubelesya mukuyiisya bamwi. Atukanze kuzibelesya kuyaka ntalisyo yeelede.
8. Mbuti mbotuyaka ntalisyo ya Kristo mubantu balangilwa kuba basikwiiya?
8 Notuyaka ntalisyo ya Kristo, tatumutondezyi mbuli mwana muvwanda buyo uuli mucilido caŋombe, alimwi tatumweelanyi a Jehova mbuli mbobacita basikusyoma Leza Wabutatu. Peepe, injiisyo zyamusyobo oyo ziyaka ntalisyo ya Banakristo bakubeja. Pele tuyiisya kuti wakali muntu mupati kwiinda bantu boonse bakaponede, akuti wakatuula buumi bwakwe kugwasya ndiswe alimwi akuti Mmwami ngwabikkide acuuno Jehova uulela kujulu. (Ba-Roma 5:8; Ciyubunuzyo 11:15) Alimwi tusola kukulwaizya basikwiiya besu kutobela mukondo wa Jesu akwiiya bube bwakwe. (1 Petro 2:21) Tuyanda kuti bakulwaizigwe kapati abusungu bwa Jesu mumulimo wakukambauka aluzyalo lwakwe kubantu bacete badyaamininwa, aluse lwakwe kuli basizibi ibatyompedwe akaambo kazibi zyabo abusicamba bwakwe mbwatondezya napenzegwa. Inzya, Jesu nintalisyo mbotu cini-cini. Pele ino citobela ncinzi?
Ikubelesya Ziyasyo Ziluzi
9. Nokuba kuti Paulo wakali muyaki wantalisyo, nkulibilika nzi nkwaakali aakwalo kujatikizya baabo bakatambula kasimpe nkaakali kuyiisya?
9 Paulo wakalemba kuti: “Lino alinjiyo muntu ulakonzya kuyasya ingolida niiba insiliva naaba mabwe mayandisi naaba masamu nibuba bwizu naaba matete, pele milimo yaumwi aumwi iyoobonwa mbwiibede. Buzuba bwalubeta mbobuyooitondezya mbwiibede, nkaambo obo buzuba buyooca amulilo, nkabela mulilo uyoosunka milimo yaumwi aumwi mbwiibede.” (1 Ba-Korinto 3:12, 13) Ino Paulo wakali kwaamba nzi? Atubone cakacitika musyule. Mulimo mupati wa Paulo wakali wakuyaka ntalisyo. Munyendo zyakwe zyabumishinali, wakeenda munzi amunzi kakambauka kubanji ibatakamvwide Kristo. (Ba-Roma 15:20) Ibantu mbobakali kuyabumvwida kasimpe nkaakali kuyiisya, imbungano zyakali kuyabubambwa. Paulo wakalijisi luyando kapati kubantu aaba basyomeka. (2 Ba-Korinto 11:28, 29) Pele mulimo oyu wakali kuyanda kuti azumanane. Elyo naakayaka ntalisyo kwamyezi iili 18 mu Korinto, wakazwa waya kukukambaukila muminzi iimbi. Nokuba boobo wakali kuyandisisya kubona mbuli bamwi mbobakali kunootolaambele mulimo ngwaakasiya oko.—Incito 18:8-11; 1 Ba-Korinto 3:6.
10, 11. (a) Mbuti Paulo mbwaakaindanya misyobo yaandeene yaziyasyo? (b) Misyobo nzi yamaanda eeni-eni aakaliko ambweni mu Korinto yansiku? (c) Maanda aamusyobo nzi aalangilwa kutapya mulilo, alimwi nciiyo cacitondezyo nzi ncobaiya kuli ceeci Banakristo bagwasya bantu kuba basikwiiya?
10 Kulibonya kuti bamwi ibakali kuyakila antalisyo Paulo njaakayaka mu Korinto teebakali kuyaka kabotu. Ikutondezya penzi eli, Paulo waamba kwiindana kwamisyobo yobilo yaziyasyo: ngolida, insiliva amabwe mayandisi kulubazu lumwi; zisamu abwizu amatete kulubazu lumbi. Iŋanda ilakonzya kuyakwa aziyasyo zibotu ziyumu, izitapyi amulilo; naa ilakonzya kubindilwa kuyakwa aziyasyo izitakkali izikonzya kupya amulilo. Ooyu munzi mupati uuli boobu wa Korinto weelede wakalijisi maanda manji aamisyobo eyi yobilo. Kwakali matempele aatalikomeneni aakayakidwe aamabwe mapati aadula, aakayalidwe aangolida ansiliva atala.b Aaya maanda mayumu ambweni akabambene aatwaanda twabwizu, tudumba, atuntoolo twabwizu twamumusyika twakayasidwe aazisamu.
11 Ncinzi cakali kunga cacitika kumaanda aya kuti kwaba mulilo? Cakalizizilwe mumazubaa Paulo mbweena mbuli mbocizizilwe sunu. Munzi wa Korinto wakazundwa akuumpwaa muna Roma Musololi Wabasilumamba wazina lya Mummius mumwaka wa 146 B.C.E. Maanda manji aakayasidwe aazisamu, abwizu akanyonyoonwa. Ino mbuti alo maanda mayumu aamabwe, aakayalidwe insiliva angolida atala? Taakanyonyooka pe. Basikwiiya ba Paulo bamu Korinto balakonzya bakali kwiinda mumbali aamaanda aya buzuba abuzuba—maanda aakali mabotu aatakanyonyoonwa antenda ciindi amwi maanda ngaakabambene limwi aatakali mayumu naakanyonyoonwa. Wakakasalazya kaka kaambo Paulo! Notuyiisya atulibone mbuli bayaki. Atubelesye ziyasyo zibotu kapati alimwi ziyumu. Elyo mulimo wesu ulalangilwa kukkalilila. Ino ziyasyo ziyumu ezyo nziyasyo nzi, alimwi nkaambo nzi ncokuyandika kapati kuzibelesya?
Sena Mulimo Wako Taukapyi?
12. Muunzila nzi Banakristo bamwi baku Korinto mobakali bayamba mumulimo wabo wakuyaka?
12 Cakutadooneka, Paulo wakali kuyeeya kuti bamwi Banakristo bamu Korinto teebakali kuyaka kabotu pe. Ino ncinzi cakalubide? Mbweena mbuli mbokutondezedwe mumakani aayengelede, mumbungano mwakali lwaandaano, kulombozya bantu nokuba kuti eci cakali kunookasya lukamantano mumbungano. Bamwi bakali kuti, “ime ndi wa-Paulo,” kakuli bambi bakali kuti, “ime ndi wa-Apolo.” Bamwi bakali kulisumpula akaambo kabusongo bwabo. Icakatobela ncakuti kwakaba muuya wakuyeeya kwabuntu, wakutasima munzila yakumuuya, ‘awabbivwe abulwani.’ (1 Ba-Korinto 1:12; 3:1-4, 18) Ooyu muuya masimpe wakali kutondezegwa mukuyiisya kwakali kuyiisigwa mumbungano amubukambausi. Aboobo mulimo wabo wakugwasya bantu kuba basikwiiya wakali wabuyamba, mbweena mbuli ŋanda iyayasigwaa ziyasyo zitali kabotu. Ilakonzya kupya “mulilo.” Ino mulilo nzi ngwaakali kwaamba Paulo?
13. Ino mulilo wiiminina nzi mucikozyanyo ca Paulo, alimwi ncinzi Banakristo boonse ncobeelede kuziba?
13 Kuli mulilo toonse ngotuswaangana awalo mubuumi—masunko aalusyomo lwesu. (Johane 15:20; Jakobo 1:2, 3) Ibanakristo baku Korinto bakeelede kuziba, mbweena andiswe mbotweelede kuziba kuti boonse mbotuyiisya kasimpe bayoosunkwa. Ikuti katutayiisyi kabotu, izinga zyacitika zilausisya. Paulo wakacenjezya kuti: “Muntu umwi aumwi uuyokokelwa milimo yakwe njayaka alinjiyo uyootambula bulumbu. Pele muntu umwi aumwi uutentelwa milimo yakwe uyoosweekelwa bulumbu bwakwe, nekubaboobo walo mwini uyoofutulwa cakukwempwa kumulilo.”c—1 Ba-Korinto 3:14, 15.
14. (a) Mbuti Banakristo bagwasya bantu kuba basikwiiya mbobanga ‘basweekelwa,’ pele mbuti mbobanga bafwutulwa mbuli kuti bakwempwa kuzwa kumulilo? (b) Mbuti mbotunga twacesya penzi lyakusweekelwa?
14 Aaya majwi alausisya cini-cini! Cilacisa kapati kubona muntu ngowakabelekela kapati kugwasya kuti abe sikwiiya wawa mumusunko naa akaambo kakupenzegwa waisiya nzila yakasimpe. Paulo ulazuminizya aceeci naamba kuti tulasweekelwa. Cintu camusyobo oyu cilacisa kapati cakuti lufwutuko lwesu lwaambwa mbuli kuti “muntu wakwelwa kuzwa mumulilo.” Ino swebo mbuti mbotunga twacesya zintu nzyotusweekelwa? Nkuyaka aziyasyo ziyumu! Ikuti basikwiiya besu katubayiisya cakuti makani ngotubayiisya kaabanjila akubakulwaizya kuyanda ciimo ca Bunakristo cijatikizya busongo, bupampu, kuyoowa Jehova alusyomo lwini-lwini, eci caamba kuti tuyaka aziyasyo ziyumu, izitapyi mulilo. (Intembauzyo 19:9, 10; Tusimpi 3:13-15; 1 Petro 1:6, 7) Aabo babaa ciimo eci balazumanana kucita luyando lwa Leza; banoojisi bulangizi bwini-bwini bwakupona kukabe kutamani. (1 Johane 2:17) Ino mbuti mbotunga twagwasigwa acitondezyo ca Paulo? Amubone zikozyanyo zimwi.
15. Muunzila nzi motunga twabona kwaamba kuti tatuyaki cabuyamba kujatikizya basikwiiya besu ba Bbaibbele?
15 Notuyiisya basikwiiya Bbaibbele, tutanoolumbaizyi bantu kwiinda Jehova Leza. Tatweelede kubayiisya kutulanga mbuli kuti ndendiswe tulaa busongo. Tuyanda kuti basyome kuti kulikke nkobanga bajana busololi nkuuli Jehova a Jwi lyakwe ambunga yakwe. Aboobo ciindi nobabuzya mibuzyo tatweelede kwiingula mbuli mbotuzibona zintu pe. Pele atubayiisye kulijanina bwiinguzi kubelesya Bbaibbele amabbuku aazwa ‘kumuzike musyomesi uucenjede.’ (Matayo 24:45-47) Akaambo kaceeci ncoonya, tatweelede kutyompya basikwiiya besu kuyanzana abamwi. Muciindi cakunyema bamwi bantu nobavwula munsi ambabo, tweelede kukulwaizya basikwiiya besu ba Bbaibbele kuti ‘bajule myoyo yabo’ bazibe bantu banji mumbungano.—2 Bakolinti 6:12, 13, BT.
16. Mbuti baalu mbobanga bayaka aziyasyo zitapyi mulilo?
16 Abalo baalu Banakristo bajisi lubazu luyandika kapati mukuyaka basikwiiya. Beelede kusola kuyasya ziyasyo izitapyi amulilo ciindi nobayiisya kumbele lyambungano. Luzibo lwabo lwakuyiisya lulakonzya kalwiindene kapati alimwi balankonzya kabasiyene-siyene mbuli mbobabede, pele tababelesyi kwiindana oku kulijanina basikubatobela. (Amweezyanisye Incito 20:29, 30.) Tatuzi cini-cini bamwi bamu Korinto ncobakali kwaambila kuti, “ndi wa-Paulo” naa, “ime ndi wa-Apolo.” Pele tulizi cini-cini kuti taakwe naba umwi akati kabaalu aba basyomeka iwakali kukulwaizya mizeezo iileta lwaandaano iili boobu. Paulo tanaakaupaikwa amajwi aya; Wakabakazya kapati. (1 Ba-Korinto 3:5-7) Asunu mbubonya, baalu tabeelede kuluba kuti beembela “butanga bwa-Leza.” (1 Petro 5:2) Tabuli bwamuntu uli woonse. Aboobo baalu balasola kukasya muntu omwe kweendelezya butanga nokuba kweendelezya kabunga kabaalu. Kufwumbwa kuti baalu kabakwelelezegwaa luyando lwakubelekela mbungano, makani ngobayiisya kaanjila mbelele akuzigwasya kubelekela Jehova camoyo omwe, munzila eyi bayasya ziyasyo zitapyi mulilo.
17. Mbuti bazyali Banakristo mbobasola kuyasya ziyasyo zitapyi mulilo?
17 Bazyali Banakristo abalo balakayeeyesya kaambo aka. Balayandisya kapati kuti bana babo bakapone kukabe kutamani! Nkakaambo kaako babeleka canguzu ‘kuyiisya’ njiisyo zya Jwi lya Leza mumyoyo yabana babo. (Deuteronomo 6:6, 7) Bayanda kuti kutobela kasimpe cibe cintu cikkomanisya kubana babo, batacibwezeli munzila buyo yakuzuzikizya milawo naa kubaa luzibo buyo. (1 Timoteo 1:11) Ikutegwa babayake bana babo babe basikwiiya ba Kristo basyomeka, bazyali basiluyando basola kubelesya ziyasyo zitapyi amulilo. Balabeleka antoomwe abana babo cakukkazika moyo ikubagwasya kusonzola tumpenda Jehova ntwatayandi akwiiya ciimo ncayanda.—Ba-Galatiya 5:22, 23.
Nguni Uujisi Mukuli?
18. Ikuti naa sikwiiya wazikaka njiisyo zigwasya, nkaambo nzi basikusola kumuyiisya ncobatakonzyi kupegwa mulandu?
18 Ooyu mubandi ubusya mubuzyo mupati. Ikuti muntu ngotwasola kugwasya wawa mukasimpe, sena eco caamba kuti twaalilwa tobamayi—akuti twakabelesya ziyasyo zitali kabotu? Peepe. Majwi aa Paulo atuyeezya kuti mukuli mupati kutola lubazu mukuyaka basikwiiya. Tweelede kusola canguzu kuyaka kabotu. Pele Jwi lya Leza talitwaambili kuti tuyumune mukuli woonse tuminwe apenzi lyakulipa mulandu ciindi aabo mbotusola kugwasya nobazangila kasimpe. Kunze lyalubazu ndotujisi tobayaki kuli azimbi zintu zijatikizidwe. Mucikozyanyo, amumvwe Paulo ncaamba kujatikizya mwiiyi naba yooyo watayaka kabotu: “Uyoosweekelwa bulumbu bwakwe, nekubaboobo walo mwini uyoofutulwa.” (1 Ba-Korinto 3:15) Ikuti oyu muntu kayakufwutulwa—kakuli calo ciimo ca Bunakristo ncaalikusola kuyaka muli sikwiiya wakwe cakozyanisigwaa “kutentwa” mumusunko uuli mbuli mulilo—ncinzi ncotutaambe? Cakutadooneka, sikwiiya uyooliiminina lwakwe alikke kuli Jehova kunzila nzyasala, naa ulasyomeka naa pe.
19. Ncinzi citikabandikwe mucibalo citobela?
19 Ikuliiminina muzintu nzyotucita ncintu cipati. Cilatujatikizya toonse. Ino ncinzi cini-cini ncoliyiisya Bbaibbele kujatikizya kaambo aka? Cibalo citobela cilabandika makani aya.
Bupanduluzi buyungizidwe
a ‘Intalisyo zyanyika’ zilakonzya kazijatikizya zintu ziijisilidi—kubikkilizya azijisilidi nyenyeezi zyoonse zyamujulu. Kunze lyaboobo, nyika lwayo iyakidwe munzila yakuti taakwe noitikabe “niizungaana,” naa kunyonyoonwa.—Intembauzyo 104:5.
b “Mabwe mayandisi” Paulo ngaakali kwaamba teezyakali ngale zini-zini mbuli madaimondi amabwe aasalala pyu. Alakonzya akali mabwe aakuyasya aadula mbuli mamabbo, alabasta, naa granaiti.
c Paulo taakadooneka kufwutuka kwamuyaki, wakadooneka kufwutuka ‘kwamulimo’ wamuyaki. Mu The New English Bible ikapango aka kasandulwidwe kuti: “Ikuti ŋanda muntu njaakayaka yakkalilila, uyoolumbulwa; pele kuti yapya, uyoosweekelwa; nikuba boobo uyoofwutulwa, pele mbuli muntu wakwelwa kuzwa mumulilo.”
Mulaingula Buti?
◻ Ino “ntalisyo” ninzi mu Munakristo wini-wini, alimwi inga yayakwa buti?
◻ Ncinzi ncotunga twaiya kuzwa kuziyasyo ziindene-indene?
◻ Ino “mulilo” wiiminina nzi, alimwi inga wapa buti kuti bamwi ‘basweekelwe’?
◻ Mbuti basikuyiisya Bbaibbele, ibaalu alimwi abazyali mbobanga bayasya ziyasyo zitapyi mulilo?
[Cifwanikiso icili apeeji 23]
Muminzi minji yansiku, maanda aamabwe aakaindi aatakali kupya mulilo akabambene limwi atudumba