Nkaambo nzi Ncokuli Kulibilika Kujatikizya Ciyubunuzyo?
UMWI sikulemba zyabukombi mumagazini ya Time iwazina lya Damian Thompson wakaamba kuti: “Kwamakumi aamyaka aali mbwaabede, Ibanakristo balaampuwo bali kusinsima kuti kuli lunyonyooko [lumwi] lwaciinga coonse cabantu luli afwaafwi kapati. Ono icabagambya kapati Banakristo aba ncakuti zintu zili boobu tazili buyo mukubikkilwa maanu, pele zili mukumwaisigwa abantu mbamunya ibakali kubasampaula mbuli: ibeendelezya mapulogilamu aamumakkompyuta, basololi bamakwebo alimwi abasitwaambo twacisi.” Cabusungu waambilizya kuti ikulibilika kwakuti imakkompyuta oonse nyika yoonse mbwiizulwa aayooleka kubeleka mumwaka wa 2000 “kwacinca bantu ibatakali kulangilwa kuti inga baba basikusyoma mucuulu camyaka” balo ibayoowa mapenzi aalangilwa mbuli “ikuzyingwa kwabantu, ikutabeleka kwamfwulumende, ikulwanina zyakulya akaambo kakubulilana alimwi antenda zyandeke kwiinda mukulimba maanda malamfwu.”
Kunze lyakulibilika kwabantu boonse, kuli amilimo imwi iicitwaa tubunga tusyoonto twabukombi twalo kanjikanji itwiitwa kuti “ntwabusinsimi bwamapenzi.” Mu January 1999, mucibalo cakuti “Jerusalemu Ambunga Yabamakaintu Baku Ciyubunuzyo,” imagazini yaci Fulenci iitegwa Le Figaro yakati: “Icibeela cilanga-langa bukwabilizi bwacisi mu [Israyeli] ceezeezya kuti kuyooba ‘basikusyoma mucuulu camyaka’ ibainda kumwaanda omwe a Cilundu ca Elaioni naa munsi lyaco ibalindila kuboola kwa Jesu naa ciyubunuzyo.”
Ibbuku litegwa 1998 Britannica Book of the Year lijisi lipooti yaalubazu kujatikizya “Nkamu Zisinsima Buzuba Bwalubeta.” Izimwi nzyolyaamba nzeezyo nkamu zyabasikulijaya, mbuli izitegwa Heaven’s Gate, the People’s Temple, Solar Temple alimwi aya Aum Shinrikyo (Kasimpe Kasumpukide) yalo iyakabelesya busi bukola mumugwagwa wakunsi aanyika ku Tokyo mu 1995, ibwakajaya bantu bali 12 alimwi akukola zyuulu-zyuulu zyabantu. Mukumanizya kuluula oku, Martin E. Marty, professor wabukombi ku Yunivesiti yaku Chicago wakalemba kuti: “Ikunjila mumwaka wa 2000 kuleenzya mubili alimwi kuyookulwaizya misyobo yoonse yabusinsimi alimwi ambunga. Zimwi ambweni ziyooba zyankondo. Cinooli ciindi citeelede kusobanina pe.”
Mbukwakatalika Kuyoowa Ciyubunuzyo
Ciyubunuzyo ndizina lyabbuku lyamamanino mu Bbaibbele ilyakalembwa kumamanino aamwaanda wamyaka wakusaanguna C.E. Akaambo kakuti ibbuku eli ndyabusinsimi alimwi lijisi mwaambo wakwiiminina zintu, ikaambo kakuti “aabusinsimi bwamapenzi” kakatalika kubelesyegwa kujatikizya malembe amwi aakaliko kalitanalembwa bbuku lya Ciyubunuzyo lyamu Bbaibbele. Imakani akulengelezya aambwa mubbuku eli alaya munsi kucisi cansiku ca Persia mane amusyule kacitana cisi eci. Aboobo ibbuku litegwa The Jewish Encyclopedia lyaamba makani “aabukkale bwaku Babuloni kujatikizya zintu zinabunji zyakulengelezya zyibikkilizidwe mumabbuku aaya [aabusinsimi bwamapenzi bwaba Juda].”
Imabbuku aaba Juda aabusinsimi akavwula kuzwa kumatalikilo aamwaanda wamyaka wabili B.C.E. kusikila kumamanino aamwaanda wamyaka wabili C.E. Kapandulula ncaakalembelwa mabbuku aya, sikwiiya Bbaibbele umwi wakalemba kuti: “Iba Juda bakaandaanya ciindi muzibeela zyobile. Kwakali ciindi cino, icibyaabi ncobeni . . . Aboobo iba Juda bakalindila mamanino aabweende bwazintu bwakaliko kuciindi eco. Alimwi kwakali ciindi cicizya calo icakali kunooli cibotu lyoonse, ciindi cabukkale bubotu ica Leza mwalo mwakali kunooli luumuno, buvwubi alimwi abululami . . . Ino ciindi eci ciliko cakali kunoocincwa buti kuti cibe ciindi eco cicizya? Iba Juda bakali kusyoma kuti ikucinca teekwakali kuyooletwaa bantunsi pe, elyo akaambo kaceeci bakali kulangila ciindi Leza naakali kuyoobweza ntaamu. . . . Ibuzuba bwakuboola kwa Leza bwakali kwiitwa kuti Mbuzuba bwa Mwami alimwi cakali kuyooba ciindi camapenzi iciyoosya, icalunyonyooko alubeta calo cakali kuzyooba mapenzi aamatalikilo aaciindi cipya. Imabbuku oonse aabusinsimi alazyaamba zintu ezi.”
Sena Cililuzi Ikuyoowa Ciyubunuzyo?
Ibbuku lyamu Bbaibbele lya Ciyubunuzyo lyaamba makani aa “nkondo yabuzuba bupati bwa-Leza Singuzuzyoonse” naa Harmagedoni omo basizibi mobayoonyonyoonwa, mpoonya kuyootobela ciindi camyaka iili cuulu (zimwi ziindi iciitwa kuti Cuulu Camyaka), elyo Saatani nayooangwa mumulindi uutagoli alimwi Kristo nayoobeteka bantu. (Ciyubunuzyo 16:14, 16; 20:1-4) Ikaindi, ibusinsimi obu tiibakabuteelela kabotu bamwi nkaambo “Musaante” waba Katolika wazina lya Augustine (354-430 C.E.) wakaambide kuti Cuulu Camyaka cakatalikide aciindi Kristo naakazyalwa alimwi cakali kuyootobelwaa Lubeta Lwamamanino. Kulangilwa kuti Augustine tanaakacibikkila maanu kapati ciindi, pele imwaka wa 1000 nowakaswena, ibantu bakateelelesya. Basikwiiya zyakaindi tabazuminani pe kujatikizya mbokwakamwaikide kuyoowa oku kwaciyubunuzyo kuciindi eco. Kufwumbwa naa kwakasikide kule buti, tiikwakaluzi pe.
Mbubwenya buyo asunu, kuli buyoofwu bwabasizikombelo alimwi abwabantu buyo bwakuti imwaka wa 2000 naa 2001 uyooboola aciyubunuzyo ciyoosya kapati. Pele sena ikuyoowa kuli boobu kuliluzi? Alimwi sena imulumbe uuli mubbuku lyamu Bbaibbele lya Ciyubunuzyo weelede kuba cintu ciyoowogwa naa weelede kuba cintu cimwi ncotulangila? Amuzumanane kubala.
[Cifwanikiso icili apeeji 4]
Ikuyoowa kwakaindi kujatikizya Ciyubunuzyo tiikwakaluzi pe
[Kulumba]
Maya/Sipa Press
[Nkotwakajana cifwanikiso icili apeeji 4]
© Cliché Bibliothèque Nationale de France, Paris