Ino Nkaambo nzi Ncocikatazya Kulilekelela?
MU July 2000, Inkamu Yabasikwaanza Milawo mu Cooko ca California mucisi ca United States bakaanza mulawo ngobakali kuyanda kuti utalike kubelesyegwa. Imulawo ooyo wakali wakulekelela bantu ibatondezya kuusa kumuntu walicisa muntenda oomo balo mobajatikizyidwe. Ino nkaambo nzi ncowakaanzwa mulawo ooyu? Kwakabonwa kuti eelyo ntenda noicitika alimwi bamwi nobalicisa, bantu tabalisunguli pe ikulilekelela akaambo kakuyoowa kuti inkuta eeco inga yacibona kuti nkuzumina mulandu. Kulubazu lumbi, aabo ibalimvwa kuti muntu uujatikizyidwe weelede kulilekelela ndilyonya balakonzya kunyema, aboobo intenda nsyoonto buyo ilakonzya kuleta mazwanga mapati.
Mmasimpe taciyandiki pe kulilekelela kuntenda njootapa kuti icitike. Alimwi kuli ziindi eelyo nocili camaanu ikucenjela kujatikizya nzyomwaamba. Ikasimpi kakaindi kamwi kaamba kuti: “Mukuvula kwamajwi tamubuli mulandu, pele oyo uukasya milomo yakwe musongo.” (Tusimpi 10:19; 27:12) Nokuba boobo, mulakonzya kutondezya bulemu alimwi akugwasya.
Pele sena taali masimpe kuti bantu banji bacileka kulilekelela neliba leelyo noitali milandu izekelwa munkuta buya? Aŋanda, imukaintu ulakonzya kwaamba kuti, ‘Mulumaangu kunyina nalilekelela pe kujatikizya cintu cili coonse ncalubizya.’ Kumilimo, kapitawu ulakonzya kutongooka kuti, ‘Basimilimo bangu kunyina nobazumina kuti balubizya, alimwi bunji bwaziindi tabaambi kuti bausa.’ Kucikolo, imwiiyi ulakonzya kwaamba kuti, ‘Bana kunyina nobayiisyigwa kwaamba kuti amundijatile.’
Ikaambo komwe ikapa kuti muntu atalilekeleli kalakonzya kujatikizya kuyoowa kukakwa abamwi. Akaambo kakuyoowa kutabikkilwa maanu, ulakonzya kutatondezya bwini mbwalimvwa. Kayi mubwini muntu ooyo iwakacisigwa ulakonzya kumweeleba iwakamubisizya, calo icinga capa kuti koombolozyanya kukatazye.
Ikutabikkila maanu kujatikizya mbobalimvwa bamwi nkaambo kambi ikapa kuti bamwi kabataangulukide kulilekelela. Balakonzya kuyeeya kuti, ‘Ikulilekelela takukwe kucizimaazya pe cibi ncindacita.’ Alimwi bambi tabaangulukide kwaamba kuti bausa akaambo kazintu nzyobalangila kuti inga zyabacitikila. Balakonzya kutelaika kuti, ‘Sena ndilaambwa kuti ndime ndilaa mulandu akwaambilwa kuti ndiliye?’ Pele icintu cipati cipa kuti muntu ataanguluki kuzumina cibi ncaacita nkulisumpula. Imuntu uulisumpula cakutakonzya kwaamba kuti “ndausa” mubwini inga kaamba kuti, ‘Tandiyandi kuboneka buyanga kwiinda mukuzumina kulubizya kwangu. Eeco inga caubya-ubya bulemu mbondijisi.’
Kufwumbwa naa nkaambo nzi, ibwini mbwakuti ibanji cilabayumina ikulilekelela. Pele sena mubwini cilayandika kulilekelela? Ino nimpindu nzi nzyotujana notulilekelela?
[Cifwanikiso icili apeeji 3]
“Bana kunyina nobayiisyigwa kwaamba kuti amundijatile”
[Cifwanikiso icili apeeji 3]
“Basimilimo bangu kunyina nobazumina kuti balubizya”
[Cifwanikiso icili apeeji 3]
“Mulumaangu kunyina nalilekelela”