666—Tabuli Bulembo Buyo Bwamaseseke Butakonzyi Kupandululwa

“Kutabi muntu naba umwi uukonzya kuula nikuba kuuzya, cita uujisi bulembo, nkukuti izina lyacinyama nuuba mweelwe wazina lyaco. Mbuboobu busongo. Oyo uujisi maanu abale mweelwe wacinyama, nkaambo ngomweelwe wamuntu. Mweelwe wakwe njemyaanda iili musanu aumwi amakumi aali musanu alimwi amusanu aumwi.”—Ciyubunuzyo 13:17, 18.

NTUSYOONTO twaambo twamu Bbaibbele itupa bantu kuba aluyandisisyo akulibilika mbuli businsimi bujatikizya bulembo bugambya naa izina “lyacinyama,” nkokuti mweelwe 666. Mucipekupeku aa Internet, kubikkilizya amumabbasikopo, mabbuku amamagazini, bulembo bwacinyama lyoonse ali makani aali kuyeeyelwa.

Bamwi bayeeya kuti 666 mbulembo bwasinkondonyina Kristo waambidwe mu Bbaibbele. Ibambi baamba kuti ncitondezyo cakusinikizyigwa kumwi, mbuli nsimbo antela caando citondezya muntu kuti mmubelesi wacinyama. Alimwi ibambi basyoma kuti 666 mbulembo bwiiminina bweendelezi bwapaapa mu Katolika. Kwiinda mukubelesya manamba aaci Roma mubusena bwamabala aaci Latin aali amusini wa paapa aakuti Vicarius Filii Dei (Wiiminina Mwana a Leza), alimwi akwaacinca asyoonto manamba, bajana kuti 666 yiiminina bweendelezi bwaba paapa. Alimwi bantu bambi baamba kuti namba njimunya eeyi ilakonzya kujanwa kuzina lyaci Latin lya Mweendelezi waci Roma Diocletian alimwi akubusanduluzi bwaci Hebrayo bwazina lya Nero Caesar.a

Pele, bupanduluzi oobu bwakuyeeyela alimwi bwakulipangila buliindene kapati kuliceeco ncolyaamba Bbaibbele kujatikizya bulembo bwacinyama, kweelana ambotutiibone mucibalo citobela. Ibbaibbele liyubununa kuti aabo bajisi bulembo bwacinyama bayakulibonena bukali bwa Leza aakunyonyoona bweende bwazintu oobu ibuliko. (Ciyubunuzyo 14:9-11; 19:20) Aboobo, ikubumvwisya bupanduluzi bwa 666 kujatikizya zinji kunze buyo lyakupasulula kaambo kamwi kakatazyide. Cikondelezya ncakuti, Jehova Leza, ooyo uuli ncikozyanyo cibotu caluyando alimwi Uupa mumuni wakumuuya, tabasisilide pe makani aaya aayandika kapati babelesi bakwe.—2 Timoteo 3:16; 1 Johane 1:5; 4:8.

Bupanduluzi buyungizidwe