Sena Mulayeeya?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwasoleka kwiingula mibuzyo eeyi iitobela:

• Ino mapenzi nzi mapati Banakristo bamwi ngobajana bamana kukwatana, alimwi ino ncinzi ncobeelede kusolekesya kucita?

Banakristo bamwi inga babona kuti tabeendelani angobakwetene limwi muzyintu nzyobayanda alimwi anzyobacita mubuumi. Kuzyiba kuti kulekana kutazumizyigwi mumagwalo taili nenzila yakumana mapenzi iiluzi, bayandika kuzumanana kubeleka canguzu kukwabilila lukwatano lwabo.—4/15, peeji 17.

• Ino mbuyumu-yumu nzi mbwajana Munakristo uukkala muŋanda mobalanganya bacembeede?

Inga katazyibilene ambungano iili mucilawo mwakayakilwa ŋanda iilanganya bacembeede. Bunji bwabantu bakkala mumaanda mobalanganya bacembeede inga kabasyoma njiisyo ziindene-indene, aboobo inga bayanda kuti Munakristo abasangane mumilimo yabo yabukombi. Basazinyina Ibanakristo alimwi abaabo bali mumbungano iili mucilawo eeco beelede kubuzyiba buyumu-yumu oobu alimwi beelede kumulanganya Munakristo ooyu alimwi akumugwasya.—4/15, mapeeji 25-27.

• Ino ninzila nzi zyone zikonzya kugwasya banabukwetene kumana mapenzi?

Amubikke ciindi cakubandika makani aamukatazyide. (Muk. 3:1, 7) Amwaambe mbomuyeeya camoyo woonse alimwi cabulemu. (Ef. 4:25) Amuswiilile akutondezya kuti mwamvwisya mbwalimvwa ngomukwetene limwi. (Mt. 7:12) Amujane nzila mbomukonzya kulimana penzi akwiitobela nzila eeyo. (Muk. 4:9, 10)—July–Sept., mapeeji 20-22.

• Ino muumakkomiti nzi aabo bali mu Kabunga Keendelezya mobabelekela?

Kkomiti Yabeendelezi; Kkomiti Iilanganya Babelesi; Kkomiti Iilanganya Zimwaigwa; Kkomiti Yamulimo; Kkomiti Iilanganya Ziyiisyigwa; Kkomiti Iilanganya Zilembwa.—5/15, peeji 29.

• Sena kutalilemeka kupandululwa ku Ba-Roma 1:24-32 kwakali kwaamba ba Juda naa Bamasi?

Bupanduluzi bulakonzya kwaamba nkamu iili yoonse akati kazeezi zyobile, pele mwaapostolo Paulo cacigaminina wakali kwaamba bana Israyeli bakakakilwa kutobela Mulawo kwamyaanda yamyaka iili mbwiibede. Bakaliizyi milawo ya Leza iiluleme, pele taakwe nobakaitobela pe.—6/15, peeji 29.

• Ino nkaambo nzi kucita zyintu nzyotukonzya ncokukonzya kutupa kukkomana kapati?

Ikuti katukakatila kuzuzikizya mbaakani nzyotutakonzyi, katuzyi buya kuti zilaminya, ciyootupa kutakkomana. Nokuba boobo, tatweelede kulileka mbuli mulomo wakunsi akutamizya kukompama kwesu kuti nkokutupa kuyaansi mumulimo wa Bunakristo.—7/15, peeji 29.

• Ino ncinzi cikonzya kupa kuti cibayumine bazyali kubandika abana bakubuka?

Zyintu zinji zikonzya kupa kuti cikatazye kubandika kabotu zilakonzya kuba nsoni nzyajisi mukubusi, kuyanda kulyeendelezya, alimwi akuyanda kulicitila zyintu. Cilakonzya kubagwasya bazyali kusoleka kubandika cakulikwaya alimwi akusoleka kuzyiba ncapandulula mukubusi.—Oct–Dec.