Amube Acilongwe a Leza
“Leza Siluumbulizyo Loonse”
ZYINTU zinji mubuumi zilakonzya kutupa kupenga, kutyompwa akulendelelwa. Muziindi zili boobu mulakonzya kulibuzya kuti, ‘Nkuli nkondikonzya kujana lugwasyo?’ Imajwi amwaapostolo Paulo aajanwa ku 2 Ba-Korinto 1:3, 4 atondezya kuti tulakonzya kujana luumbulizyo kuli Jehova Leza.
Mukapango ka 3, Leza waambwa kuti “Taateesu siluzyalo.” Ino majwi aaya aamba nzi? Ibbala lya Cigiliki lisanduludwe kuti “siluzyalo” lipa muzeezo wakutondezya lubomba kumuntu uuli mumapenzi.a Bbuku limwi lyaamba zyamu Bbaibbele lyaamba kuti bbala eeli lilakonzya kulembwa kuti “kweetelela” naa “kubikkila maano.” “Luzyalo” ndwajisi Leza ndolumukulwaizya kubweza ntaamu. Ikuzyiba bube oobu bwa Leza kutupa kuba acilongwe anguwe, sena tabusyi?
Alimwi Paulo wakaamba kuti Jehova ngu “Leza siluumbulizyo loonse.” Naakali kwaamba kaambo aaka Paulo wakabelesya bbala ilyaambwa kuti lipandulula “kuumbulizya muntu uuli mumapenzi naa uulila, kwiinda mukumugwasya naa kumukulwaizya.” The Interpreter’s Bible lipandulula kuti: “Tulamuumbulizya muntu uupengede notumukulwaizya kuliyumya kupenzi ndyajisi.”
Mulakonzya kubuzya kuti, ‘Ino Leza utuumbulizya buti akutupa busicamba kutegwa tuliyumye kupenzi ndyotujisi?’ Ulacita oobo kwiinda mu Jwi lyakwe Ibbaibbele anotupaila kulinguwe. Paulo utwaambila kuti akaambo kakuti Leza ulatuyanda wakatupa Ijwi lyakwe kutegwa “kubukombelezyo bwamalembe tujane bulangizi bwakutomozya moyo.” Kunze lyaboobo, kwiinda mumipailo ipailwa camoyo woonse, tulakonzya kuba “[a]luumuno lwa-Leza lwiinda miyeeyo yoonse.”—Ba-Roma 15:4; Ba-Filipi 4:7.
Ino mumapenzi aali buti Jehova mwabaumbulizya bantu bakwe? Paulo waamba kuti Leza ‘ulatuumbulizya mumapenzi esu oonse.’ (2 Ba-Korinto 1:4) Kufwumbwa naa mapenzi nzi aakonzya kutucitikila, Leza ulakonzya kutupa busicamba anguzu kutegwa tuliyumye. Sena eeco tacikkazyiki moyo?
Luumbulizyo ndwapa Leza talumanini buyo kumuntu ooyo waumbulizyigwa. Paulo wakazumanana kwaamba kuti Leza ulatuumbulizya kutegwa “tukakonzye kuumbulizya boonse bapengede kuluumbulizyo olo ndulonya ndutuumbulizizigwa tubeni kuli-Leza.” Notuumbulizyigwa mumapenzi, citupa kuba alubomba akugwasya baabo bapengede.
Nokuba kuti Jehova ngu “Leza siluumbulizyo loonse,” tacaambi kuti ulaamana mapenzi eesu mpoonaawo. Pele kaambo kamasimpe nkakuti: Ikuti twamulomba kuti atuumbulizye, ulakonzya kutupa nguzu zyakuliyumya mubuumba buli boonse naa mapenzi ngotukonzya kuba angawo. Aboobo, tweelede kumukomba akumutembaula Leza ooyu silubomba.
Bupanduluzi buyungizidwe
a Leza waambwa kuti “Taateesu siluzyalo” akaambo kakuti ulaaluzyalo alimwi mbwabede.