Sena Leza Ulijisi Zyina?
Bantu banji mbobaingula:
◼ “Mwami.”
◼ “Tajisi zyina limugeme.”
Ino ncinzi Jesu ncaakaamba?
◼ “Mbuboobu mbumweelede kukomba: Taateesu ooli kujulu, alilemekwe izina lyako.” (Matayo 6:9) Jesu wakalizyi kuti Leza ulaazyina.
◼ “Ndabazibya zina lyako, alimwi ndiyoolizibya kuti luyando ndookali kundiyanda andulo lukabe mulimbabo, amebo mulimbabo.” (Johane 17:26) Jesu wakalizyibya izyina lya Leza.
◼ “Tamukooyoondibona limbi, mane mukaambe kuti, Uli acoolwe uuboola muzina lya-Jehova.” (Luka 13:35; Intembauzyo 118:26) Jesu wakalibelesya zyina lya Leza.
LEZA mwini ulatwaambila izyina lyakwe. Wakaamba kuti: “ Ndime Jehova. Ndezina lyangu.”a (Isaya 42:8) Izyina lyakuti Jehova ndezyina lizyibidwe mu Chitonga lyakazwa mu Chihebrayo. Mulakonzya kugambwa ikubona kuti izyina eeli lilibedelede lyamu Chihebrayo lilajanika ziindi zinji mumabbuku aa Bbaibbele aansiku. Alimwi ndelijanika ziindi zinji kwiinda zyina lili lyoonse lili mu Bbaibbele.
Ibamwi ikuti babuzyigwa kuti, ino zyina lya Leza nguni, baamba kuti “Mwami.” Ikuti mwabuzyigwa mubuzyo wakuti “ino nguni wakazwidilila nokwakali kuvwoota”? Sena inga mwaingula kuti “Iwakali kuvwootelwa?” Oobu bwiinguzi tabuluzi akaambo kakuti ikwaamba kuti “iwakali kuvwootelwa” naa “mwami” taali mazyina.
Ino nkaambo nzi Leza ncatwaambilida izyina lyakwe? Ulatwaambila kutegwa tumuzyibe kabotu. Mucikozyanyo, muntu inga kabamwiita kuti Simalelo, Taata naa Basyaanene kweelana abukkale. Mabala aaya aamba cintu cimwi kujatikizya muntu ooyo alimwi alakonzya kutuyeezya zyintu nzyacita. Mbubwena buyo, mabala aakuti Mwami, Singuzuzyoonse, Taata a Mulengi atuyeezya zyintu ziindene-indene nzyacita Leza. Pele izyina lyakwe lyakuti Jehova, lituyeezya zyintu zyoonse nzyotuzyi kujatikizya nguwe. Mbuti mbomukonzya kumuzyiba Leza ikuti kamutalizyi izyina lyakwe?
Tweelede kulizyiba izyina lyakwe akulibelesya. Nkaambo nzi? Nkaambo kakuti Ibbaibbele litwaambila kuti: “Umwi aumwi uulilila izina lya [Jehova] ulafutuka.”—Ba-Roma 10:13; Joeli 2:32.
Bupanduluzi buyungizidwe
a Kutegwa muzyibe bupanduluzi buyungizyidwe bwazyina lya Leza alimwi akaambo ma Bbaibbele aambi ncaatajisi zyina eeli, mulakonzya kubona mapeeji 195-197 mubbuku lyakuti, Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.
Majwi aakwelelezya sikubala aali apeeji 6]
Muntu inga kabamwiita kuti Simalelo, Taata naa Basyaanene kweelana abukkale. Pele izyina lyakwe lituyeezya zyintu zyoonse nzyotuzyi kujatikizya nguwe