MAKANI AAYEEME AMUTWE UULI ACIVWUMBYO MULAKONZYA | KUBA MULONGWE WA LEZA
Sena Mulilizyi Alimwi Akulibelesya Zina lya Leza?
Sena kuli mweenzinyoko ngomuyandisya kapati ngomutazyi zina? Kweelede kuti taakwe. Mukaintu waku Bulgaria wazina lya Irina wakaamba kuti: “Tacikonzyeki kuba acilongwe a Leza ikuti naa tamulizyi zina lyakwe.” Cikkomanisya ncakuti, kweelana ambotwabandika mucibalo cainda, Leza uyanda kuti tuswene kulinguwe. Aboobo kwiinda mu Bbaibbele, lwakwe mwini walizyibya kulindinywe kwiinda mukwaamba kuti: “Ndime Jehova. Eeli ndezina lyangu.”—Isaya 42:8.
Kwiinda mu Bbaibbele, lwakwe mwini walizyibya kulindinywe kwiinda mukwaamba kuti: “Ndime Jehova. Eeli ndezina lyangu.”—Isaya 42:8
Sena Jehova kuli mbwalimvwa ikuti mwalizyiba alimwi akulibelesya zina lyakwe naa pe? Atulange-lange makani aaya: Izina lya Leza ililembedwe amabala one aaci Hebrayo aitwa kuti Tetragrammaton, lilajanika mumalembe aakusaanguna aaci Hebrayo ziindi zitandila ku 7,000. Lilajanika ziindi zinji kwiinda mazina aamwi ngotukonzya kuyeeya aambwa mu Bbaibbele. Masimpe eeci ncitondezyo cakuti Jehova uyanda kuti tulizyibe alimwi akulibelesya zina lyakwe.a
Zilongwe zilatalika abantu bobilo kwiinda mukuzyibana mazina. Sena mulilizyi zina lya Leza?
Bamwi balakonzya kulimvwa kuti nkubula bulemu kubelesya zina lyakwe akaambo kakuti Leza ulasalala alimwi ngusinguzuzyoonse. Masimpe inga calubila kubelesya zina lya Leza munzila mbyaabi, mbubonya mbomutakonzyi kubelesya zina lyamweenzinyoko ngomuyandisya kapati munzila iitali kabotu. Aboobo makanze aa Leza ngakuti aabo ibamuyanda kabalilemeka zina lyakwe alimwi akulizyibya kuli bamwi. (Intembauzyo 69:30, 31; 96:2, 8) Amuyeeye kuti Jesu wakaambila basikwiiya bakwe kupaila kuti: “Taateesu ooli kujulu, alisalazyigwe zina lyako.” Tulakonzya kutola lubazu mukusalazya zina lya Leza kwiinda mukulizibya. Kucita boobo kutupa kuswena kulinguwe.—Matayo 6:9.
Bbaibbele litondezya kuti Leza ulababikkila maano aabo “bazinzibala kuyeeya [naa ambweni, “bayandisya”] zina lyakwe.” (Malaki 3:16; majwi aamunsi) Kujatikizya muntu uuli boobo, Jehova usyomezya kuti: “Ndiyoomukwabilila akaambo kakuti ulilizyi zina lyangu. Walo uyoondiita, eelyo ndiyoomuvwiila. Ndinooli anguwe mumapenzi aakwe.” (Intembauzyo 91:14, 15) Ikuti katuyanda kuba acilongwe ciyumu a Jehova, cilayandika kulizyiba alimwi akulibelesya zina lyakwe.
a Cuusisya ncakuti, basanduluzi banji bama Bbaibbele tabalibikkilizyi zina lya Leza mubusanduluzi bwabo, nokuba kuti lilajanika ziindi zinji mumalembe aaci Hebrayo, aayo aazyibidwe abantu banji kuti Cizuminano Cakaindi. Muciindi caboobo, mubusena bwazina lya Leza bakabikka mabala aabulemu mbuli aakuti “Mwami” naa “Leza.” Ikuti kamuyanda kuzyiba zinji kujatikizya makani aaya, amubone mapeeji 195-197 mubbuku lyakuti Ino Ncinzi Cini Bbaibbele Ncoliyiisya? ilyakamwaigwa abakamboni ba Jehova.