Ino Nkuli Nkomweelede Kuba Mamanino Aakusika?
CIINDI Jehova nayoonyonyoona bweende bwazyintu oobu lya Amagedoni, ino ncinzi iciyoocitikila bantu baluleme? Lugwalo lwa Tusimpi 2:21, 22 lwiingula kuti: “Baluleme bayookala munyika; baololokede mbebayoosyaala mulinjiyo; pele basizibi bayoonyonyoonwa munyika, abasilweeno bayoogwisigwa.”
Aboobo ino mbuti bantu baololokede mbobayoosyala munyika? Sena kuyooba busena bwakuyubila? Ino nkuli nkobeelede kuba bantu baluleme mamanino aakusika? Zibalo zyamu Magwalo zyone zilagwasya kuzyiba twaambo ootu.
Ciindi Busena Nobwakali Kuyandika
Kulugwalo lwa 2 Petro 2:5-7, tubala kujatikizya lufwutuko lwa Nowa alimwi a Loti kuti: “[Leza] takailekede nyika yakalekale, pele wakamubamba Nowa, mukambausi wabululami, abamwi bali musanu mubabili, naakapazya maanzi kulibasikasampusampu boonse baansi. Alimwi wakaibeteka minzi ya-Sodoma a-Gomora, wakaitenta amulilo mane kwakasyaala itwe luzutu, kuti cibe ciluuzyo kulibaabo beenda cakasampusampu, pele wakamuvuna [Loti] uululeme, uwakali kukataazigwa akweenda kwabasizibi muzisusi zyabo zibi.”
Ino mbuti Nowa mbwaakafwutuka ciindi cazambangulwe? Leza wakaambila Nowa kuti: “Ndakanza kumanisya bantu boonse, nkaambo nyika ilizwide luuni nkaambo kabo. Ncobeni njoobanyonyoona anyika yoonse. Kolipangila bwaato bwazisamu zyagofa.” (Matl. 6:13, 14) Nowa wakapanga bwato kweelana ambwaakalaililwa kuli Jehova. Mazuba aali ciloba kalitanatalika zambangulwe, Jehova wakamulailila kuti ayobolole banyama akubabikka mubwato antoomwe amukwasyi wakwe. Mubuzuba bwaciloba, citendele cakajalwa, “nkabela mucobocobo wakali kuwa ansi mazuba aali makumi one, isikati amasiku.” (Matl. 7:1-4, 11, 12, 16) Nowa amukwasyi wakwe ‘bakavwunwa kumaanzi.’ (1 Pet. 3:20) Kutegwa bafwutuke, bakeelede kuba mubwato. Kunyina busena buli boonse anyika nkobakali kukonzya kufwutukila.—Matl. 7:19, 20.
Walo Loti wakapegwa malailile aasiyene ayaayo aakapedwe kuli Nowa. Bangelo bobile bakamwaambila kujatikizya nkwaatakeelede kuba. Bakamwaambila kuti: “Boonse mboli abo mumunzi, kobagwisya omuno, nkaambo tulanyonyoona busena obuno.” Bakeelede kutijila “kucilundu.”—Matl. 19:12, 13, 17.
Izyakacitikila Nowa alimwi a Loti zitondezya kuti “Jehova ulizi kuvuna bamukomba kumasukusyo, akuyobola bataluleme mulukomo mane kusikila kubuzuba bwalubeta.” (2 Pet. 2:9) Mubukkale boonse bobile oobu, lufwutuko lwabo lwakayeeme abusena mpobakabede. Nowa wakeelede kunjila mubwato; Loti wakeelede kuzwa mu Sodoma. Pele sena busena ncintu ciyandika lyoonse? Sena Jehova ulakonzya kufwutula bantu baluleme kufwumbwa nkobabede, kakunyina kuunka kubusena bumbi? Ikwiingula mubuzyo ooyu, amubone makani aambi obile aajatikizya lufwutuko.
Sena Busena Bulayandika Lyoonse?
Jehova katanaleta cipenzyo cakkumi mu Egepita kumazuba aa Musa, wakalailila bana Israyeli kunanika bulowa bwamunyama wapobwe lya Kwiindilila aminsende yobile yamaanda aabo. Ino nkaambo nzi? Akaambo kakuti ciindi ‘Jehova naakali kuyooyinda kutegwa ajaye bana Egepita, eelyo aakubona bulowa bwakucikunguzyo abwakuminsende yobile, wakali kuyooyindilila amulyango ooyo akutazumizya sikujaya kuti anjile muŋanda akubajaya.’ Imasiku ngamunya aalya, “Jehova wakauma bana boonse bataanzi bamucisi ca-Egepita, kuzwa kumwana mutaanzi wa-Farao iwakakede acuuno cabwami kusikila kumwana mutaanzi wamwaange wamuntolongo, abalo bana bataanzi boonse baŋombe.” Bana bataanzi kuzyalwa babana Israyeli bakafwutuka kakunyina kuunka kubusena bumbi.—Kul. 12:22, 23, 29.
Alimwi amubone makani aajatikizya Rahabu, mwanakazi simamambe iwakali kukkala ku Jeriko. Bana Israyeli bakali afwaafwi kuzunda Nyika Yakasyomezyegwa. Rahabu naakazyiba kuti munzi wa Jeriko wakali kuyoonyonyoonwa, wakaambila bana Israyeli bobile basikutwela kuti bantu bamumunzi bakaliyoowede kapati akaambo kabana Israyeli bakali munzila. Wakabasisa basikutwela alimwi wakabalomba kuti bamusyomezye kuti walo amukwasyi wakwe tabakanyonyoonwi ciindi munzi wa Jeriko waakunyonyoonwa. Basikutwela bakalailila Rahabu kuti bantu boonse bamukwasyi wakwe bakanjile muŋanda yakwe iyakayakidwe kubwaanda bwamunzi. Kufwumbwa wakali kuyoozwa muŋanda wakali kuyoonyonyweedwa aantoomwe abantu bamumunzi. (Jos. 2:8-13, 15, 18, 19) Nokuba boobo, Jehova wakazooambila Joshua kuti “bulambo bwa munzi buzoowida ansi mbumu.” (Jos. 6:5) Aboobo, ibusena mbobakaamba basikutwela kuti mbobwakali bwalukwabililo bwakaboneka kuti bwakali kubikka bantu muntenda. Ino mbuti Rahabu alimwi abamukwasyi wakwe mbobakali kukonzya kufwutuka?
Nocakasika ciindi cakuti Jeriko anyonyoonwe, bana Israyeli bakoompolola akulizya myeembo. Lugwalo lwa Joshua 6:20 lwaamba kuti: “Bantu nibakamvwa ijwi lyamweembo, bakoompolola aloompololo lupati. Mpawo bulambo bwamunzi bwakawida ansi mbumu.” Kunyina muntu wakali kukonzya kubukwabilila bulambo kuti butanyonyooki. Pele munzila yamaleele, bulambo bwamunzi kunyina nobwakawa aakali ŋanda ya Rahabu. Joshua wakalailila basikutwela bobile kuti: “Kamuya kuŋanda yayooyo simamambe, mukagwisye mumo mwanakazi aboonse mbali abo, mbubonya mbumwakamusyomezezya.” (Jos. 6:22) Boonse ibakali muŋanda ya Rahabu bakafwutuka.
Ino Ncinzi Cakali Kuyandika Kapati
Ino ncinzi ncotwiiya kumakani aakufwutulwa kwa Nowa, Loti, bana Israyeli bakuciindi ca Musa alimwi a Rahabu? Ino mbuti makani aaya mbwaatugwasya kuzyiba nkotweelede kuba ciindi mamanino aabweende bwazyintu bubyaabi oobu aakusika?
Masimpe, Nowa wakafwutukila mubwato. Pele ino nkaambo nzi ncaakali mumo? Sena takali kaambo kakuti wakajisi lusyomo alimwi wakali kumvwida? Bbaibbele lyaamba kuti: “Nowa wakacita obo. Wakacita mbubonya mbuli Leza mbwaakamulailila.” (Matl. 6:22; Heb. 11:7) Ino mbuti kujatikizya ndiswe? Sena tulacita mbubonya mbwatulailila Leza? Alimwi Nowa wakali “mukambausi wabululami.” (2 Pet. 2:5) Mbuli mbwaakacita Nowa, sena andiswe tulatola lubazu cabusungu mumulimo wakukambauka, nociba ciindi bantu nobatayandi kuswiilila?
Loti wakafwutuka kwiinda mukutija kuzwa mu Sodoma. Wakafwutuka akaambo kakuti wakaliluleme mumeso aa Leza alimwi wakakatazyigwa kapati akaambo kakutalilemeka kwabantu bamu Sodoma a Gomora. Sena kutalilemeka kwabantu ikuvwulide kapati mazuba aano kulatukatazya andiswe? Naa, sena twazyibila kapati kubona zyintu zili boobu cakunga tatucikatazyigwi? Sena tulasoleka kapati kuti tukajanike ‘muluumuno katutakwe kabala akampenda’?—2 Pet. 3:14.
Kujatikizya bana Israyeli ibakali ku Egepita alimwi a Rahabu ku Jeriko, lufwutuko lwakayeeme aakukkala mumaanda aabo. Kucita boobu kwakali kuyandika lusyomo alimwi akumvwida. (Heb. 11:28, 30, 31) Amuciyeeyele buyo mikwasyi yabana Israyeli mboyeelede kuti yakali kulangisya bana babo bataanzi kuzyalwa ciindi “[no]kwakaba kulila kupati” muŋanda aimwi yabana Egepita. (Kul. 12:30) Amweezyeezye Rahabu mbwayelede kuti wakalimvwa kali amukwasyi wakwe ciindi naakali kumvwa muzunzumo wabwaanda bwa Jeriko ibwakali koolomoka kuwa nowakali kuyaabuswena kuŋanda yakwe. Wakali kuyandika kuba alusyomo lwini-lwini alimwi akumvwida kutegwa atazwi muŋanda.
Nyika ya Saatani ilaafwaafwi kunyonyoonwa. Tatunazyiba Jehova mbwayookwabilila bantu ‘mubuzuba bwabukali bwakwe.’ (Zef. 2:3) Nokuba boobo, kunyina makani abusena nkotuyooba alimwi amubukkale mbotuyoojanika aciindi eeco, tulakonzya kuba masimpe kuti lufwutuko lwesu luyooyaama alusyomo ndotujisi muli Jehova alimwi akumumvwida. Pele aciindi cino, tweelede kububona munzila yeelede busena mbwaakaamba Isaya kuti “maanda [eesu] aamukati.”
“Munjile Mumaanda Aanu Aamukati”
Lugwalo lwa Isaya 26:20 lwaamba kuti: “Amuboole nubantu bangu, munjile mumaanda aanu aamukati, mulijalile milyango yako, muyube kaindi kaniini, mane bukali bukamane.” Businsimi oobu bweelede kuti bwakazuzikizyigwa ciindi cakusaanguna mu 539 B.C.E. ciindi ba Medi aba Persia nobakazunda Babuloni. Kuboneka kuti naakanjila mu Babuloni, Koresi muna Persia wakaambila bantu boonse kuti batazwi mumaanda aabo nkaambo basikalumamba bakwe bakalaililwa kujaya muntu uuli woonse iwakajanika anze.
Mumazuba eesu, ‘maanda aamukati’ aambwa mubusinsimi oobu alakonzya kwiiminina mbungano zya Bakamboni ba Jehova iziinda ku 100,000 munyika yoonse. Mbungano eezyi zilayandika kapati mubuponi bwesu. Ziyoozumanana kuba boobu akuciindi ‘camapenzi mapati.’ (Ciy. 7:14) Bantu ba Leza balaililwa kunjila “mumaanda [aabo] aamukati” akuyuba “mane bukali bukamane.” Cilayandika kapati kwiibona munzila yeelede mbungano akukanza kuzumanana kuyanzana anjiyo. Atutobele lulayo lwa Paulo lwakuti: “Katunga katuyeeyana, kutubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.”—Heb. 10:24, 25.
[Zifwanikiso izili apeeji 7]
Ino ncinzi ncotukonzya kwiiya kujatikizya nzila njaakabelesya Leza mukufwutula bantu lyansiku?
[Cifwanikiso icili apeeji 8]
Ino ‘maanda aamukati’ alakonzya kwiiminina nzi mumazuba eesu?